Глас 4
Песнь 1
Ирмос: Мо́ря чермну́ю пучи́ну/ невла́жными стопа́ми/ древний пешеше́ствовав Изра́иль,/ крестообра́зныма Моисе́овыма рука́ма/ Амали́кову силу в пустыни победи́л есть.
Припев: Преподо́бне о́тче Три́фоне, моли́ Бо́га о на́с.
Боже́ственнаго Пресвятаго Духа блиста́яся благодатию,/ светоно́сное и честно́е твое успение пра́зднующих, Трифоне преподобне,/ светлою молитвою твоею от страсте́й мглы очисти.
Припев: Преподо́бне о́тче Три́фоне, моли́ Бо́га о на́с.
Преподобне отче, крест свой взем,/ последовал еси Слову, распе́ншемуся нас ради,/ и плотския стра́сти воздержа́нием, преподобне, и низу лега́нием умертви́л еси.
Сла́ва Отцу́ и Сы́ну и Свято́му Ду́ху.
Поще́нием, молитвами и слеза́ми Бо́гови приближа́яся,/ приял еси от Него благодать цели́ти неду́ги и отгоня́ти лукавыя ду́хи,/ Трифоне Богомудре преблаженне.
И ны́не и при́сно и во ве́ки веко́в. Ами́нь.
Богородичен: Облече́ся из Тебе, Чистая Дево, Бог в Человека,/ спасения ра́ди человеков,/ егоже моли́ просвети́ти пою́щия Тя.
Песнь 3
Ирмос: Веселя́тся о Тебе Церковь Твоя, Христе, зову́щи:/ Ты моя кре́пость, Господи,/ и прибе́жище, и утвержде́ние.
Припев: Преподо́бне о́тче Три́фоне, моли́ Бо́га о на́с.
Яко же солнце на земли, светом добродетелей просия́л еси,/ всех ду́ши, преподобне, благодатию просвеща́я духо́вною.
Припев: Преподо́бне о́тче Три́фоне, моли́ Бо́га о на́с.
Железом чре́сла своя препоя́сана имел еси страсте́й на умерщвле́ние,/ и телесе́ озлобление претерпе́л еси, Трифоне преподобне,/ безстра́стием я́ве оде́лся.
Сла́ва Отцу́ и Сы́ну и Свято́му Ду́ху.
Человеколюби́в быв немощны́м в житии твоем,/ сего ради прия́л еси от Бога многую благодать, преподобне,/ цели́ти стра́сти неисце́льныя.
И ны́не и при́сно и во ве́ки веко́в. Ами́нь.
Богородичен: Слово Божие во утробу Твою, Приснодево, всели́ся,/ и земноро́дных вся́кия грехи́ отъя́ло есть Своею бла́гостию.
Седален, глас 8
Отре́кся плоти сладостра́стия Христа ради,/ духо́вный пастырь людем явился еси,/ словеса́ учения Христова сказу́я и́ноком и собою явля́я правды правило,/ стра́сти же вся крепко попра́л еси, тем и вра́жия кова́рства до конца потребил еси,/ к Богу взира́я всегда, блаженне Трифоне./ егоже моли грехо́в оставле́ние пода́ти чту́щим любовию святую па́мять твою.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Солнца о́блаче светле́йший,/ Боже́ственнаго Света све́щниче златокова́нный, Непорочная Пречистая Владычице,/ омраче́нную душу мою слепото́ю страсте́й безстра́стия заре́ю просвети́, молюся,/ и оскверне́нное сердце мое омы́й умиле́нием покая́ния,/ пла́чем же от скверных мя очисти дел моих, да любовию зову́ Ти:/ Богородице Приснодево, моли Христа Бога,/ прегреше́ний оставле́ние дарова́ти ми, к Тебе бо и́мам надежду, раб Твой.
Песнь 4
Ирмос: Вознесе́на Тя ви́девши Церковь на Кресте́,/ Солнце праведное,/ ста в чи́не своем,/ достойно взыва́ющи:/ слава силе Твоей, Господи.
Припев: Преподо́бне о́тче Три́фоне, моли́ Бо́га о на́с.
Струя́ми сле́зными сердце свое очищая,/ молитвами твоими на безво́днем месте воде истека́ти устро́ил еси,/ Богу тя прославля́ющу, Трифоне преподобне, яко Своего угодника.
Припев: Преподо́бне о́тче Три́фоне, моли́ Бо́га о на́с.
Пресла́вным житием твоим, яко звезда, сия́я,/ священными чудесы, яко другое Небо, показа́ся, блаженне, ве́рою зову́щим:/ слава силе Твоей, Господи.
Сла́ва Отцу́ и Сы́ну и Свято́му Ду́ху.
Законом повину́яся, преподобне, Владычним,/ яже в па́стве твоей су́щия наставил еси к свету Богоразумия,/ усугу́бив данный ти талант, яко раб послушли́в своему Владыце Христу.
И ны́не и при́сно и во ве́ки веко́в. Ами́нь.
Богородичен: Привлече́нный ум мой, Богородительнице, к теле́сным сла́достем,/ Твоим хода́тайством, молюся, утверди́,/ Яже Едина рождшая Благодетеля Бога нашего в Вы́шних.
Песнь 5
Ирмос: Ты, Господи, мой свет/ в мир прише́л еси,/ Свет Святый, обраща́яй из мра́чна неве́дения/ верою воспева́ющия Тя.
Припев: Преподо́бне о́тче Три́фоне, моли́ Бо́га о на́с.
Ум твой, преподобне, чи́стыми к Богу манове́нии весь укрепля́ем явися/ и плотски́х сладостра́стии́ превы́шши показа́ся.
Припев: Преподо́бне о́тче Три́фоне, моли́ Бо́га о на́с.
Сый врач душа́м и телесе́м, пребога́те,/ отжени плотски́я и душевре́дныя болезни благодатию Божественнаго Духа.
Сла́ва Отцу́ и Сы́ну и Свято́му Ду́ху.
Блажен еси, преподобне, яко всю зло́бу вра́жию победил еси/ и теле́сныя стра́сти до конца умертви́л еси.
И ны́не и при́сно и во ве́ки веко́в. Ами́нь.
Богородичен: Родила́ еси Преблага́го Бога и по рождестве Де́вая пребысть, Богоневесто,/ сего ра́ди Тя вси ро́ди челове́честии ублажа́ют.
Песнь 6
Ирмос: Пожру́ Ти со гла́сом хвале́ния, Господи,/ Церковь вопие́т Ти,/ от бесо́вския кро́ве очищшися,/ ради милости от ребр Твоих/ исте́кшею Кровию.
