Предыдущая публикация
Кондак 1
Избранный измлада Господу работати, подвизався добрым подвигом веры, течение твое доблестно скончал еси. Водворяяся же днесь в Небесных Селениих, молися еже избавитися нам от лютых обстояний, от всех зол и напастей, да зовем ти:
Радуйся, Геннадие, теплый наш к Богу молитвенниче и чудотворче.
Икос 1
Ангельскому житию восхотев подражати, измлада явился еси тщаливейший в дому Божием делатель, нося в сердцы законы и оправдания Его. Сего ради радостно вопием ти:
Радуйся, всякое мудрование плоти умертвивый.
Радуйся, еще от пелен путь истины познавый.
Радуйся, презревый вся суетная блага мира, Господа ради.
Радуйся, всею душею Богови прилепивыйся.
Радуйся, воине Царя Небеснаго.
Радуйся, подвигом добрым подвизавыйся пред Ним.
Радуйся, благая отрасле благаго корене.
Радуйся, светильниче страны Любимоградския.
Радуйся, Геннадие, теплый наш к Богу молитвенниче и чудотворче.
Кондак 2
Видяще тя приснии еще юна зело, не отходяща от церкви, и пребывающа в посте и молитве, тщахуся ослабити духовный подвиг твой. Ты же, от юности твоея, вдавый сердце Богови, пребыл еси непоколебимь, духом горя, Господеви работая и воспевая: Аллилуиа.
Икос 2
Разум, исходяй от Отца светов, яко бисер драгий обрет, тем озаряемь, всяку мглу греховную далече отгнал еси от себе; управляемь же сый, яко путеводною звездою, в пустыню, сподобился еси очима твоима зрети труды и подвиги Корнилиа и внимати словесем мудрости его. Мы же восхваляюще тя вопием сице:
Радуйся, лучами Божия мудрости озаренный.
Радуйся, благодатною силою во всяцем деле блазе утвержденный.
Радуйся, похоть плоти, похоть очес и гордость житейскую низложивый.
Радуйся, некрадомое добродетелей сокровище стяжавый.
Радуйся, пустыню облагоухавый дел твоих добротою.
Радуйся, заблудших на путь заповедей и оправданий Господних наставивый.
Радуйся, иноком давый образ кротости и смиренномудрия.
Радуйся, обитель твою молитвами твоими ограждаяй и спасаяй.
Радуйся, Любима града прибежище и радование.
Радуйся, помощниче притекающих к тебе с верою.
Радуйся, Геннадие, теплый наш к Богу молитвенниче и чудотворче.
Кондак 3
Силою, данною ти свыше, в пустынях подвизаяся, аще и многи напасти и озлобления от враг видимых и невидимых претерпел еси; обаче та вся доблестно победил еси, и козни их разрушил еси, воспевая к Богу: Аллилуиа.
Икос 3
Имея от юности твоея всажден в сердцы твоем страх Божий, не дал сна очима твоима, и веждома твоима дремания, дондеже обрел еси в пустыни Любимоградской, при водах Сурских, место Господеви, селение Богу Иаковлю, и рекл еси: се покой мой во век века, зде вселюся, яко изволих и. Мы, чудящеся всеблагому о тебе Божию смотрению, вопием ти:
Радуйся, яко измлада познал и всею душею твоею возлюбил еси Отца Небеснаго.
Радуйся, яко вся суетная и тленная презрел еси.
Радуйся, яко вся земная, уметы быти вменил еси, взыскуя Иерусалима Горняго.
Радуйся, яко изволил еси подъяти всяко поношение паче, нежели вкушати временную греха сладость.
Радуйся, яко скорбьми многими вшел еси в радость Господа твоего.
Радуйся, яко странник и пришлец сый, создал еси дом Божий, храм Господеви, в немже от лет многих призвася святое имя Его.
Радуйся, вод Сурских ликование.
Радуйся, града Любима ограждение.
Радуйся, Костромских предел благолепное украшение.
Радуйся, Геннадие, теплый наш к Богу молитвенниче и чудотворче.
