Предыдущая публикация
Песнь 1
Ирмо́с: Волно́ю морско́ю скры́вшаго дре́вле гони́теля мучи́теля, под земле́ю скры́ша спасе́нных о́троцы: но мы я́ко отрокови́цы, Го́сподеви пои́м, сла́вно бо просла́вися.
Припев: Священному́чениче Илариóне, моли́ Бо́га о на́с.
Иларио́не, всечестны́й святи́телю, по и́мени твоему́ и житие́ твое́ бысть, тишину́ бо моли́твенную внутрь себе́ име́я, ра́дость пасха́льную всем яви́л еси́.
Припев: Священному́чениче Илариóне, моли́ Бо́га о на́с.
Лесть гони́телей твои́х отве́ргнув, муче́ния лю́таго не убоя́лся еси́, свя́те, Христа́ же пред судия́ми непра́ведными му́жески испове́дав, сла́вою небе́сною просла́вился еси́.
Припев: Священному́чениче Илариóне, моли́ Бо́га о на́с.
А́нгелов собесе́дниче, Иларио́не преподо́бне, во огра́де до́ма Живонача́льныя Трóицы, пожи́л еси́, иде́же посто́м и моли́твою ду́шу очи́стив, богове́дение стяжа́л еси́.
Сла́ва Отцу́ и Сы́ну и Свято́му Ду́ху:
Ре́вность по Бо́зе име́я, святи́телю, богобо́рцев сло́вом облича́л еси́, та́кожде и ерети́ческих мудрова́ний не терпя́, нечести́выя из оби́телей и хра́мов изгоня́л еси́, ка́ющияся же ко спасе́нию приводи́л еси́.
И ны́не и при́сно и во ве́ки веко́в. Ами́нь.
Богоро́дичен: Ины́я по́мощи не и́мамы, ра́зве Тебе́, Влады́чице, Ты нам помози́ мо́ря жития́ сего́ пучи́ну я́ко по су́ху проити́ неискуше́нно от злых.
Песнь 3
Ирмо́с: Тебе́ на вода́х пове́сившаго всю зе́млю неодержи́мо, тварь ви́девши на ло́бнем ви́сима, у́жасом мно́гим содрага́шеся, несть свят, ра́зве Тебе́, Го́споди, взыва́ющи.
Припев: Священному́чениче Илариóне, моли́ Бо́га о на́с.
От ю́ности чистоту́ возлюби́в, Иларио́не ди́вный, де́вственник душе́ю и те́лом пребы́л еси́ и, не пожела́в порабо́тати тва́ри па́че Творца́, на земли́ невеще́ственное житие́ показа́л еси́.
Припев: Священному́чениче Илариóне, моли́ Бо́га о на́с.
Небе́сный челове́че, земны́й А́нгеле, Иларио́не прему́дре, святы́м отце́м житие́м после́дуя, за Христа́ ду́шу твою́ положи́л еси́ и земли́ Ру́сския украше́ние яви́лся еси́.
Припев: Священному́чениче Илариóне, моли́ Бо́га о на́с.
Архиере́ю Бо́жий, Иларио́не свя́те, кро́тостию, смире́нием и терпе́нием, па́че же любо́вию преукра́шен был еси́, сего́ ра́ди за мучи́телей твои́х моли́лся еси́, Христу́ Бо́гу подража́я.
Сла́ва Отцу́ и Сы́ну и Свято́му Ду́ху:
Свята́го Ду́ха дар стяжа́в, Сы́ну Бо́жию, крест взем, после́довал еси́, и во́лю Отца́ Небе́снаго испо́лнил еси́, Иларио́не блаже́нне, Трóицы Святы́я и́стинный почита́телю.
И ны́не и при́сно и во ве́ки веко́в. Ами́нь.
Богоро́дичен: Ле́ствице Небе́сная, Е́юже сни́де Бог, до́лу лежа́щее естество́ на́ше к небеси́ возво́диши, те́мже Тя, Пресвята́я Богоро́дице, любо́вию непреста́нно велича́ем.
Седа́лен, глас 7:
Священному́чениче сла́вне Иларио́не, архиере́ю и дру́же Христо́в, ты, в темни́це заключе́н быв, не восхоте́л еси́ слуга́м анти́христовым поклони́тися, я́коже и му́ченицы дре́вле не возжела́ша же́ртву и́дольскую принести́. Сего́ ра́ди помози́ нам моли́твами твои́ми стре́лы вра́жия отрази́ти и ко́зни диа́вольския разори́ти, еди́наго же Христа́ распя́таго вы́ну очесы́ у́мными зре́ти и Тому́ из глубины́ серде́чныя взыва́ти: Го́споди, Иису́се Христе́, поми́луй нас.
Сла́ва, и ны́не, Богоро́дичен, глас то́йже:
Предста́тельнице и Моли́твеннице на́ша, Пресвята́я Влады́чице, умоли́ Сы́на Твоего́ и Бо́га, егда́ ся́дет суди́ти живы́м и ме́ртвым, да прости́т грехи́ и беззако́ния на́ша, и сподо́бит ны Ца́рствия Небе́снаго.
Песнь 4
Ирмо́с: На Кресте́ Твое́ Боже́ственное истоща́ние прови́дя Авваку́м, ужа́сся вопия́ше: Ты си́льных пресе́кл еси́ держа́ву, Бла́же, приобща́яся су́щим во а́де, я́ко Всеси́лен.