Припев: Преподо́бне о́тче Три́фоне, моли́ Бо́га о на́с.
Единым то́чию призыванием святаго твоего и́мене/ и омы́тием воды́, исходя́щия во обители твоей,/ тряса́вичная болезнь от человек отгоня́ется и вред бесо́вский молитвами твоими потребля́ется.
Припев: Преподо́бне о́тче Три́фоне, моли́ Бо́га о на́с.
Победи́в плотскаго наве́та мудрование,/ Духа Святаго благодать прия́л еси/ отгоня́ти плотски́я неду́ги и цели́ти душевныя стра́сти, Трифоне преблаженне.
Сла́ва Отцу́ и Сы́ну и Свято́му Ду́ху.
О, чудо преди́вное,/ ка́ко от еди́наго то́кмо призыва́ния боля́щии прие́млют исцеление твоим явлением, преславне Трифоне,/ и бед и напа́стей свобожда́ются твоими к Богу молитвами.
И ны́не и при́сно и во ве́ки веко́в. Ами́нь.
Богородичен: Умертви́ пло́ти моея мудрова́ние, Приснодево,/ Умертви́теля смерти заче́ншая/ и ро́ждшая Жизнодавца паче сло́ва и разума.
Кондак, глас 8
Днесь в начале основания добродетелей, блаженне,/ положил еси в души́ своей страх Божий,/ от юности взем крест свой,/ благоче́стно Христови последовал еси,/ А́нгельским о́бразом облече́ся и быст монах преди́вен,/ в добродетелех цветяше, к будущим Бо́гови простира́лся./ И своей пло́ти, яко врагу, немилостив, отче, был еси,/ терпением явися, блаженне, яко зла́то искуше́но в горни́ле,/ но и ныне не забуди посещати чад своих,/ поминай нас, чтущих пресвятую память твою,/ да вси благода́рне вопие́м ти:/ радуйся, прему́дре Трифоне, наставниче мона́хом.
Икос
Отве́рзи ми устне́ Богоприя́тными твоими к Богу молитвами, преблаженне,/ да воспою́ равноа́нгельное житие твое и возглаго́лю достойно вся добродетели твоя,/ столп бо и забра́ло явися и́ноком и правды пра́вило пресветлое,/ темже и просла́вльшему тя Господу молися непреста́нно о всех нас.
Песнь 7
Ирмос: В пещи́ Авраа́мстии о́троцы перси́дстей,/ любовию благоче́стия па́че,/ не́жели пла́менем, опаля́еми, взыва́ху:/ благословен еси в храме славы Твоея, Господи.
Припев: Преподо́бне о́тче Три́фоне, моли́ Бо́га о на́с.
Сле́зными тучами пла́мень страсте́й погаси́л еси,/ ныне же огне́м молитв твоих, блаженне, и Божественною благодатию/ попаляеши вся душетле́нныя неду́ги.
Припев: Преподо́бне о́тче Три́фоне, моли́ Бо́га о на́с.
Всеусе́рдно Творца твоего, блаженне, возлюби́л еси,/ Емуже сам служа́ и и́ны науча́я, Трифоне мудре, взыва́л еси:/ благословен еси в храме славы Твоея, Господи.
Сла́ва Отцу́ и Сы́ну и Свято́му Ду́ху.
Якоже древо при исхо́дищах вод, воздержанием, отче, насажде́н быв,/ воздал еси плоды́ чудес действо от честна́го ти о́браза, Трифоне пребогате,/ благовре́менно всегда изоби́луяся.
И ны́не и при́сно и во ве́ки веко́в. Ами́нь.
Богородичен: Бу́ри безме́рных моих прегрешений, Отроковице, избави мя,/ едина смире́нных помощь кре́пкая и грешных очищение, зовущих:/ благословенна Ты в жена́х еси, Всенепоро́чная Владычице.
Песнь 8
Ирмос: Ру́це распросте́р Дании́л,/ львов зия́ния в ро́ве затче́,/ огненную же силу угаси́ша, доброде́телию препоя́савшеся,/ благоче́стия рачи́тели/ о́троцы, взыва́юще:/ благословите вся дела Господня Господа.
Припев: Преподо́бне о́тче Три́фоне, моли́ Бо́га о на́с.
Яко пресве́тлое у́тро, просия́л еси,/ яко светоза́рная звезда, и яко вели́кое солнце, озари́л еси верных сердца́ чудесы́ твоими, Трифоне Богодухнове́нне,/ и души всех просвети́л еси Божественною благодатию, вопию́щих:/ вся дела благослови́те Господня Господа.
Припев: Преподо́бне о́тче Три́фоне, моли́ Бо́га о на́с.
Глубоку я́зву врагу, ражда́ющу смерть, преблаженне, дал еси,/ егда благодатию Святаго Духа смиренну стяжа́л еси мудрость,/ высокому́дрый того нрав в землю смиря́я и се́ти душетле́нныя его попира́я.
Припев: Преподо́бне о́тче Три́фоне, моли́ Бо́га о на́с.
Ви́дети ра́йскаго блаженства и ве́чнующаго наслаждения, святе, сподо́бився,/ святых све́тлости зри́ши и радостно с ними всегда пое́ши:/ вся дела благослови́те Господня Господа.
Сла́ва Отцу́ и Сы́ну и Свято́му Ду́ху.
Место во обители твоей безво́дное, якоже вторы́й Моисе́й, молитвами твоими многово́дно сотвори́л еси/ и цельбоно́сно показал еси приходя́щим с верою, че́рплющим, пию́щим и Христу зову́щим:/ вся дела благословите Господня Господа.
И ны́не и при́сно и во ве́ки веко́в. Ами́нь.
Богородичен: Неду́говавшую тягото́ю лю́тых, смире́нную мою душу жаждою пали́му,/ Богоблагода́тная Владычице Чистая, напо́й водою спасения и здраву до конца покажи́, зову́щу:/ вся дела благословите Господня Господа.
Песнь 9
Ирмос: Ка́мень нерукосе́чный/ от несеко́мыя горы́, Тебе, Дево,/ краеуго́льный отсече́ся, Христос,/ совокупи́вый разстоя́щаяся естества́,/ тем, веселя́щеся, Тя, Богородице, велича́ем.
Припев: Преподо́бне о́тче Три́фоне, моли́ Бо́га о на́с.
Возмо́гл еси о укрепля́ющем тя Господе, Трифоне Богомудре,/ вся вра́жия силы попра́ти и неверныя посрами́ти,/ темже и венец яко победоно́сец прия́л еси,/ и дерзнове́ние моли́тися Господу о нас, чтущих память твою че́стно.
