«Икте-весым пагален, йӱлам арален…»
Тӱнямбал кӱкшытыштӧ
«Икте-весым пагален, йӱлам арален…»
24-28 июльышто Йошкар-Олаште «Тӱнясе калык-влакын боевой искусствыштын традиционный видше-шамыч да физический чулымлык модмаш» гӱжлен эртен.
Марий Эл шке мландыштыже боевой искусство дене спортсмен-шамычым вашлийын. Тыгайже Российыштыжат икымше гана лийын да тудо республикыштына эртен. Пытартыш жапыште тыгай турнир-влаклан кугу тӱткышым ойырат.
Чылажат самырык тукым таза, виян, лӱддымӧ кушкышт манын ышталтеш.
Мероприятийыш 51 регион да 3 эл гыч тӱжемат пеле утла участник чумырген. Пытартыш 5 ийыште тыгайже лийын огыл.
Таҥасымашла «Марий Эл» ий полатыште, «Дружба» стадионышто эртеныт. Участник-шамыч спортын 15 видыштыже (айкидо, кендо, муайтай, масс-рестлинг, руш лапта, фиджитал да молат) вийыштым тергеныт.
Модмашын программышкыже тӱрлӧ таҥасымаш пурталтын. Южышт мемнан дене икымше гана эртаралтыт. Мутлан, шахбокс.
Спорт модмашын тӱҥжылан таза илыш-йӱлам кучаш кумылаҥдыме деч посна шочмо кундемым, элым йӧратыаш, шочмо элнан тӱрлӧ национальностян калыкын тӱвыраж ден йӱлажым арален кодаш тунеммым шотлыман.
«Тӱнясе калык-влакын боевой искусствыштын традиционный видше-шамыч да физический чулымлык модмаш» сай кӱкшытыштӧ эртыш. Кажне таҥасымаште сеҥыше ден призёр-шамычым палемденыт.
Но эн кугу шарнымашым пытартыш кече кужу жаплан кода, шонем. Ты кечын тӱрлӧ таҥасымаште ятыр пӱжвӱдышт йогыш да арам огыл. Спорт айдемым пеҥгыде койыш-шоктышан, чытышан лияш, элым йӧраташ кумылаҥда.
27 июльышто «Тӱнясе калык-влакын боевой искусствыштын традиционный видше-шамыч да физический чулымлык модмашым» торжественно петырымашке Марий Эл вуйлатыше Юрий Зайцев лийын.
Лач ты кечын тӱҥ приз, «Муайтай дене чемпион» ӱштӧ верч таҥасымаште регионна гыч Александр Морозов дене Пошкырт кундем гыч боец Ростислав Кутлуметов (Башкортостан, Татарстан, Марий Эл республиклан, Киров областьын чемпионжо) вашлийыч. Титульный бойым мероприятийын ик эн ойыртемалтше таҥасымашлан шотлыман.
Шокшо вашпижмаште Александр Морозов ты ӱштын озаже лие. Тудлан ты ӱштым тӱнямбал кӱкшытыштӧ чапланыше спортсмен Олег Тактаров кучыктен.
«Тӱнясе калык-влакын боевой искусствыштын традиционный видше-шамыч да физический чулымлык модмашын» талисманжылан шордым ойыреныт. Тудын лӱмжӧ – Патыр.
Тыге «Тӱнясе калык-влакын боевой искусствыштын традиционный видше-шамыч да физический чулымлык модмаште» кажне участникым сеҥышылан шотлыман, кажныже шке патырлыкшым ончыктен. Мероприятий Российыште илыше тӱрлӧ национальностян калыкын виян улмыжым, келшен илымыжым эше ик гана пеҥгыдемдыш.
Елена Эшкинина
Авторын видеожо
Присоединяйтесь к ОК, чтобы подписаться на группу и комментировать публикации.
Нет комментариев