Предыдущая публикация
УНІКАЛЬНЫ НОСЬБІТ АЎТЭНТЫЧНАГА ФАЛЬКЛОРУ
ЖЫВЕ НА КРАСНАПОЛЬШЧЫНЕ
Унікальны носьбіт аўтэнтычнага фальклору – гэта пра яе, пра Ніну Фядосаўну Яцутка, жыхарку вёскі Пачапы, удзельніцу ансамбля народнай песні “Спадчына” Пачапоўскага СДК.
8 жніўня Ніне Фядосаўне спаўняецца 80 гадоў. Даволі доўгі шлях жыцця. Жыцця, напоўненага пакутамі і радасцю, стратамі і знаходкамі. І ўсё ж – жыцця шчаслівага! Так ацэньвае яго сама гэта жанчына.
“На жыццё нельга скардзіцца – навогул! Радуйся, што бог пусціў цябе на гэты свет, жыві і ў меру сваіх сіл упрыгожвай яго”, - гэта пазіцыя Ніны Фядосаўны.
І сапраўды ў гэтай жанчыны так усё і атрымліваецца – жыць прыгожа!
І адзін са складнікаў такога жыцця – яе еднасць, злучанасць з песняй. Праз усё жыццё праносіць яна бясхітрасныя і разам з тым унікальныя фальклорныя песні. Іх нямала пераняла яна ад вясковых жанчын у вёсцы свайго дзяцінства і маладосці. Ды яна не проста жыве з гэтымі песнямі, спяваючы іх і дома, і “на людзях”, а яшчэ з задавальненнем і нястомна перадае іх. А заўзятыя пераемнікі – вось яны, тут як тут.
На працягу 30 гадоў стабільна і плённа засвойвае і папулярызуе народную песню вясковы ансамбль народнай песні “Спадчына” мясцовага СДК. Тут, як кажуць, “усё і зраслося” – на сённяшні час ёсць тут невычэрпны рэпертуар жывога носьбіту фальклору Н. Ф. Яцутка, ёсць таленавіты кіраўнік ансамбля Л. Я. Каратцова, ёсць сапраўдныя аматары роднай песні - Н. Паплыка, В. Жукава, Н. Дударава.
Ансамбль народнай песні “Спадчына” жыве насынаным творчым жыццём – напрацоўвае рэпертуар, удасканальвае выканальніцкае майстэрства, ладзіць канцэрты, сваімі выступленнямі ўпрыгожвае розныя тэматычныя праграмы і святы, прымае ўдзел у фестывалях і конкурсах свайго раёна і за яго межамі. І заўсёды ў саставе калектыву можна бачыць Н. Ф. Яцутка.
“Здаецца, час не падуладны над ёй – яна застаецца такой жа спрытнай, вясёлай, лёгкай на ўздым. Мы не ўяўляем свой калектыў без яе. Ад яе мы вучымся і з задавальненнем пераймаем яе песні, якія прайшлі праз гады, і якія мы павінны захаваць і перадаць далей у ланцугу пакаленняў”, - дзеліцца Л. Я. Каратцова, кіраўнік ансамбля “Спадчына”.
Песні, захаваныя Н. Ф. Яцутка, песні, якія ансамбль пераймае з яе вуснаў, - унікальныя песенныя жамчужыны. Дзякуючы такому фальклорнаму матэрыялу ансамбль “Спадчына” мае сваю адметнасць і непаўторнасць.
Хочацца пажадаць Ніне Фядосаўне добрага здароўя і доўгага жыцця, светлых пачуццяў у душы, спагады і поспехаў у родным спеўным калектыве. А яшчэ хочацца нізка пакланіцца гэтаму чалавеку, на першы погляд сціпламу і звычайнаму. Пакланіцца за той важкі ўнёсак, які яна зрабіла і нястомна робіць у справу захавання і папулярызацыі традыцыйнай культуры свайго рэгіёна – Краснапольшчыны.
Са святам Вас, Ніна Фядосаўна! З 80-годдзем!
ВАЛЯНЦІНА МАРЧАНКА,
метадыст Краснапольскага РЦК
Следующая публикация
Комментарии 3