Припев: Священному́чениче Илариóне, моли́ Бо́га о на́с.
Апо́стольское сло́во исполня́я, в безбо́жнем ми́ре Христа́ пропове́дал еси́, Иларио́не богому́дре, и Це́рковь Его́ от волко́в, расхища́ющих ю́, неусы́пно охраня́л еси́.
Припев: Священному́чениче Илариóне, моли́ Бо́га о на́с.
Вели́ка та́йна есть Це́ркве, я́ко неве́сты Христо́вы, ю́же ты, Иларио́не, чи́стым се́рдцем узре́л еси́ и я́сно провозгласи́л еси́.
Припев: Священному́чениче Илариóне, моли́ Бо́га о на́с.
Небе́сныя любве́ да́ра удосто́ен быв, Иларио́не, Бо́га Трóицу во Еди́нице, И́же есть Любы́, испове́дал еси́ и о Це́ркви Святе́й, я́же есть любве́ едине́ние, богосло́вствовал еси́.
Сла́ва Отцу́ и Сы́ну и Свято́му Ду́ху:
Адама́нт ве́ры быв и оте́ческих заве́тов храни́тель, святи́телю Иларио́не, лука́выми уче́нии не смуща́емь, Богоро́дицу Чи́стую, я́ко Де́ву и Ма́терь, просла́вил еси́.
И ны́не и при́сно и во ве́ки веко́в. Ами́нь.
Богоро́дичен: Голго́фе предстоя́щи, Ма́ти Бо́жия ско́рбно взыва́ше: увы́ Мне, Сы́не Мой! Ка́ко на Кресте́ ви́сиши, зе́млю на вода́х пове́сивый? Ка́ко стра́сти терпи́ши, прише́дый спасти́ мир?
Пе́снь 5
Ирмо́с: Богоявле́ния Твоего́, Христе́, к нам ми́лостивно бы́вшаго, Иса́ия свет ви́дев невече́рний, из но́щи у́треневав взыва́ше: воскре́снут ме́ртвии, и воста́нут су́щии во гробе́х, и вси земноро́днии возра́дуются.
Припев: Священному́чениче Илариóне, моли́ Бо́га о на́с.
О, святи́телю Христо́в Иларио́не, помози́ нам нощь жития́ сего́ ско́рбнаго в терпе́нии и покая́нии без поро́ка прейти́, и ра́дости све́та невече́рняго сподо́битися.
Припев: Священному́чениче Илариóне, моли́ Бо́га о на́с.
Христо́вым па́стырем пра́вило был еси́, Иларио́не, и наста́вник терпели́вый, не то́кмо сло́вом, но и де́лом о́браз им показу́я, и благода́тию, тебе́ от Бо́га да́нною, укрепля́я.
Припев: Священному́чениче Илариóне, моли́ Бо́га о на́с.
Ра́дости духо́вныя испо́лнен, Иларио́не, ше́ствовал еси́ путе́м те́сным и приско́рбным, всех уча́ Христу́ сраспина́тися, дабы́ с Ним воскре́снути.
Сла́ва Отцу́ и Сы́ну и Свято́му Ду́ху:
И́ноцы оби́тели Сре́тенския днесь прославля́ют архипа́стыря Иларио́на, служи́теля благогове́йнаго Де́вы Пренепоро́чныя, сла́ву Влади́мирскому о́бразу Ея́ досто́йно возда́вшаго и тем преще́ния безбо́жных презре́вшаго.
И ны́не и при́сно и во ве́ки веко́в. Ами́нь.
Богоро́дичен: Сла́вим Тя немо́лчно, Влады́чице, и ко ико́не Твое́й Влади́мирстей припа́даем, взыва́юще: покры́й град Москву́ от тьмы грехо́вныя и безбо́жныя и спаси́ ду́ши на́ша.
Песнь 6
Ирмо́с: Ят бысть, но не удержа́н в пе́рсех ки́товых Ио́на: Твой бо о́браз нося́, Страда́вшаго, и погребе́нию Да́вшагося, я́ко от черто́га от зве́ря изы́де, приглаша́ше же кустоди́и: храня́щии су́етная и ло́жная, ми́лость сию́ оста́вили есте́.
Припев: Священному́чениче Илариóне, моли́ Бо́га о на́с.
Ты, иера́рше честны́й, о устрое́нии Це́ркве Ру́сския ревну́я, из глубины́ душе́вныя Христу́ Бо́гу взыва́л еси́: Го́споди, чин патриа́рший возста́ви и единомы́слие в Це́ркви соблюди́.
Припев: Священному́чениче Илариóне, моли́ Бо́га о на́с.
О, Иларио́не блаже́нне, ты, Собо́ру муже́й церко́вных предстоя́, му́дрым сло́вом, благода́тию растворе́нным, призва́л еси́ их патриа́ршеством Це́рковь Ру́сскую па́ки украси́ти и по достоя́нию возвели́чити.
Припев: Священному́чениче Илариóне, моли́ Бо́га о на́с.
Всечестны́й Иларио́не святи́телю, ве́рный сподви́жник Ти́хона патриа́рха яви́лся еси́, Це́рковь от безбо́жных власте́й и раздира́ющих хито́н Христо́в до́блественне охраня́я.
