Тыгак Зеленый Дол – Краснококшайск кӱртньыгорным ыштымылан 100 ий темме лӱмеш пыштыме Шарнымаш-Чапкӱм торжественно почыныт.
Пайремыш погынышо калыкым посёлкылан 44 ий темме дене Марий Эл Кугыжаныш погын вуйлатышын алмаштышыже Лариса Яковлева, Марий Элын пӱртӱс поянлык, экологий да йырым-йырысе средам аралыше министр Алексей Киселев, Волжский муниципальный район вуйлатыше Владимир Сергеев саламленыт, палдара Волжский район администраций.
– Тыгай пайрем чылаштым иктеш уша: кӧ тыште кызытат ила, кӧмыт тышеч каеныт, но чонышт шочмо ялыш ӱжеш, кушто ача-аваштым, коча-коваштым шарнат, кӧ шке вийжым, тазалыкшым, можыч, ӱмыржым пыштен ты вершӧрым нӧлтымӧ, вияҥдыме пагытыште, – тыге тӱҥалын шке мутшым Л.Яковлева. Ешарен: – Кӱртньыгорным чоҥымо историй нерген ойлымо годым шарналтена: могай нелылыкым чытен, калык ярагида манме гай, тудым чоҥен. Кызытсе правительствына кӱрньыгорным Киров область марте шуктышаш верч тырша, вет ме палена, корно – тиде илыш вӱршер гаяк. Тек тиде шарнымаш чапкӱ посёлкым тӱзландарыше кугу, кӱлешан проектлан тӱҥалтышым пышта.
Зеленый Дол – Краснококшайск (Йошкар-Ола) кӱртньыгорно 1923 ийыште чоҥалтын. Йол ӱмбак шогалше МАО-м кугу эл дене ушышо корно лийын. Еҥ-влак, кукшо ийлам ончыде, кидышкышт кольмым налын, землянкылаште илен, у пашалан пижыныт. Шукышт верысе калык гыч лийыныт. Тыге Памар станций шочын. Российыште веле огыл, Европыштат палыме.
Кӱртньыгорным чоҥышо-влаклан пӧлеклалтше Мемориал-Чапкӱ тӱшка калыкын, мер ушемын еҥышт-влакын тыршымыштлан кӧра пышталтын. Ончыкшымат шарныме лӱмеш. Арам огыл «С благодарностью, ваши потомки. Тауштен, кызытсе тукым деч» манын сералтын. Организатор-влак ойыртемалтше-влакым чапкагаз дене палемденыт. Приволжский ола шотан поселений администрацийым вуйлатыше Анатолий Червинский калыкым саламлен тауштен ойлен. Чапкӱм почмо годым тасмам пӱчкаш Приволжский посёлкын эн кугу ийготан Николай Николаевич Грачевлан чап пуалтын.
Пайремым верысе артист-влак сӧрастареныт, кидпаша ончер-влак куандареныт, тӱрлӧ площадкылаште йоча-влак юарленыт, нунылан посна программым ямдыленыт. А кастене Марий кундемын мотор да куатле Юл эҥерын лӱмжым налше Приволжский посёлкым салют волгалтарен.
Тӱрлӧ увер негызеш Л.СЕМЕНОВА ямдылен
Снимкылаште: Шарнымаш-Чапкӱ, Н.Н.Грачев – пагалыме уна.
И.Козлован фотожо / «Марий Эл» увер агентстве
Присоединяйтесь к ОК, чтобы подписаться на группу и комментировать публикации.
Нет комментариев