Припев: Преподо́бне о́тче Три́фоне, моли́ Бо́га о на́с.
Якоже от неистощи́маго источника, струи́ исцелений источа́еши, преподобне,/ и всякия болезни плотски́я и душе́вныя скве́рны силою Божественнаго Духа очищаеши,/ и благоче́стно наша напая́еши сердца и помышления, почита́ющих Тя.
Припев: Преподо́бне о́тче Три́фоне, моли́ Бо́га о на́с.
Днесь всечестну́ю твою память, отче преподобне Трифоне, соверша́юще,/ соше́дшеся всяк во́зраст, тре́бующе твоея помощи и заступления, усе́рдно просим:/ поминай нас у Престола Господа Славы, чтущих священную память твою.
Сла́ва Отцу́ и Сы́ну и Свято́му Ду́ху.
Троичен: Взят еси ко оби́телем вечным Единосущныя Троицы, преподобне отче,/ и, взира́я у́мныма очи́ма, по достоя́нию к лико́м преподобных причте́ся,/ с ними же нас поминай, иже на земли тебе поминающих и пе́сньми всегда почита́ющих.
И ны́не и при́сно и во ве́ки веко́в. Ами́нь.
Богородичен: Глас Арха́нгельский вопие́м Ти, Чи́стая Де́во:/ радуйся, клятвы разрушение, преподобных славо и мучеником похвало,/ пророков проповедание и человеков спасе́ние.
Светилен
Мирска́го сладостра́стия яко многомяте́жна избе́г, и неяде́нием плоть свою увядив,/ обнови́в же душе́вную кре́пость и славою Небесною обогати́вся, приснопа́мятне Трифоне,/ моли́ся о нас непреста́нно ко Господу.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Кре́пкое Твое предстательство, Марие Богоукра́шенная,/ и све́тлая Твоя сла́ва по всей земли показася,/ о Тебе ныне хва́лимся и весели́мся, иму́ще Тя к Сыну и Богу Твоему Хода́таицу неусы́пную,/ молитвами Твоими спасемся.
...........
Минея, 8 Октября, Канон преподобного Трифона
Глас 2
Песнь 1
Ирмос: Гряди́те, людие, поим песнь Христу Богу,/ разде́льшему море и наста́вльшему люди,/ яже изведе́ из рабо́ты еги́петския,/ яко просла́вися.
Припев: Преподо́бне о́тче Три́фоне, моли́ Бо́га о на́с.
Радуйся, источниче кипя́щий струи́ спасения,/ от них же почерпа́ем целе́бную благодать, и прегрешений избавля́емся,/ любовию приходя́щии к тебе, приснопа́мятне Трифоне.
Припев: Преподо́бне о́тче Три́фоне, моли́ Бо́га о на́с.
От утробы ма́терни, славне, явился еси избра́нный сосуд,/ духо́вную благодать от Христа Бога прие́мый.
Сла́ва Отцу́ и Сы́ну и Свято́му Ду́ху.
Да живота нетленнаго прича́стник яви́шися,/ вре́менных, отче премудре, небре́гл еси/ и, к Богу преше́д, непрестанно мо́лишися, спастися всем нам.
И ны́не и при́сно и во ве́ки веко́в. Ами́нь.
Богородичен: Словесе́м премудрым Твоих усте́н после́дующе,/ ра́дующеся, Всенепорочная, Тя ублажа́ем,/ нам виновницу неизрече́ннаго блаженства.
Песнь 3
Ирмос: На ка́мени мя веры утверди́в,/ разшири́л еси уста моя на враги́ моя,/ возвесели́бося дух мой, внегда пе́ти:/ несть свят, якоже Бог наш,/ и несть пра́веден, па́че Тебе, Господи.
Припев: Преподо́бне о́тче Три́фоне, моли́ Бо́га о на́с.
Всесветлый, Богомудре, показа́ся столп, наставляющ чи́ны и́нок,/ и облак, осеня́ющ жребий Божий, и ли́ца невидимых враго́в помрача́ющ,/ благодатию всех Царя и Бога.
Припев: Преподо́бне о́тче Три́фоне, моли́ Бо́га о на́с.
Предстоя́ своему Владыце и Господу,/ молися изба́витися стаду твоему от рабо́ты темныя, преподобне,/ и мучи́тельства страсте́й избежа́ти, ибо твоих молитв послу́шает Бог.
Сла́ва Отцу́ и Сы́ну и Свято́му Ду́ху.
Пло́ти своея стра́сти умертви́в крепким поще́нием, Богоглаго́льниче,/ и быв обитель Влады́чня,/ моли изба́витися скорбе́й и страсте́й смуще́ния избежа́ти всем, к тебе прибега́ющим.
И ны́не и при́сно и во ве́ки веко́в. Ами́нь.
Богородичен: Сви́ток Тя нарече́ Исаия, в немже Слово плотски назна́менася,/ да раздра́в долго́в древних рукописа́ние,/ подаст оставле́ние рабо́ты всем нам.
Седален, глас 8
Отре́кся плоти сладостра́стия Христа ради,/ духо́вный пастырь людем явился еси,/ словеса́ учения Христова сказу́я и́ноком и собою явля́я правды правило,/ стра́сти же вся крепко попра́л еси, тем и вра́жия кова́рства до конца потребил еси,/ к Богу взира́я всегда, блаженне Трифоне./ егоже моли грехо́в оставле́ние пода́ти чту́щим любовию святую па́мять твою.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Солнца о́блаче светле́йший,/ Боже́ственнаго Света све́щниче златокова́нный, Непорочная Пречистая Владычице,/ омраче́нную душу мою слепото́ю страсте́й безстра́стия заре́ю просвети́, молюся,/ и оскверне́нное сердце мое омы́й умиле́нием покая́ния,/ пла́чем же от скверных мя очисти дел моих, да любовию зову́ Ти:/ Богородице Приснодево, моли Христа Бога,/ прегреше́ний оставле́ние дарова́ти ми, к Тебе бо и́мам надежду, раб Твой.
Песнь 4
Ирмос: Пою́ Тя, слухом бо, Господи, услышах и ужасо́хся,/ до мене бо и́деши, мене ища́ заблу́ждшаго./ Тем многое Твое снизхожде́ние, еже на мя,/ прославля́ю, Многоми́лостиве.
Припев: Преподо́бне о́тче Три́фоне, моли́ Бо́га о на́с.
