Пэўна, у гарадскім пасёлку Капаткевічы няма чалавека, які б не ведаў Ядвігу Суботка. Як дырэктар мясцовага Дома культуры і кіраўнік узорнага дзіцячага танцавальнага ансамбля “Верасок” Ядвіга Іванаўна добра вядома не толькі ў раёне, але і па-за яго межамі. Ведаюць яе землякі і яшчэ ў адной ролі – у якасці дэпутата выбарчай акругі № 8.
– На маім участку, — расказвае Ядвіга Іванаўна, — пражывае каля 170 чалавек. Людзей я ведаю, за трэці тэрмін свайго дэпутатства ведаю і іх праблемы. Не заўсёды, на жаль, маю магчымасць рэальна дапамагчы, але даношу пажаданні сваіх выбаршчыкаў да сельскага Савета.
Што тычыцца праблем, з якімі звяртаюцца да ўлады, то яны ў асноўным пераклікаюцца з агульнараённымі і абласнымі. Да самых злабадзённых можна аднесці стан дарожнага пакрыцця ў населеным пункце. Вырашаецца названае пытанне па меры матэрыяльных магчымасцяў: рэгулярна ў самых праблемных месцах ажыццяўляецца падсыпка і грэйдаванне. Ёсць і больш прыватныя звароты. Так, жыхары двух дамоў па вуліцы Міліярацыйнай папрасілі дапамогі ў наладжванні каналізацыйнай сістэмы. Зараз вядуцца рамонтныя работы. Сярод вырашаных – асвятленне вуліц: цяпер, дзякуючы пастаяннаму кантролю, своечасова замяняюцца перагарэлыя элементы.
Дэпутат увогуле паўстае своеасаблівым пасрэднікам паміж мясцовай уладай і насельніцтвам. Часам прыходзіцца дапамагаць старшыні сельсавета ў прыцягненні мясцовых жыхароў да добраўпарадкавання гарадскога пасёлка, даносіць да людзей новую інфармацыю. Зразумела, што да кожнага чалавека патрэбны свой падыход і павага.
Сесіі сельвыканкама, на якіх прысутнічаюць дэпутаты, адбываюцца раз у месяц. Апошні раз абмяркоўвалі лёс будынка былой школы-інтэрната. Гэта пытанне вельмі хвалюе насельніцтва. Ад лю-дзей паступаюць прапановы размясціць там спортзал для дарослых (зараз у гарпасёлку працуюць толькі школьныя), адкрыць новыя аб’яднанні па інтарэсах. Вырашаюцца на сесіях і іншыя пытанні: абсталяванне аўтобуснага прыпынку – мяркуецца, што там будзе лаўка, казырок і расклад руху транспарту, з пачаткам навучальнага года стала асабліва актуальна дзяжурства дружын.
З душой стараюся падыходзіць да сваёй непасрэднай работы – арганізацыі масавых святаў і іншых мерапрыемстваў, каб у жыцці маіх землякоў было больш радасці і пазітыву. Такім чынам, у бліжэйшы час плануецца сустрэча з маладымі выбаршчыкамі. Гэта ідэя ўзнікла ў час збору подпісаў: некаторыя маладыя людзі выказалі радасць і гонар у сувязі з дасягненнем паўналецця і ўступленнем у свае грамадзянскія правы, асноўным сярод якіх яны лічаць права галасавання на выбарах Прэзідэнта Рэспублікі Беларусь.
Ірына Занкевіч.
Фота аўтара.
Присоединяйтесь к ОК, чтобы подписаться на группу и комментировать публикации.
Комментарии 51