Рӯза гирифтан ибодатест, ки дар динҳои пеш аз ислом низ маълум будааст. Чунончӣ Худованд дар сураи "Бақара", ояти 183 мефармояд "Эй мӯъминон, рӯза бар шумоён фарз гардид, ҳамон гуна, ки бар пешиниёни шумо воҷиб гашта буд. Бошад, ки тақво (парҳезкорӣ) пеша кунед".
Рӯзаи ислом аз рӯзаи қавмҳои пешин фарқ дорад. Рӯза ин боздоштани нафс аст аз он чӣ металабад. Мӯъмин ба хотири ёфтани ризои Худованд, тӯли рӯз нафсашро аз хӯрдану ошомидан ва алоқаи ҷинсӣ бозмедорад.
Худованд барои рӯзаи мусулмонон моҳи мубораки Рамазонро махсус гардонидааст. Моҳе, ки дар он аввалин оёти Қуръон тавассути Ҷибриил алайҳиссалом ба қалби Расули Акрам саллаллоҳу алайҳи ва саллам нозил гардид.
Рӯза рӯҳи инсонро қувват медиҳад. Маълум аст, ки инсон аз рӯҳ ва бадан таркиб ёфтааст. Агар инсон майлҳои рӯҳи худро зери султаи гароишҳои баданӣ (хоҳишоти нафсонӣ) қарор диҳад, аз шакли инсони соҳибихтиёр ба бандаи нафс (танпараст, шаҳватпараст,шикампараст, майпараст...) табдил меёбад. Чунончӣ Аттори Нишопурӣ фармудааст:
Хобу хӯр ҷуз пешаи анъом нест,
Хуфтагонро баҳра аз инъом нест.
З-обу нон то лаб шикамро пур масоз,
Ҳамчу ҳайвон баҳри худ охур масоз!
Худованд ба бандагонаш рӯзаро муқаррар кардааст, то инсон тавассути он аз тобеияти ғаразҳо ва зиндони бадан озод шуда бар хоҳишоти нафсониаш ғолиб ва бар табиати ҳайвониаш ҳоким шавад. Ба ин восита ӯ ба фариштагон монанд ва дуояш мустаҷоб мегардад.
Чунончӣ ба ривояти Имом Тирмизӣ дар ҳадисе ҳазрати Муҳаммад (саллаллоху алайхи вассалам) фармудаанд: "Дуои се нафар беҷавоб намемонад (яъне, иҷобат мешавад): Дуои рӯзадор, то вақте ки ифтор кунад, дуои пешво (ҳоким)-и одил ва дуои мазлуми додхоҳ".
Рӯза ҳамчунин дар тақвияти бадан низ нақши муҳим мебозад. Решаи бисёр бемориҳо аз пурхӯрӣ сар мезанад. Чунончӣ, дар ҳадиси Паёмбари Акрам (саллаллоху алайхи вассалам) зикр шудааст: "Одамӣ ҳеҷ зарфе бадтар аз шиками худро пур накардааст. Барои одамӣ чанд луқмае, ки ӯро сари по нигоҳ дорад, кофӣ аст. Агар ба ин ҳам қонеъ нашавад, сеяки зарфияти худро ба хӯрок, сеяки дигарро барои нӯшидан ва сеяки боқимондаро барои нафасгирӣ ихтисос диҳад (ҷудо кунад)".
Пас рӯза гирифтан барои осоиши меъда ва наҷоти бадан аз маводи зиёди зарарнок фурсати аз ҳама мусоид аст. Рӯзадорӣ як навъ дарси мустаҳкамсозии ирода низ мебошад. Ҳарчанд дар пешаш ғизои гуногун мавҷуд аст, ӯ гурусна менишинад: ҳарчанд оби зулолу сард пешаш фароҳам аст, ӯ ба ташнагӣ тоқат мекунад: бо вуҷуди он ки ҳамсараш бо ӯ танҳост, аз алоқа намудан худдорӣ мекунад. Ӯ ҳис мекунад, ки Парвардигор аз ҳар як рафтораш огоҳ аст. Вай метавонад дар пинҳонӣ ғизо истеъмол намояд, аммо виҷдону имон ва иродааш ӯро огоҳ месозанд, ки "Худо туро мебинад!" Чунин амал тӯли сӣ рӯз такрор меёбад. Бубинед, рӯза доштан мактаби бузурги тақвияти имондорист. Ҳатто ғайр аз моҳи Рамазон низ рӯза гирифтан боиси худдорӣ аз гуноҳ мешавад. Ба ин ҳадиси Расуллуллоҳ (саллаллоху алайхи вассалам), ки Имом Бухорӣ ривоят кардааст, таваҷҷӯҳ намоед: "Эй ҷавонон! Ҳар кадоми шумо, ки тавоноӣ доред, издивоҷ кунед. Зеро ки чашматонро аз лағзиш мепӯшонад ва ғаризаи ҷинсиро аз ин ҳироф бозмедорад. Ҳар кас (издивоҷ карда) наметавонад, (бигзор) рӯза бигирад, ки рӯза барои ӯ сипар аст".
