Предыдущая публикация
ПАЗНАЁМІЛІСЯ З ПРАФЕСІЯЙ СЛЕДЧАГА
15.10.2024 у актавай зале Нягневіцкай сярэдняй школы адбылася прафарыентацыйная сустрэча з прадстаўнікамі Следчага камітэта, у якой бралі ўдзел і вучні ІХ – ХІ класаў Шчорсаўскай сярэдняй школы. Начальнік Навагрудскага раённага аддзела Следчага камітэта Рэспублікі Беларусь Дзмітрый Віктаравіч Фурса і галоўны інспектар аддзела кадраў і ідэалагічнай работы Упраўлення Следчага камітэта па Гродзенскай вобласці Сяргей Мікалаевіч Кірпля змястоўна і цікава расказалі вучням аб нялёгкай, але вельмі патрэбнай людзям прафесіі следчага, прапанавалі жадаючым юнакам паступаць на следча-экспертны факультэт Акадэміі МУС ці ў рамках мэтавай падрыхтоўкі – на юрыдычны факультэт Гродзенскага дзяржаўнага ўніверсітэта імя Янкі Купалы, дзе, дарэчы, ёсць магчымасць паступіць на вучобу і дзяўчатам. Па словах Сяргея Мікалаевіча, дзяўчаты дасягаюць высокіх вынікаў у прафесіі, з іх атрымліваюцца добрыя следчыя. А Дзмітрый Віктаравіч нават адзначыў адну нашу вучаніцу, Маскалевіч Аліну, якая давала правільныя, дакладныя адказы на пастаўленыя пытанні.
У чым канкрэтна заключаецца праца следчага, вучні маглі даведацца з расказу і практычных дзеянняў супрацоўніка Следчага камітэта, які правёў паказальны запуск квадракоптара, паказаў вучням службовы аўтамабіль і магчымасці працы перасоўнай крыміналістычнай лабараторыі. Расказаў, як разумныя прыборы дапамагаюць узяць след, “злавіць” пах і тым самым раскрыць злачынства. Жадаючыя паглядзелі, як эксперт-крыміналіст здымае адбіткі пальцаў, паспрабавалі пакаваць пісталет, як рэчавы доказ.
Следчым-крыміналістам нярэдка даводзіцца працаваць у досыць складаных умовах, дзе патрэбна веданне ўсіх відаў стралковай зброі. Вучні змаглі нават патрымаць яе ў руках, прымераць насябе ахоўны шлем і бронекамізэльку.
Сустрэча не пакінула абыякавым нікога, а найбольш карыснай стала для тых, хто хоча стаць следчым ці супрацоўнікам крымінальнага вышуку (а такія ў нас ёсць).
Следующая публикация
Нет комментариев