Сла́ва Отцу́ и Сы́ну и Свято́му Ду́ху:
Архиере́я достосла́внаго Иларио́на Вере́йскаго днесь, ве́рнии лю́дие, благоче́стно восхва́лим, той бо град Москву́ от поновля́ющих и изменя́ющих чин церко́вный огради́ и ве́рных в благоче́стии утверди́.
И ны́не и при́сно и во ве́ки веко́в. Ами́нь.
Богоро́дичен: Ра́дуйся, Цари́це Небе́сная, Патриа́рхов правосла́вных Похвало́, оби́телей святы́х неруши́мая Стено́, гра́да же первопресто́льнаго и страны́ на́шея Утвержде́ние.
Конда́к, глас 2:
Сла́ву ми́ра сего́ оста́вив, Христу́ до́блественне после́довал еси́ и, святи́тельское служе́ние восприи́м, венце́м му́ченичества украси́лся еси́, и ны́не, Престо́лу Бо́жию предстоя́, моли́ся, Иларио́не, иера́рше прему́дре, спасти́ся душа́м на́шим.
И́кос:
Све́том боже́ственныя му́дрости, Иларио́не святы́й, испо́лни ум мой помраче́нный, да восхвалю́ житие́ твое́, взыва́я си́це:
Ра́дуйся, Христа́ Бо́га ве́рный служи́телю;
ра́дуйся, Це́ркве Его́ и́стинный испове́дниче.
Ра́дуйся, ю́ных до́брый наста́вниче;
ра́дуйся, Сло́ва Бо́жия изря́дный пропове́дниче.
Ра́дуйся, ве́рным путь спасе́ния возвести́вый;
ра́дуйся, хитросплете́ния су́етная посрами́вый.
Ра́дуйся, патриа́ршества ревни́телю;
ра́дуйся, оте́ческих заве́тов ди́вный храни́телю.
Ра́дуйся, Иларио́не, Це́ркве на́шея сла́во и украше́ние.
Песнь 7
Ирмо́с: Неизрече́нное чу́до, в пе́щи изба́вивый преподо́бныя о́троки из пла́мене, во гро́бе мертв бездыха́нен полага́ется, во спасе́ние нас пою́щих: Изба́вителю Бо́же, благослове́н еси́.
Припев: Священному́чениче Илариóне, моли́ Бо́га о на́с.
А́ще не яви́лася бы ве́лия ре́вность новому́чеников Це́ркве Ру́сския, поги́бла бы ве́ра Правосла́вная во оте́честве на́шем. Ты же, святи́телю Иларио́не, с ни́ми страда́ния претерпева́я, взыва́л еси́: Изба́вителю Бо́же, благослове́н еси́.
Припев: Священному́чениче Илариóне, моли́ Бо́га о на́с.
Труды́ и по́двиги, священному́чениче Иларио́не, богоуго́дне поне́сл еси́, и́миже разори́тели Це́ркве Христо́вы посра́млены бы́ша, ве́рнии же восклица́ху: Изба́вителю Бо́же, благослове́н еси́.
Припев: Священному́чениче Илариóне, моли́ Бо́га о на́с.
Наста́вник мона́хом быв, Иларио́не свя́те, ты во вре́мя лихоле́тия оби́тель Сре́тенскую от нечести́вых защища́л еси́. И ны́не та́мо моща́ми почива́еши, и́ноков ея́ науча́я взыва́ти: Изба́вителю Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Иларио́не свя́те, Це́ркве Ру́сския похвало́, сподо́би нас, немощны́х и гре́шных, моли́твами твои́ми от пла́мене страсте́й изба́витися и от искуше́ний невреди́мы сохрани́тися, Го́сподеви взыва́юще: Изба́вителю Бо́же, благослове́н еси́.
И ны́не и при́сно и во ве́ки веко́в. Ами́нь.
Богоро́дичен: Кто Тебе́ не просла́вит, Пресвята́я Де́во, Ты бо еси́ Роса́ небе́сная, грехо́вный пла́мень угаша́ющая и ве́рныя благода́тию исполня́ющая. Те́мже Тебе́ вопие́м: изба́ви нас ве́чнаго осужде́ния и спаси́ ду́ши на́ша.
Песнь 8
Ирмо́с: Ужасни́ся боя́йся, не́бо, и да подви́жатся основа́ния земли́: се бо, в мертвеце́х вменя́ется в вы́шних Живы́й, и во гроб мал странноприе́млется: Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Припев: Священному́чениче Илариóне, моли́ Бо́га о на́с.
А́гнца Бо́жия возлюби́в и ду́ха ми́ра сего́ отве́ргнув, еди́наго и́стиннаго Бо́га служи́тель пребы́л еси́, Иларио́не сла́вне, ны́не же на Небеси́ Влады́це всех предстои́ши. Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Припев: Священному́чениче Илариóне, моли́ Бо́га о на́с.
Внегда́ вся власть тьмы на Це́рковь Ру́сскую ополчи́ся, тогда́ ты, Иларио́не, ду́хом кре́пкий, Христа́ испове́дати не убоя́лся еси́. Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Припев: Священному́чениче Илариóне, моли́ Бо́га о на́с.
