(Правильная молитва о Святой Руси)
Го́споди Бо́же, Со́лнце пра́вды, Исто́чниче Любве́, при́зри на смире́нныя рабы́ Твоя́ , услы́ши нас в ско́рби на́шей и помилуй нас: се́ бо архиере́и и кня́зи вку́пе ополчи́шася на за́поведи Твоя́ и вме́сто Ца́рствия Небе́снаго от помраче́ния ума́ своего́ ба́сни сатани́нския пропове́дуют, ча́юще отврати́ти нас от путе́й Твои́х и па́ки возврати́ти на пу́ть погибели и кро́ве, и́мже в мимоше́дшая ле́та го́рестно идя́ше страна́ на́ша, отве́ргши Христа́ и пра́вду Его.
Возста́ни, Бо́же, в по́мощь и́скренним лю́дем Твои́м и пода́ждь нам си́лу и ра́зум возврати́тися на путь пра́вды и пра́ведности и не соблазня́тися земны́ми мудрова́ньми, с амво́на церко́внаго де́рзостно возглаша́емыми.
Ве́рных же чад Твои́х, о еди́нстве Це́ркве ревну́ющих и ми́ра ча́ющих, в терпе́нии и братолю́бии укрепи́ и соедини́ их вку́пе о и́мени Твое́м, а́ще и рассе́яни ны́не суть по лицу́ всея́ земли́ .
Си́лою благода́ти Твоея́ вла́сть предержа́щую в беззако́нии обличи́ и вразуми́ ; а́ще же принесу́т плоды де́ятельнаго покая́ния, ко вся́кому бла́гу наста́ви и му́дростию обогати́!
Во́ины и вся мня́щия бы́ти защи́тницы Оте́чества земна́го на по́ле бра́ни непра́ведныя ско́ро уста́ви и в за́поведех Твои́х утверди́, наипа́че же да́ждь им позна́ти за́поведь Твою́ о любви́ ко враго́м и в стра́се Бо́жии храни́ти ю́ научи́ их на вся́к день.
Все́м же во дни́ сия́ же́ртвами соде́лавшимся безу́мия иродоподо́бных прави́телей , а́ще жи́вы су́ть и плене́ни, ско́ро свободи́; аще лише́ни суть кро́ва, в до́мы введи́; а́ще а́лчут, напита́й; а́ще неду́гуют и стра́ждут, укрепи́ и исцели́; а́ще в смяте́нии и печа́ли пребыва́ют, наде́жду благу́ю и утеше́ние пода́ждь!
Аще хо́щещи, присовокупи́ и сие́:
Все́х нас от басма́нного кривосу́дия изба́ви, и нечестивы́я ба́сни о «Свято́й Руси́», о «свяще́нной бра́ни» и лука́вая словеса́ о «традицио́нных це́нностех» посрами́ и в коне́ц упраздни́ . И о́гнь гее́нский , и́же от звезд пятиконе́чных по все́м градо́м и ве́сем изверга́емыя, угаси́ .
Убие́нным и от ра́н и боле́зней сконча́вшимся проще́ние грехо́в да́руй и блаже́нное упокое́ние сотвори́!
Исполни́ на́с я́же в Тя́ ве́ры и́стинныя, наде́жды нелицеме́рныя и лю́бве всепобежда́ющия, возста́ви Ду́хом Твои́м Святы́м па́ки по всей земли́ единомы́слие и ми́р, друг ко дру́гу любо́вь обнови́ в лю́дех Твоих, я́ко да еди́неми усты́ и еди́нем се́рдцем сла́вим Тя, страда́вшаго и тридне́вно воскре́сшаго Бо́га на́шего.
Ты́ бо еси́ заступле́ние, и ра́дость, и спасе́ние всем упова́ющим на Тя́ и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.
Присоединяйтесь к ОК, чтобы посмотреть больше фото, видео и найти новых друзей.
Нет комментариев