Предыдущая публикация
АРМАНДУУ СҮЙҮҮ
Жигит.
Көп жыл күтүп, көп убакыт издепмин,
Кайгы, муңду, капарыма илбепмин.
Кезиктирип алган менен өзүңдү,
Кечигип мен калаарымды билбепмин.
Кыз.
Сарсанаага, батып сизди күтүпмүн.
Сагыныпмын, туткунунда үмүттүн.
Сары ооруга кабыларым билбестен.
Сүйүүнү мен жеңил го деп жүрүпмүн.
Жигит.
Жаным кейип, канча азап жебедим.
Жетемин деп, бир өзүңө дегдедим.
Жүрөк ооруп калды эми билгенде,
Жолугуунун арты арман экенин.
Кыз.
Мен да сиздей, сыздап жүрөм ичимен,
Муңга батып дем кыстыгып демигем.
Муңдуу болуп баратамын түнөрүп,
Мен деп күйөр, айрылганда кишимен.
Жигит.
Оолуга албай, баратамын картайып,
Ооруп турам өңдөн азып саргайып.
Оо арман күн, азап тура ашыктык,
Ойлорум да туш тарапта чар жайыт.
Кыз.
Аргасызмын, мен да жүрөм муңайым.
Ал сыноону берген мага кудайым.
Арманымдан терең чөгүп баратам,
Агатайым, дайым тартып убайым.
Жигит.
Сыгылбагын, бекер азап жебегин.
Сабырдуу бол, жашоо жеңил дебегин.
Сагынычка батып өмүр кечирем,
Сүйүү билбейм канча азап берээрин.
Кыз.
Унутпаңыз, тагдыр бизди кошподу,
Узак жолдо жолубуз бир болбоду.
Ушунчалык баттым ага арманга
Унутпаймын бирге баскан жолдорду.
Жигит.
Жүрбөйлү биз, мейли эми арманда,
Жанаша албай, бул өмүрдө калганга.
Жолуңду сен тандап кеттиң жарыгым,
Жеңилбеймин мен да эми арманга.
Жашай берем, медер кылып ар убак,
Жүрөгүмө сени сактап калганга.
Автор: Жыргалбек Усенов 01.08.2024.
22:42 Москва
Следующая публикация
Комментарии 3