Предыдущая публикация
Минея, 25 Января, Канон
Глас 4
Песнь 1
Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.
Припев: Преподо́бне о́тче Моисéе, моли́ Бо́га о на́с.
Иису́су: Отве́рзи устне́ мои́, Го́споди, и просвети́ смы́сл мо́й омраче́нный, разреши́ ю́зу язы́ка моего́, я́ко да све́тле и ра́достне восхвалю́ до́бляго святи́теля Моисе́я, Твоего́ уго́дника.
Припев: Преподо́бне о́тче Моисéе, моли́ Бо́га о на́с.
А́ще и не красно́ приноси́мое тебе́ пе́ние, но от усе́рдия приими́, о́тче, я́коже две́ ца́ты вдови́цы прия́т Христо́с, и не лише́на мя́ сотвори́ твои́х даро́в, и согреше́нием мои́м испроси́ проще́ние твои́ми к Бо́гу моли́твами.
Сла́ва Отцу́ и Сы́ну и Свято́му Ду́ху.
Блага́го Бо́га подража́тель бы́л еси́, преблаже́нне Моисе́е, милосе́рдие к ни́щим и любо́вь нелицеме́рну ко все́м стяжа́в, помина́я и де́лом показу́я рече́нная: возлю́биши и́скренняго твоего́, я́ко са́м себе́.
И ны́не и при́сно и во ве́ки веко́в. Ами́нь.
Богородичен: Всепе́тая Богоро́дице, Я́же Всеми́лостиваго Бо́га ро́ждшая, ду́шу мою́, омраче́нную бесо́вскими прило́ги, просвети́, Всенепоро́чная, и ума́ моего́ я́звы уврачу́й, и заступи́ мя́, я́ко да по достоя́нию сла́влю Тя́.
Песнь 3
Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.
Припев: Преподо́бне о́тче Моисéе, моли́ Бо́га о на́с.
Го́спода своего́ во́лю сотвори́в, сугу́б тала́нт приобре́л еси́, сего́ ра́ди благи́й о́н слы́шиши гла́с: до́брый ра́бе и ве́рный, вни́ди в ра́дость Го́спода твоего́.
Припев: Преподо́бне о́тче Моисéе, моли́ Бо́га о на́с.
Душе́вную чистоту́ стяжа́в, без нея́же никто́же у́зрит Го́спода, Моисе́е, о́тче на́ш, стра́сти окая́нныя души́ моея́ и сла́сти теле́сныя утоли́ моли́твами твои́ми.
Сла́ва Отцу́ и Сы́ну и Свято́му Ду́ху.
Христу́ Бо́гу производя́щу тя́ на лу́чшая, мирска́я вся́ оплева́л еси́ и, благи́й яре́м на ра́мо взе́м, усе́рдно Тому́ после́довал еси́.
И ны́не и при́сно и во ве́ки веко́в. Ами́нь.
Богородичен: Живо́т ро́ждшая составны́й, Де́во Всенепоро́чная, се́рдца моего́ стру́пы исцели́ хода́тайствы Твои́ми, е́же к Сы́ну Твоему́, Богоблагода́тная.
Седален, глас 1
Разу́мнаго адама́нта, до́бляго святи́теля, Моисе́я днесь, ве́рнии, почти́м,/ све́тло пра́зднующе всечестну́ю па́мять его́,/ той бо моли́твами свои́ми к Бо́гу/ от свои́х многоцеле́бных моще́й подава́ет нам неоску́дно исцеле́ния исто́чник,/ велегла́сно нас науча́я Христо́ви вопи́ти:/ прославля́яй святы́х Твои́х, Го́споди, сла́ва Тебе́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Спасе́ния на́шего Хода́таица Ты яви́лася еси́, Всенепоро́чная,/ ду́шу мою́ окая́нную изба́ви бесо́вскаго мучи́тельства/ и пода́ждь ми прегреше́ний очище́ние:/ ра́зве бо Тебе́, раби́ Твои́, не име́ем помо́щницы.
Песнь 4
Ирмос: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.
Припев: Преподо́бне о́тче Моисéе, моли́ Бо́га о на́с.
Зе́льных ра́ди поще́ний, и моли́тв непреста́нных, и чистоты́ серде́чныя всели́ся в тя́ Христо́с, преблаже́нне святи́телю Моисе́е, на Него́же наде́жду всю́ возложи́л еси́.
Припев: Преподо́бне о́тче Моисéе, моли́ Бо́га о на́с.
Земна́я отри́нув, небе́сная насле́довал еси́, от си́лы бо в си́лу восходя́, к преми́рному Ца́рствию пресели́лся еси́, иде́же терпе́ния ра́ди твоего́ угото́вася ти́ вене́ц нетле́нный и ве́чное весе́лие.
Сла́ва Отцу́ и Сы́ну и Свято́му Ду́ху.