О, свяще́нная и спаси́тельная нощь Па́схи, егда́ ты, святи́телю Христо́в, во у́зах солове́цких возгласи́: да воскре́снет Бог! Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Сла́ва Отцу́ и Сы́ну и Свято́му Ду́ху:
Солове́цкая земле́ многострада́льная, возра́дуйся и возвесели́ся: Иларио́н бо преди́вный с со́нмом новому́чеников на небесе́х за Русь Святу́ю мо́лит ны́не Царя́ Сла́вы. Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.
И ны́не и при́сно и во ве́ки веко́в. Ами́нь.
Богоро́дичен: Пресвята́я Де́во, на Небеса́ к Сы́ну Твоему́ возшла́ еси́ и нас, си́рых, на земли́ не оста́вила еси́; покры́й честны́м Твои́м омофо́ром оби́тели и гра́ды на́ша, жизнь ве́чную подаю́щи всем воспева́ющим Тя.
Песнь 9
Ирмо́с: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно я́ко Бог, ве́рою и любо́вию Тя велича́ющия.
Припев: Священному́чениче Илариóне, моли́ Бо́га о на́с.
Егда́ во враче́бнице темни́чней Петро́ва гра́да огне́вицею те́ло твое́ пали́мо бя́ше, душа́ твоя́, я́ко на вода́х упокое́ния ра́достию испо́лнися, и, сете́й кня́зя ми́ра сего́ избе́гнув, ко Христу́ оты́де.
Припев: Священному́чениче Илариóне, моли́ Бо́га о на́с.
Во́ине Христо́в, Иларио́не сла́вне, ты Го́спода в житии́ твое́м небоя́зненно испове́дав, кончи́ны блаже́нныя сподо́бился еси́. Те́мже взыва́ем: моли́ ми́лостиваго Бо́га, да пода́ст нам во и́стинней ве́ре живо́т свой сконча́ти.
Припев: Священному́чениче Илариóне, моли́ Бо́га о на́с.
А́нгельское пе́ние и звон пасха́льный дру́зи твои́ и сро́дницы услы́шавше, возра́довашася, Иларио́не, уразуме́ша бо, я́ко душа́ твоя́ чи́стая на Не́бо восхо́д соверша́ше.
Сла́ва Отцу́ и Сы́ну и Свято́му Ду́ху:
Егда́ те́ло твое́ многоболе́зненное во гро́бе положе́но бысть, ча́да твоя́ духо́вная со слеза́ми к тебе́ взыва́ху: моли́ся о нас, пра́ведниче, у престо́ла Госпо́дня.
И ны́не и при́сно и во ве́ки веко́в. Ами́нь.
Богоро́дичен: Ма́ти Безневе́стная, не лиши́ нас Твоего́ заступле́ния, умоли́ Милосе́рдаго Судию́ оправда́ти ны, ве́рою и любо́вию Тя велича́ющих.
Свети́лен:
Вси святи́и Це́ркве Ру́сския ны́не торжеству́ют све́тло, священному́ченика и архиере́я Иларио́на зря́ще, с ни́ми Трóице Боже́ственней моли́твенно предстоя́щаго.
Сла́ва, и ны́не, Богоро́дичен:
Пресвята́я Богоро́дице, ди́вное селе́ние Бо́га и Сло́ва, помози́ нам, Ми́лостивая, моли́твами Твои́ми терпе́ние и упова́ние стяжа́ти, и спасе́ние улучи́ти.
Молитва
О, пресла́вный уго́дниче Бо́жий священному́чениче Иларио́не, о́тче наш, ты во дни маловре́меннаго жития́ земна́го посреде́ гоне́ний и скорбе́й мно́гих ве́ру сохрани́в, ду́ха не угаси́л еси́ и ве́рныя научи́л еси́, ка́ко подоба́ет жи́ти в Дому́ Бо́жии, и́же есть Це́рковь Бо́га Жи́ва, столп и утвержде́ние и́стины. Сего́ ра́ди к тебе́ припа́дающе мо́лимся: помози́ нам твои́ми моли́твами догма́ты и кано́ны церко́вныя тве́рдо храни́ти, зре́ние согреше́ний свои́х ду́хом смире́нным стяжа́ти, вся́каго челове́ка я́ко нетле́нный о́браз Христо́в по глаго́лу Ева́нгельскому возлюби́ти, ни еди́наго же презира́юще или́ отрева́юще, но всем по си́ле служа́ще, и та́ко Го́сподеви рабо́тающе, да сподо́бимся с тобо́ю и со все́ми новому́ченики Це́ркве Ру́сския воспева́ти Святу́ю Тро́ицу во ве́ки веко́в. Ами́нь.
..........
Текст акафиста утвержден решением Священного Синода
от 9 июля 2019 года (журнал № 82).
Кондак 1
Избра́нный во́ине Христо́в и свиде́телю ве́рный, еди́ну Святу́ю, Собо́рную и Апо́стольскую Це́рковь во спасе́ние всех испове́давый, за ню́же пострада́ти да́же до сме́рти изво́лил еси́, и ны́не в Це́ркви торжеству́ющей прославля́емый, помина́й нас, любо́вию ти взыва́ющих: Ра́дуйся, Иларио́не, Це́ркве Ру́сския сла́во и украше́ние.
Икос 1
А́нгела земна́го и челове́ка небе́снаго зрим тя, святи́телю Иларио́не, чистоту́ душе́вную измла́да соблю́дшаго и по́двигом духо́вным дар благода́ти стяжа́вшаго, те́мже ны́не ско́рую по́мощь всем подае́ши, в моли́твах та́ко тя призыва́ющим:
Ра́дуйся, благоче́стия роди́телева насле́дниче;
ра́дуйся, Це́ркве Христо́вы избра́нное ча́до.
