Դու մի օր գրախանութներից մեկում կգտնես գրքերիցս մեկը. կգտնես ու կզարմանաս: Անուն-ազգանունս ծանոթ կթվա... Կվերցնես մի քանի տող ուղղակի աչքերով «թռնելու» համար, բայց հետո կուզես մի քանի վայրկյան նստել ու կարդալ... Վայրկյաններն արագ կանցնեն, ու դու կհամոզես քեզ, որ մի քանի րոպե ունես աշխարհից կտրվելու համար... Կկարդաս դանդաղ, ինձ կփնտրես գրքիս էջերում, բայց փոխարենը քեզ կգտնես՝ տողերիս տակ ճմրթված ու ծալծլված... Հաստատ կգտնես...Առաջին մի քանի էջը մի շնչով կկարդաս, հետո կզգաս, որ սենյակում օդ չկա, չափազանց տոթ է... Կվերցնես գիրքն ու դուրս կգաս... Առանց վճարելու... Չես լսի վաճառողուհու՝ հետևիցդ հետզհետե գոռացող ձայնը. ա՜խր, ամեն ինչի համար էս կյանքում պիտի վճարես... Հը՜մ, դու էլի ինձ ես փնտրում, որ ասեմ՝ մենք վաղուց ենք ծանոթ, գրեթե՝ ծնված օրից... Բայց հիշողությունս առաջվանը չի... Հիմա շատ բաներ մոռանում եմ...Չգիտեմ՝ ի օգուտ, թե հեճուկս ինձ... Ի վերջո վաճառողուհին կկանգնի քո առաջ, ու դու գրպաններդ կքրքրես՝ անտարբեր դրամ փնտրելով... Իմ գիրքը թանկ արժե... Որովհետև ամեն տողի տակ տեսնելու ես քեզ ու դատարկվես... Ամեն բառի, տառի հետ տալու ես հոգուցդ մի մասնիկ ու մերկ մնաս... Բայց, գիտե՞ս ինչ, քո դրամներն ինձ պետք չեն... Էս անգամ կասեմ, որ խանութը ամբողջ փողն իրեն վերցնի... Դու ամեն բառիս, ամեն տառիս համար վճարել ես արդեն... Դու էլի ինձ ես փնտրում... Մի թեթև ուրվագիծ կա, չէ՞: Ասում են՝ տարիների ընթացքում մարդու երեսին ամեն ինչ փոխվում է. միայն աչքերն են նույնը մնում...Միամի՜տ. հանկարծ չհավատաս... Իմ աչքերն առաջ երբեք մոխրագույնի երանգ չունեին... Դու մի քանի անհանգիստ ջղաձգում ես անում. ա՜խր, աշխարհին ո՞նց ես պատմել իմ մասին... Քեզ տեսնում ես, չէ՞, ամեն թանաքի ու վերնագրի տակ. սպիերդ էլ մատներով ես շոշափում... Իմ գիրքը երկար չէ... Մտածում էի՝ էդքան ճկված ու կռացած երկար չես դիմանա... Ա՜խր, դու գիրք ե՞րբ ես սիրել, որ հիմա գրքեր ես փնտրում... Թե կյանքում ինչ-որ բան կորցրածի նման՝ գրքում ես ուզում գտնել...Խելքի ես եկել, հա՞... Ոչի՜նչ, գրքերը սպասել գիտեն... Մարդկանց նման չեն... Հառաչդ էլ կլսեն, բողոքդ էլ, սերդ էլ կվերցնեն ու դիմացը հազարապատիկը կտան... Ես էլ եմ երբեմն մարդկանց մեջ ինչ-որ բան կորցնում...Անվերադարձ... Դրա համար եմ քեզ խցկել տողատակերիս տակ, ամեն բառիս ու տառիս շվաքում, որ ջնջելիս էլ չանհետանաս... ❤😌
#գրվածքներ
#Սոնա
Присоединяйтесь к ОК, чтобы подписаться на группу и комментировать публикации.
Нет комментариев