Предыдущая публикация
ԳՈՐԾՈՒՆԵՈՒԹՅԱՆ ՀԻՄՔՈՒՄ` <<ԱԶՆՎՈՒԹՅՈՒՆ>>, <<ՆՊԱՏԱԿ>>, <<ՀԱՂԹԱՆԱԿ>> ԿԱՐԳԱԽՈՍՆԵՐԸ
ԱՐՄԻՆԵ ԴԱՆԻԵԼՅԱՆ
ՄԱԿ-ի Գլխավոր Վեհաժողովի՝ 1999 թվականի դեկտեմբերի 17-ի որոշմամբ, օգոստոսի 12-ն Երիտասարդության միջազգային օր է հռչակվել: Հարցը քննարկվել է 1998 թվականի օգոստոսի 12-ին, Լիսաբոնում անցկացված Երիտասարդության հարցերի նախարարների համաշխարհային համաժողովի ժամանակ:
Առաջին անգամ տոնը նշվել է 2000 թվականի օգոստոսի 12-ին:
Ակտիվ երիտասարդությունը յուրաքանչյուր երկրի հզորության գրավականն ու հիմքն է: Առանց մտածող, պատասխանատու և նախաձեռնող երիտասարդության անհնար է պատկերացնել վաղվա օրը, յուրաքանչյուր պետության ծաղկումն ու զարգացումը:
Մարտունու քաղաքապետին կից գործող երիտասարդական խորհուրդը կապող օղակ է քաղաքի երիտասարդության և տեղական ինքնակառավարման մարմինների, տվյալ պարագայում համայնքապետարանի միջև: Այն շրջկենտրոնի երիտասարդների ծրագրերի իրականացման շարժիչ ուժն է և նրանց գաղափարներն ի կատար ածելու լավագույն հարթակը: Խորհուրդը ստեղծված է համախմբելու տարբեր կուսակցական ու գաղափարական պատկանելիություն ունեցող երիտասարդներին մեկ դրոշի ու գաղափարի ներքո ` հիմնական ուժն ուղղելով Մարտունի քաղաքի զարգացմանը:
Խորհուրդն ունի նախագահության 11, հանձնաժողովների 25 անդամներ և մի քանի տասնյակ խորհրդի անհատական կազմ:
Երիտասարդության միջազգային օրը լավագույն առիթ է անդրադառնալու նորաստեղծ խորհրդի գործունեությանը: Այդ նպատակով հանդիպեցի խորհրդի նախագահի և հանձնաժողովների նախագահների հետ:
Երիտասարդական խորհրդի նախագահ Մհեր Խաչատրյանն երիտխորհրդի յոթամսյա գործունեությունը գնահատում է բավարար` հաշվի առնելով այն հանգամանքը, որ դեռևս չկա բավականին մեծ փորձ, որով կարող են առաջնորդվել, խորհուրդ, որին կարող են ընդօրինակել: Խորհրդի գործունեությունն իրականացվում է պահի թելադրանքով, սեփական նախաձեռնությամբ:
Երիտասարդական խորհրդի հանձնաժողովների անդամները բանակ-հասարակություն կապի զարգացման աշխատանքներում առաջին քայլը համարում են շրջանում տեղակայված զորամասերի հրամանատարական կազմի հետ համագործակցության ձեռքբերումը: Զորամասերում երիտխորհուրդը հանդես է եկել համերգներով և ինտելեկտուալ խաղ-մրցույթներով: Այս փաստով պայմանավորված, երիտխորհրդի նախագահության թ.4 որոշման համաձայն, Ն զորամասի հրամանատար գնդապետ Կարեն Գրիգորյանն արժանացել է խորհրդի պատվավոր անդամի կոչման:
Մարտունու քաղաքապետին կից գործող երիտասարդական խորհուրդը հաճախակի հանդիպումներ է կազմակերպում քաղաքի երիտասրդության, առավել ևս դպրոցականների հետ, լսել է աշակերտների առաջարկները, ծրագրերը` հետագայում այն դնելով խորհրդի նիստերում` որպես օրակարգի հարց:
Յոթամսյա ժամանակաընթացքում խորհուրդը կազմակերպել է կինոդիտումներ, որը քաղաքի երիտասարդության պահանջն ու առաջարկն է, այսպես ասած, բարի ավանդույթների շարունակությամբ վերականգնվել է նախկին` ժողովրդի կողմից ընդունված ու սիրված լավագույն ժամանցային ծրագրերից ամենաարդիականը:
Խորհուրդը մայիս ամսից քաղաքի <<Երևանյան այգի>> կոչվող պուրակ-զբոսավայրում հասարակության հանգստի կազմակերպման համար ապահովում է երաժշտություն:
Առաջիկայում նախատեսվում է իրականացնել <<Գունավոր Մարտունի>> ծրագիրը, որի արդյունքում քաղաքի տարբեր հատվածներում կպատկերվեն հայտնի ֆիլմերից նկարներ, ինչպես նաև նախատեսվում է ստեղծել թատերական խումբ: Վերջինս, ի դեպ, դպրոցականների առաջարկն է:
Առաջիակայում պլանավորվում է նաև ունենալ բիզնես-ֆորում ծրագրեր, ինչը խթան կհանդիսանա, որպեսզի երիտասարդությունը ներգրավի նաև սոցիալ-տնտեսական ծրագրերում:
Հատկանշական է նաև, որ խորհուրդն ապրիլյան ռազմական գործողությունների ընթացքում հավուր պատշաճի կազմակերպել է թիկունքի պարենային աշխատանքներ, այդ թվում մթերքների, կամավորականների համար ուղարկված ծանրոցների բաժանում, քաղաքի նկուղների մաքրում:
Երիտասարդական խորհուրդը հստակորեն կշարունակի իր գործունեությունը` նախաձեռնելով նոր ու արդիական ծրագրեր: Նա քաղաքի երիտասարդությանը առաջարկում է իրենց ծրագրերն ու մտահղացումները ներկայացնել խորհրդին գրավոր կամ բանավոր տարբերակներով` համատեղ ավելի լուրջ արդյունքների հասնելու ակնկալիքով: Խորհրդի գործունեությունը նպատակաուղղված է ամուր երիտասարդությամբ ամուր քաղաք ունենալուն: Այն գործում է <<Ազնվություն>>, <<Նպատակ>>, <<Հաղթանակ>> կարգախոսներով:
Խորհրդի նախագահ Մ.Խաչատրյանը շնորհավորում է բոլոր երիտասարդներին գեղեցիկ տոնի առթիվ` մաղթելով վճռականություն, կամք և նպատակասլացություն: Երիտասարդությունն ուժեղ է, երբ համախմբված ու միասնական է, երբ ճիշտ և ի շահ հայրենիքի ամրապնդման է օգտագործում սեփական ներուժը:
Следующая публикация
Нет комментариев