Желание тя Божественное распали́, огнем бо святы́м согре́я твое сердце,/ сего ради и жела́нная дости́гл еси до конца, Богомудре,/ оста́вль земны́х пристра́стие и единожи́тель быв Вы́шнем служи́телем.
Припев: Преподо́бне о́тче Три́фоне, моли́ Бо́га о на́с.
Ласка́ния све́рстник твоих попра́л еси, преподобне, всеобразно,/ вни́де бо раче́ние Содетеля в тя, Богомудре, те́пле,/ и за́дних мрачная желания до конца отри́нул еси.
Припев: Преподо́бне о́тче Три́фоне, моли́ Бо́га о на́с.
Житейския сла́дости отверг, преподобне,/ и, Христа Единаго возлюби́в, родительский кров тайно оставил еси,/ и яко пришлец во страна́х чужди́х явился еси, спасе́ния неки́й.
Сла́ва Отцу́ и Сы́ну и Свято́му Ду́ху.
На па́жить чистую воздержа́ния возве́л еси стадо твое, отче,/ ко исто́чником спасения нему́тнаго безстра́стия,/ разумныя звери побеждая твоими к Богу молитвами.
И ны́не и при́сно и во ве́ки веко́в. Ами́нь.
Богородичен: Се сла́вят Тебе ро́ди родо́в, Богомати, якоже прорекла́ еси, Отроковице,/ Создателя бо бе палата и храм Божественный,/ в немже всели́ся Вышний, пло́тию оде́яся, да спасе́т нас.
Песнь 5
Ирмос: Просвеще́ние во тьме лежащих,/ спасение отча́янных, Христе Спасе мой,/ к Тебе у́тренюю, Царю мира,/ просвети́ мя сия́нием Твоим:/ иного бо ра́зве Тебе Бога не зна́ю.
Припев: Преподо́бне о́тче Три́фоне, моли́ Бо́га о на́с.
Весь Бо́гови предався, преподобне,/ в пусты́нях мраз зимний претерпел еси, и до́блественне зной понесл еси,/ и сподо́бися причастник Премудрости Божия быти, доброде́тельным сиянием благоукраша́ем.
Припев: Преподо́бне о́тче Три́фоне, моли́ Бо́га о на́с.
От юности прилежа́в поще́нию мно́гу, чревоугодия зми́я отри́нул еси сове́тника, отче преподобне,/ а́лчбою, и жа́ждею, и непреста́нными молитвами, и чистотою Бо́гови соедини́лся/ и прича́стник быти сподо́бился еси пи́щи Небесныя.
Сла́ва Отцу́ и Сы́ну и Свято́му Ду́ху.
Доброде́тельми на Го́рняя восшед,/ и́ночествующих стадо научил еси чувственных дея́ний огреба́тися,/ возводя́ их на го́ру Боже́ственнаго разума.
И ны́не и при́сно и во ве́ки веко́в. Ами́нь.
Богородичен: Явися, Чистая, дре́вле пра́отца ле́ствица, Небес вы́сшая, иму́щая твердый восход,/ из Тебе бо сошед Слово Отчее пло́тию, совокупи́ разстоя́щаяся естества́,/ темже вси Тя, Богороди́тельнице, сла́вим.
Песнь 6
Ирмос: Ко Господу от ки́та Ио́на возопи́:/ Ты мя возведи́: из глубины́ а́да, молюся,/ да яко Изба́вителю во гла́се хвале́ния/ истины же духом пожру́ Тебе.
Припев: Преподо́бне о́тче Три́фоне, моли́ Бо́га о на́с.
Влады́чнею любовию вжиля́ем,/ вся кра́сная мира сего оставив, единому Христу после́довал еси/ и, благи́й яре́м на ра́мо взем, му́жески понесл еси.
Припев: Преподо́бне о́тче Три́фоне, моли́ Бо́га о на́с.
Пастырь сый, от Духа Божия науче́нный, блаженне,/ наставля́л еси стадо твое Небесная разумева́ти и страсте́й нашествия отгоня́ти,/ Царствия же Божия и правды Его иска́ти.
Сла́ва Отцу́ и Сы́ну и Свято́му Ду́ху.
Житие твое А́нгельскому подо́бно бысть, преподобне,/ яко дерзновение от Бога, вся содержащаго, име́яй,/ молися, о еже от страсте́й лука́вых христоимени́тому стаду твоему изба́витися.
И ны́не и при́сно и во ве́ки веко́в. Ами́нь.
Богородичен: Прови́дев Твое неизрече́нное, Чистая, духом та́инство,/ Авваку́м иногда́ предвозвести́, гору Тя нарече́ приосене́нную,/ из Тебе бо всех Содетель вопло́щься, спасе́ нас.
Кондак, глас 8
Днесь в начале основания добродетелей, блаженне,/ положил еси в души́ своей страх Божий,/ от юности взем крест свой,/ благоче́стно Христови последовал еси,/ А́нгельским о́бразом облече́ся и быст монах преди́вен,/ в добродетелех цветяше, к будущим Бо́гови простира́лся./ И своей пло́ти, яко врагу, немилостив, отче, был еси,/ терпением явися, блаженне, яко зла́то искуше́но в горни́ле,/ но и ныне не забуди посещати чад своих,/ поминай нас, чтущих пресвятую память твою,/ да вси благода́рне вопие́м ти:/ радуйся, прему́дре Трифоне, наставниче мона́хом.
Икос
Отве́рзи ми устне́ Богоприя́тными твоими к Богу молитвами, преблаженне,/ да воспою́ равноа́нгельное житие твое и возглаго́лю достойно вся добродетели твоя,/ столп бо и забра́ло явися и́ноком и правды пра́вило пресветлое,/ темже и просла́вльшему тя Господу молися непреста́нно о всех нас.
Песнь 7
Ирмос: Купина́ в горе́ огненеопа́льная/ и росоно́сная пещь халде́йская/ яве предписа́ Тя, Богоневе́сто:/ Боже́ственный бо невеще́ственный/ в веще́ственней чре́ве Огнь неопа́льно прия́ла еси./ Те́мже из Тебе Ро́ждшемуся/ пое́м: благослове́н еси, Боже отец наших.
Припев: Преподо́бне о́тче Три́фоне, моли́ Бо́га о на́с.
Авраа́му уподо́бился еси, преблаженне,/ от земли бо оте́чествия твоего изве́д, пресе́льника сотвори тя Господь в Вя́тстей стране́,/ идеже Сего узре́л еси, обещава́юща ти воздая́ние бога́тно,/ Емуже, веселяся, усердно воспева́л еси:/ благословен Бог отец наших.