Ра́дуйся, от младе́нства уче́нию прилежа́вый;
ра́дуйся, и́стины Боже́ственныя умо́м и се́рдцем взыска́вый.
Ра́дуйся, шко́лу духо́вную, я́ко ма́терь и пита́тельницу, возлюби́вый;
ра́дуйся, тве́рдою пи́щею богосло́вия воспита́нный.
Ра́дуйся, под кро́вом моли́тв преподо́бнаго Се́ргия ве́рою укрепи́выйся;
ра́дуйся, на брань духо́вную с миродержи́телем тьмы ве́ка сего́ изше́дый.
Ра́дуйся, Иларио́не, Це́ркве Ру́сския сла́во и украше́ние.
Кондак 2
Ви́дя ме́сто патриа́ршее пра́здно су́ще в вели́цей це́ркви Успе́нской, рыда́л еси́ се́рдцем го́рце, Иларио́не, и к лю́дем ру́сским взыва́л еси́: Доко́ле пла́кати и́мать земля́? Избра́нну же бы́вшу Патриа́рху Освяще́нным Собо́ром, лику́я воспе́л еси́ Бо́гу побе́дную пе́снь: Аллилу́иа.
Икос 2
Ра́зумом богопросвеще́нным проре́кл еси́ Патриа́рху не ца́рский вене́ц восхи́тити, но му́ченическим венце́м украси́тися, по вся бо дни умира́ти и́мать за Це́рковь Христо́ву. Сим кре́стным путе́м и ты, Иларио́не, Первосвяти́телю сше́ствовал еси́, те́мже вси восхваля́ем тя си́це:
Ра́дуйся, догма́тов и кано́нов церко́вных ревни́телю;
ра́дуйся, о Це́ркви Ру́сской те́плый моли́твенниче.
Ра́дуйся, поруга́ния сла́вы церко́вныя ви́дети не терпе́вый;
ра́дуйся, сло́вом огнено́сным сердца́ ве́рных воспламени́вый.
Ра́дуйся, во избра́нии Патриа́рха исполне́ние ча́яний церко́вных узре́вый;
ра́дуйся, Первосвяти́телю в труде́х и попече́ниих о Це́ркви сподвиза́выйся.
Ра́дуйся, крест служе́ния архиере́йскаго во дни гоне́ний восприе́мый;
ра́дуйся, на ка́мени ве́ры стопы́ твоя утверди́вый.
Ра́дуйся, Иларио́не, Це́ркве Ру́сския сла́во и украше́ние.
Кондак 3
Си́лою Вы́шняго укрепля́емь, Иларио́не, подъя́л еси́ по́двиг служе́ния архиере́йскаго, всем быв вся, и всем себе́ порабо́тив, утеша́я, наставля́я и облича́я, Бо́гу же вы́ну поя́: Аллилу́иа.
Икос 3
Имы́й ре́вность по Бо́зе и ве́лие дерзнове́ние, святи́телю Иларио́не, отсту́пники отгна́л еси́ от оби́тели Сре́тенския, к покая́нию тех призыва́я и ча́да церко́вная во благоче́стии утвержда́я, те́мже приими́ от нас похвалы́ сия́:
Ра́дуйся, враги́ твоя́ и гони́тели любо́вию покрыва́яй;
ра́дуйся, враги́ церко́вныя о́гненными словесы́ опаля́яй.
Ра́дуйся, хитросплете́ния лжепа́стырей расторга́яй;
ра́дуйся, в ве́рности Патриа́рху коле́блемых утвержда́яй.
Ра́дуйся, мно́ги отсту́пники к покая́нию обрати́вый;
ра́дуйся, любо́вию к Це́ркви ве́рных сердца́ испо́лнивый.
Ра́дуйся, лука́выя совопро́сники ве́ка сего́ посрами́вый;
ра́дуйся, за и́стину церко́вную страда́ти изво́ливый.
Ра́дуйся, Иларио́не, Це́ркве Ру́сския сла́во и украше́ние.
Кондак 4
Бу́рею зло́бы смуща́еми гони́тели Це́ркве, у́зы и темни́цы ти угото́ваша, тща́щеся свет испове́дания твоего́ сокры́ти, Иларио́не, ты же, и власть богобо́рную я́ко попуще́ние за грехи́ от Бо́га прие́мля, о всем прославля́л еси́ Промысли́теля всех, поя́: Аллилу́иа.
Икос 4
Слы́ша стра́шныя ве́сти о гоне́ниих лю́тых, не поколеба́лся еси́ душе́ю, Иларио́не сла́вне, но па́че укрепи́лся еси́ ве́рою в Це́рковь Христо́ву, я́ко багряни́цею и ви́ссом, кровьми́ но́вых му́ченик украша́ему. Тя же, я́ко еди́наго от ни́х, священному́чениче, ублажа́ем, воспева́юще ти сицева́я:
Ра́дуйся, омофо́р святи́тельский в день священному́ченика Ермоге́на прие́мый;
ра́дуйся, служе́ние архипа́стырское страда́нием запечатле́вый.
Ра́дуйся, у́зы, темни́цы и го́рькия рабо́ты за Христа́ претерпе́вый;
ра́дуйся, благоду́шием и терпе́нием в ско́рбех сих украше́нный.
