КУГАРНЯ газет

Шучко омо гына лийже ыле… Морко район Красный Стекловар посёлко гыч Анастасия пытартыш пел ий пуйто шучко омышто гай ила. Мобилизаций тӱҥалмеке, Амир пелашыжым специальный военный операцийыш наҥгаеныт. Тений апрельыште пӧръеҥ сӧй пасуэш вуйым пыштен. Но капшым але мартеат шочмо мландыш конден тойымо огыл. Йӧратыме пелаш да ача Настя ден Амир Красный Стекловар посёлкышто палыме лийыныт – тунам Настя йолташ ӱдыржӧ дене пырля тушко уналыкеш толын улмаш. – Амирын поро да весела улмыжо иканаште кумылем савыреныт. Еҥ тӱшкаште шкенжым туге кучен моштен, тудым эре ончымет гына шуэш ыле. Икымше вашлиймаш деч вара телефон дене ятыр кутыренна, келшаш тӱҥалынна, сӱаным ыштенна. Кок икшывыланна эн сай ача лийын, – шарналта ӱдырамаш. Амир чоҥымо пашаште тыршен, бригаде дене пура-влакым нӧлтеныт. Настя ик жап Звенигово район Шолэҥерыш совхозыш пашаш кудалыштын. Вара шке посёлкысо школыш куснен, кызытат тушто поварлан пашам ышта. Амир Волковлан повестке 2022 ий октябрьыште толын. Настя шортын, а пӧръеҥ тидлан ямде лийын. Повесткым огыт колто гынат, мый шке кумылын порысем шукташ каем ыле манын каласен вараракшым пелашыжлан. Ульяновск олаште учебкым эртымеке, 2023 ий январь гыч – СВО кайыме верыште. Тылеч вара кок гана мӧҥгыжӧ отпускыш толын каен.

П. Итальева - "Россия" каналыште Шукерте огыл палыме да йӧратыме марий мурызо Полина Итальева "Россия-1" каналысе "Песни от всей души" передачышке миен. Вучена ты передачым, пырля погынен ончена. П.Итальеван альбомжо гыч фото.

Пилотын ораваже мардеж деч талын пӧрдеш 🚘 Шукерте огыл Грозный оласе «Крепость Грозная» автодромышто кольцевой гонкын иктешлыше йыжыҥже, Российын чемпионатше ден элнан кубокшо верч таҥасымаш-влак эртеныт. Тушто Марий Эл гыч Николай Калинин вийжым терген. Спортсмен Российын кубокшын ший призёржо лийын (кум тӱрлӧ дистанцийыште сеҥен). Тудын моштымашыжым аклен, «LADA Sport» компанийым вуйлатыше В.М.Незванкин Николайлан у LADA Granta Sport автомашина деч сравочым кучыктен. 💁‍♂🚙 Икымше гана – куд ияш – Мый изинек автоспортлан шӱман кушкынам. Ачамат ты спортлан кумылан, садлан тудын дене пырля чӱчкыдын автогонко-влакым ончаш кугу олалашке коштынна, тыгак квадроцикл, мотоцикл да моло транспорт дене кудалыштынна...

Слёт нуным чумырен 🤗 Татарстан Республикысе Рушарня да туныктымашке этнокультурный компонентым пуртымо школ-влакын слётышт Озаҥыште 16-18 октябрьыште лийын. «Байтик» тазалыкым пеҥгыдемдыме да туныктымо комплексыште 6-14 ияш 200 наре йоча погынен. Озаҥ оласе шуко национальностян Рушарня школын тунемшыже-шамычат ты слётыш кумылын ушненыт. Марий пӧлкаш коштшо ӱдыр-рвезе-влаклан тыгай мероприятий моткоч келшен. София Васильева, Вилена ден Арсений Матвеевмыт туныктышышт Алина Семёнова дене пырля шкешт дене палдареныт да мастарлыкыштым ончыктеныт веле огыл, тыгак шуко ум пален налыныт. Тӱрлӧ мастер-класс, Озаҥ мучко экскурсий, этнодискотеке тунемше-шамычлан поснак келшеныт. Туныктышо-шамыч, «йыргешке ӱстел» йыр чумырген, шочмо йылме дене туныктымо паша шотышто эксперт-влак дене каҥашеныт. 📸А.Семёнован альбомжо гыч налме фото.

