Башта сайлау хакында иде ул...
Ә хәзер исемен үзгәртергә микән әллә?..
Бәлки, безгә башка үзгәрешләр кирәктер?..
(Л. С.)
Лилия СӘГЫЙДУЛЛИНА
САЙЛАУ
Яшә, Цезарь!
Үлемгә баручылар
сәламли сине.
1
Бәйгеләрнең хак бәясе
Аргамактан беленгән.
Ә тәкәләр сөзешүе –
Клоунада иленнән.
2
«Ил башында ишәк икән –
Фәйләсүфләр күбәя».
Монтень* хактыр... Тик ул вакыт
Ишәкләр дә ишәя.
3
Ахмаклыктыр, ишәкләрдән
Нәрсәдер өмет итү.
Шәп ишәкнең вазифасы:
Өнсез буйсынып, көтү;
Тукмак эләкмәсен диеп,
Хуҗага хезмәт итү...
«Кыш ялкытты. Тун, башлыктан
Коткарырмы яз җитү?» —
Дип яздым да – мөһер суктым:
Минем уйда да – көтү...
Ни аяныч, дөньябызда
Ишәклек – көтү-көтү...
4
Сайлау диеп аталса да,
Асылы – тик баш ору...
Бердәмнәрнең берлегенә:
«Мең яшә!» – диеп йөрү.
Битарафлык битлегенә,
Чарасыздан, төренү.
Шуңа, ахры, безнең: «Алга!» –
Артка таба йөгерү...
Сайлауда сайлау калмагач,
Үз сүзеңне әйталмагач,
Хокукыңны хакламагач,
Кешедә Адәм югалгач,
Үз телеңне санламагач,
Үз халкыңны якламагач
Саегудан сакланмагач,
Туган җир Ватан булмагач,
Яшәү түгел бу – үлү,
Үзеңнән үзең көлү,
Мыскал** хәленә керү...
5
«Әйе» дә, «юк» та димибез,
Ак-карага тимибез.
Урталык сайлау әмәлен
Зирәклеккә тиңлибез.
Афәттә сугыш күрмибез —
Эвфемизм көйлибез...
Күңелләрдә күзелдерек*** —
Күнеккәнбез... Көймибез...
«Без бит берни югалтмыйбыз! —
Ил-дөньялар аклыйбыз!» —
Ә без шушы чи ялганны
Кан чәчерәтеп яклыйбыз.
Яшибез... Һәм яшәмибез...
Киләчәкне күмәбез...
Без — Буридан ишәкләре:
Сайлый алмый үләбез...
6
«Сайлау», – димәгез!
Дисәгез,
Ут төртәсез ачуга.
Саеккан сайлауга алмаш –
Электораль вакыйга.
Хәер, сайлау мөмкинлеге
Юк түгелдер бүген дә...
Тик чынлык бит – кот очмалы!
Күңел кайнап түгелә.
Сулны сайласаң – ил-атсыз...
Уңны икән – башсызмы?..
Туры юлга тугры калсаң, –
Хокуксыз һәм сансызмы?..
Юл чатында басып торам –
Ният корам йөз төрле...
Юлсыз калмам...
Тик җан сөйми
Көчләүне һәм этүне.
2003 - 2024
*Монтень – француз философы (XVI гасыр)
**Мыскал — золотник (мера веса, 4,26 грамм)
***Күзелдерек — шоры (рус.)
P. S.
Ave, Caesar, morituri te salutant (с лат. — «Славься, Цезарь, идущие на смерть приветствуют тебя») — латинское крылатое выражение, которым, согласно произведению римского историка Гая Светония Транквилла («Жизнь двенадцати цезарей», «Божественный Клавдий», 21), при императоре Клавдии приветствовали императора гладиаторы, отправляющиеся на арену.
Присоединяйтесь к ОК, чтобы посмотреть больше фото, видео и найти новых друзей.
Нет комментариев