Припев: Преподо́бне о́тче Три́фоне, моли́ Бо́га о на́с.
Распаля́ем Святым Духом, преподобне, ко́зни вражия разори́л еси,/ Кре́стным оружием ограждаяся нас ради волею пригвождшагося Сына Божия,/ Емуже, веселя́ся, усердно поя́ше:/ благословен Бог отец наших.
Сла́ва Отцу́ и Сы́ну и Свято́му Ду́ху.
В Го́рняя Небеса к Богу молитвами твоими приступил еси,/ вшед в пресве́тлый о́блак, незаходи́мыя сподо́бися Божия Славы виде́ния,/ Емуже прилежно, веселя́ся, поя́ше:/ благословен Бог отец наших.
И ны́не и при́сно и во ве́ки веко́в. Ами́нь.
Богородичен: Закона исполне́ние родила́ еси, Сына, Преве́чнаго всяческих Бога и Господа,/ премудрости наказа́теля земноро́дных, Емуже усе́рдно поем:/ благословен Бог отец наших.
Песнь 8
Ирмос: В пещь о́гненную ко отроко́м еврейским снизше́дшаго/ и пла́мень в ро́су прело́жшаго Бога/ по́йте дела́ яко Господа/ и превозноси́те во вся веки.
Припев: Преподо́бне о́тче Три́фоне, моли́ Бо́га о на́с.
Твоими, яже к Богу, сле́зными тече́нии огнепа́льныя стра́сти потопи́л еси,/ гее́нского пла́мене страх погаси́в, отче мудре, совершенною любовию Господа своего,/ при́сно поя́ во вся веки.
Припев: Преподо́бне о́тче Три́фоне, моли́ Бо́га о на́с.
Якоже вторы́й Ено́х к Богу преше́д,/ от Него прия́т бысть, отче, и с Вы́шними ликостоя́нии водворя́яся пое́ши:/ вся дела́ Господа пойте и превозноси́те во вся веки.
Сла́ва Отцу́ и Сы́ну и Свято́му Ду́ху.
Ныне на Небесех нетле́нных даро́в от Бога наслаждаяся/ и Трисолнечныя Его светлости исполняяся, Трифоне блаженне,/ певцы́ своя молитвами твоими страстныя мглы избави,/ поющия и превознося́щия Господа во вся веки.
И ны́не и при́сно и во ве́ки веко́в. Ами́нь.
Богородичен: Древнюю клятву разреши́ла еси, Пречистая, неизрече́нным словом Бога Слова заче́ншая,/ воплоще́нна из Тебе за милосердие, Владычице, земноро́дных спасение,/ егоже превозно́сим во вся веки.
Песнь 9
Ирмос: От Бога Бога Сло́ва,/ неизреченною му́дростию пришедшаго обнови́ти Ада́ма,/ я́дию в тле́ние па́дшаго лю́те,/ от святыя Девы неизреченно воплоти́вшагося нас ра́ди,/ ве́рнии, единому́дренно пе́сньми величаем.
Припев: Преподо́бне о́тче Три́фоне, моли́ Бо́га о на́с.
Просвети́вся от Бога Слова по́стническою добро́тою, отче Три́фоне,/ оде́ян ри́зою нетле́ния и венча́н дарова́нии паче ума челове́ча,/ ныне предстои́ши Го́сподеви, ра́дуяся.
Припев: Преподо́бне о́тче Три́фоне, моли́ Бо́га о на́с.
Во обители присноживо́тныя Господа своего всели́лся еси, преблаженне,/ иде́же апо́стольстии престо́ли, му́ченичестии собо́ри, преподобных собра́ния, пророческая ликования:/ с ними же тя величаем.
Сла́ва Отцу́ и Сы́ну и Свято́му Ду́ху.
Всесве́тел показа́ся, Богоглагольниче, зарями Трисолнечнаго света озаряем,/ испроси́ от Христа Бога прегрешений разреше́ние и лю́тых избавление, и злых измене́ние,/ любовию тебе почитающим.
И ны́не и при́сно и во ве́ки веко́в. Ами́нь.
Богородичен: Воплоти́тися благоизво́ли неизреченно Владыка всяческих из Тебе, Богородительнице Марие,/ соверше́н Бог и Человек, сохранив Тя прежде рождества, и в рождестве, и по рождестве Девою:/ Его в сугу́бом естестве́ величаем.
Светилен
Мирска́го сладостра́стия яко многомяте́жна избе́г, и неяде́нием плоть свою увядив,/ обнови́в же душе́вную кре́пость и славою Небесною обогати́вся, приснопа́мятне Трифоне,/ моли́ся о нас непреста́нно ко Господу.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Кре́пкое Твое предстательство, Марие Богоукра́шенная,/ и све́тлая Твоя сла́ва по всей земли показася,/ о Тебе ныне хва́лимся и весели́мся, иму́ще Тя к Сыну и Богу Твоему Хода́таицу неусы́пную,/ молитвами Твоими спасемся.
.......
Кондак 1
Избранный угодниче Христов и чудотворче, преподобне отче Трифоне, святостию жития и чудесы твоими возсиявый стране Вятстей, яко звезда богосветлая! Похвальная восписуем ти, любовию творящии всечестную память твою: ты же, яко имеяй дерзновение ко Господу, молитвами твоими от всяких нас бед свободи зовущих:
Радуйся, Трифоне, преславный чудотворче.
Икос 1
Ангела тя во плоти суща познавше, преподобне, и велия благодеяния от тебе приемше, яко чудотворца преславнаго тя славим и сице тебе со умилением зовем:
Радуйся, северныя страны благоуханный крине.
Радуйся, отрасле благочестиваго корене.
Радуйся, от младости в добром наказании воспитанный.
Радуйся, издетска сопричтенный в сыновство Отцу Небесному.
Радуйся, благочестивыя матере твоея отрадо и утешение.
Радуйся, братию и сродники твоя своим благочестием удививый.
Радуйся, целомудрие девства невредимо сохранивый.
Радуйся, от сердца твоего вся искушения юности отгнавый.
Радуйся, к Богу имевый рачение велие.
Радуйся, Господа ради путь тесный и скорбный избравый.
Радуйся, дольняя горняго ради оставивый.
Радуйся, яко спасения иский, во страну чуждую стопы твоя управил еси.
Радуйся, Трифоне, преславный чудотворче.
Кондак 2
Видев, яко мати и братия твоя восхотеша браку тя вдати, и чистоту девства паче возлюбив, дом отеческий оставил еси и странник быти предсудил еси, да сподобишися вечно пети Христу Богу: Аллилуиа.
