Чӳхенеҫҫӗ ҫилпе ылтӑн пуҫ пучахсем,
Пӗр-пӗрне чуп тӑваҫҫӗ ҫил майӑн вӗсем.
Сар хӗвел ачашлать кашнинех юратса,
Ир те каҫ ӳстерет ҫутипе ӑшӑтса.
Мӗн терийӗ илем! Пуҫ каять ҫаврӑнса:
Сар хумсем вылянаҫҫӗ умра сарӑлса.
Ҫук пекех туйӑнать ун ни вӗҫӗ, хӗрри,
Тӳпепе пӗрлешет тейӗнех сар тӗрри.
Пучахсем те лекеҫҫӗ кӗҫ-вӗҫ пӗлӗте,
Кармашаҫҫӗ вӗсем инҫете-инҫете.
Аллӑмпа та хӑяймӑп сире перӗнме,
Вӑтанатӑп ҫак хаклӑ мулран эп теме.
Техӗм ҫӑкӑр шӑрши сӑмсана кӑтӑклать,
Уй-хиртех пиҫсе тухнӑ пекех туйӑнать.
Илӗртет тырӑ-пулӑ пусси шуҫӑмпа,
Каҫхине сар хӗвел анас чух - анӑҫпа.
Тинкереҫҫӗ кулса кӑн-кӑвак чечексем,
Сар ыраш хӗрринчи чи асамлӑ куҫсем.
Сарӑ тӗс ҫумӗнче палӑратӑр питех,
Килӗшӳллӗ эсир юнашар, чӑннипех.
Тӑрисем те памаҫҫӗ туйма тунсӑха,
Кӑмӑллаҫҫӗ вӗсем уй-хирти хӑтлӑха.
Тӑр-тӑри, тӑтӑр-и, ҫывӑрса юлмӑр-и?
Сар ыраш ҫумӗпе киленсе утмӑр-и?
24. 07. 2024. Мая Салампи
Присоединяйтесь к ОК, чтобы посмотреть больше фото, видео и найти новых друзей.
Комментарии 48