Фельдшер булып эшләгән Гөлназ Мансурова гаилә хәле буенча авылыбыздан киткәннән соң, Ирина Финат кызы сәламәтлек саклау өлкәсендә эстафетаны кабул итте. Унҗиде ел эчендә ул тәҗрибә туплады, абруй яулады. Авыл җирендә медицина хезмәткәре – иң кирәкле, иң хөрмәтле һөнәр иясе. Берәрсе авырып китсә, иң элек ярдәм сорап аңа йөгерәләр. Төн уртасымы, буранмы, яшенле койма яңгырмы – фельдшерга берни дә киртә түгел, санитар сумкасын тотып шул минутта ук, машинасын кабызып, авыру янына җилдерә Ирина Загидуллина. Иң тәүге ярдәмне кешегә авыл врачы күрсәтә. Фельдшерга мөрәҗәгать итәргә туры килгән hәр кешедән аның турында бары тик мактау сүзләре генә әйтә.
Ирина Финаи кызы фельдшер hөнәрен Туймазы медицина училищесында үзләштерә. Уку чорында булачак фельдшерларны авырулар белән уртак тел табу, аларның психологиясен аңлап,тәннәренә сихәт, җаннарына да шифа бирергә өйрәтәләр. Шуңа күрә Иринаны авыл табибы гына түгел, чын психолог та дияргә була.
Бүгенге көндә Уран авылы фельдшеры дәваланырга килүчеләрне эш урынында якты йөз белән каршы ала, төрле процедуралар үткәрә: укол эшли, кан басымын үлчи, бәйләүгечләрне алмаштыра, төрле документлар тутыра, кваликациясен күтәрергә Уфа шәһәренә укырга йөри. Өлкән буын кешеләре hәм нәниләр белән дә уртак тел тиз таба. Эшенә зур җаваплылык белән карый. Нинди генә сорау белән мөрәҗәгать итсәләр дә сабыр гына тыңлап, киңәшләр бирә. Авылда фельдшер булып эшләү икеләтә җаваплылык сорый. Сер түгел, Иринага педиатр да, күз табибы да, хәтта хирург да булырга туры килә. Авылдашлар арасында абруй казану, ышаныч яклау өчен белемле булу белән беррәттән, ачык йөзле, ягымлы булу да мөhим. Кешене дару гына дәваламый, җылы сүз, якты чырай, яхшы мөнәсәбәт шифалырактыр да әле. Ирина авылча эчкерсезлеге, кешеләрне яратуы белән әнә шундый зур хөрмәт казанды.
Аның күңел тынычлыгы гаилә тынычлыгы да. Чөнки әлеге эштә күпчелек вакыт тормыш иптәшең дә ярдәмгә килә. Илдары балаларны алып калып, тыныч күңел белән йөреп кайт дип фатихасын бирә. Һәрчак бер-берләренә терәк-таяныч булып яшиләр.
‒ Аллага шөкер, гаиләм бервакытта да сүз әйтми, киресенчә, өйдәгеләр миңа ярдәм итәргә тырыша. Аларга бик рәхмәтлемен!‒ ди ул, сөенеп.
Загидуллиннар зур, иркен, күркәм йорт төзеп керделәр. Илдарның шәхси белорусы бар. Йомыш белән кергән кешенең йомышын үтәми калган чагы юк. Ишле итеп мал тоталар, җәйләрен яланда аларны электро көтүче көтә.
Халык телендә „Атадан күргән ук юнган, анадан күргән тун теккән”, дигән әйтем яши. Загидулиннарның өч баласы — өч таянычы hәм горурлыгы. Зур уллары Айгиз тугызынчы классны тәмамларга җыена. Әтисеннән күреп, кадак- чүкеч белән оста эш итә, малларны карарга булыша. Кызлары беренче сыйныфта укып йөри. Авылдашларыбыз Илизаны берничә еллар инде бәйрәмнәрдә сәхнәдән озын-озын шигырьләр сәйләүче буларак белә. Костюмнарны аңа нәнәсе РабигаСәитова тегә, ә шигырьләрне икенче нәнәсе Лена Загидуллина ятлата. Ул әнисенә тәрәзә төбен тутырып үскән гөлләрне карашырга да булыша.Бәләкәчләре Эмиль балалар бакчасына йөри. Оста биюе белән әти-әнисен шатландыра.
Авыл фельдшеры хезмәтенең никадәр тынгысыз икәнен авыл табибларының үзе белән аралашкан кеше генә аңлый.Соңгы көннәрдә, повязка алмаштырып бәйләргә кирәккәнлектән, еш кына Ирина Финатовнага мөрәҗәгать итәргә туры килде. Янында утырган чагымда аңа ничәмә-ничә төрле сорау белән шалтыраттылар. Ә ул, үзенең һөнәренең этикасы кушканча сабыр гына һәркайсын тыңлап, сорауларына җавап кайтара.
Медпункт узгангасырның 90нчы еллар башыннан файдалануга тапшырылган. Ул чиста һәм җыйнак булса да (аны Гүзәл Аюпова тәртиптә тота) капиталь ремонт сорый. Район хакимияте башлыгы Азат Арсланов бу ремонтны вәгъдә итә.
Сания Шәрипова, Уран авылы.
22.05.19
Присоединяйтесь к ОК, чтобы посмотреть больше фото, видео и найти новых друзей.
Комментарии 12
Яна унышлар сина