Икос 2
Разумев козни, от врага спасения нашего содеваемыя, терпение, пощение и молитву к Богу противу поставил еси, всеблаженне отче, и яко нищ духом же и телом, от града во град и от веси в весь преходил еси и во оных приметатися ко храмом Господним возлюбил еси. Сего ради зовем ти:
Радуйся, вся красная мира сего ни во что вменивый.
Радуйся, нищету телесную и духовную возлюбивый.
Радуйся, рубища ветхая, яко одежду драгую, на теле своем носивый.
Радуйся, алчбою и жаждею, мразом и зноем тело твое изнуривый.
Радуйся, чашу поругания правды ради до конца испивый.
Радуйся, за творящыя ти напасть, яко за благотворца Господу моливыйся.
Радуйся, терпением твоим мира сего злобу победивый.
Радуйся, огнем молитвы твоея вся стрелы лукаваго попаливый.
Радуйся, силою твоею веры языческая суеверия потребивый.
Радуйся, красоту селения Божия возлюбивый.
Радуйся, приметатися в дому Божии изволивый.
Радуйся, яко странник и пришлец быв на земли, ныне в обителех небесных вселился еси.
Радуйся, Трифоне, преславный чудотворче.
Кондак 3
Сила Божия дадеся ти, преподобне, егда в честнем странствии твоем некоего младенца именем Тимофеа, немощию лютою одержима и близ конечнаго издыхания бывша, молитвами твоими исцелил еси, и здрава того сотворив, купно с родители и присными его воспел еси укрепляющему ти Христу Богу: Аллилуиа.
Икос 3
Имея помысл чист и душу непорочну, блаженне отче, уразумел еси суету мира сего и непостоянство, и вечных благ возжелев, мира сего отреклся еси и пострижение иноческое приял еси. Темже ублажаем тя, преподобне отче, и славяще еже о тебе изволение Божие, вопием ти сице:
Радуйся, яко земная отринув, умом твоим к небесным востекл еси.
Радуйся, яко к вышним течение свое выну управил еси.
Радуйся, смирение возлюбивый.
Радуйся, послушания рачителю.
Радуйся, молитв кадило благоприятное.
Радуйся, слез покаянных неоскудный источниче.
Радуйся, благое иго Христово на себе возложивый.
Радуйся, на высоту безстрастия возшедый.
Радуйся, всего себе Богу предавый.
Радуйся, от смерти напрасныя изволением Божиим дивно сохраненный.
Радуйся, явлением святителя Николаа обрадованный.
Радуйся, от недуга лютаго им исцеленный.
Радуйся, Трифоне, преславный чудотворче.
Кондак 4
Бурю искушений и бед от человек, злобных на тя святаго ради жития твоего, преподобне отче, с кротостию претерпевая и единаго только на потребу ища, еже како Богови угодити, Богом водимый, достигл еси Вятския страны, и во граде Хлынове обитель во славу Богородицы создав, в ней с лики иночествующих немолчно вопиял еси к Богу: Аллилуиа.
Икос 4
Слышавше христоименитии людие града Хлынова, яко обители иночестей близ града того основание положил еси, Трифоне богоносне, возрадовашася радостию велию, и яко ангела Божия тя почитаху, служаще от имений своих к устроению оныя обители и вопияху тебе сице:
Радуйся, тайнаго веления Божия послушавый.
Радуйся, Авраама вере поревновавый.
Радуйся, во страну Вятскую путь свой благочестне управивый.
Радуйся, обитель иноческую тамо создати зело восхотевый.
Радуйся, храмы Божия в ней благолепно устроивый.
Радуйся, чудеса преславная при основании обители совершивый.
Радуйся, яко Моисей молитвами воду источивый.
Радуйся, Богородицы заступлению и покрову обитель твою вдавый.
Радуйся, лика иноческаго предстоятелю богомудрый.
Радуйся, града Хлынова святое украшение и покрове, Богом данный.
Радуйся, сотворивый волю Господню и ины творити научивый.
Радуйся, сего ради велий в Царствии Небесном нареченный.
Радуйся, Трифоне, преславный чудотворче.
Кондак 5
Боготечно, яко светозарная звезда, шествовал еси, угодниче Божий, в престольный град Москву, полезная обители твоей тамо устрояяя и от святейшаго патриарха Иова в архимандрита поставлен быв, с милостынею многою от благовернаго царя Феодора дарованною, в обитель твою паки возвратился еси, благодарственно воспевая Богу: Аллилуиа.
Икос 5
Видев враг спасения нашего обитель твою добре устрояему от тебе, преподобне отче, воздвиже на тя некиих от ученик твоих, иже противу тебе возставше, от обители твоея тя отгнаша. Ты же, на земли сие изгнание с кротостию приемый, ныне же вселивыйся в обителех небесных, услыши нас, поющих ти сицевая:
Радуйся, яко за благая ко спасению словеса поругание приемый.
Радуйся, аки кроткий агнец вся терпевый.
Радуйся, с небесе утешение приемый.
Радуйся, молчанием на укоризны отвещавый.
Радуйся, во изгнание незлобиво отшедый.
Радуйся, любовию Христовою козни вражия победивый.
Радуйся, многи обители иноческия во странствии твоем посетивый.
Радуйся, в них себе утешение и отраду обретый.
Радуйся, чудеса дивная во изгнании твоем совершивый.
Радуйся, многи на путь иноческаго жития наставивый.
Радуйся, блаженнаго Прокопиа на подвиг юродства о Христе благословивый.
Радуйся, яко сый на земли яве с небожители беседовал еси.
Радуйся, Трифоне, преславный чудотворче.
Кондак 6
Проповедует присно страна Вятская подвиги и труды твоя, преподобне, в странах Архангельских, Устюжских, пермских, и светло красуется, стяжавши тя помощника и покровителя себе особне. Молим убо тя, святче Божий, не лиши и нас грешных небесныя твоея помощи и покрова молитв твоих, к твоему бо заступлению в скорбех наших вседушно прибегаем и прославльшему тя Господу со умилением зовем: Аллилуиа.
Икос 6
Возсиял еси, преподобне, яко звезда богосветлая, во граде Слободстем, вонь же по изгнании твоем пришед, обитель Богоявления Господня создал еси и тамо вселился еси, всех озаряя святостию жития своего. Сего ради вопием ти сице:
Радуйся, граду Слободскому пришествием твоим благословение от Господа низпославый.
Радуйся, жителем града того светильник пресветел бывый.
Радуйся, от них радостно приятый.
Радуйся, любовию их утешенный.