Ра́дуйся, нестяжа́ния и кро́тости о́бразе;
ра́дуйся, о гоня́щих и оби́дящих тя моли́твенниче.
Ра́дуйся, богосло́ве, ры́барския мре́жи не возгнуша́выйся;
ра́дуйся, уму́ преизя́щному апо́стольскую простоту́ сочета́вый.
Ра́дуйся, Иларио́не, Це́ркве Ру́сския сла́во и украше́ние.
Кондак 5
Боготе́чная звезда́ яви́лся еси́, Иларио́не, во у́зах солове́цких стра́ждущим лю́те, и́мже смерть предстоя́ше на всяк час, тьму бо зло́бы сатани́нския све́том любве́ просвети́л еси́, уны́ние и страх отгоня́я, соу́зники же твоя́ научи́л еси́ во ско́рбех хвали́ти Бо́га: Аллилу́иа.
Икос 5
Ви́дяще нача́льницы и приста́вницы во узи́лищи му́жество и добро́ту души́ твоея́, Иларио́не чу́дне, де́рзость обы́чную отлага́ху и я́ко архиере́я Бо́жия тя почита́ху, мы же тя я́ко святи́теля и му́ченика си́це восхваля́ем:
Ра́дуйся, простото́ю и кро́тостию вся к себе́ привлека́яй;
ра́дуйся, любо́вию твое́ю вся́кую ду́шу возвеселя́яй.
Ра́дуйся, тщесла́внаго ду́ха фарисе́йскаго обличи́телю;
ра́дуйся, лицеме́рия и лжи искорени́телю.
Ра́дуйся, о́браз Бо́жий нетле́нный в челове́цех прозрева́яй;
ра́дуйся, и са́мых отча́янных гре́шников не отмета́яй.
Ра́дуйся, благоду́шием твои́м страда́льцы утеша́яй;
ра́дуйся, сло́вом ве́ры малоду́шныя возставля́яй.
Ра́дуйся, Иларио́не, Це́ркве Ру́сския сла́во и украше́ние.
Кондак 6
Пропове́дник и свиде́тель яви́лся еси́ и́стины глаго́ла Христо́ва, я́ко врата́ а́дова не одоле́ют Це́ркви, вся бо су́етная кова́рства князе́й богобо́рных, Иларио́не, я́вна соде́лал еси́, просвеща́ющему и укрепля́ющему тя Бо́гу взыва́я: Аллилу́иа.
Икос 6
Возсия́л еси́ Це́ркви Ру́сской, Иларио́не, я́ко звезда́ путево́дная, посреде́ смяте́ний и раско́лов, от слуг сатани́нских всева́емых, ты бо ве́ру и пра́вила церко́вная тве́рдо храня́, со преда́тели и отсту́пники в сове́т не вшел еси́, па́че же страда́ти с людьми́ Бо́жиими изво́лил еси́, те́мже тя, священному́чениче, похваля́ем:
Ра́дуйся, ле́сти богобо́рных не послу́шавый;
ра́дуйся, хитросплете́нныя ко́зни тех разори́вый.
Ра́дуйся, и́стину церко́вную сло́вом богому́дрым пропове́давый;
ра́дуйся, страда́льческим житие́м сло́во сие́ извествова́вый.
Ра́дуйся, архипа́стырей и па́стырей во узи́лищи укрепля́вый;
ра́дуйся, от раско́ла церко́внаго смуще́нных огражда́вый.
Ра́дуйся, к едине́нию с Це́рковию вся призыва́вый;
ра́дуйся, не́мощи собра́тий долготерпе́ти увещава́вый.
Ра́дуйся, Иларио́не, Це́ркве Ру́сския сла́во и украше́ние.
Кондак 7
Хотя́щу ти Це́ркви Христо́ве послужи́ти, Иларио́не, прия́т Человеколю́бец Госпо́дь страда́льческое твое́ житие́ я́ко же́ртву благоуха́нну, хода́тая и моли́твенника тя ве́рным дарова́в, пою́щим Ему́: Аллилу́иа.
Икос 7
Но́вым страстоте́рпцем Це́ркве Ру́сския сочета́лся еси́, Иларио́не достоблаже́нне, егда́ во враче́бнице Петро́ва гра́да тя́жко боля́й, ду́шу твою́ в ру́це Христу́ пре́дал еси́. Ве́рнии же многострада́льное те́ло твое́ погребо́ша со пла́чем, надгро́бныя пе́сни ти воспева́юще:
Ра́дуйся, от уз и заточе́ния сме́ртию разреши́выйся;
ра́дуйся, свобо́ду сла́вы чад Бо́жиих улучи́вый.
Ра́дуйся, на земли́ не о себе́, но о Це́ркви Ру́сской скорбе́вый;
ра́дуйся, на Небеси́ о благостоя́нии ея́ при́сный хода́таю.
Ра́дуйся, верными с любовию провождаемый;
ра́дуйся, А́нгельскими ли́ки во сла́ве срета́емый.
Ра́дуйся, блаже́нств Ева́нгельских соприча́стниче;
ра́дуйся, я́ко мзда твоя́ мно́га на Небесе́х.
Ра́дуйся, Иларио́не, Це́ркве Ру́сския сла́во и украше́ние.