Изволе́нием Бо́жиим и избра́нием по́стников сосло́вия па́стырь поставля́ешися и наста́вник, и́же ко спасе́нию, вводя́ ста́до твое́ во огра́ду небе́сную.
И ны́не и при́сно и во ве́ки веко́в. Ами́нь.
Богородичен: И ражда́еши, и де́вствуеши, Де́во Всенепоро́чная, иску́са бо му́жеска не прие́мши, родила́ еси́ Бо́га воплоще́нна, Его́же моли́ о пою́щих Тя́.
Песнь 5
Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Припев: Преподо́бне о́тче Моисéе, моли́ Бо́га о на́с.
Кре́пко вооружи́вся на неви́димыя враги́, я́коже тве́рдый адама́нт, вы́я и́х сокруши́л еси́, го́рдостная шата́ния утоли́л еси́, Го́споду тя́ прославля́ющу.
Припев: Преподо́бне о́тче Моисéе, моли́ Бо́га о на́с.
От лука́вых бесо́в ла́яния ста́до твое́ сохраня́я, и́стиннаго Па́стыря — Христа́ — и́стинный учени́к бы́л еси́, святи́телю Моисе́е, сего́ ра́ди избра́нием первосвяти́теля Петра́ наме́стник блаже́ннаго святи́теля Иоа́нна в це́ркви Прему́дрости Бо́жия устроя́ешися.
Сла́ва Отцу́ и Сы́ну и Свято́му Ду́ху.
Ми́лостивно наказу́я, о́тче, о Христе́ поруче́нное тебе́ ста́до, упа́сл еси́ на па́житех зако́на живоно́снаго: тобо́ю бо о́браз показа́л еси́, возвеща́я пу́ть ко спасе́нию и е́же от злы́х премене́нию.
И ны́не и при́сно и во ве́ки веко́в. Ами́нь.
Богородичен: На́шего спасе́ния Хода́таица Ты́ яви́лася еси́, Всенепоро́чная, ду́шу мою́ окая́нную изба́ви бесо́вскаго мучи́тельства и пода́ждь прегреше́нием очище́ние: ра́зве бо Тебе́, раби́ Твои́, не и́мамы помо́щницы.
Песнь 6
Ирмос: Да не погрузи́т мене́ бу́ря водна́я, ниже́ пожре́т мене́ глубина́, отве́ржен бо е́смь во глубины́ се́рдца морска́го зо́л мои́х. Те́м зову́, я́ко Ио́на: да взы́дет от тли́ зо́л живо́т мо́й к Тебе́, Бо́же.
Припев: Преподо́бне о́тче Моисéе, моли́ Бо́га о на́с.
Зли́и челове́цы приидо́ша ко оби́тели, в не́йже твое́ честно́е те́ло положе́но бы́сть, святи́телю Моисе́е, не ве́дуще, я́ко ты́ заступа́еши ста́до твое́ и по отше́ствии твое́м от жития́ твоего́. Ты́ же, еди́наго коего́ждо и́х, ми́лостивно наказа́в, на пу́ть пра́вый наста́вил еси́.
Припев: Преподо́бне о́тче Моисéе, моли́ Бо́га о на́с.
Почто́ совеща́етеся, зли́и, ка́ко дерзну́сте умы́слити зла́я на оби́тель мою́? — святи́тель Моисе́й глаго́лаше. — Или́ не ве́сте си́лы непобеди́маго воево́ды Госпо́дня, вели́каго арха́нгела Михаи́ла? А́ще не пока́етеся, то́ вси́ зде́ лю́те поги́бнете. — Они́ же, с пла́чем и слеза́ми пока́явшеся тебе́ и ви́девше тя́, моля́щася о ни́х, Бо́гу хвалу́ возсыла́ху.
Сла́ва Отцу́ и Сы́ну и Свято́му Ду́ху.
Ра́зум от Бо́га прии́м, благочести́выя па́че приводя́ к благоразу́мию, нечести́вым же уста́ загражда́я, Моисе́е святи́телю: го́рдостнаго бо епи́скопа, бы́вша во оби́тели твое́й и уничижи́вша тя́, ума́ отъя́тием смири́в, во святи́тельстве непотре́бна сотвори́л еси́.
И ны́не и при́сно и во ве́ки веко́в. Ами́нь.
Богородичен: Святе́йшая херуви́м и серафи́м яви́лася еси́, Пречи́стая, Зижди́теля бо и́х несказа́нно родила́ еси́, не опа́льшися огне́м Божества́, и ны́не блажа́т Тя́ вси́ ро́ди, я́коже прорекла́ еси́, Всепе́тая.