Кондак 4
Бурю злоречия, клевет и шептания, по действу змия древнаго, исконнаго отца лжи, окаяннии воздвигоша на тя в обители доблестнаго Корнилиа. Обаче Господь, ведый избавляти и утешати преподобныя своя, обрати студ на главу враг твоих; тебе же на широту изведе, и постави на пространстве нозе твои, Емуже принося жертву хвалы и благодарения, вопиял еси выну: Аллилуиа.
Икос 4
Слышаша ближнии и дальнии, от днепровских до волжских стран о богоугодном житии твоем, твои подвизех и терпении мнозем; град же Москва, в пришествие твое с Серапионом и Уаром, чудящеся, из уст твоих прияша проречение, егда рекл еси непорочной, яко агницы сущей Анастасии: ты еси розга прекрасная, венцем царским будеши благоукрашена; еже и сбыстся во время свое. Хваляще Бога, давшаго ти дар прозрения, вопием:
Радуйся, духа пророчества богомудренным житием стяжавый.
Радуйся, благодатию душу свою ожививый и чистотою возвысивый ю.
Радуйся, сбытием пророчества обрадовавший царство православное.
Радуйся, яко рукою благочестивой Анастасии утрошася слезы многих.
Радуйся, яко царица суще, державцу Русския земли славу во благочестном жителстве приумножи.
Радуйся, яко отложив во успении венец тленный, сподобился еси прияти венец славы нескончаемыя.
Радуйся, яко и мнозем женам, сущым в болезни и скорбех, помощь и утешение подавал еси.
Радуйся, яко и немощнии младенцы не отщетишася от твоея помощи, на цельбу и возраста преспеяние от святыя раки твоея получиша.
Радуйся, яко и всем притекающым ко гробу твоему скорый являешися помощник.
Радуйся, Геннадие, теплый наш к Богу молитвенниче и чудотворче.
Кондак 5
Боготечной уподобився звезде, притекл еси от юга во страны севера; и лучами добродетелей твоих озарив пустыню любимоградскую, научал еси, отче, исповедатися Богу Небесному и пети имени Его, зовуще: Аллилуиа.
Икос 5
Видя благодать яже в тебе и дар Святаго Духа, царь Иоанн изволи, да и чада его твоею рукою, преподобне, обновляются в пакибытие. Мы же славяще Бога, возносящаго смиренных сердцем, и венчающаго их милостию и щедротами, взываем:
Радуйся, Геннадие, яко старцы и послуша тя и мудрии в совет твой внидоша.
Радуйся, яко и пред цари глаголал еси о судьбах и оправданиих Господних.
Радуйся, яко слово твое бысть выну во благодати, солию растворенно.
Радуйся, яко николиже слово праздно и гнило изыде из уст твоих, паче же вся бяху к назиданию верных.
Радуйся, яко был еси сосуд в честь, освящен, благопотребен Владыце.
Радуйся, яко соблюл еси таинство веры в чистой совести.
Радуйся, яко пребыл еси во истине благовествования.
Радуйся, яко ангелу благовестнику уподобился еси, предрек славу Анастасии, о нейже возвеселишася богатии и убозии.
Радуйся, Геннадие, теплый наш к Богу молитвенниче и чудотворче.
Кондак 6
Пустынножительствовавый на Свире реце преподобный Александр, радостно прият тя с содругом твоим Феодором, и прозорливец сый, предпоказа в тебе благаго и мудраго иночествующым вождя и наставника. Слышавшии таковая проречения, прославиша Господа, глаголюще: Аллилуиа.
Икос 6
Возсия, яко звезда утренняя, и яко луна полна во днех своих, слава подвигов, труждения и терпения твоего; пустыня бо возвести о тебе, и добродетели твоя окрест живущым поведа. Сего ради якоже они, такожде и мы благодаряще Бога, вопием ти:
Радуйся, презревый славу мира, ища Божия славы.
Радуйся, сбытие пророчества, еже о тебе, добре показавый.
Радуйся, явивыйся присный ревнователь преподобным Александру и Корнилию.
Радуйся, среди житейских обуреваний обретый тихое пристанище.
Радуйся, пустыню и езеро освятивый ангелоподобным жителством твоим.
Радуйся, положивый основание твердо обители твоей, и молитвами твоими оградивый ю.
Радуйся, образ честнаго жителства иноком собою давый.
Радуйся, словом и делом наказавый буия и строптивыя.
