Шукерте огыл Специальный военный операцийыште вуйым пыштыше боец-шамычын ачаштлан Марий Эл вуйлатыше Юрий Зайцев Арсентий Крыловлан, Сергей Сирапутскийлан, Андрей Чемодановлан «Отец солдата» медальым кучыктен.
Регион вуйлатыше Герой-влакым, элым аралыше-шамычым воспитатлымыштлан тауштен.
Морко район гыч Арсентий Крылов – боевой действийын ветеранже. 1984 ий шошым тудым, 18 ияш рвезым, армийыш налыныт. Ик жап гыч шке кумылын Афганистаныш каен.
– Тунам мыланем шоналташ жапым пуэныт. «Огым» манашат лиеш ыле. Мый огыл гын, кӧ? Афганистаныште калыкын чапшым аралаш, еҥ-влаклан полшаш кӱлын. Тиде мыйын порысем, мыйым тыге воспитатленыт. Афган кундем чот шокшо улмыж дене ойыртемалтын. Тахта-Базарыште учебкышто лийынам. Ночко да шинчалан гимнастёрко… чот нойымо дене южгунамже йолнат нимом шижын огыл. Привалыште изиш каналтет да адакат – марш-бросок, – шарналта Арсентий Георгиевич. – Неле салтак илыш: ятыр километрыш марш-бросок, суткан кеч-могай жапыштыже бойлан ямде улмо, боевой действий-влак, боевой йолташ-шамычым йомдарымаш…
Тудын ойлымыж почеш, тыгай тренировко бой годым кӱлеш лийын. Землякна Герируд переправым оролышо подразделенийыште снайпер лийын.
Денис эргыжат элнам арален. Тудо Богдан Хмельницкий орденан Краснознамённый Омско-Новогубский 21-ше отдельный гвардейский мотострелковый бригадыште служитлен. 2016 ийыште ротын командиржылан шогалтеныт, а 2017 ийыште – 1-ше образцовый мотострелковый ротын командиржылан. 2020 ийыште тудын командованийже дене танковый биатлонышто Мотострелковый команде-влак коклаште БМП дене экипаж 4-ше верыш лектын.
Спецопераций эртыме кумдыкышто капитан Денис Крылов икымше кече гычак батальонын штаб начальникшылан ыштен. Герой 2022 ий 10 мартыште боевой йолташыжым аралымыж годым ӱмыр лугыч лийын.
Колымыж деч вара Мужество орден дене наградитлалтын.
«Защитники Отечества» кугыжаныш фондын Марий Элысе филиалжын вуйлатышыже Ренат Магсумовын палемдымыж почеш, элна верч вуйым пыштыше воин-влакын ачашт-шамычлан реабилитаций кӱлеш. Тыгак авашт, пелашышт-влакланат полшыман. Мондаш огеш кӱл, ача-шамычат йӧратыме эргыштым йомдарат… Шукыж годым пӧръеҥ-влак шке тургыжланымыштым, ойгыштым огыт поч да, тидым ыштен огыт мошто, сандене эмоций велым луштаралташ, СВО-што улшо боец-шамычын ачаштланат мероприятийым эртарыман, нуным поддержатлыман.
«Защитники Отечества» кугыжаныш фондын Марий Элысе филиалжын материалже негызеш Е.Эшкинина ямдылен.
Присоединяйтесь к ОК, чтобы подписаться на группу и комментировать публикации.
Нет комментариев