20 - БӨЛҮМ.
-- Мына курбуларым өз башымдан өткөргөн өмүр баяным ушундай. Кимге кандай билбедим бирок өтмүшүмдү баян этүү, ошол бактысыз жана бактылуу күндөрүмө кайрадан барып келгендей эле болдум. Кыскасы жыргап жүргөн эч ким жок! Жаңылышуу, өкүнүч, өксүк, арзуу, махабат, кызганыч коштолуп, кыянат, ызалык менен аяктаган армандуу өмүрдө жаштык менен кошо, жалындаган махабаттын жалбырттаган жалыны жалп этип өчүп, өмүрлүк жарга болгон ишенич, талкаланып, көңүл чөгүп, көкүрөктү муң, басып, шаттанган бакыттын күлкүсү сээлдеп, жагымсыз жалгыздык жаныңды кыйнаса да, айла канча? Ар бир адам баласы маңдайына жазылгандан качып кутула албайт экен. Мына Клара ушул күнгө чейин эркек затын сүйбөдүм - дейт. Айкүмүш сени билбеймин. Мен сүйүп, күйүп, ал үчүн кандай азаптарды башымдан кечирбедим. Ээх ойлоп турсам күйүп, күйүп күлгө айланып кетемин!
-- Болду эми, капалана бербечи досум. Өзүң айткандай маңдайга жазылганын көрөбүз! Кудайга шүгүр үч кызың бар экен. Кандай гана бактылуусуң! - деп Клара Асеманын жанына олтурду.
-- Ошону айтпайсыңбы? Койчу бир тамчы көз жашыбызга арзыбаган, сүйүүбүздүн баркына жете албаган, кыянатчыларды ойлоп жаныбызды кейиткенче, балдарыбыздын келечегин ойлоп, бактылуу болуп жашоолоруна өбөлгө түзөлү! Менде бир кыз, сенде үч кыз, ал эми Кларанын уулу бар экен. Асема кыздарыңдын бирин Кларанын уулуна берип кудагый болгула --деп күлдү.
-- Ооба ошентсек болот экен -- деп Клара да тамашалай күлүп койду.
-- Макул кыздар, Сахаровага качан барып келебиз? - деди Асема сөздүн нугун башка тарапка буруп.
-- Бригадирибиз Айжанга айталы анда эртең крой да аз болсо керек!
-- Анда Айжанга азыр эле звонок кылалы. Надежда Павловнадан жооп сурап берсин!
Бригадирлери Айжанга телефон чалып, болгон жагдайды түшүндүрүп айтып, жооп сурап берүүсүн өтүнүштү.
- Макул эжекелер айтып көрөйүн. Үчөөңүздөргө бирдей жооп бербесе керек! Күтүп туруңуздар азыр чалам - деди Айжан.
Бир аздан кийин, Айжан кайра чалды.
-- Эжекелер араң көндүрдүм.
-- Ээ жакшы болгон экен. Жүрөк өйүгөн ушул маселе бизди алагды кылып жатпайбы?
-- Бирден барса болбойбу - дейт. Мен азыр крой аз болуп жатканда барып келе беришсин - десем, макул деди.
-- Ишке жарапсың алтыным, эжелериң сага гүл карыз.
-- Макул анда жакшы барып, жакшы өтүп келиңиздер!
Ак жол! - деп Айжан телефонун өчүрдү.
Ошол замат интернеттен такси караштырып, сүрүштүрүп жатышып акыры бир таксинин айдоочусу менен келишип коюшту.
-Азыр менде бир адам бар. Сиздер үчөө болсоңуздар жакшы экен. Таң эртең саат бешке даяр болуп турсаңыздар барып алып. кетемин . Адрести таштап коюңуз -- деди кошумчалай.
-- Мына кыздар баары чечилди. Эрте жатып, дем алалы да таң эртең жолго чыгалы -- дешти.
Аңгыча эле Айкүмүштүн телефону чырылдап калды. Албайын десе, Ашым экен.
