Дареғо, хуррамӣ аз кӯчабоғи зиндагонӣ рафт,
Ҳама зебогиҳои фасли умру бехазонӣ рафт.
Ба вайронӣ бидод селоби ҳасрат мазраъи дилро,
Зи сина гӯиё, ки як ҷаҳони бекароне рафт.
Чи зебо буд ҳама он бозиву сармастиву шӯхӣ,
Нишон аз лаҳзаҳои бесариву бенишонӣ рафт.
Кунун ҷуз аспи чӯбин дар хаёли мо чи меояд?
Таманнои саманду орзӯи рахшронӣ рафт.
Тавону бозуи моро, ки аз дасти фалак бишкаст,
Маҷоли Рустамиву майлу шавқи паҳлавонӣ рафт.
Муродӣ, соати бигзашта ҳаргиз барнамегардад,
Шикоят то бакай, ҳар ончи омад як замоне рафт.
МУРОДИИ ХАТЛОНӢ 22.08.2020
-------------------------------------------------------
***** Дар шакли мустазод *****
Дареғо, хуррамӣ аз кӯчабоғи зиндагонӣ рафт, ҷавонӣ рафт.
Ҳама зебогиҳои фасли умру бехазонӣ рафт,
ҷавонӣ рафт.
Ба вайронӣ бидод селоби ҳасрат мазраъи дилро, ҳазор афсӯс,
Зи сина гӯиё, ки як ҷаҳони бекароне рафт, ҷавонӣ рафт.
Чи зебо буд ҳама он бозиву сармастиву шӯхӣ, дареғо зуд,
Нишон аз лаҳзаҳои бесариву бенишонӣ рафт, ҷавонӣ рафт.
Кунун ҷуз аспи чӯбин дар хаёли мо чи меояд, намедонам,
Таманнои саманду орзуи рахшронӣ рафт, ҷавонӣ рафт.
Тавону бозуи моро, ки аз дасти фалак бишкаст, ку дармоне?
Маҷоли Рустамиву майлу шавқи паҳлавонӣ рафт, ҷавонӣ рафт.
Муродӣ, соати бигзашта ҳаргиз барнамегардад, мадоро кун!
Шикоят то бакай, ҳар ончи омад як замоне рафт, ҷавонӣ рафт.
МУРОДИИ ХАТЛОНӢ 22.08.2020
Присоединяйтесь к ОК, чтобы подписаться на группу и комментировать публикации.
Комментарии 2