Площадка йӹрвӓш Кырык мары районышты ӹлӹшӹвлӓн фотографиӓн дӓ цевер кырык сир природан баннервлӓм шагалтен кемӹ, а кӱшӹц шукы цӹреӓн гирляндывлӓм шыпшыл шӹндӹмӹ. А хына семӹнь ӱжмӹ семнявлӓлӓн шӹнзӓш стӧлвлӓм шӹнден кемӹ, кыдывлӓ вӹлкӹ ромашка – празньыкын символжы – пеледӹшӓн вазывлӓм вӓрӓнгдӹмӹ ылын. Анжаш толшывлӓм шотыш нӓлӹн, нӹнӹлӓнӓт концертӹм анжен шӹнзӓш тӧнгӹлвлӓм йӓмдӹлӹмӹ. Тетявлӓлӓн мадмы зоным ӹштӹмӹ, кышты шавынь шонгвлӓм колтыл, асфальтеш пор доно рисуен кердӹнӹт.
Празньык вӓрӹм пишок яжон тумаен олмыктарымы гишӓн паснаок пӓлдӹртӹмӹ шоэш. Хынавлӓм техень цевер вӓрӹштӹ вӓшлимӹ доно шукым ӧрӹктӓренӹт, тенгеӓт маныныт: «Шӹнзӹмӹ вӓрӹм пиш яжом йӓмдӹленӹт!»
Празньыкым В.Куприянов лӹмӓн Микрӓк тетя музыкальный школын кӓрш ансамбль пачын, вуйлатышыжы Мары Эл Республика культурын заслуженный пӓшӓзӹ Фелицата Эшметова. Вара Российӹн, Мары Элӹн дӓ Кырык мары районын гимнвлӓ йонгалтыныт.
Кымылангдаш шамакым Мары Эл Республика Правительствын пӹтӓришӹ заместитель Михаил Васютинлӓн пумы. Тӹдӹ 8 июль Святой пиш ӹнян ылшы Петр дон Феврони Муромскийвлӓм ӓштӹмӹ кечӹ семӹнь пӓлемдӓлтеш манын, кыдывлӓ ӹнян яратышы, шотан дӓ пуры йӓнгӓнвлӓ семӹнь ӓклӓлтӹт. Тагачы ти ӹнян пелӓш семня дон мыжырангмашын перегӹшӹвлӓжӹ ылыт.
«Лач семня мӓмнӓн ӹлӹмӓшнӓм пайдара, ӹнян палшыкна ылеш, тӹштӹ веле цӓш дон сусум шижӹнӓ, нелӹм сӹнген кердӹнӓ», – Михаил Зиновьевич манын.
Тенгеок Васютин шайыштын, махань палшыкым государство семнявлӓлӓн ӹштӓ, «Семья» у нацпроект доно пӓлдӓрен, кыды 2025 ин 1 январь гӹц ӹлӹмӓшкӹ пыра.
Нет комментариев