«Тӱҥжӧ – ойырен налме корным кучаш», –
манеш Кужэҥер район «Искра» колхоз председатель Н.Поликарпов
Тиде тӱшка озанлык районышто веле огыл, республикысе ончыл озанлык-влак радамыште ӱшанлын ошкылеш. Тыште ий еда курал-ӱдымӧ пасу ешаралтеш, трактор ден машина паркым уэмдат, вольык ашныме оралтым чоҥат да тидлан кӧра ушкал кӱтӱ кугем толеш, пашадар кушкеш. Тидын нерген каласкалаш да таче шуктен шогымо паша дене палдараш озанлык вуйлатыше Н.Поликарповым йодынна:
– Тенийысе пасу паша тургым тӱҥалтышым, шошо агам, ме рӱжге эртарен колтышна да ынде нурлаште шурно кушкеш, кургылык кушкылым поген налына, кургым ямдылена, – ойла Николай Александрович. – Ӱдымӧ кумдыкна 3,9 тӱжем гектарыш шуын. Икияшым шонымо гаяк жапыште вераҥден шуктышна. Эше «Куженерский» озанлыклан полшаш миенна. Пашам эшеат писемдаш лиеш ыле, но игече чаракым шындыле, вӱдыжгӧ шогыш. Тиде гана ме силослык кукурузым ятырлан шукырак, 260 гектарыш, ӱденна. Кодшо ийын кокшӱдӧ гектарыш вераҥдыме ыле. Тиде культуро чапале качестван силосым опташ сай йӧным пуа. Тенийысе шошо агаште мемнан механизаторна Ильсур Файзрахманов ойыртемалте, республикысе таҥасымаште кумшо верым нале.
Нур пашам писынрак эртарен колташ машинавечынам уэмдымынат чот полша. Тений гына К 700, МТЗ-82 маркан трактор-влакым налынна, тыгак мландым пушкыдемдыме агрегат-шамычым кондымо.Тыге ий еда.
Механизаторна-влак ситат. Кӧ ондак пашам ышташ Москвашке, моло вере каен, нуно ынде мӧҥгеш пӧртылыныт, да ме колхозышто тыршаш темлена.
Тенийысе икияш, тыгак кокияшым ӱдымӧ пырчан пасушко ончалатат, уда огыл лектышым сӧра. Но эше чылажат пырчыже кузе погынымо дене кылдалтын.
Шурным погышо комбайн-влакым виктараш механизаторна-влак улыт. Нуно ончычшат удан огыл тыршеныт. Тиде йодыш ок тургыжландаре. Ты кечылаште пырчым оптышаш склад-влакым ямдылаш тӱҥалына. Кодшо ийысе пырчым ик леваш гыч весыш кусараш кӱлеш. Вет мемнан эше кодшо ийысе пырчынак шагал огыл аралалтеш. Ме пешыжак ужалаш ышна тырше. Теве шукерте огыл «Звениговский» СПК-лан ик тӱжем тонным ужалышна. Тыгак кодшо ийысе силосым ик озанлыклан колтышна. Ме эре тыге ышташ тыршена: пырче, курго шапаш вес ийланат кодшо, вет игече могай лиеш, кушкыл кузерак атылана – ончылгоч пален мошташ ок лий.
Пырчым эрыктен-коштымо комплекснам уэмденна ыле да ынде тидын шотышто нелылыкым огына шиж. Кызыт тудым терген лекме, мо кӱлешым шотыш кондымо. Икманаш, чылажымат шинча ончылно кучаш тыршена.
Кодшо ийын ме пырчым гектар еда коло кандеш центнер дене шийынна ыле. Тыге гектар кумдыкым шотыш налын, ме республикыште кокымшо верыш лектынна. Теният тыгай кӱкшытым кучаш манын, чылажымат ыштена. Минералный ӱяҥдышым гына тений 570 тонным кондымо ыле, тудым кушкыллан шавыме. Икияш пырчан шурно чыла пасушко шӱкшудым пытараш гербицидым шавенна.
Кызыт ик тӱҥ пашана – кургым шапашлаш. Тиде гана ме план почеш 600 тонн кукшо шудым, 12,5 тӱжем тонн силос ден сенажым ямдылышаш улына. Июнь мучашлан нӧрӧ кургым 3,5 тӱжем тонным оптенна ыле. Кургым ямдылыме тургым шыже марте шуйна.
В.Смоленцев
Авторын фотожо
Присоединяйтесь к ОК, чтобы подписаться на группу и комментировать публикации.
Комментарии 1