Kishining tabiatida ochko‘zlik, nopoklik bo‘lsa, irodasi mustahkam bo‘lmasa, oxiri nafsi g‘olib chiqib, o‘zini ko‘rsatishi aniq ekan. Omad chopib Doniyor masʼuliyati cheklangan jamiyatga urfda bo‘lgan menejer lavozimiga qabul qilindi. Mazkur jamiyat yigirmadan ortiq xo‘jalik yurituvchi subyektlar o‘rtasida qishloq xo‘jalik texnikalarini yetkazib berish borasida faoliyat yuritishini hisobga olsak, uning imkoniyatlarini, ayniqsa moliyaviy imkoniyatlarini tasavvur qilish qiyin emas. 2022 yilning oktyabr-dekabr oylarida shunday xo‘jaliklar tomonidan katta miqdordagi 246 829 299 so‘m to‘lovlar taqdim etiladi. Bunday katta summani ko‘rgan Doniyorning yuragining qaysidir chetida g‘imirlab qolgan nafsi junbushga keldi. Uning tinchi yo‘qoldi. Qanday qilsa, bu pullar uning cho‘ntagiga tusharkan-a?! O‘ylay-o‘ylay, chorasini topdi. Pullarni korxonaning hisob raqamiga kirim qilmay, o‘zining shaxsiy plastik kartasiga tushirishga erishdi. Vijdoni qiynalmay, o‘z ehtiyojlariga ishlatib yubordi. Oktyabr oyida birlamchi to‘lov sifatida to‘langan 12 698 000 so‘mni o‘zlashtirish maqsadida, kompyuter imkoniyatlaridan foydalangan holda, “naqd pul ko‘rinishida to‘lov” degan yozuvlarni kiritib, pul topshirgan Egamqulga soxta hujjat berdi. Ishtahasi hakalak otgan Doniyor korxonaga tegishli bo‘lgan pullarni o‘ziniki deb hayol qildimi yoki javobgarlikni butunlay unutib qo‘ydimi, fermer xo‘jaligi rahbari Sarvarni aldab, qarzdorlik bartaraf etilmagan deya, 9 651 000 so‘mini firib yo‘li bilan o‘zlashtirib, buni ham o‘z ehtiyojlariga sarflab yubordi. Biroq xo‘jalik rahbarlari u o‘ylaganchalik pulning hisobini bilmaydigan, pul oqib keladigan o‘zan boshida o‘tirganlardan emas edi. Pul topshirib ham xo‘jalik uchun havodek zarur texnikalarini ololmagan rahbarlar ichki ishlar organlariga murojaat qilishdi.
– Oliy maʼlumotli, ikki nafar farzandli, oq-qorani tanigan yoshda bo‘lgan Doniyorning qilmishini oqlab bo‘lmaydi, – deydi Mirobod tumani IIO FMB huzuridagi Tergov bo‘limi katta tergovchisi, mayor Davron Mahkamov. – Mana shu tushgan pullardan jamiyat ishchilariga maosh beriladi, shart-sharoitlar yaratiladi va korxona faoliyatini yuritish choralari ko‘riladi. Biroq Doniyor faqat o‘zining huzur-halovatini o‘yladi.
Shu o‘rinda bir narsani taʼkidlamoqni lozim topdik. Huzur-halovat o‘zgalar haqiga xiyonat, qonunni buzish, ishxona mulkini talon-taroj qilish evaziga bo‘lmasligi kerak.
Tergovchi tomonidan jinoyat ishi har tomonlama to‘liq va xolisona olib borilib, aybdorning harakatlari to‘g‘ri malakalanib, tegishli mahkamalarga topshirilishiga erishildi.
Jinoyat ishlari bo‘yicha Mirobod tumani sudi O‘zbekiston Respublikasi Jinoyat kodeksining 168-moddasi bilan aybli deb topilgan Doniyorga yetkazilgan moddiy zarar qoplanganligini inobatga olib, har oylik ish haqining 20 foizi davlat foydasiga ushlab qolingan holda ikki yilga axloq tuzatish ishlari jazosini tayinladi.
