“Яўген Чырыкаў. На шляхах жыцця і творчасці”
17 ліпеня 2024 года а 17-й гадзіне
Вядомы рускі пісьменнік, празаік, драматург, журналіст Яўген Мікалаевіч Чырыкаў нарадзіўся 24 ліпеня (5 жніўня) 1864 года. Дэбютаваў у друку ў 1885 годзе ў “Волжском вестнике”, у 1899 г. надрукаваў першую кнігу – “Очерки и рассказы”. З 1900 г. пачаў пісаць п’есы, якія ставіліся ў правінцыйных і сталічных тэатрах. На працягу жыцця выйшла шмат зборнікаў апавяданняў, да 1917 г. – збор твораў у 17-ці тамах.
З 1895 года Яўген Чырыкаў жыў у Мінску, горад адыграў важную ролю ў жыцці пісьменніка. Напісаныя тут апавяданні “Хлеб вязуць”, “Блудны сын”, аповесці “Інваліды” “Чужаземцы”, “Таніна шчасце” зрабілі яго імя вядомым шырокаму колу чытачоў. У Мінску ён пачаў дзейнасць як драматург, п’есу “На двары ў флігелі” паставілі мясцовыя аматары тэатральнага мастацтва. У мінскі перыяд жыцця на мясцовым матэрыяле Я.Чырыкаў пачаў пісаць п’есу “Евреи”, яна была надрукавана ў 1904 г. і з поспехам ішла на айчыннай і замежных сцэнах.
Яўген Чырыкаў быў у ліку ініцыятараў стварэння мінскага Таварыства аматараў мастацтва (Общество любителей изящных искусств), Пушкінскай бібліятэкі. Падчас працы ў Кантролі Лібава-Роменскай чыгункі пазнаёміўся з вядомымі палітычнымі дзеячамі – Пятром Румянцавым і Сяргеем Мяржынскім, падтрымліваў стасункі з Анатолем Бонч-Асмалоўскім. Даў рэкамендацыйны ліст Адаму Багдановічу, дзякуючы якому сям’я Багдановічаў пазнаёмілася і пасябравала з сям’ёй Максіма Горкага.
У фондах музея М. Багдановіча захоўваецца шмат матэрыялаў, якія прама ці ўскосна звязаныя з Я. Чырыкавым, – лісты, дакументы, паштоўкі, кнігі, перыядычныя выданні. На працягу многіх гадоў супрацоўнікі музея сябруюць з нашчадкамі рускага пісьменніка, якія жывуць у розных краінах.
У выставе прэзентуюцца каштоўныя матэрыялы з архіва сям’і Чырыкавых, якія раскрываюць тэму жыцця пісьменніка ў Мінску, дадаюць штрыхі да ўмоўнага партрэта Мінска к. ХІХ – пач. ХХ стст.
Выстава працуе па 31 жніўня 2024 года.
Літаратурны музей Максіма Багдановіча
Мінск, вул. М.Багдановіча, 7а
Тэл. +375 17 363 07 61, +375 17 355 22 95
Присоединяйтесь к ОК, чтобы подписаться на группу и комментировать публикации.
Нет комментариев