Предыдущая публикация
📖Сургутский диалект📖
Кат най имиӽән иԓты
Әймәта ԓатнә, йыснә, кат мәӽи ныӈкән вӑԓԓәӽән. Чи вӑԓтыннә, чи ӄоԓтыннә, кат най аӈкәлиӽән тӑйԓәӽән, качәӈ ӄотнә.
Панә чи кат най аӈкәлиӽән ньуԓа йәвәтӽән мойәԓтаӽә, ньӑвәмтаӽә йәккән. Әй найәли ньӑвмәԓ:
– Ма чаха мант тӑйтә ныӈэмнә атәмӽә тӑйԓөйәм. Чувалнә ма кимәԓ өӽтыԓамнә ӄуԓи әй ӄунттапә әнтә раӈиԓԓәӽәԓ: кәчэм иԓә әнтә мөӈәтԓәтәӽ, иԓә рәкәнтә сăви пуләт кэра пәрӽи әнтә ԓьÿвәтԓәԓ. Ма лӓкәмԓам – пӑрԓам най лӑкисԓәтә вăӽнат сӓӈкԓәԓ, лӑӄәт әйнам ма сӓмӽәԓам йӓчәӽа тӑӽԓәԓ. Най пӑр уч әй ӄунттапә нуӄ әнтә вәйӽәԓ. Ма чӑӄа атәм нумәса, чаль нумәса питәм, мәта кәрэк вӓртаӽә нумәӄсәԓәм.
Өс кимәтмәт най аӈкәли йастәԓ:
– Өс ма тьӑӄа мант тӑйтә ныӈәлэмнә туӈӄә йәмӽә тӑйԓөйәм! Иттән, аԓәӈ кимәԓ өӽтыԓам нуӄ чочԓиӽән-раӈиԓиӽән. Чувал мăӽәԓты рăӈиԓәтәӽ.
Панә әй ныӈәԓа йастәӽ:
– Нӱӈ атәм нумәса питән ӄунтә, ныӈэ йÿканәԓ йевәтԓи ӄунтә, төппә мант тӑйтә ныӈәлэм, мәта атәм ура аԓ вәрә. Панә нуԓэӄсәтә йуӄӄән аԓ ньоӽтыԓа, аԓ мәта атәм ура вӓриԓа, чит ма имәлэм тӑйтә утӽән, ԓÿвнә мәта мӓрәӽат нÿӈ имэна мәйәккәԓ.
Панә ньӑвәммин пырнә, най аӈкәлиӽән ӄотԓәннам мәнӽән.
Аԓәӈ әй ӄотәӈ нэ кэм кӱч ӓт – ичәк пәтә! Кимәтмәт ӄот әнтэм – төп най ԓивәм тоӽи! Өс оԓӽән – йуӽтәп йуӄӄән чи тоӽинә туттыӽән, найәлинә әнтә ԓивиӽән.
Читат чи йыс йасәӈ соӽит най аӈкәли суӈӄԓәӽ тоӽинә тӑйԓи, атәм йуӽат-пөмат әнтә пӑнԓи. Па урнам па әнтә уч войәӽԓәԓи. Най имәли пытәмтәԓ ӄунтә, чи мәта пэкәт атәм вӓр вӓрәԓ.
Следующая публикация
Нет комментариев