--Оо Ашым кандайсыңар?
-- Айкүн эже сүйүнчү!
-- Эмне болду? Мехриниса төрөдүбү?
Ооба жеңем уул төрөдү.
-- Аай иий жакшы болгон турбайбы?-- деп Айкүмүштүн кубанычтан чырайы ачылып, көздөрү жайнап кетти.
-- Мен таң эртең Сахаровага кетип жаттым эле.
-- Ооба алагды болбой барып келе бериңиз! Толгоосу түндө башталганда эле төрөтканага жеткиргенбиз! Сизге айталы десем, Касым байкем төрөгөндөн кийин гана айтабыз ага чейин унчукпа -- деди.
-- Касым жаныңдабы?
-- Жок жанымда эмес, төрөтканага кеткен.
-- Макул анда, рахмат сага! Сүйүнчүңдү картага салып коёмун!
- Салбай эле койбойсузбу убара болуп...
-- Сүйүнчүнү сөзсүз бериш керек! - деп дароо Ашымдын картасына акча салып койду.
-- Рахмат Айкүн эже. Сахаровага баратсаңыз кайра сизге мен акча беришим керек эле го - деп ыңгайсыздана сүйлөдү.
Ээ макул, акчасыз калып баратсам силер барсыңар го кудайга шүгүр! Аа айтмакчы, жумуштарың жакшы элеби?
- Кам санабаңыз баары жакшы. Мен дагы башка квартира таап чыксамбы? -деп жатам. Жакында жеңемдин төрөтканадан чыгып келишине Касым агамдын кайын энеси келатат - экен. Ансыз деле чыксамбы - деп жүрдүм эле - деди.
-- Ооба туура кыласың. Бир тууган болгонуңубуздан кийин Касым дагы сени " башка квартира таап чыгып кет" - деп айталбайт да туурабы? - макул дагы кийин сүйлөшөбүз - деп телефонун өчүрдү да;
-- Аай кыздар менин иним уулдуу болуптур! - деп кубанычын жашыралбай каткырып күлдү.
-- Жакшы болуптур! Өмүрү менен болсун! Келиниң эсен - аман эки бөлөк болуп алыптыр. Кудайга шүгүр- деп Асема, Клара Айкүмүштүн кубанычын бөлүшүп, өздөрүнүн тилектештигин билдиришти!
-- Азыр уулдуу болгон иниңе дароо чалып куттуктап кой эми -- деди Асема күлүп.
-- Ооба десең, азыр - деп Айкүмүш Касымга чалды. Касым дароо эле ала койду.
-- Уулдуу болупсуң! Куттуктаймын! Ылайым дени таза, өмүрү менен берген болсун кудайым!
-- Рахмат Айкүн эже. Баары жакшы. Бир аз кыйналып төрөдү. Азыр эми жакшы. Уулум богатыр төрт килограмм туулду -- деди.
-- Жакшы болуптур! Ата - энеси да кулагын түрүп олтургандыр! Алар укса учакка билет алып жетип келишсе керек - деди Айкүмүш.
-- Ооба алар угушту! Сиз айткандай кайын энем келатат. Чилдеси чыкканча каралашамын же өзбекстанга алып келемин- дейт.
-- Каралашса каралашсын бирок алып кетемин дегени дурус эмес. Уулуң менен келинчегиң жаныңда эле болгону жакшы. Кайын энең келсе келе берсин дагы сүйлөшөбүз! Мен азыр эле жетип барат элем бирок жумуштан араң суранып, таң эртең саат беште такси жалдап Сахаровага кетип жаттык эле. Туура түшүнүп капа болбогун! -- деп Айкүмүш сөзүн аяктады.
- Болду эми, телефондорду өчүрүп салып, дем алалы кыздар - деп Клара телефонун өчүрүп, оронуп жатып алды.