Кондак, глас 3
Я́ко венце́м пресве́тлым украси́вся дне́сь, вели́кий Новгра́д лику́ет в па́мять па́стыря своего́ и учи́теля, и, я́ко диади́му ца́рскую возложи́вши, честна́я о́на оби́тель све́тло ра́дуется: просла́ви бо тя́ Бо́г, уго́дника Своего́, и прояви́ после́днему ро́ду на́шему цельбоно́сныя мо́щи твоя́, святи́телю Моисе́е, Це́рковь же Бо́жия весели́тся, созыва́ющи и́нок сосло́вие велегла́сно вопи́ти: ра́дуйся, гра́ду твоему́ и оби́тели похвало́ и всея́ Росси́йския страны́ пресве́тлый свети́льниче.
Икос
Я́ко из мра́чна о́блака пресве́тлая звезда́ возсия́, та́ко ны́не от вели́каго Новагра́да небе́снаго Ца́рствия граждани́н произы́де, вели́кий Моисе́й, и все́х озари́ чуде́с луча́ми, и́же с ве́рою приходя́щих к цельбоно́сному его́ гро́бу и любе́зно целу́ющих ра́ку моще́й его́, ю́же и мы́, обстоя́ще, дне́сь серде́чною любо́вию ве́рно возопии́м: ра́дуйся, я́ко от мла́дости Бо́гу порабо́тал еси́; ра́дуйся, я́ко мирска́я вся́ оплева́л еси́; ра́дуйся, я́ко Христо́в яре́м на ра́мо взе́м, усе́рдно Тому́ после́довал еси́; ра́дуйся, я́ко вруче́нное тебе́ ста́до до́бре упа́сл еси́; ра́дуйся, я́ко престо́лом наме́стник бы́в блаже́ннаго Иоа́нна, того́ стопа́м после́довал еси́; ра́дуйся, Прему́дрости Бо́жия престо́л украси́вый; ра́дуйся, чудесы́ гра́д сво́й озари́вый; ра́дуйся, ни́щих и а́лчущих пита́телю; ра́дуйся, сирота́м печа́льным и вдови́цам утеше́ние; ра́дуйся, я́ко спа́сл еси́ му́жа, от потопле́ния водна́го погря́знути уже́ хотя́ща; ра́дуйся, я́ко того́же сохрани́л еси́ от иноплеме́нных разбо́йник; ра́дуйся, засту́пниче гра́ду твоему́ и все́м, живу́щим в не́м, и моли́твенниче те́плый ко Влады́це Христу́ Бо́гу; ра́дуйся, па́стырю до́брый, во все́м подража́яй Влады́це твоему́, Его́же моли́ о чту́щих святу́ю па́мять твою́, да вси́ в весе́лии се́рдца вопие́м ти́: ра́дуйся, святи́телю Моисе́е, вели́кому Новугра́ду похвало́ и всея́ Росси́йския земли́ пресве́тлый свети́льниче.
Песнь 7
Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.
Припев: Преподо́бне о́тче Моисéе, моли́ Бо́га о на́с.
Терпе́ния ра́ди твоего́ и му́жества возлюби́ тя́ И́же над все́ми су́щий Бо́г и чудесы́ обогати́л тя́ е́сть, пою́ща: препе́тый Го́споди, Бо́же оте́ц, благослове́н еси́.
Припев: Преподо́бне о́тче Моисéе, моли́ Бо́га о на́с.
Устроя́ет тя́ Госпо́дь Це́ркви Своея́ архиере́я, слове́сным овца́м па́стыря всеизря́дна, ты́ же, прему́дре Моисе́е, святи́тельства па́ству прии́м, в бо́льшия по́двиги вда́лся еси́, Христо́ви поя́: препе́тый Го́споди, Бо́же оте́ц, благослове́н еси́.
Сла́ва Отцу́ и Сы́ну и Свято́му Ду́ху.
Уже́ погря́знути хотя́ше во глубине́ во́дней, его́же ты́, святи́телю, а́бие от потопле́ния спа́сл еси́, под ру́це подъе́мля и держа́, до́ндеже па́ки прия́ша его́ в ладию́. Та́кожде и мене́, погря́знути хотя́ща в ти́не беззако́ний мои́х, спаси́, и соблюди́, и умоли́ Влады́ку Христа́, да прии́мет мя́ в ве́чныя жи́зненныя кро́вы, пою́ща: препе́тый Го́споди, Бо́же оте́ц, благослове́н еси́.
И ны́не и при́сно и во ве́ки веко́в. Ами́нь.
Богородичен: Фарисе́йскаго бу́яго киче́ния ненави́дети ми́ сотвори́, Богоро́дице, и мытаре́ву смире́нию поревнова́ти сподо́би, умоли́, Его́же родила́ еси́, Христа́, да просвети́т ду́шу мою́ омраче́нную и лю́таго паде́ния изба́вит, я́ко да во явле́нии сла́влю Тя́, Всенепоро́чная, Сы́ну Твоему́ вопия́: препе́тый Го́споди, Бо́же оте́ц, благослове́н еси́.
Песнь 8
Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.