Радуйся, заблудших наставниче и всех притекающих к тебе скорый помощниче.
Радуйся, Геннадие, теплый наш к Богу молитвенниче и чудотворче.
Кондак 7
Прославити хотя пустыню непроходную и просветити сидящыя во тме и сени смертней, всеблагий Бог, державным манием Василиа Иоанновича указует ти место, да созиждеши олтарь Богови и селение исповедающым имя святое Его. Ты же, Господу споспешествующу, сия соделав, с сонмом подвижников и со всеми, иже видеша благословение на делех рук твоих, воспел еси: Аллилуиа.
Икос 7
Новый и дивный злочестия обличитель явился еси, преподобне, егда святотатственную простершаго ко олтарю руку, разслаблением наказл еси; егда же исповеда грех свой пред тобою, и в раскаяние прииде, того благодатною силою исцелил еси, и на путь спасения наставил еси. Сего ради память твою, угодниче Божий, чествующе, зовем ти сице:
Радуйся, злочестия обличителю.
Радуйся, кающихся во гресех своих утешителю.
Радуйся, заблудших наставниче.
Радуйся, молитвами твоими подаваяй исцеление телесное, вкупе же и душевное.
Радуйся, заступничеством твоим низлагаяй демонская возстания.
Радуйся, благодатию яже в тебе подаваяй силы к животу и благочестию.
Радуйся, свыше данною ти премудростию умудряяй неразумныя.
Радуйся, яко всем притекающым к тебе с верою, присно подаеши утешение и радование.
Радуйся, Геннадие, теплый наш к Богу молитвенниче и чудотворче.
Кондак 8
Странное чудо явися, егда немоществующий болярин Борис, прияв с благоговением посох от руки твоея, преподобне, здрав бысть. Иерей же Василий, гордостно презрев приятый от преподобнаго дар, и поверг оный, тяжко искушен бысть. Познав же грех свой, и принес покаяние Богу, прослави правду Его, и угодника Его, вопия: Аллилуиа.
Икос 8
Весь ум вперив в горняя, единаго, искупльшаго нас Господа возлюбил еси, Тому последовал еси и Того язвы на теле своем носил еси, с Нимже и прославляешися днесь. Сего ради восхваляем тя:
Радуйся, обретый премудрость, юже никтоже от князей века сего разуме.
Радуйся, не духа мира сего приявый, но Духа Иже от Бога.
Радуйся, верою уразумевый тайны судеб Божиих.
Радуйся, показавый веру твою не в мудрости человечестей, но в силе Божией.
Радуйся, яко Града Небеснаго взыскал еси.
Радуйся, яко к Иерусалиму Небесному востекл еси.
Радуйся, яко на вечерю брака Агнча зван еси.
Радуйся, не к тому себе пожив, но Богови, днесь во Царствии Его вселяешися.
Радуйся, Геннадие, теплый наш к Богу молитвенниче и чудотворче.
Кондак 9
Всякими духовными даровании украшен, всякия цельбы податель явился еси, блаженне. Темже хваляще и благодаряще Бога, вопием: Аллилуиа.
Икос 9
Витии немотствоваху и мудрии века сего изумевахуся, видяще, како бесный, люте страждай, и путы железными связан сый, пред гробом твоим, преподобне, абие исцеле и воздаде хвалу Богови, дивному во святых Своих. Таяжде творяще, и мы глаголем:
Радуйся, силы многи сотворивый.
Радуйся, демонская сопротивувостания ни во что же вменивый.
Радуйся, обдержимых лютыми недугами уврачевавый.
Радуйся, безутешным утешение и радость о Господе подавый.
Радуйся, омраченных умом в разум истины приведый.
Радуйся, от сердечнаго окаменения и нечестия многих обративый к Богу.
Радуйся, яко немощствующым духом и телом простерл еси руку помощи.
Радуйся, яко безнадежных и отчаянных сущих, утвердил еси во уповании на Бога жива и истинна.
Радуйся, Геннадие, теплый наш к Богу молитвенниче и чудотворче.