👉 Жиловланмаган нафс
Кишининг табиатида очкўзлик, нопоклик бўлса, иродаси мустаҳкам бўлмаса, охири нафси ғолиб чиқиб, ўзини кўрсатиши аниқ экан. Омад чопиб Дониёр масъулияти чекланган жамиятга урфда бўлган менежер лавозимига қабул қилинди. Мазкур жамият йигирмадан ортиқ хўжалик юритувчи субъектлар ўртасида қишлоқ хўжалик техникаларини етказиб бериш борасида фаолият юритишини ҳисобга олсак, унинг имкониятларини, айниқса молиявий имкониятларини тасаввур қилиш қийин эмас. 2022 йилнинг октябрь-декабрь ойларида шундай хўжаликлар томонидан катта миқдордаги 246 829 299 сўм тўловлар тақдим этилади. Бундай катта суммани кўрган Дониёрнинг юрагининг қайсидир четида ғимирлаб қолган нафси жунбушга келди. Унинг тинчи йўқолди. Қандай қилса, бу пуллар унинг чўнтагига тушаркан-а?! Ўйлай-ўйлай, чорасини топди. Пулларни корхонанинг ҳисоб рақамига кирим қилмай, ўзининг шахсий пластик картасига туширишга эришди. Виждони қийналмай, ўз эҳтиёжларига ишлатиб юборди. Октябрь ойида бирламчи тўлов сифатида тўланган 12 698 000 сўмни ўзлаштириш мақсадида, компьютер имкониятларидан фойдаланган ҳолда, “нақд пул кўринишида тўлов” деган ёзувларни киритиб, пул топширган Эгамқулга сохта ҳужжат берди. Иштаҳаси ҳакалак отган Дониёр корхонага тегишли бўлган пулларни ўзиники деб ҳаёл қилдими ёки жавобгарликни бутунлай унутиб қўйдими, фермер хўжалиги раҳбари Сарварни алдаб, қарздорлик бартараф этилмаган дея, 9 651 000 сўмини фириб йўли билан ўзлаштириб, буни ҳам ўз эҳтиёжларига сарфлаб юборди. Бироқ хўжалик раҳбарлари у ўйлаганчалик пулнинг ҳисобини билмайдиган, пул оқиб келадиган ўзан бошида ўтирганлардан эмас эди. Пул топшириб ҳам хўжалик учун ҳаводек зарур техникаларини ололмаган раҳбарлар ички ишлар органларига мурожаат қилишди.
– Олий маълумотли, икки нафар фарзандли, оқ-қорани таниган ёшда бўлган Дониёрнинг қилмишини оқлаб бўлмайди, – дейди Миробод тумани ИИО ФМБ ҳузуридаги Тергов бўлими катта терговчиси, майор Даврон Маҳкамов. – Мана шу тушган пуллардан жамият ишчиларига маош берилади, шарт-шароитлар яратилади ва корхона фаолиятини юритиш чоралари кўрилади. Бироқ Дониёр фақат ўзининг ҳузур-ҳаловатини ўйлади.
Шу ўринда бир нарсани таъкидламоқни лозим топдик. Ҳузур-ҳаловат ўзгалар ҳақига хиёнат, қонунни бузиш, ишхона мулкини талон-тарож қилиш эвазига бўлмаслиги керак.
Терговчи томонидан жиноят иши ҳар томонлама тўлиқ ва холисона олиб борилиб, айбдорнинг ҳаракатлари тўғри малакаланиб, тегишли маҳкамаларга топширилишига эришилди.
Жиноят ишлари бўйича Миробод тумани суди Ўзбекистон Республикаси Жиноят кодексининг 168-моддаси билан айбли деб топилган Дониёрга етказилган моддий зарар қопланганлигини инобатга олиб, ҳар ойлик иш ҳақининг 20 фоизи давлат фойдасига ушлаб қолинган ҳолда икки йилга ахлоқ тузатиш ишлари жазосини тайинлади.
https://gov.uz/oz/iiv/news/view/23576 )
...Присоединяйтесь к ОК, чтобы подписаться на группу и комментировать публикации.
Нет комментариев