Припев: Преподо́бне о́тче Моисéе, моли́ Бо́га о на́с.
Хра́м Свято́му Ду́ху, святи́телю Моисе́е, сотвори́л, и са́м во оби́тель Тому́ бы́л еси́, те́мже и на́с моли́твами твои́ми селе́ния Ему́ соде́лай и от вся́ких напа́стей и озлобле́ния изба́ви, я́ко да пое́м в ра́дости се́рдца: благослови́те, вся́ дела́ Госпо́дня, Го́спода.
Припев: Преподо́бне о́тче Моисéе, моли́ Бо́га о на́с.
Отве́рзи на́м ра́йский вхо́д моли́твами твои́ми, святи́телю Моисе́е, и не пре́зри на́с в ско́рбех мно́зех, тебе́ бо засту́пника гра́ду твоему́ живу́щии в не́м, и́мамы, я́ко да в ра́дости се́рдца пое́м: благослови́те, вся́ дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху.
Царю́ Небе́сному Влады́це и Бо́гу моля́ся, гряду́щаго ку́плю де́яти от потопле́ния и от разбо́йник спа́сл еси́, по́мощь име́я и заступле́ние Бо́жия Ма́тере. То́й бо не ве́дяше, кто́ е́сть спаса́яй его́, до́ндеже ты́, святи́телю Моисе́е, яви́вся ему́ в то́нце сне́, сказа́л еси́, я́ко тобо́ю сотвори́ Бо́г избавле́ние ему́, и запове́дал еси́ сотвори́ти покро́в на честне́й ра́це твое́й. О́н же в ра́дости повеле́нная тобо́ю сотвори́, поя́ Го́сподеви: благослови́те, вся́ дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Богородичен: Чи́стая и Сла́вная Влады́чице, Ма́ти Бо́га Вы́шняго, щедро́ты низпосли́ на́м от неистощи́мых сокро́вищ Твои́х и пода́ждь в ну́ждах терпе́ние, да в весе́лии пое́м: благослови́те, вся́ дела́ Госпо́дня, Го́спода.
Песнь 9
Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.
Припев: Преподо́бне о́тче Моисéе, моли́ Бо́га о на́с.
Ше́ствовати на́с сотвори́ во сле́д сохрани́вших за́поведи Бо́га на́шего, и спаси́ моли́твами твои́ми, святи́телю Моисе́е, па́стырю и учи́телю на́ш, от все́х зо́л, находя́щих на ны́, и наста́ви на пу́ть живота́, моля́ся о на́с Человеколю́бцу Бо́гу и Спа́су ду́ш на́ших.
Припев: Преподо́бне о́тче Моисéе, моли́ Бо́га о на́с.
Ще́драго Человеколю́бца Бо́га моли́ о на́с, па́стырю на́ш до́брый, тезоимени́тый Богови́дцу, святи́телю Моисе́е: и́мать бо послу́шати Ма́тере Своея́, Засту́пницы гра́да на́шего, и твои́х пречестны́х моле́ний и поми́лует на́с.
Сла́ва Отцу́ и Сы́ну и Свято́му Ду́ху.
Ле́гко, я́коже оре́л крило́ма, на небе́сную высоту́ дости́гл еси́ и терпе́ния и чи́стаго ра́ди жития́ твоего́ по́честь прия́л еси́ от Мздовоздая́теля, и ны́не Госпо́дь яви́ на́м цельбоно́сныя мо́щи твоя́, точа́щия исцеле́ния с ве́рою приходя́щим. Те́мже мо́лим тя́, святи́телю Моисе́е: помяни́ на́с, и́же ве́рою чту́щих тя́ и достодо́лжно ублажа́ющих тя́.
И ны́не и при́сно и во ве́ки веко́в. Ами́нь.
Богородичен: Из пречи́стых ложе́сн Твои́х про́йде у́мное Со́лнце, Богоро́дице, просвеща́я и́же во тме́ седя́щих, омраче́нныя неве́дением, и приводя́ к све́ту богоразу́мия, страда́вшим Его́ ра́ди нетле́нныя венцы́ подава́я и ве́чное ра́дование. Его́же моли́ о на́с, Влады́чице, не лиши́ти на́с десна́го стоя́ния в ча́с испыта́ния, да Тя́ вси́ велича́ем.
Светилен
Ско́ро предвари́, святи́телю Моисе́е, ве́рным побо́рниче, и Христа́ Бо́га умоли́ покори́ти под но́зе Импера́тору на́шему иноплеме́нныя язы́ки, да навы́кнут сла́вити Святу́ю Тро́ицу; на́с же, чту́щих твою́ святу́ю па́мять, спаса́й от вся́каго зла́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Всеблага́я Влады́чице,/ я́же Ще́драго Бо́га пло́тию ро́ждшая,/ поми́луй нас, озло́бленных прило́ги лука́ваго,/ и устра́ншихся за́поведей Сы́на Твоего́ и Бо́га на́шего,/ и греху́ порабо́тивших себе́,/ Свои́м хоте́нием привлецы́, Пречи́стая, к повеле́нием Бо́жиим/ и не лиши́ нас ве́чнаго наслажде́ния моли́твами Твои́ми
.........