Кондак 10
Спасения иский, яко бисера многоценнаго, и к Богу душею возжадав, якоже елень на источники водныя, ничтоже земное в себе
помышлял еси; работая же Господеви со страхом и радуяся пред Ним с трепетом, сподобился еси, блаженне, с лики
избранных предстояти Престолу Царя славы, и присно воспевати: Аллилуиа.
Икос 10
Стена и прибежище был еси, Геннадие, в веце сем: в пустыню бо, в ней же восхотел еси водворитися, к тебе притекаху славнии земли, богатии и убози, вожделевающе, да приимут от руки твоея благословение, да слово уст твоих утешит, и молитва твоя оградит их от враг видимых и невидимых; и мы такожде, притекающе верою к раце твоей, и моляще о заступлении нас грешных и неключимых раб, вопием:
Радуйся, яко страстей возстание победил еси.
Радуйся, яко призывающих тя предварил еси в день озлобления.
Радуйся, яко потопляемых напастей бурею, изхитил еси из пучины зол.
Радуйся, яко влаемых волнами житейских попечений, к тихому пристанищу управил еси.
Радуйся, ищущих Царствия Небеснаго и правды его, молитвами твоими утверждаяй на камени заповедей Господних.
Радуйся, обители твоея столпе и утверждение.
Радуйся, подвизающихся во благочестии неусыпный спомощниче.
Радуйся, покаянныя слезы проливающих ко Господу сомолитвенниче.
Радуйся, Геннадие, теплый наш к Богу молитвенниче и чудотворче.
Кондак 11
Пения и славословия, подвиги и молитвенныя труждения, паче же всего себе принесл еси, преподобне, в жертву живу, святу, благоугодну Богови. Сего ради, стяжав блаженное безсмертие, в чертозе Царя славы, с тмами тем безплотных сил ликовствуя, воспеваеши: Аллилуиа.
Икос 11
Светозарной звезде уподобився, от Могилева града, от предел днепровских, аможе первии возсияша, посреде идольскаго нечестия, лучи благодатныя веры, притекл еси, да и во мраце пустыни костромския узрят людие славу Божию и чудеса Его поведят. Сия убо зрим ныне, и славяще Бога, глаголем:
Радуйся, напоивый себе струями вод благодатных.
Радуйся, утвердивый себе в вере, еюже просветися равноапостольный великий князь Владимир.
Радуйся, осиянный благословением святыя Афонския горы, почивающим на обители печерских чудотворцев.
Радуйся, их житию подражавый.
Радуйся, яко оставль богатство и славу дома отчаго, пустыню возлюбил еси.
Радуйся, яко хлад и зной и всяку тяготу понесл еси.
Радуйся, яко поругания и озлобления, Господа ради, претерпел еси.
Радуйся, яко в терпении мнозе стяжав душу свою, живот вечный наследовал еси.
Радуйся, Геннадие, теплый наш к Богу молитвенниче и чудотворче.
Кондак 12
Благодать и силу данную ти от Бога, еже целити немощствующыя духом, немощствующыя телом, еже спасати погибающих и избавляти от лютых обстояний, даяти же даяния благая, с верою и любовию притекающым к тебе; знаменьми и чудесы научени суще, свемы. Темже молимся ти, преподобне, молися о нас, яко скорбьми паче же многими грехми обдержими есмы выну, да ходатайством твоим улучивше спасение, воспоем Господеви: Аллилуиа.
Икос 12
Поюще и превозносяще Бога, дивнаго во святых своих, благолепно чествуем святую память твою, угодниче; еще бо во днех плоти твоея чудодейственныя благодати был еси причастник; по блаженном успении твоем наследствуя с лики святых вечную жизнь, молиши о чтущих тя. Сего ради вопием:
Радуйся, прославивый Бога в души и телеси своем.
Радуйся, яко славы от человек не приял еси, слава же Господня осия тя.
Радуйся, яко обитая в Небесных селених, не оставляеши нас ходатайством твоим.
Радуйся, яко надеющеся на тя, возсылаем молитвы нашя и тобою хвалимся.
Радуйся, яко надежда притекающих к раце твоей с верою, николиже посрамися.
Радуйся, яко старцы и младенцы возрадовашася о тебе.
Радуйся, яко присный хранитель еси Любимоградския страны, сподобльшияся хранити святыя мощи твоя.
