І яны не маўчалі і не змаўкалі на працягу некалькіх гадзін. Я кажу пра конкурс “Спас – усяму час”, які адбыўся ў рамках свята “Макавей” на Блакітнай крыніцы ў Слаўгарадскім раёне.
Нямала аматараў народнай і фальклорнай песні сабраў гэты конкурс з розных раёнаў Магілёўскай вобласці.
Народную песенную спадчыну Краснапольскага раёна прадстаўляў ансамбль народнай песні “Спадчына” Пачапоўскага СДК.
Трыа ансамбля выступіла ў намінацы “Лепшая фальклорная група” з вынікам дыпламанта 2 ступені.
Выдатны вынік! Яно і зразумела – спявачак вылучае прыгажосць і чысціня галасоў, захаванне асаблівасцей народнага вакала, і, канешне, любоў да народнай спадчыны.
Кіраўнік ансамбля Людміла Каратцова ў намінацыі “Лепшы індывідуальны выканаўца народнай песні” стала дыпламантам 2 ступені. З песняй Людміла сябруе даўно, умела падбірае песні пад свой характар, пад асаблівасці свайго голасу і спявае з любоўю і задавальненнем. Задавальненне ад яе спеваў атрымлівае і кожны яе слухач.
Салістка ансамбля, носьбіт аўтэнтычных песень, Ніна Яцутка у намінацыі “Лепшы саліст-фалькларыст” адзначана дыпломам 1 ступені. Нагадваю, што гэта спявачка 8 жніўня адзначыла сваё 80-годдзе. Які добры адметны падарунак сваёй перамогай у конкурсе зрабіла яна і сабе самой, і ўсем нам! Яе спяванне чаруе і заварожвае, а яе песні хочацца не проста слухаць, а яшчэ і ўслухоўвацца ў іх і разам са спявачкай пераносіцца ў далёкій і дзівосны свет нашых продкаў. Пераносіцца і нейкім незразумелым чынам адчуваць з гэтым светам сваю настальгічную роднасць. Не! Пра гэта трэба не гаварыць – гэта трэба чуць! Чуць, слухаць і самім спяваць - далучацца да сваіх каранёў.
Таму ДУК “ЦКС Краснапольскага раёна” запрашае аматараў народнай песні з любых куточкаў Прыдняпроўя на фестываль-конкурс народнай творчасці “Песня маці і сёння жыве”, які адбудзецца 24 жніўня ў 11.30 на адкрытай пляцоўцы гарадскога сквера.
Давайце збяромся разам, абудзім галасы стагоддзяў, атрымаем асалоду матчынай мовы, каб не згубілася сваё ў чужым, каб не забыліся мы, хто мы такія, каб жывое пакінуць жывым.
ВАЛЯНЦІНА МАРЧАНКА
Присоединяйтесь к ОК, чтобы подписаться на группу и комментировать публикации.
Комментарии 5