Кондак 1
Избранный чудотворче, скорый заступниче и молитвенниче о душах наших, святителю Христов Моисее, яко имеяй дерзновение ко Господу, от всяких нас бед свободи, да зовем ти:
Радуйся, святителю Моисее, похвало Церкве Христовы и великий чудотворче.
Икос 1
Ангела тя земнаго и человека небеснаго прославляем вси: от земных бо к небесным восходя чистыми помыслы, достоин явился еси служитель велений Божиих. И ныне, предстоя Престолу Святыя Троицы, не престай моляся о вопиющих ти:
Радуйся, богозарный свете, освещающий нас.
Радуйся, благочестия наставниче.
Радуйся, от юности возлюбивый Бога всем сердцем твоим.
Радуйся, яко Ему единому работати возжелел еси.
Радуйся, вся красная мира сего нивочтоже вменивый.
Радуйся, яко заповедем Христовым от юности последовал еси.
Радуйся, цвете благоуханный.
Радуйся, розго вертограда Христова.
Радуйся, свято и богоугодно на земли поживый.
Радуйся, яко подвигом добрым зде подвизался еси.
Радуйся, граду нашему добрый пастырю.
Радуйся, провозвестниче людем спасения.
Радуйся, святителю Моисее, похвало Церкве Христовы и великий чудотворче.
Кондак 2
Видим тя, святителю Моисее, яко звезду мысленно возсиявшую на тверди Церковней, и всех направляющую к высоте благочестия, поющих Богу: Аллилуиа.
Икос 2
Разум боголюбивый стяжав, о мирстей красоте и плоти мудрованиих небрегл еси: сего ради оставив отечество твое, Великий Новград, и во граде Тфери иноческий образ восприимь, ангельскому житию непорочно поревновал еси и даров благодати Духа Святаго исполнился еси. Темже радостию взываем ти:
Радуйся, премудрости Божия сокровище.
Радуйся, воздержанием умертвивый плотския страсти.
Радуйся, яко благими нравы от юности прилепился еси Христу.
Радуйся, глаголов и законов Божиих исполнителю.
Радуйся, яко в пощениих и бдениих и молитвах житие твое провождал еси.
Радуйся, мирская треволнения, яко леностный сон, отрясый.
Радуйся, яко добродетелей ради твоих освяти тя Христос.
Радуйся, твердый адаманте, сокрушаяй гордыню врагов спасения нашего.
Радуйся, яко ведущими к небеси божественными стезями бодренно шествовал еси.
Радуйся, яко от зле ведущих путей до конца уклонился еси.
Радуйся, монашескаго послушания светлый облаче.
Радуйся, ангельски во плоти поживый.
Радуйся, святителю Моисее, похвало Церкве Христовы и великий чудотворче.
Кондак 3
Силою Вышняго утверждаяся, блаженне отче, во святем жительствовании, яко чадо послушания пребывал еси во обители преподобнаго Макариа Колмовскаго и день и нощь поучался еси в законе Господни, воззывая всех пети Богу: Аллилуиа.
Икос 3
Имея любовь божественную и высотою смирения украшаемь, был еси яко звезда путеводная многим и начальник священнаго собора иноков, наказуя и уча, и вся приводя к воли Божией. Темже, яко делателю добру в вертограде Господни, приносим ти хваления:
Радуйся, светильниче божественный и светоносный.
Радуйся, еже по образу Божию соблюдый невредимо.
Радуйся, монашествующих доброто.
Радуйся, правило добродетели известнейшее.
Радуйся, яко возложив руку на рало не возвратился вспять.
Радуйся, яко управлен был еси в Царствие Христа Бога.
Радуйся, соборов иноческих похваление.
Радуйся, яко вражия ополчения упразднил еси.
Радуйся, текущих к небеси учителю.
Радуйся, ревности безплотных подражателю.
Радуйся, божественных словес хранителю.
Радуйся, преподобных и праведных сонаследниче.
Радуйся, святителю Моисее, похвало Церкве Христовы и великий чудотворче.
Кондак 4
Бури страстей многоболезненных смущают ны и озлобляют: но, исцелений источниче неоскудеваемый, утиши страсти многовременныя притекающих с верою к раце мощей твоих, и воздвигни пети Богу: Аллилуиа.
Икос 4
Слышаше ближнии и дальнии богоугодное житие твое, и егда на архипастырский престол Церкве Новграда Великаго искаху мужа достойна, абие вси желанием возжелеша имети тя пастыреначальника и святителя. Сего ради и жезл пастырства приял еси от Всероссийскаго митрополита Петра и паству твою добре упасл еси. Мы же, овцы пажити твоея, светом твоего богоразумия озаряеми, вопием ти:
Радуйся, архиерею, премудрый учителю.