Радуйся, яко память твоя во благословении и чудеса твоя возвещаются в роды родов.
Радуйся, Геннадие, теплый наш к Богу молитвенниче и чудотворче.
Кондак 13
О святче Божий и чудотворче, преподобне Геннадие! Приими молитвы и благохваления наша, приносимыя тебе днесь, по достоянию, и не забуди нас притекающих к тебе, и ищущих помощи твоея и заступления. Паче же буди ходатай наш пред Богом; да отбегше нечестия, и избавльшеся от всякаго злаго обстояния, сподобимся наследити Царство Небесное, и тамо с лики святых, славити Отца и Сына и Святаго Духа, и во вся веки воспевати пред Ним: Аллилуиа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангельскому житию восхотев подражати, измлада явился еси тщаливейший в дому Божием делатель, нося в сердцы законы и оправдания Его. Сего ради радостно вопием ти:
Радуйся, всякое мудрование плоти умертвивый.
Радуйся, еще от пелен путь истины познавый.
Радуйся, презревый вся суетная блага мира, Господа ради.
Радуйся, всею душею Богови прилепивыйся.
Радуйся, воине Царя Небеснаго.
Радуйся, подвигом добрым подвизавыйся пред Ним.
Радуйся, благая отрасле благаго корене.
Радуйся, светильниче страны Любимоградския.
Радуйся, Геннадие, теплый наш к Богу молитвенниче и чудотворче.
Кондак 1
Избранный измлада Господу работати, подвизався добрым подвигом веры, течение твое доблестно скончал еси. Водворяяся же днесь в Небесных Селениих, молися еже избавитися нам от лютых обстояний, от всех зол и напастей, да зовем ти:
Радуйся, Геннадие, теплый наш к Богу молитвенниче и чудотворче.
Молитва преподобному Геннадию, Костромскому и Любимоградскому чудотворцу
Избранниче Божий и чудотворче, преподобный отче Геннадие! От юности твоея исполнен сый духа премудрости и разума, духа благочестия и страха Господня, и приим вся оружия Божия, препоясав чресла твоя истиною, оболкся в броню правды и обув нозе во уготование благовествования мира, над всеми же восприим щит веры, возмогл еси, яко добр воин Христов, вся стрелы лукаваго разжженыя угасити. Сего ради, водворяяся днесь, с лики безплотных сил, в обителех Отца Небеснаго, неувядаемым венцем увязен еси; и предстоя Престолу Царя славы Господа сил, имаши дерзновение возносити к Нему моления и благохваления твоя. Мы же окаяннии, возводяще из глубины зол очи и сердца наша к горнему Сиону, жилищу Бога Иаковля, молим тя, преподобне Геннадие: буди заступник и ходатай наш пред Богом и Господем нашим, Судиею праведнейшим, Егоже выну прогневляем, согрешающе пред Ним. И якоже во дни плоти своея, дивная и преславная совершил еси, отче всехвальне, тако и ныне прешед от нас в обители Отца Небеснаго удиви ходатайством своим милость Господню на нас. Да отбегше нечестия и мирских похотей, Богови же благоугодивше, обрящем помощь Его во время благопотребно, и благословение на ны и на дела рук наших, и да сподобит нас наследити Царство Небесное, и с лики святых славити и воспевати пречестное и великолепое имя Отца и Сына и Святаго Духа, ныне и присно, и во веки веков. Аминь.
......
p1b7v216q11558ine9bpn2h4tq5 - Канон преподобному Геннадию, Костромскому и Любимоградскому чудотворцу
Минея, 23 Января, Кано́н, препо́добнаго
Глас 8
Песнь 1
Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Припев: Преподо́бне о́тче Генна́дие, моли́ Бо́га о на́с.
Вся́кое пло́ти умертви́в мудрова́ние, с ли́ки безпло́тных водворя́ешися в небе́сных черто́зех, преподо́бне Генна́дие.
Припев: Преподо́бне о́тче Генна́дие, моли́ Бо́га о на́с.
Озаре́нный све́том невече́рним и Влады́це все́х предстоя́, моли́, о́тче, изба́витися на́м от тмы́ грехо́вныя.
Сла́ва Отцу́ и Сы́ну и Свято́му Ду́ху.