Кондак 8
Стра́нник и пришле́ц был еси́ на земли́, Небе́снаго Ца́рства взыску́я, о́браз того́ и явле́ние Це́рковь святу́ю в ми́ре сем испове́дуя, и та́йну спасе́ния богодви́жным умо́м испыту́я, богосло́вствовал и хвали́л еси́ Бо́га о сем: Аллилу́иа.
Икос 8
Всем се́рдцем и всем умо́м твои́м Христа́ возлюби́в, Иларио́не блаже́нне, от то́ржища ми́ра к Трапе́зе Госпо́дни лю́ди ру́сския призыва́л еси́, сего́ ра́ди с весе́лием вопие́м ти:
Ра́дуйся, Ева́нгелия Христо́ва пропове́дниче;
ра́дуйся, апо́стольских преда́ний храни́телю.
Ра́дуйся, уче́ний ерети́ческих обличи́телю;
ра́дуйся, писа́ний оте́ческих сказа́телю.
Ра́дуйся, Христа́ краеуго́льна Ка́меня Це́ркве испове́давый;
ра́дуйся, на Ка́мени сем упова́ние твое́ утверди́вый.
Ра́дуйся, умы́ любому́дрыя сло́вом и́стины просвеща́яй;
ра́дуйся, сердца́ проста́я теплото́ю любве́ возгрева́яй.
Ра́дуйся, Иларио́не, Це́ркве Ру́сския сла́во и украше́ние.
Кондак 9
Все естество́ А́нгельское ра́дости испо́лнися, Иларио́не великоимени́те, восходя́щу ти от земны́х к Небе́сным, ты бо, я́ко но́вая звезда́, на тве́рди церко́вней возсия́л еси́ ве́рным, пою́щим о тебе́ Бо́гу: Аллилу́иа.
Икос 9
Вети́йствуяй умолка́ет язы́к пред та́йною твоего́ за Христа́ страда́ния, мно́гими бо дарова́ньми почте́нный, всебога́те Иларио́не, ничто́же от них пощаде́л еси́, сме́рти Христо́ве сообразу́яся и науча́я нас воспева́ти тебе такова́я:
Ра́дуйся, кре́пость теле́сную во у́зах истощи́вый;
ра́дуйся, кре́пость духо́вную в терпе́нии стяжа́вый.
Ра́дуйся, быстроту́ ума́ послуша́нием Бо́гу связа́вый;
ра́дуйся, благодаре́нием в ско́рбех И́ову подража́вый.
Ра́дуйся, я́ко ри́зы златы́я на ру́бище премени́л еси́;
ра́дуйся, я́ко одеждею весе́лия ны́не обле́клся еси́.
Ра́дуйся, престо́ла церко́внаго нево́лею зде отлуче́нный;
ра́дуйся, Престо́лу Сла́вы ны́не предстоя́й, я́ко муж соверше́нный.
Ра́дуйся, Иларио́не, Це́ркве Ру́сския сла́во и украше́ние.
Кондак 10
Спасти́ хотя́ ду́шу свою́, пло́ти, ми́ру и диа́волу не порабо́тился еси́, Иларио́не блаже́нне, но, я́ко зла́то в горни́ле, скорбьми́ мно́гими искуша́емь, терпе́нием ра́зум соверше́н стяжа́л еси́, ра́дуяся о Бо́зе и поя́ Ему́: Аллилу́иа.
Икос 10
Стена́ и утвержде́ние Це́ркви Ру́сской во дни безбо́жных гоне́ний яви́лся еси́, Иларио́не святи́телю, те́мже и нас, в мо́ри жите́йстем обурева́емых, от лжеуче́ний и собла́знов изба́ви, вопию́щих ти с любо́вию такова́я:
Ра́дуйся, от ю́ности твоея́ Це́рковь я́ко Ма́терь спаса́емых возлюби́вый;
ра́дуйся, сло́вом и моли́твою мно́гия в ло́но ея́ возврати́вый.
Ра́дуйся, плоть твою́ воздержа́нием ду́ху покори́вый;
ра́дуйся, ум твой уче́нием церко́вным уцелому́дривый.
Ра́дуйся, благоче́стия цве́те нетле́нный;
ра́дуйся, испове́дания плод принося́й.
Ра́дуйся, святи́телей ру́сских удобре́ние;
ра́дуйся, новому́чеников честна́я похвало́.
Ра́дуйся, Иларио́не, Це́ркве Ру́сския сла́во и украше́ние.
Кондак 11
Пе́ние всеумиле́нное прино́сим ти, Иларио́не, о́тче наш, к ра́це моще́й твои́х любо́вию притека́юще и моля́щеся: не оста́ви оте́чества твоего́ земна́го и оби́тели твоея́, но вся во благоче́стии утверди́, да вы́ну зове́м: Аллилу́иа.
Икос 11
Светоза́рную звезду́ в нощи́ уны́ния су́щим ви́дим тя, Иларио́не небоявле́нне, ты бо свет невече́рния ра́дости в се́рдце нося́, ско́рбный мрак разгоня́еши, возвеселя́я всех вопию́щих ти:
Ра́дуйся, ра́дости тезоимени́тый;
ра́дуйся, от младе́нства Бо́гом избра́нный.
Ра́дуйся, Воскресе́ния Христо́ва и́стинный свиде́телю;
ра́дуйся, сла́вы Ца́рствия в до́льнем ми́ре возвести́телю.