Радуйся, мужу желаний, пасти стадо Христово призванный.
Радуйся, чистотою яко солнце возсиявый.
Радуйся, отче предивный.
Радуйся, пастырю прелюбезный.
Радуйся, избранный сосуде благодати божественныя.
Радуйся, апостолов сопричастниче.
Радуйся, великих святителей Новгородских преемниче и сопрестольниче.
Радуйся, бодрый страже словесных овец.
Радуйся, иерархов украшение.
Радуйся, благочестивых велений сказателю и насадителю.
Радуйся, яко славу Церкве обогатил еси ученьми твоими, богомудре.
Радуйся, святителю Моисее, похвало Церкве Христовы и великий чудотворче.
Кондак 5
Боготечная воистинну звезда был еси в житии твоем всем ищущым спасения, и по честнем успении ко спасению ны руководиши. Темже прославляющему тя Господу вопием: Аллилуиа.
Икос 5
Видеша тя людие пастыря воистинну добра, неленостнаго строителя и бодреннаго рачителя о спасении их: церкви бо и монастыри созидал еси, ихже иконами украсил и книгами удоволил, вся восполняя мздою твоею. Сего ради похвалами тя венчаем сице:
Радуйся, отче преславный.
Радуйся, православных утверждение.
Радуйся, храмов Божиих созидателю.
Радуйся, обителей иноческих устроителю.
Радуйся, яко видение деяний божественных верным предал еси.
Радуйся, яко заблуждающих богомудренно вразумляеши.
Радуйся, Православия предание со дерзновением проповедавый.
Радуйся, благодатию Божиею преукрашенный.
Радуйся, Церкве красото.
Радуйся, яко вся ученьми твоими просвещаеши.
Радуйся, непостыдный о нас предстателю.
Радуйся, молитвенниче о душах наших.
Радуйся, святителю Моисее, похвало Церкве Христовы и великий чудотворче.
Кондак 6
Проповедник и образ добраго жития был еси в кротости и премудрости: и Господь видя смирения твоего высоту, свыше строения тебе слово дарует, имже лжемудрия потоки заградил еси, верныя же научил еси пети Богу: Аллилуиа.
Икос 6
Возсиял еси, яко звезда лучезарная, блистанием учений и деяний твоих, егда по осьмнадесяти летех вольнаго твоего удаления со святительскаго престола паки, аще и противу воли, призваху тя людие на пастырство, и прияв благословение от Патриарха Цареградскаго и митрополита Всероссийскаго, столп и утверждение Церкве показался еси. И ныне не презри притекающих к тебе и вопиющих:
Радуйся, истины поборниче.
Радуйся, ересей посрамителю.
Радуйся, светило благочестия.
Радуйся, соблазнов прогонителю.
Радуйся, яко лесть беззаконных обличил еси.
Радуйся, яко чуждая учения от Церкве верных отгнал еси.
Радуйся, бодренный в вертограде Христове делателю.
Радуйся, яко вражия ополчения низложивый.
Радуйся, веры православныя таинниче.
Радуйся, яко тобою воистинну право ходити познахом.
Радуйся, яко страх Божий, начало премудрости, в сердца пасомых внушал еси.
Радуйся, яко одождением словес твоих неплодное сердец возделывал еси.
Радуйся, святителю Моисее, похвало Церкве Христовы и великий чудотворче.
Кондак 7
Хотением от мирских сластей отлучаяся, крепко ополчался еси на невидимыя враги, святителю преподобне, и верным был еси целомудрия образ, и учений сокровище неоскудеваемое, вопиющым о тебе Богу: Аллилуиа.
Икос 7
Новаго тя о спасении людей ревнителя Моисеа познаваем. Якоже бо той скоро к людем беззаконнующым сниде, от горы Божия, во еже пресещи нечестивое их устремление: тако и ты к мятущымся гражданом от обители Архистратига Михаила абие притекл еси со словом вразумления, да не радуют поганыя, да не пустошат град и церкви Божии. Сего ради и крепость подаде ти Бог, и не попусти людей Своих быти в посмех диаволу. И мы славяще о сем Бога, приносим ти хвалебное пение:
Радуйся, славы Божия присный ревнителю.
Радуйся, мятежей укротителю.
Радуйся, немудрых наказателю.
Радуйся, заблуждших к истине воззываяй.
Радуйся, яко тмою страстей омрачаемыя просвещаеши.
Радуйся, яко всех к небеси направляеши.
Радуйся, от работы вражия, якоже оный Моисей от Египта, изводяй.
Радуйся, во мраце прелести седящыя к свету благоразумия возставляяй.
Радуйся, яко разжжения сатанинская угасивый.
Радуйся, яко христиан соборы в единомыслие приводиши.
