(сл. Алеся Ставера ) "Разумею цяпер чаму з выраю жураўлі на Палессе ляцяць".
Беларускія буслы
Разумею і я чаму кожнай вясной
Прылятаюць буслы на Палессе.
Бо сама ганаруся Радзімы красой,
Мілагучнаю моваю-песняй.
Прыляцелі ізноў, уладкоўваюць быт.
Хутка з'явяцца дзеткі цікаўныя.
Іх чакаюць лясы, неба чысты блакіт,
Краявідаў малюнкі прывабныя.
Людзі тут іх шануюць, чакаюць заўжды,
Ім будуюць буслянкі з ахвотаю.
Бачым птушак на полі, імху, ля вады...
Дзень цыбатых заняты работаю.
Яны мудрасці сімвал, дабра, чысціні,
І зямля зноў цвіце пад іх крыламі.
Абярэгам буслы прыляцяць з вышыні,
І да іх мы з намерамі мірнымі.
Бусел сімвал жыцця ў краіне маёй.
Калі пара аб гэтым папросіць,
Каб у кожнай сям'і былі лад і спакой,
Немаўлят бусел у дзюбе прыносіць.
Важна ходзяць буслы ля азёр і балот,
Бо ўпэўнены: сцюжа далёка.
Яны мужна ляцелі праз процьму нягод
Да Радзімы сваёй сінявокай.
Беларусь гэта: лён, васількі і лугі...
Тут з душы словы шчырыя льюцца.
Пакідаюць буслы ўвосень край дарагі,
Каб пасля ў свае гнёзды вярнуцца.
2024 г.
Присоединяйтесь к ОК, чтобы подписаться на группу и комментировать публикации.
Комментарии 14