Ра́дуйся, блаже́нную чистоту́ явля́яй;
ра́дуйся, ра́дости о Бо́зе Спа́се па́дшия науча́яй.
Ра́дуйся, я́ко житие́ твое́ при́сное есть Бо́гу хвале́ние;
ра́дуйся, я́ко смерть твоя́ бы́сть Христу́ Воскре́сшему побе́дное пе́ние.
Ра́дуйся, Иларио́не, Це́ркве Ру́сския сла́во и украше́ние.
Кондак 12
Благода́ть от Бо́га прия́л еси́, Иларио́не, неду́жныя исцеля́ти, ско́рбныя утеша́ти, па́дшия возставля́ти, те́мже и мы, све́тло па́мять твою́ соверша́юще, благода́рно зове́м: Аллилу́иа.
Икос 12
Пою́ще по́двиг испове́дания твоего́, восхваля́ем тя, святи́телю Иларио́не пресла́вне, тече́ние бо непоро́чно сконча́в и ве́ру соблю́д, пра́вды вене́ц прия́л еси́, те́мже Це́рковь Ру́сская тобо́ю хва́лится, побе́дныя пе́сни ти возсыла́ющи:
Ра́дуйся, во́ине Христо́в непобеди́мый;
ра́дуйся, сто́лпе Це́ркве несокруши́мый.
Ра́дуйся, за́поведей Ева́нгельских исполни́телю;
ра́дуйся, ни́вы церко́вныя де́лателю и храни́телю.
Ра́дуйся, цве́те росси́йскаго лу́га духо́внаго;
ра́дуйся, пло́де кра́сный се́яния спаси́тельнаго.
Ра́дуйся, собо́ра но́вых му́чеников све́тлая звездо́;
ра́дуйся, о земне́м оте́честве при́сный моли́твенниче.
Ра́дуйся, Иларио́не, Це́ркве Ру́сския сла́во и украше́ние.
Кондак 13
О, преди́вный священному́чениче Христо́в Иларио́не, Це́ркве Ру́сския украше́ние, приими́ ны́не ма́лое моле́ние сие́ на́ше, от тлетво́рных собла́знов изба́ви нас, да от ве́чных мук свобо́ждшеся твои́ми к Бо́гу моли́твами и спасе́ние улучи́вше, воспое́м с тобо́ю Святе́й Тро́ице: Аллилу́иа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
А́нгела земна́го и челове́ка небе́снаго зрим тя, святи́телю Иларио́не, чистоту́ душе́вную измла́да соблю́дшаго и по́двигом духо́вным дар благода́ти стяжа́вшаго, те́мже ны́не ско́рую по́мощь всем подае́ши, в моли́твах та́ко тя призыва́ющим:
Ра́дуйся, благоче́стия роди́телева насле́дниче;
ра́дуйся, Це́ркве Христо́вы избра́нное ча́до.
Ра́дуйся, от младе́нства уче́нию прилежа́вый;
ра́дуйся, и́стины Боже́ственныя умо́м и се́рдцем взыска́вый.
Ра́дуйся, шко́лу духо́вную, я́ко ма́терь и пита́тельницу, возлюби́вый;
ра́дуйся, тве́рдою пи́щею богосло́вия воспита́нный.
Ра́дуйся, под кро́вом моли́тв преподо́бнаго Се́ргия ве́рою укрепи́выйся;
ра́дуйся, на брань духо́вную с миродержи́телем тьмы ве́ка сего́ изше́дый.
Ра́дуйся, Иларио́не, Це́ркве Ру́сския сла́во и украше́ние.
Кондак 1
Избра́нный во́ине Христо́в и свиде́телю ве́рный, еди́ну Святу́ю, Собо́рную и Апо́стольскую Це́рковь во спасе́ние всех испове́давый, за ню́же пострада́ти да́же до сме́рти изво́лил еси́, и ны́не в Це́ркви торжеству́ющей прославля́емый, помина́й нас, любо́вию ти взыва́ющих: Ра́дуйся, Иларио́не, Це́ркве Ру́сския сла́во и украше́ние.
Молитва
О, пресла́вный уго́дниче Бо́жий священному́чениче Иларио́не, о́тче наш, ты во дни маловре́меннаго жития́ земна́го посреде́ гоне́ний и скорбе́й мно́гих ве́ру сохрани́в, ду́ха не угаси́л еси́ и ве́рныя научи́л еси́, ка́ко подоба́ет жи́ти в Дому́ Бо́жии, и́же есть Це́рковь Бо́га Жи́ва, столп и утвержде́ние и́стины. Сего́ ра́ди к тебе́ припа́дающе мо́лимся: помози́ нам твои́ми моли́твами догма́ты и кано́ны церко́вныя тве́рдо храни́ти, зре́ние согреше́ний свои́х ду́хом смире́нным стяжа́ти, вся́каго челове́ка я́ко нетле́нный о́браз Христо́в по глаго́лу Ева́нгельскому возлюби́ти, ни еди́наго же презира́юще или́ отрева́юще, но всем по си́ле служа́ще, и та́ко Го́сподеви рабо́тающе, да сподо́бимся с тобо́ю и со все́ми новому́ченики Це́ркве Ру́сския воспева́ти Святу́ю Тро́ицу во ве́ки веко́в. Ами́нь.
Следующая публикация
Нет комментариев