Радуйся, яко тобою диавол попрася.
Радуйся, яко тобою Христос прославися.
Радуйся, святителю Моисее, похвало Церкве Христовы и великий чудотворче.
Кондак 8
Странническое на земли житие пожив и волнений множество благоискусно прешед, к безскорбному животу достигл еси и дерзновение имаши к Подвигоположнику Богу, Емуже вопием: Аллилуиа.
Икос 8
Весь исполнен любве Христовы и Благаго Бога подражатель быв, пастырски порученное тебе от Христа стадо упасл еси: лица бо сильных не стыдяся наставлял их на путь спасения, немощныя заступал еси, вдовам и сиротам быв помощник и любовь нелицемерную ко всем стяжав. Сего ради, чтуще святую память твою, любовию ти вопием:
Радуйся, свидений Господних непостыдный проповедниче.
Радуйся, яко кроткими глаголы и многим разумом противныя вразумлял еси.
Радуйся, гордыни смирителю, убогих же заступниче.
Радуйся, яко стяжал еси любовь, николиже отпадающую.
Радуйся, милосердия источниче.
Радуйся, непрестанное о людех промышление.
Радуйся, нищих питателю.
Радуйся, алчущым хлебе неоскудеваемый.
Радуйся, всех надежное прибежище.
Радуйся, ненадежных надеждо светлая.
Радуйся, болящих услышание скорое.
Радуйся, скорбных отрадо.
Радуйся, святителю Моисее, похвало Церкве Христовы и великий чудотворче.
Кондак 9
Всего себе вперив к божественному желанию и плоть повинув духу воздержанием всяким и добродеянием, пожил еси в чистей совести и вере неразоримей. Сего ради и в селениих райских водворяешися поя Богу: Аллилуиа.
Икос 9
Ветий многовещанных красноглаголания не возмогут исповести славы твоея, ни изрещи величия добродетелей твоих: от юности бо взем крест твой, достигл еси идеже доброта неизреченна и недомысленна, и на небесех живеши, во свете невечернем. Молися убо о нас, приносящих ти хвалебныя пения:
Радуйся, тщету мирских попечений отринувый.
Радуйся, в преподобии и правде Богу послуживый.
Радуйся, яко о земных небрегий, небесная наследовал еси.
Радуйся, яко пресветло житие твое на земли прешел еси.
Радуйся, яко верою возращаемь древо животное явился еси.
Радуйся, струе приснотекущая, напаяющая верных.
Радуйся, Иерусалима Небеснаго гражданине.
Радуйся, страны нашея светлое радование.
Радуйся, блаженство вечное унаследовавый.
Радуйся, некрадомое богатство обретый.
Радуйся, прибежище наше и упование.
Радуйся, скорое в болезнех врачевание.
Радуйся, святителю Моисее, похвало Церкве Христовы и великий чудотворче.
Кондак 10
Спастися хотяй всем человеком и в разум истины приити, дарова нам тебе, яко сокровище неотъемлемо, яко сад красный добродетелей, яко светильника божественнаго и светлоноснаго: исцелений бо благодать источаеши всем, притекающым к раце мощей твоих, и воздвизаеши верныя воспевати Богу: Аллилуиа.
Икос 10
Стену прибежища стяжахом тя, досточудне Моисее, и в скорбех заступление: предваряеши бо в бедах сущыя, якоже иногда куплю деющаго от потопления спасл еси, и разбойничо умышление на того паки раззорил еси. Не отрини убо и нас, умиленно ти взывающих:
Радуйся, в бедах сущым предстателю.
Радуйся, напаствуемым свободителю.
Радуйся, плавающих хранителю.
Радуйся, путешествующым благое поспешение.
Радуйся, спасаяй от смерти горькия.
Радуйся, в нечаянии сущым скорое поможение.
Радуйся, яко речная волнения уставляеши.
Радуйся, яко обстояния лукавства и наветы злобы разрушаеши.
Радуйся, обидимых покрове.
Радуйся, немоществующих крепосте.
Радуйся, яко впадающих во искушения возставляеши.
Радуйся, яко от скорбей и озлоблений исхищаеши.
Радуйся, святителю Моисее, похвало Церкве Христовы и великий чудотворче.
Кондак 11
Пение наше молебное не презри, незлобиве отче: се бо верою и любовию подвизаеми, притекаем ко честному гробу твоему, и прославляюще Венчавшаго тя Господа, молимся ти: молися выну у Престола Славы избавитися нам от враг видимых и невидимых, да во благодарениих зовем Дивному во святых Своих Богу: Аллилуиа.
Икос 11
Светодательная свеща явился еси граду нашему, блаженне отче, в нетлении святаго телесе твоего. Темже блажим тя, яко и в граде вышнем вселяешися и посреде нас милосердуеши, приражения лести демонския сокрушая и отгоняя от почитающих священную память твою:
Радуйся, человече Божий.