Ми́ром доброде́телей облагоуха́нныя святы́я мо́щи твои́, преподо́бне, блаже́нным безсме́ртием благоуха́я, источа́ют ве́рным исцеле́ние.
И ны́не и при́сно и во ве́ки веко́в. Ами́нь.
Богородичен: Лю́тыя пло́ти моея́ стра́сти утоли́, Пресвята́я Де́во, и заблу́ждшаго мя́ к ти́хому приста́нищу напра́ви.
Песнь 3
Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.
Припев: Преподо́бне о́тче Генна́дие, моли́ Бо́га о на́с.
По́хоть пло́ти, по́хоть оче́с и го́рдость жите́йскую отри́нув, яви́лся еси́, Генна́дие, сосу́д че́стен, Влады́це благопотре́бен.
Припев: Преподо́бне о́тче Генна́дие, моли́ Бо́га о на́с.
Вери́гами желе́зными, посто́м и бде́нием отягчи́л еси́, о́тче, бре́нную, вку́пе же и многомяте́жную пло́ть, да ду́шу свободи́ши от лю́тости страсте́й.
Сла́ва Отцу́ и Сы́ну и Свято́му Ду́ху.
Я́звы Го́спода на те́ле свое́м носи́в и стопа́м Его́ после́довав, воше́л еси́ и в ра́дость Его́, я́ко благи́й и ве́рный ра́б.
И ны́не и при́сно и во ве́ки веко́в. Ами́нь.
Богородичен: Пресла́вная Ма́ти Де́во Богоро́дице, во утро́бе име́в Преве́чнаго Бо́га, вознеси́ к Нему́ моли́твы на́ша, я́ко Блага́я Хода́таица.
Седален, глас 8
Уподо́бился еси́ купцу́, и́щущему би́сера многоце́ннаго, оста́вль бо кро́в о́тчий и вменя́я вся́ тщету́ бы́ти, да Христа́ приобря́щеши, Тому́ после́довал еси́, Его́ ра́ди стра́сти и озлобле́ния претерпе́л еси́, с Ни́мже и прославля́ешися дне́сь, о́тче богому́дре.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Мно́гими скорбьми́ и напа́стьми от враг ви́димых и неви́димых вы́ну обдержи́ми су́ще,/ к Тебе́, Ма́ти Бо́жия, притека́юще, мо́лимся:/ не отри́ни нас, на Тя упова́ющих.
Песнь 4
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Припев: Преподо́бне о́тче Генна́дие, моли́ Бо́га о на́с.
Очи́стив себе́ от вся́кия скве́рны пло́ти и ду́ха, хра́м Бо́жий бы́л еси́ на земли́, по успе́нии же твое́м во хра́ме невече́рния сла́вы предстои́ши Го́споду.
Припев: Преподо́бне о́тче Генна́дие, моли́ Бо́га о на́с.
На вся́к де́нь и ча́с моля́ся, тружда́яся и при́сно рабо́тая Го́споду, пребы́л еси́ непоколеби́м, я́ко утвержде́нный на ка́мени за́поведей Госпо́дних.
Сла́ва Отцу́ и Сы́ну и Свято́му Ду́ху.
Сла́вим Отца́, Сы́на и Свята́го Ду́ха — Бо́га, да́рующаго благода́ть святы́м Свои́м и те́х моли́твами избавля́ющаго на́с от лю́тых обстоя́ний.
И ны́не и при́сно и во ве́ки веко́в. Ами́нь.
Богородичен: Влады́чице, приими́ моли́твы на Тя́ наде́ющихся: Твои́ бо есмы́ рабы́, да не постыди́мся.
Песнь 5
Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.
Припев: Преподо́бне о́тче Генна́дие, моли́ Бо́га о на́с.
От ю́га в се́верныя страны́ прите́кл еси́, преподо́бне, горя́ любо́вию Боже́ственною, ея́же пла́менем наве́ты вра́жия, я́ко бы́лие травно́е, сожго́шася.
Припев: Преподо́бне о́тче Генна́дие, моли́ Бо́га о на́с.
Гра́де Могиле́ве, ра́дуйся! Ты́ бо произрасти́л еси́ благода́тный кла́с, и́мже процвете́ пусты́ня Любимогра́дская и сла́вою его́ возвели́чися.
