Предыдущая публикация
У гэты дзень, 1 жніўня 2019 года, на коласаўскай сцэне адбылася прэм’ера спектакля «ЯШЧЭ РАЗ ПРА КАХАННЕ» паводле апавяданняў Васіля Шукшына «Раскас», «Сцёпкава каханне», «Бяспальцы», «Боцікі», «Восенню».
Інсцэніроўка, пастаноўка і музычнае афармленне заслужанага дзеяча мастацтваў Расіі Юрыя Пахомава. Мастак-пастаноўшчык – Андрэй Жыгур. Пластыка і харэаграфія Дзіяны Юрчанка. Пераклад на беларускую мову Алеся Замкоўскага.
Героі пастаноўкі – звычайныя жывыя людзі, якія адчуваюць і адкрыта паказваюць пяшчоту, неўтаймоўную жарсць, спачуванне, здраду, душэўныя пакуты – усё па-сапраўднаму. Усё аб’яднана адной тэмай – каханне. Яно не заўсёды шчаслівае, можа быць неразважлівым і рэзкім, можа ацвярэзіць і нават забіць, але заўжды будзе жывым і жаданым.
Рэжысёр Юрый Пахомаў стварыў на сцэне блізкую, даверлівую размову артыстаў з гледачом. Паказвае кранальныя жыццёвыя карціны, напоўненыя ўнікальным гумарам, прастатой і самабытнасцю.
Артысты-коласаўцы выконваюць у спектаклі па некалькі роляў і мяняюць іх не адзін раз: апавядальнікі пераўтвараюцца ў герояў, галоўныя персанажы – у эпізадычных. У зразумелых кожнаму вобразах Шукшына можна лёгка пазнаць сябе, сваіх суседзяў, сяброў, калег, з кім штодня сустракаешся ў краме, транспарце, на працы.
І хаця атмасфера спектакля захоўвае прыкметы 60-70-х гадоў, але тэма пастаноўкі – па-за часам. Інтанацыі і прызнанні чыстай любові, безумоўна, цікавыя і сучаснай моладзі, і старэйшаму пакаленню.
Следующая публикация
Нет комментариев