Алсолашке – унала Алсола Морко велын ик эн сӧрал верыштыже верланен. Йырымваш мотор пӱртӱс. Памаш йоген эрта. Но чоным кочо шӱлыш авалта. Вет кап кӱкшыт марте куштыра кушкын шогалын. Илыдыме тошто сурт-влак йӧсланен ойганат. Ялыште кевытат уке. Самырык-шамычшат кодын огытыл манме гаяк. А илалше еҥын тазалыкше чоным ок вӱчкӧ, шонымо семын ошкыл колташ йол коршта. Ял урем дене эртетат, икмыняр пӧрт окна гыч веле чурийвылыш койылалта. Шукерте огыл Кораксола тӱвыра пӧртын пашаеҥже-влак Алсола ялыште илыше Татьяна Васильевна Афанасьева деке унала мийышна. Тудо ӱмыржӧ мучко «Авангард» колхозышто тыршен. Ятыр йӱштӧ-шокшым, шере-кочым чытен. Александр пелашыж дене кок икшывым ончен куштеныт. Елена ӱдырышт Курыкӱмбал ялыште ила, Володя эргышт – Морко посёлкышто. Татьяна Васильевна ондак пелаш деч посна кодын. А кызыт тудо Вячеслав Александрович Никифоров дене пырля шке илыш корныжым шуя. Пӧръеҥат уло ӱмыржым «Авангард» колхозлан пӧлеклен. Коктынат колхозышто сай пашаеҥ семын ойыртемалтыныт. Мемнан кутырымашке Эрик Ухов ушныш. Ты поро чонан айдеме Татьяна Васильевна ден Вячеслав Александровичлан вӱдым нумалын пуа, моло сомылланат полшаш эреак ямде. Шке оралтыжым пеш арун куча. Суртшо йыр чыла шудым солымо, нимогай куштыра уке. Татьяна Васильевнам Илалше-влакын кечышт дене саламлышна, пеледыш аршашым кучыктышна, а Вячеслав Александровичлан – шӱргышовычым. Кораксола ялын чолга мурызыжо-влак С.Н.Кириллова, Р.Н.Иванова, А.А.Силантьева Алсолашке пырля миеныт да шуко мурым суртоза-влаклан йоҥгалтарышт. Мый шкеже шиялтыш семым луктым, почеламутым лудым. Тыге ме, Кораксола тӱвыра пӧрт пашаеҥ-влак, кажне ийын Алсолашке унала коштына. Татьяна Васильевна ден Вячеслав Александрович мемнам эре шокшын вашлийыт да мийымынам вучат. Таза да пиалан лийза, шергакан да лишыл еҥна-влак! Елена Григорьева, Кораксола тӱвыра пӧрт вуйлатыше.

Марий Элысе калык-влакын ешышт ик ӱстел коклаште вашлийыныт 🙌 «Российысе марий-влак» ФНКА мер ушемлан ФАДН-ын еш йӱла межнациональный фестивальым эртараш субсидийым пуэныт. Кеч-могай ешын тӱҥ йӱлаже – шке калыкын кочкышыжо. 🥘 Йошкар-Олаште «Дело Вкуса» кулинарный студийыште казах, грузин, азербайджан, аварец, таджик, еврей, татар да марий-влак шке кочкышыштым ямдыленыт да вашла сийленыт. Марий Эл Республикын да Калык-влакын икоян улмо кечышт вашеш ты мероприятийым Еш идалыклан пӧлекленыт. 📸 Лариса Яковлеван лаштыкше гыч налме фото-влак.

«Марий паркым» пайремлын почыт🎢 👥 Марий калыкын XXII погынжо 31 октябрь гыч 2 ноябрь марте Йошкар-Олаште эрта. Тушко Российысе 20 регион гыч 440 утла делегат ден уна-влак толыт. 🎉Погын годым 1 ноябрьыште 9 шагатлан Марий паркым пайремлын почыт. Тидлан Марий тӱвыра рӱдер вуйын шога. Марий Элым Вуйлатыше Юрий Зайцев саламлымаш мутым каласа. «Марий Эл» кугыжаныш куштышо ансамбль, Российын сулло, Марий Эл Республикын калык артистше Иван Смирнов, мурызо-влак Вадим Краснов, Станислав Устюгов, гармоньчо Сергей Пакеев мурышт дене куандарат. ♻ «Илыме вер да оласе йырвел» нацпроектын «Оласе йырвелым йӧнаным ыштымаш» федеральный программыж почеш Марий паркым ыштыме. Совет жапыште Марий парк олан рӱдӧ верыштыже, Ленин садыште, верланен ыле. Тушто кугыжаныш да марий пайрем-влакым эртарыме, ӱдыр-рвезе-влак марла куштен-муреныт. Кызытат у каныме верыште тӱрлӧ шӧрынан меропрятийым эртараш, еш дене каналташ келшыше йӧным ыштыме.

🍪💟 Йошкар-Ола гыч тунемше «Шочмо эл мучко кулинар путешествий» Пӱтынь Российысе еш фотографий-влакын конкурсысо федерал этапын лауреатше лийын. Тудо «Чын питаний нерген мутланымаш» программыште ойыртемалтын. Йошкар-Оласе 15-ше номеран школын 2«Д» классыштыже тунемше София Аграновская ты конкурсышто ешыже да туныктышо-наставникше Ирина Геннадьевна Киселёва дене пырля «Марий колобок – Ӱяча» пашажым ончыктен. 👏 Софиям саламлена да тудлан умбакыжат усталык сеҥымашым тыланена! 📸 Минобрнауки Республики Марий Эл

☃ ❄ А 10 ий ончыч тиде кечын луман лийын. Тыгай кӱчык жапыште игече могай чот вашталт толын. 📅22 октябрь 2014 ий. 📸Петр Васильевын фотожо-влак.