Сла́ва Отцу́ и Сы́ну и Свято́му Ду́ху.
Ве́рнии, прииди́те, ублажи́м преподо́бнаго отца́ на́шего Генна́дия, прозорли́вец бо и чудотво́рец в житии́ бы́в, по сме́рти источа́ет исцеле́ния от святы́х моще́й свои́х.
И ны́не и при́сно и во ве́ки веко́в. Ами́нь.
Богородичен: Богода́нный души́ моея́ свети́льник угаси́х и све́та стезе́й Госпо́дних не уве́дех, оба́че, Ма́ти Све́та! из мра́ка грехо́внаго вопию́: озари́ мя́, омраче́ннаго, и заблу́ждшаго напра́ви ко приста́нищу спасе́ния.
Песнь 6
Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.
Припев: Преподо́бне о́тче Генна́дие, моли́ Бо́га о на́с.
Е́зеро Су́рское! Во́ды твои́ да воспле́щут дне́сь, я́ко в имени́тый де́нь пра́здника, со струя́ми бо твои́ми слия́стася умиле́нныя сле́зы, и́миже пла́кася преподо́бный Генна́дий, призыва́я благослове́ние держа́ве Росси́йстей и сыново́м ея́.
Припев: Преподо́бне о́тче Генна́дие, моли́ Бо́га о на́с.
Кладенцы́, иско́паннии преподо́бным, и́не вся́ ру́к его́ тружде́ния, да науча́т на́с, ка́ко подоба́ет умерщвля́ти пло́ть, рабо́тая при́сно Го́сподеви.
Сла́ва Отцу́ и Сы́ну и Свято́му Ду́ху.
Я́звы Го́спода Иису́са и Кре́ст Его́, я́ко вене́ц зла́т, с ра́достию прии́м, услы́шал еси́, преподо́бне, вожделе́нный гла́с: до́брый ра́бе, благи́й и ве́рный, вни́ди в ра́дость Го́спода твоего́!
И ны́не и при́сно и во ве́ки веко́в. Ами́нь.
Богородичен: Богода́нный души́ моея́ свети́льник угаси́х, и тма́ обы́де мя́, окая́ннаго, оба́че к Тебе́ зову́, Ма́ти Све́та: озари́ ду́шу мою́ омраче́нную и спаси́ мя́.
Кондак, глас 3
Моли́твою и посто́м, тружде́нием и терпе́нием умертви́вый вся́кое пло́ти мудрова́ние, чистоты́ сосу́д благоле́пен, Боже́ственных даро́в и чуде́с прича́стник, и́ноком же до́блий наста́вник бы́л еси́, сподвиза́яся блаже́нному Корни́лию, о́тче богому́дре. Сего́ ра́ди вопие́м: моли́ся ко Го́споду, да моли́твами твои́ми да́рует ми́р и спасе́ние душа́м на́шим.
Икос
Свети́льник нога́ма твои́ма положи́вый зако́н Госпо́день и све́т стезя́м твои́м, се́рдце же утверди́вый на ка́мени ве́ры, в не́йже стоя́ и хваля́ся упова́нием сла́вы Бо́жия, избе́гл еси́ жите́йския тли́, преподо́бне, и, ко све́ту Ца́рствия Бо́жия упра́влен сы́й, призира́еши на ны́, моля́ся ко Го́споду, да обря́щемся сына́ми Све́та и Ца́рствие Его́ насле́дити сподо́бимся.
Песнь 7
Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Припев: Преподо́бне о́тче Генна́дие, моли́ Бо́га о на́с.
О́тче Генна́дие, с дру́гом твои́м Фео́дором прише́л еси́ к преподо́бному Алекса́ндру, и́же до́блестно на Сви́ре реце́ подвиза́ся, и того́ житию́ поревнова́л еси́.
Припев: Преподо́бне о́тче Генна́дие, моли́ Бо́га о на́с.
Семена́ слове́с прему́дрости Бо́жия прия́в в се́рдце свое́ от преподо́бнаго Корни́лия, возрасти́л еси́ я́, о́тче Генна́дие, в дре́во благосенноли́ственное, я́ко приити́ к тебе́ со́нму и́ноков и вита́ти, благогове́нствуя, под се́нию благода́ти, я́же в тебе́.