Радуйся, обитель иноческую тамо добре устроивый.
Радуйся, милостыню на устроение ея многу собравый.
Радуйся, тихое в ней пристанище обретый.
Радуйся, присно в ней в труде и молитве пребывавый.
Радуйся, и зде иноков богомыслию поучавый.
Радуйся, ученика твоего Досифеа ко спасению наставлявый.
Радуйся, путь терпения иноческаго тому показавый.
Радуйся, образе веры и любве и ангельскаго жития в подражание учеником твоим оставивый.
Радуйся, Трифоне, преславный чудотворче.
Кондак 7
Хотение едино имел еси, преподобне, еже видети созданную от тебе обитель Богородицы во граде Хлынове. Сего ради весть от Бога прием, яко близ есть кончина твоя, от обители Соловецкия, еяже в странствии своем богоугодием достигл еси, паки во град Хлынов стопы твоя управил еси, да тамо во обители твоей, предаси дух твой Богу, Емуже от юности твоея навыкл еси пети: Аллилуиа.
Икос 7
Дивно бысть, угодниче Божий, пришествие твое во град Хлынов, егда тя ветха денми суща и телесною немощию одержима, братия обители твоея отринуша, последи же, пред кончиною твоею святою, гнева Божия убоявшеся и терпением твоим побеждени бывше, раскаяхуся и в обитель твою с любовию тя прияху. Мы же таковому незлобию твоему дивящеся, вопием ти:
Радуйся, отче благосердый, враждовавшыя на тя любовию Христовою возлюбивый.
Радуйся, гнев на воздвигших гонение на тя совершенно в себе умертвивый.
Радуйся, до конца обитель твою возлюбивый.
Радуйся, паки в ней радостно и мирно водворивыйся.
Радуйся, в затворе келейнем в ней уединивыйся.
Радуйся, постом и молитвою к исходу из мира сего в нем уготовлявыйся.
Радуйся, братию твою пред исходом от жития сего благословивый.
Радуйся, поучение от Писания божественнаго им преподавый.
Радуйся, тем благая за зло воздавый.
Радуйся, при исходе твоем от временнаго жития причастия Божественных Таин сподобивыйся.
Радуйся, от уз тела разрешитися и со Христом быти желание всегда имевый.
Радуйся, о Нем единем присно воздыхавый.
Радуйся, Трифоне, преславный чудотворче.
Кондак 8
Странствие земное скончавшу ти, Трифоне приснопамятне, благоухания дивнаго исполнися келлия твоя: вериги же тайно тобою носимыя, спадоша с твоего телесе, и зрак лица твоего просветися, яко всем, видевшым исход твой, дивитися зело и возопити ко Господу: Аллилуиа.
Икос 8
Вся братия обители твоея, преблаженне, со освященным собором и людьми многими со слезами и пении надгробными изнесоша всечестное тело твое ко гробу, тобою в храме Пресвятыя Богородицы уготованному, идеже оное, яко сокровище духовное, честно положиша. Мы же у раки твоея святыя вопием ти с любовию таковая:
Радуйся, во благоухании святыни сном смерти опочивый.
Радуйся, смерть вкусивый, тления же не познавый.
Радуйся, в ризу нетления благодатию Божиею облеченный.
Радуйся, чудесы многими от Бога по смерти прославленный.
Радуйся, яко честная рака твоя врачебница бысть всем недугующым.
Радуйся, яко всяк, приходяй к ней с верою, приемлет дары целебныя.
Радуйся, разслабленных укрепителю.
Радуйся, беснующихся от насилия диавольскаго свободителю.
Радуйся, слепым зрение возвращаяй.
Радуйся, хромым еже право ходити устрояяй.
Радуйся, немым проглаголание даруяй.
Радуйся, неисцельныя язвы дивно врачуяй.
Радуйся, Трифоне, преславный чудотворче.
Кондак 9
Ангели Небеснии радостно прияша чистую душу твою, преподобне, во обители райския, идеже Царь Славы Христос Господь венча тя венцем небесным, егоже уготова всем, возлюбльшым явление Его, и дарова нам тебе заступника и молитвенника благаго, да благодарно поем Ему: Аллилуиа.
Икос 9
Витии многовещании не возмогут по достоянию воспевати славу, от Господа уготованную святым Его во Царствии Небеснем, еяже наследник сподобился еси быти, Трифоне преблаженне. Сея славы сопричастники быти и нас сподоби, угодниче Божий, святыми твоими о нас к Богу молитвами, да радостно вопием ти:
Радуйся, ликовствуяй в чертозе Небеснаго Домовладыки.
Радуйся, гражданине Иерусалима горняго.
Радуйся, святче Божий, со всеми святыми прославляемый.
Радуйся, от горних высот к нам земнородным милостивно приникаяй.
Радуйся, обитель твою и град наш присно сохраняяй.
Радуйся, в сониих и видениих верным являяйся.
Радуйся, северныя и Вятския страны небесный особне покровителю.
Радуйся, града Хлынова неотступный хранителю.
Радуйся, всех скорбящих утешение.
Радуйся, всех притекающих к тебе скорое услышание.
Радуйся, предстателю наш благий.
Радуйся, ходатаю о нас пред Богом немолчный.
Радуйся, Трифоне, преславный чудотворче.
Кондак 10
Спасительный залог Божия благодати святыя мощи твоя, преподобне, по летех мнозех обретени быша нетленни и в новем храме Богородицы честне от святителя Ионы положени быша, иже с братиею обители и всем множеством благоговейне лобызаху оныя, радостно поя Богу: Аллилуиа.
Икос 10
Стеною молитв твоих, преподобне, огради нас от всяких бед и скорбей, тебе бо стяжахом заступника твердаго и предстателя о нас пред Богом неусыпнаго, да ограждаеми твоим заступлением, сице тебе зовем:
Радуйся, в бедах и обстояниих скорый помощниче.
Радуйся, призывающым тя усердный заступниче.
Радуйся, почитающих тя прошения скоро исполняяй.
Радуйся, многажды прошение помощию твоею предваривый.
Радуйся, в милостех неистощимый.
Радуйся, скорбящих прибежище теплое.
Радуйся, печальных утешение.
Радуйся, обидимых заступниче.
Радуйся, от бед и скорбей нас скоро избавляяй.
Радуйся, яко непрестанною молитвою о нас Бога умилостивляеши.
Радуйся, сосуде честный, елей милости Божия к нам содержаяй.
Радуйся, звездо светлая, путь к Царствию Божию нам указующая.
Радуйся, Трифоне, преславный чудотворче.
