Ирма Яковлевналӧн олантуйыс омӧля торъялӧ сійӧ кадся йӧзлӧн олӧмкӧд, но век жӧ эм аслыспӧлӧслун. Чужліс ичӧт Ирма Вежаю посёлокын, кытчӧ комынӧд воясӧ уна йӧзӧс, немеч кыв вылын сёрнитысьясӧс, вайӧдісны Поволжьеысь. Спецпереселенечьяс лыдын вӧлі и Ирма Яковлевналӧн ыджыд мам. Сійӧс, вит посни челядя мамӧс, сідз жӧ овмӧдісны сьӧд вӧр шӧрса Вежаю посёлокад. Эз юмов олӧм виччысь бокысь локтысьясӧс. Войвывса кӧдзыдыс, сьӧкыд вӧрса кипом удж, тшыгъялӧм, ставыс тайӧ муніс быд локтысь пыр.
Вежаюсянь вудждлісны семьяӧс Вӧльскӧй поселокӧ, сы бӧрти 9 арӧса Ирмалӧн семья вуджис сӧмын на воссьӧм выль вӧрса посёлок Ярашьюӧ, кӧн сетісны налы ичӧтик олан комната. Ирма пырис велӧдчыны Скӧрӧдум школаӧ да помаліс сэн 8 класс, а сы бӧрын Сыктывкарын тӧдӧмлунъяс босьтіс медицинскӧй училищеын да локтіс Помӧсдін больничаӧ уджавны.
35 во Ирма Яковлевна уджаліс Помӧсдін больничаын. Сійӧс тӧдӧ быд ань, коді чужтывліс ассьыс кага больнича роддомын. Шань, вежавидзысь, тӧлка нывбабаӧс ставӧн казьтывлӧны сӧмын бур кывйӧн.
Николай Алексеевич верӧсыскӧд таво пасйисны 60 во ӧтлаын олӧм. Шуда гозъя, уджачӧсь, зільӧсь. Стрӧитісны керка-«коромина», чужтісны да быдтісны челядь, оланрусӧ кыпӧдӧны куим внук-внучка. А кымынпӧлӧс шаньга-пирӧгӧн номсӧдлы гортсаясӧс Ирма Яковлевна! Нывъясыс казьтывлӧны, локтас пӧ мам войся смена бӧрад да медводз пусяс-пӧжасяс , скӧт дорад на бергалыштас-и, коркӧ тай сэсся ойбыртлас жӧ-а…
Тайӧ гижӧдсӧ лӧсьӧдігас юалі Ирма Яковлевналӧн ныв Ирина Николаевналысь, помнитӧ оз мамыс немеч кыв, вочакывйыс шензьӧдіс: чойясыскӧд пӧ телепон пыр немеч кыв вылын и сёрнитӧ. Вежаю поселокысь Ярашъюӧ петӧм бӧрын роч ни коми кыв оз вӧлі тӧд. Пыр жӧ и велалӧма. Ыджыд мам аслас ичӧт ыджыд мамӧн шуыськӧд ёна радейтӧны коми пӧслӧвича да поговоркаяс тетрадьӧ гижавны, да мам сы мында юрсьыс висьталас, шензян да и сӧмын, висьталӧ Ирина нылыс.
Вот татшӧм бур нывбаба олӧ Помӧсдін сиктын и мед дыр на олас! Сиам пыдди пуктана Ирма Яковлевналы да сылӧн став матысаясыслы крепыд дзоньвидзалун да шуда олӧм!
Чолӧмавны юбиляршаӧс волісны Помӧсдін ветеранъяслӧн сӧветса председатель Карманова Н.И. да Помӧсдін больничаса профсоюзнӧй комитетса веськӧдлысь Кулида А.М. Чолӧмалана гижӧд да козин ыстіс Кулӧмдін районса ветеран сӧвет нимсянь Сазанович Е.А.
Присоединяйтесь к ОК, чтобы подписаться на группу и комментировать публикации.
Комментарии 3