Сла́ва Отцу́ и Сы́ну и Свято́му Ду́ху.
Ликовству́я дне́сь, принесе́м, ве́рнии, хвалу́ и благодаре́ние Бо́гови, нетле́нием просла́вившему уго́дника Своего́ и дарова́вшему ему́ благода́ть исцеле́ний.
И ны́не и при́сно и во ве́ки веко́в. Ами́нь.
Богородичен: Вы́шняго освяще́нное Боже́ственное селе́ние, ра́дуйся, Тобо́ю бо даде́ся ра́дость, Богоро́дице, зову́щим: Благослове́на Ты́ в жена́х еси́, Всенепоро́чная Влады́чице.
Песнь 8
Ирмос: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.
Припев: Преподо́бне о́тче Генна́дие, моли́ Бо́га о на́с.
Царя́ Небе́снаго ве́рный ра́бе! Тому́ порабо́тал еси́, подвиза́яся по́двигом до́брым, Того́ ра́ди вся́ претерпе́л еси́, да насле́диши обетова́ния жи́зни ве́чныя.
Припев: Преподо́бне о́тче Генна́дие, моли́ Бо́га о на́с.
Моли́ся и о на́с, преподо́бне, да благоче́стно пожи́вше и Бо́гови благоугоди́вше, прича́стницы бу́дем жи́зни ве́чныя.
Сла́ва Отцу́ и Сы́ну и Свято́му Ду́ху.
Не челове́ческую, а Бо́жию возлюби́л еси́ сла́ву, о́тче Генна́дие, сего́ ра́ди Бо́г тя́ просла́ви, да́руя тобо́ю по́мощь и спасе́ние притека́ющим к тебе́ с ве́рою.
И ны́не и при́сно и во ве́ки веко́в. Ами́нь.
Богородичен: Досто́йно е́сть блажи́ти Тя́, Богоро́дице: Благослове́нна Ты́ в жена́х и благослове́н Пло́д чре́ва Твоего́.
Песнь 9
Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.
Припев: Преподо́бне о́тче Генна́дие, моли́ Бо́га о на́с.
Воспомина́юще подви́жничество твое́, преподо́бне Генна́дие, честно́е успе́ние твое́ и зна́мения, я́же соде́я Госпо́дь руко́ю твое́ю, со умиле́нием глаго́лем: вои́стинну ди́вен Бо́г во святы́х Свои́х.
Припев: Преподо́бне о́тче Генна́дие, моли́ Бо́га о на́с.
Да весели́тся пусты́ня Любимогра́дская, во́ды Су́рския да воспле́щут: та́мо бо просия́ ди́вный уго́дник Бо́жий.
Сла́ва Отцу́ и Сы́ну и Свято́му Ду́ху.
Сла́вна и всехва́льна па́мять твоя́, о́тче Генна́дие, сла́вою бо, я́же от Отца́, Сы́на и Свята́го Ду́ха, просла́влен еси́.
И ны́не и при́сно и во ве́ки веко́в. Ами́нь.
Богородичен: Ма́ти Бо́жия! ника́коже по достоя́нию мо́жем восхвали́ти Тя́. Оба́че Блага́я су́щи, приими́ моли́тву рабо́в Твои́х и принеси́ Сы́ну Твоему́ и Бо́гу на́шему, да спасе́т ду́ши на́ша.
Светилен
Я́ко заря́ у́тренняя и я́ко луна́ полна́ во дне́х свои́х, бы́л еси́, преподо́бне, в житии́ се́м, горя́ ре́вностию, я́же по Бо́зе, богате́я святы́ми де́лы и словесы́ благи́ми. Те́мже мо́лимся: не забу́ди чту́щих святу́ю па́мять твою́ и моли́ся ко Го́споду спасти́ и просвети́ти ду́ши на́ша.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Дивя́щеся непостижи́мому та́инству вочелове́чения Бо́га Сло́ва,/ Тя, Богоро́дицу, немо́лчно велича́ем,/ я́ко Сла́внейшую во́инств Небе́сных/ и при́сную Хода́таицу ро́да христиа́нскаго.
Следующая публикация
Нет комментариев