Кондак 11
Пение всеумиленное приносим ти, преподобне, пред ракою твоею святою предстояще, и молимся ти прилежно: якоже отроковицу, беснованием одержимую, милостивно исцелил еси, тако и нас, страстьми многоразличными недугующих, посети и данною ти от Бога благодатию исцели, да радостно поем прославльшему ти Богу: Аллилуиа.
Икос 11
Светоподательна светильника тя вемы, отче, Престолу Божию предстояща и мрак страстей и грехов наших лучами молитв разгоняюща. Озари убо от горних высот и наша сердца, всеблаженне, да досточестно вопием ти сице:
Радуйся, света Троическаго зрителю.
Радуйся, небеснаго Сиона жителю.
Радуйся, горняго мира блаженный обитателю.
Радуйся, присно созерцаяй пресветлое лице Владыки Христа.
Радуйся, немолчно воспеваяй трисвятую песнь Троице.
Радуйся, луче пресветлая, от Солнца Христа возсиявшая.
Радуйся, яко и по преставлении твоем с нами пребываеши.
Радуйся, в молитвах твоих о нас к Богу теплый предстателю.
Радуйся, страну Вятскую зело возлюбивый.
Радуйся, мощи твоя святыя ей в наследие оставивый.
Радуйся, сокровище неоскудное многих исцелений.
Радуйся, Трифоне, преславный чудотворче.
Кондак 12
Благодать и милость испроси нам, преподобне, у Христа и Бога нашего и молитвенник усердный буди о нас ко Господу, да утвердившеся в заповедех Его, получим спасение вечное и тако присно поем Богу песнь: Аллилуиа.
Икос 12
Поюще подвиги предивнаго жития твоего и славяще чудеса твоя, преподобне, любовию ублажаем тя, яко многомощна молитвенника о нас и предстателя пред Господем нашим. Ты же, о, святче Божий, яко благоутробен, принеси моление теплое о нас ко Владыце, да сподобит нас Небеснаго Царствия Своего, вопиющих ти с любовию таковая:
Радуйся, Пресвятыя Троицы служителю верный.
Радуйся, благодатию Духа Святаго приосененный.
Радуйся, Пресвятыя Богородицы слуго изрядный.
Радуйся, ангелом собеседниче предивный.
Радуйся, со апостолы ликовствуяй у Престола Царя Славы.
Радуйся, мученик добропобедных сострадальче.
Радуйся, преподобных подражателю верный.
Радуйся, всех святых Божиих сонаследниче.
Радуйся, о грешных всегда Бога умоляяй.
Радуйся, душы и телеса наша благодатию Божиею исцеляяй.
Радуйся, по Бозе на тя упование возлагающих не посрамляяй.
Радуйся, Трифоне, преславный чудотворче.
Кондак 13
О, предивный угодниче и преславный чудотворче, преподобне отче наш Трифоне! Милостивно приими сие малое моление наше, в похвалу тебе приносимое, и предстоя Престолу Царя Славы, умоли Господа, да сохранит нас от враг видимых и невидимых, от недуга и глада, от напасти и скорби и вечнаго мучения избавит, да сподобимся вкупе с тобою радости святых вечно воспевати Ему: Аллилуиа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангела тя во плоти суща познавше, преподобне, и велия благодеяния от тебе приемше, яко чудотворца преславнаго тя славим и сице тебе со умилением зовем:
Радуйся, северныя страны благоуханный крине.
Радуйся, отрасле благочестиваго корене.
Радуйся, от младости в добром наказании воспитанный.
Радуйся, издетска сопричтенный в сыновство Отцу Небесному.
Радуйся, благочестивыя матере твоея отрадо и утешение.
Радуйся, братию и сродники твоя своим благочестием удививый.
Радуйся, целомудрие девства невредимо сохранивый.
Радуйся, от сердца твоего вся искушения юности отгнавый.
Радуйся, к Богу имевый рачение велие.
Радуйся, Господа ради путь тесный и скорбный избравый.
Радуйся, дольняя горняго ради оставивый.
Радуйся, яко спасения иский, во страну чуждую стопы твоя управил еси.
Радуйся, Трифоне, преславный чудотворче.
Кондак 1
Избранный угодниче Христов и чудотворче, преподобне отче Трифоне, святостию жития и чудесы твоими возсиявый стране Вятстей, яко звезда богосветлая! Похвальная восписуем ти, любовию творящии всечестную память твою: ты же, яко имеяй дерзновение ко Господу, молитвами твоими от всяких нас бед свободи зовущих:
Радуйся, Трифоне, преславный чудотворче.
Молитва святому преподобному Трифону, Вятскому чудотворцу
О, священная главо, преподобне отче наш Трифоне! Земный ангеле и небесный человече, светильниче пресветлый, страну Вятскую озаряяй чудесы, граду нашему стено и утверждение, бедствующым крепкий помощниче, обители твоея добрый хранителю, присный о нас к Богу молитвенниче и теплый о душах наших ходатаю! Тебе, угодниче Божий, неистощимое от Всеблагаго Владыки благодати и даров дадеся сокровище, еже целити недуги телесныя и отгоняти страсти душевныя и от всех зол избавляти с верою имя твое призывающих. К тебе убо прибегаем и тебе припадающе молимся: не презри нас, молящихся тебе и твоея просящих помощи, избави нас от враг видимых и невидимых, завистно на ны возстающих и яростию зверскою поглотити хотящих, изми нас невидимым предстательством твоим от смущения и бури и тмочисленных скорбей наших, за грехи наша нам прибывающих. О, предивный и богоносный отче наш Трифоне! Скоро потщися на помощь нашу. Вознеси благомощную молитву твою ко Господу сил: страждущую страну Российскую от лютых безбожник и власти их Господь да свободит, и да возставит престол православных правителей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш, да потребит Господь от земли нашея вся неистовыя крамолы, и утвердит в ней безмятежие, мир и благочестие, да сохранит обитель твою святую, град наш и вся грады и веси страны нашея от глада и губительства, от мятежа и нестроения, от запаления и бури, от нападений вражиих и от тлетворных ветр и от всякаго зла. Умилостиви о нас благоприятными молитвами твоими Христа Бога нашего, еже избавитися нам от грех наших и наветов вражиих, яко да заступлением твоим и помощию в мире и тишине богоугодне зде на земли поживем, и в будущем веце да сподобимся части святых Господем нашим Иисусом Христом, Емуже подобает и честь и поклонение, ныне и во вся веки. Аминь.
Присоединяйтесь к ОК, чтобы подписаться на группу и комментировать публикации.
Нет комментариев