Төрт жарымга коюлган будильник кайра - кайра чырылдап, таттуу уйкудан өздөрүн зордоп ойгонуп, муздак сууга жуунуп, шаша - буша кечинде даярдап койгон кийимдерин кийип,, бөлмөнүн ичи заматта чакчалекей болуп кетти. Документтерин тактап салып, Жолдоруна азык алып, саат бештен он минута өткөндө, күткөн таксилери келип, сыртта күтүп турганын айтып кабарлады. Алар шашып бушуп, көчөгө чыгып, таксиге олтуруп, таксист менен саламдашып, арткы орундукка жайгашып олтурушту.
Таксиге чыгаар замат эле, кыздар бири - бирине жөлөнүп уктап калышты.
Такси зуулдаган бойдон бир калыпта жүрүп, айдоочу жанындагы эр адам менен анча - мынча кобурашып коюп баратты. Такси жолдун бир кыйла жерине жеткенде, Айкүмүш ойгонуп, такси айдап бараткан айдоочуга көзү түшүп, көздөрү чанагынан чыга жаздап, оозу ачылып катып калды. Тообо, болушу мүмкүн эмес - деп жакасын тиштеп, кайра дагы карады. Ооба кайниси Билал! Анан акырын жанындагы эр адамга көз жүгүртүп, кырынан көрсө да, жазбай тааныды. Ал кызы Айлиндин атасы, өзүнө кыянат жасаган Малик эле. Деми ичине тартылган бойдон бурчка тыгылып терезе тарапка жүзүн буруп өткөн күндөрдүн элеси кайрадан жаңыланып көз алдына тартылып, " мени байкабай калышса экен" - деп тилеп жатты.
Аңгыча эле, Клара менен Асема да ойгонуп, калганын байкап,
- Кандай эжекелер уйку кандыбы? - деди Билал
-- Ооба рахмат! Жакшы - деп экөө жарыша жооп кайтарышты.
-- Сахарова дегени ошондой алыс экен да
-- Ооба кыйла алыс. Мен дагы күн алыс адам толгондо каттап турам.
Анда таанышып алалы. Менин атым Билал. Бул менин бир тууган агам Малик. Москвага эми эле келди. Өзү бойдок - деп, шарактап күлүп, күзгүдөн үчөөнө көз жүгүртө баштаганда, Айкүмүш андан бетер жүзүн ары карай буруп, тескери карады.
-- Асема өздөрүнүн аттарын айтып таанышканы калганын байкап, тизесин чымчылап, жанталашып кулагына акырын шыбырай калды. " Менин атымды айтпагын аларга" - деп үлгүрдү.
-- Ии кана эми сиздер айтыңыздарчы атыңыздар ким болот?- деп Билал дагы калаар эмес.
-- Анда менин атым Гүлнур, Гүлзада, Гүлайым - деди Асема.
-- Охоо өңкөй гүлдөр экен го. Байке ушундай гүлдөр менен баратканда бир нерсе дебейсизби?
-- Эмне демек элем?- деп унчукпай олтуруп калды.
- Кыздар зерикпесин дегеним го - деди кайра Билал.
-- Ыңгайлуу жерге токточу мен тамеки чегип алайын - деди Малик оор күрсүнүп. Билал токойлуу жерге жеткенде, машинасын токтотуп, агасы менен кошулуп түшүп баратып,
- Азыр беш минут эжекелер - деди.
Алар түшөөрү менен Асема Айкүмүшкө карап;
-- Эмне буларды тааныйсыңбы?
-- Ооба тааныймын!
-- Таанысаң эмне жашынып жатасың?
-- Жөн эле кийин айтып беремин.
-- Кайра кайтканга да сүйлөштүңөр беле?
-- Ооба ушул такси менен бирге баргандан кийин, бирге кайтабыз да.
-- Анда силер ушулар менен чогуу кайта бергиле! Мен өзүм башка кетемин - деди.
-- Асема менен Клара бири - бирине карап, таң калып ийинин кысып унчугушпады.
-- Чыш алар келатышат - деди Клара .
Алар кайрадан жолун улады.