Рамазонро моҳи раҳмат, моҳи бахшиши гуноҳон ва моҳи сабр мегӯянд. Ҳатто Расули Худо (саллаллоху алайхи вассалам) моҳи Рамазонро ба "Сабр" нисбат дода фармудаанд: "Рӯзаи моҳи сабр (Рамазон) ва се рӯз аз ҳар моҳ тирагӣ (сиёҳӣ)-и дилро мезудояд (меравонад). "Дар ҳадиси дигар омадааст: "Ҳар чиз закоте дорад ва закоти бадан рӯза аст. Рӯза нисфи сабр аст".
Хулоса рӯзаи моҳи шарифи Рамазон дорои манфиату ҳикматҳои зиёдест, ки мо андаке аз онҳоро хотиррасон кардем.
Рӯзаи моҳи мубораки Рамазон дар баробари он ки рӯҳи моро тақвият медиҳад, барои обутоби бадан низ дуруст муносиб мебошад. Таи як моҳ ҷисми мо ба кам хӯрдан ва қаноат кардан одат мекунад. Шомгоҳон вақте ки фурсати рӯзакушоӣ фаро мерасад, мо ҳис мекунем, ки боз барои чанд соати дигар тоқати бардошти гуруснагиро дорем.
Рӯзадорӣ фурсати муносибест, ки меъда осоиш ёфта, бадан аз маводи зиёду зарарнок халос мешавад. Ҳазрати Муҳаммад (саллаллоху алайхи вассалам) рост гуфтаанд, ки «Рӯза бигиред, то тандуруст шавед».
Рӯза доштан ба мо сабру қаноат карданро ёд медиҳад. Расули Акрам (саллаллоху алайхи вассалам) дар ин хусус фармудаанд: «Ҳар чиз закоте дораду закоти бадан рӯза аст ва рӯза нисфи сабр аст». Ба ин далел рӯзаро нисфи сабр мегӯянд, ки дар инсон се гароиш вуҷуд дорад:
1. Гароиши шаҳвонӣ, ки дар ҷонварон низ ҳаст.
2. Гароиши хашму ғазаб, ки даррандагон ҳам доранд.
3. Гароиши рӯҳӣ. Ҳамон гуна, ки дар фариштагон мавҷуд аст.
Вақте ки қувваи гароиши рӯҳии ӯ бар яке аз ду нерӯи дигар ғолиб ояд, нисфи сабр аст. Азбаски ҳангоми рӯза фарди мусулмон хоҳишоти нафсонӣ (шаҳвонӣ) ва шикамро пушти по мезанад, барҳақ онро нисфи сабр донистаанд.
Афроде, ки аз ҳикматҳои Рамазон бохабаранд, аз файзи он баҳра мебардоранд. Рӯзашонро на ба хоб, балки ба кору фаъолият сарф намуда, шаб низ ба хондани таровиҳ ва тиловати Қуръон машғул мешаванд. Моҳи Рамазонро моҳи омӯзишу бандагӣ ва некӣ қарор медиҳанд. Забонҳояшон рӯза медорад. Яъне, рӯзаи худро бо беҳудагӯӣ ва ҷаҳолат зоеъ намекунанд. Чашмонашон рӯза дошта, ба ҳаром наменигарад. Дастонашон рӯза дошта, ба озору дуздӣ ва ба бадии касе дароз намешавад. Дар дил асло нияти гуноҳ намекунанд. Афроди худогоҳ дар ин моҳ бештар ба заифону маҳрумон кӯмак менамоянд. Зеро Расули Худо (саллаллоху алайхи вассалам) дар моҳи Рамазон бештар саховату бахшандагӣ мекарданд.
Мутаассифона, афроде низ ҳастанд, ки аз рӯзадории худ баҳрае надоранд. Худо рӯзаро барои сабру бурдборӣ қарор додааст, вале онҳо рӯзаро бо хашму ғазаб мегузаронанд. Парвардигор рӯзаро фурсати оромишу матонат (маҳкамиродагӣ) қарор додааст, вале онон Рамазонро бо фаҳшгӯӣ ва ғайбату беҳудагӯӣ мегузаронанд.
Дуо мекунем, ки Худованд ба мардуми мо тавфиқ диҳад, то рӯзаро он гуна, ки мавриди назари Қуръон аст, бигиранд. Рамазонро тавре ба поён расонанд, ки пок, бахшидашуда ва ризои илоҳиро дарёфта бошанд.
Присоединяйтесь к ОК, чтобы подписаться на группу и комментировать публикации.
Нет комментариев