Радуйся, яко прославленный тобою Господь прослави тя.
Радуйся, яко в преподобии пожил еси.
Радуйся, яко не даде Господь видети тебе, преподобному своему, истления.
Радуйся, яко в вышних селениих торжествуеши.
Радуйся, яко и нас, в дольнем мире пребывающих, не оставляеши.
Радуйся, небожителю богопросвещенный.
Радуйся, грешных ко исправлению приводяй.
Радуйся, пастырю благий.
Радуйся, волков мысленных отгнание.
Радуйся, яко с ангелы ликовствуеши.
Радуйся, яко предстоиши Престолу Славы невечерния.
Радуйся, святителю Моисее, похвало Церкве Христовы и великий чудотворче.
Кондак 12
Благодатию Духа Святаго, еюже просвещен быв при жизни, и по смерти наслаждаешися, облагодати наша мысли и сердца: да чистыми усты и непорочными помыслы благодарим Благодеющаго нам Господа и воспеваем Ему: Аллилуиа.
Икос 12
Поюще твое христоподражательное на земли житие, богомудрая деяния и по блаженней кончине преславная чудодействия, молим тя присно заступати ны от враг видимых и невидимых, якоже иногда от умышления злых человек, еже расхитити святую обитель, идеже положено честное тело твое, спасл еси оную дивным явлением твоим. Темже, яко выну благая людем твоим ходатайствующему у Престола Божия, взываем ти:
Радуйся, присный о нас к Богу ходатаю.
Радуйся, обидимых ограждение.
Радуйся, злобы сокрушителю.
Радуйся, наветов вражиих разорение.
Радуйся, обидящих карателю.
Радуйся, яко неправых ковы разрушаеши.
Радуйся, яко стяжал еси к Богу дерзновение.
Радуйся, яко и на земли прославляешися.
Радуйся, обители твоея крепосте и украшение.
Радуйся, всех нас защищение.
Радуйся, честными мощами твоими благодати исцеления подаваяй.
Радуйся, всех усердно к тебе прибегающих пристанище необуреваемое.
Радуйся, святителю Моисее, похвало Церкве Христовы и великий чудотворче.
Кондак 13
О священнейший отче, пастырю и учителю наш Моисее, не отрини сие наше усердное приносимое ти пение! Избави нас твоим ходатайством и помощию от всякаго зла и вечныя муки, да с тобою воспеваем Богу: Аллилуиа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангела тя земнаго и человека небеснаго прославляем вси: от земных бо к небесным восходя чистыми помыслы, достоин явился еси служитель велений Божиих. И ныне, предстоя Престолу Святыя Троицы, не престай моляся о вопиющих ти:
Радуйся, богозарный свете, освещающий нас.
Радуйся, благочестия наставниче.
Радуйся, от юности возлюбивый Бога всем сердцем твоим.
Радуйся, яко Ему единому работати возжелел еси.
Радуйся, вся красная мира сего нивочтоже вменивый.
Радуйся, яко заповедем Христовым от юности последовал еси.
Радуйся, цвете благоуханный.
Радуйся, розго вертограда Христова.
Радуйся, свято и богоугодно на земли поживый.
Радуйся, яко подвигом добрым зде подвизался еси.
Радуйся, граду нашему добрый пастырю.
Радуйся, провозвестниче людем спасения.
Радуйся, святителю Моисее, похвало Церкве Христовы и великий чудотворче.
Кондак 1
Избранный чудотворче, скорый заступниче и молитвенниче о душах наших, святителю Христов Моисее, яко имеяй дерзновение ко Господу, от всяких нас бед свободи, да зовем ти:
Радуйся, святителю Моисее, похвало Церкве Христовы и великий чудотворче.
Молитва святителю Моисею, архиепископу Новоградскому, чудотворцу
О священнейший отче, святителю Моисее, пастырю и учителю наш, не отрини нас с верою притекающих к раце мощей твоих и к твоему заступлению, и теплою молитвою тя призывающих: но скоро потщися помолитися Царю царствующих и Господу господствующих, да избавит стадо Свое от волков губящих е, и всяку страну христианскую огради и сохрани святыми твоими молитвами от мирскаго мятежа и труса, нашествия иноплеменник и междоусобныя брани, от глада же и губительства, потопа, и меча, и огня, и напрасныя смерти; и якоже помиловал еси грядущаго куплю деяти от потопления, и от разбойников спасл еси святую обитель сию твою, тако помилуй и нас, умом, словом и делом во тме греховней сущих, и избави нас гнева Божия и вечныя казни, яко да твоим ходатайством и помощию, Своим же милосердием и благодатию, Христос Бог тихое и безгрешное житие даст нам пожити в веце сем и избавити нас шуияго стояния, сподобит же деснаго со всеми святыми. Аминь.
Следующая публикация
Нет комментариев