Сахаровага жетип, таксиден түшкөндө, Айкүмүш канчалык жүзүн жашырып, жатса да, Билал жеңеси Айкүмүштү тааный койду. Көктөн тилегени жерден табылгандай, кубанычы койнуна сыйбай, " жеңе" -- деп кыйкырып жибергенин өзү да сезбей калды. Маликтин оозуна сөз кирбей, караган бойдон " өңүмбү, түшүмбү"? - дегенсип, көрүп турган көздөрүнө ишенбей, көздөрү да тунаргандай болуп, теңселе түшүп оңолду! Алардын таанып койгонун жактырбай, жанындагы курбуларына да карабай, тез - тез басып, эл чууруп бараткан агымга кошулуп, элеңдеп эки жагын каранып ит куугандай анча - мынча чуркап коюп, алыстап баратты. Бирок ичине киргенде, номер алып, олтуруп, эки жакты чочулай карап жатканда, кайдан - жайдан жетип келип , Малик жанына олтуруп калганын сезбей калды.
-- Эмне качасың? Кандайсың? Мен Айлин экөөңдү сагынып издеп келдим.
-- Эмнеге качканымды өзүң жакшы билесиң. Издеп келе турган жөнүң да калган эмес.
Айлинди көрө албайсың. Себеби ал бул жерде эмес.
-- Сен эмне деп жатасың? Менин Айлиним кайда? Мен сагынып араң жүрөм. Сабырымды сынаба! Кайда деймин айтпайсыңбы эми?
-- Айтпаймын!
-- Мен атасымын го! Көргөнгө акым жокпу?
-- Ооба акың жок -- деп ойлоймун. Кызыңды ошончолук жакшы көрсөң, ошондой иттик кылбайт элең да. Кой сөздү көбөйтпөй, менин жообумду айтып кой! Араны ачык кылалы!
-- Эмне кызды туш келген жерге таштап келип, эми эрге тийгиң келип калдыбы?
-- Сөзүңдү ойлонуп сүйлөгүн! Биринчиден мен кызымды туш келген жерге таштабадым. Экинчиден мен сага отчет бергенге милдеттүү эмесмин!
-- Кой эми, уруша бербей, келишимге келели! Сураныч мени кечирип бир эле жолу менин өтүнүчүмдү кабыл алчы сураныч - деп жатканда, Айкүмүштүн номери жарыяланып, ордунан туруп кетти. Ал жерден документтери такталып, кийинки кассага чуркап кетип, Малик болсо, айласыздан Айкүмүштү таппай калды. Ошентип бир машакаттар менен, текшерүүлөрдөн өтүп, Айкүмүш такси токтогон тарапка барбай, сураштырып автобустун бекетине келип, автобус келип токтоп, эл менен кошулуп автобуска түшүп олтуруп. Асемага телефон чалды.
-- Кыздар капа болбогула мен силерден бөлүнүп автобуста кетип калдым. Кокустан менин номеримди тигилер сурап калса бербегиле! Анан менин, жол акымды картаңа салып коём толугу менен төлөп койгула! - деди Айкүмүш.
-- Биз сени күтүп олтурдук эле. Жакшы айтып койдуң. Макул жакшы жетип ал!
-- досум деди Асема Айкүмүшкө.
- Силер дагы эсен - аман жетип алгыла - деди Айкүмүш .
Өзүнүн ой - санаасы менен болуп, Айкүмүш автобустун терезесинен карап Маликтин мүнөзү токтоо тартып, азып, арыктап, көздөрү муңдуу тартып калганын, элестетип, айткан сөздөрүн ойлоп баратты. Автобус бир калыпта зуулдап, чачтарын жайган аппак денелүү сулуу перилердей болуп термелген ак кайыңдар, калың карагайлуу чытырман чер токойлор кош айтышып, кол булгалап артта калып жатты
Таажы Аязова
Уландысы бар.
Присоединяйтесь к ОК, чтобы подписаться на группу и комментировать публикации.
Комментарии 1