Хырхызстан Минзў Куәщүәйүан Хуэйзу дэ Ханйү җунщин гунзуәди лисы фубәшы Җон А. зэ фаҗон хуэймин вынхуашон вули да гўзыди йигә куәщүәҗя. Җиннян Җон Али Алиевич 70 суйли.
Ба җыгә мяншан, цунмин, ю гунлоди лисы фубәшы куәщүәҗя Җун-Я дэ Россияди бушоди куәщүәҗяму дэ нянҗяму җыдони. Җинтян тади куәщүә вынҗон дэ лунвын зэ Хырхызстан, Казахстан, Җунгуә, Жыбын дэ Россия вончў чўбанли. Куәщүәҗя янҗюди тимусы: Җун-Я хуэйзужынмуди лисы дэ жынҗунщүә: куйчын, лийи, җищү, фынсу, чуантун, җўфон, чы-хә дэ җёмын з.д. вынтиму. Та янҗюди тиму куанҗан зэмусы ёҗин, йинцысы Али Җон ба хуэйминди вынхуа да «литу» җыдони. Зэ янҗю хуэйзужынмуди вынхуашон Җун-Яди диҗешон ба Җон Али суандисы йигә ю миншынди лисы куәщүәҗя.
До җинтян Җон Али зэ заёрди чўбаншә, заҗы дэ боди мянзышон йинчўлэли 7 лунвын, 70 дуә куәщүәди вынҗон. Җон Али лян зыҗиди туанти йитун ба «Вурус-хуэйзу цыдян» (3 бын, 1981 н.) дэ «Хуэйзужынмуди быйкә чүан фу» (ту йигә чўбан 2005 н., ди 2-гә чўбан 2009 н.) дуйчынли. Зэмусы 2016 няншон та зэ Хырхызстанди «Илим» чўбаншәни йинчўлэли 3 лунвын фу, җысы лян вурус йүян: «Обычаи, обряды и поверья дунган. Ди 2 чўбан»; лян хуэйзу йүян: «Хуэйзу куйчын, лийи зэмусы җищү»; лян хырхыз йүян: «Дунгандарын үрп-адат, ырым-жырым жана ишенимдери». Зэ 2017 няншон Али Җонди йибын лунвын лян ханвын зэ Җунгуә Быйҗинди Минзў Дащүәни йинчўлэли: «东干人的习俗, 礼仪与信仰» (Dong gan ren de xisu, liyi yu xinyang. Minzu Uniwersiti Press).
Чўгуә җыще лунвын Али Җон лян ханвын да 2002 додо 2015н н. йинчўлэли хын җигә куәщүә вынҗон, йигә зэ: Jjrnal of the Second Northwest Uniwersiti for Nationalities № 4. Gen. №56. Куәщүә вынҗонди тимусы: «中亚回族的民族意识与 汉 语论著中 «东干» (Zhong ya huizude minzu yishi yu hanyu lunzhu zhong «Dong gan») ди эргә зэ Jjrnal of Xinjian Uniwersiti Supp. Vol. 33. Fug. 2005. P. 144-145 зaҗы литу йинчўлэли, куәщүә вынҗонди тимусы: «中亚回族和他们 的语言» Zhong ya huizu he tamende yuyan.
2010 няншон Али Җ. лян Хырхыстан дэ Узбекистанди куәщүәҗяму зэ Жыбын җинчынниди Токиоди Вэйү Дащәүниди куәщүә хуэйшон цанли җяли. Туанди линшусы Хуэйзу дэ Ханйү җунщин янҗюсуәниди зунҗон йүвын бәшы Имазов М.Х. җёшу. Зэ җыгә хуэйшон җинҗи фубәшы Юсупов Р.У. дэ Узбекистанди лисы фубәшы Савуров М. е цанҗяли. Куәщүә хуэйди тимусы: «Гуйҗиди хуэй зэ Җун-Я хуэйзужынмуди вынтишон». Җейинлиди зэмусы зўҗылиди жынсы Токио Вэйү Дащүәниди ю миншынди фубәшы Канно Хирооми җёшу. Тасы янҗю мынгў йүянди янҗюҗя. Кэли хуэйди йиху, 2012 няншон Жыбынди Токио Вэйү Дащүәниди заҗышон: Tokio Uniwersiti of Foreign Studies (2012. Р. 64-68) ба Али Алиевичди кущүә вынҗон: «Papers of dungans» (Сулян Лянхә Гуйни хуэйзужынди жынҗунщүәди цэлё) йинчўлэли.
Куәщүәҗяди җыще хуә додо Җун-Я хуэйзужынмуди вынхуашон дусы ёҗинди, йинцысы Хырхызстан, Узбекистан дэ Казахстан хуэйцзуди вынхуа лян Җунгуә Щи-Бый хуэйзу дэ ханзуди вынхуа ю җи лянщини. 2015 няншон вуйүәни зэ Җунгуәди Сиань чынниди Шэньси Шыфан Дащүәни гуәли куәщүә хуэйли. Зэ җыгә хуэйшон Али Җон е цанҗяли. Тади богоди тимусы: «Җун-Я хуэйзужынмуди вынхуашонди гэбян».
Җон Алиди канфа, йиҗян дэ җелүн додо җунгуәниди янҗюҗяшон ю хо фонфа дэ йисыни. Билүн, Ланҗу Дащүәниди Чан Вэньчан җёшу фәди: «Ба Али Җонди «东干人的习俗, 礼仪与信仰»(Dong gan ren de xisu, liyi yu xinyang)вә суандисы зуй ходи фу зэ янҗю хуэйзужынди куйчын, лийи зэмусы җищүшон. Куәщүәҗя фәдини, йибянни, хуэйзужынму ба бынди жынмуди куйчын, лийи җешухали йинцысы зэ щин дифоншон лян бынди жынму җудо йидарнили. Ди эрлэ, таму (хуэйзу Х.Д.) фили щинҗин, ба зыҗиди куйчын, лийи, җищү каншухали. Зэ җыгә фонмяншон бынди жынмуди вынхуашон е юли (хуэйзу куйчынди Х.Д.) дэлүли».
Җон Али Алиевичсы 1951 няншон сыйүә 30 зэ Казах Гунхәгуә Җямбул дичүди Курдай районшонди Сортобе щёнҗуонни сын-ёнхади. 1967 няншон ба Кант районшонди Милянчуанди Җунщүә нянван, зэ колхоз литу зўли хуәли. 1969 няншон Али Җ. вудо Хырхызстанди Пржевальск минтонди Гуйҗя Шыфан Дащүәлитули. Ба Шыфан Дащүә 1973 няншон нянван, та ба җё вурусы йүян дэ вынщүә җёйүанди шуйи дыйшонли. Зу зэ нэ йинян литу ба та да биншон тёшон зудёли.
Да 1978 няншон А. Җон доли Хырхыз Гунхәгуәниди вуҗинди Хуэйзу дэ Ханйү җунщинни гунзуәтуәли. 1986 няншон зэ Ленинград чынни (Ордена Дружбы Народов Институт Этнографии имени Н.Н. Миклухо-Маклая АН СССР) ба щүәвэй лунвын кошон гуәчили, куәщүә линшусы ю минди лисы бәшы Сушанло М.Я. Тади щүәвэй лунвынди тимусы: «Җун-Я дэ Казахстан хуэйзужынмуди җўфон, җуонйүан дэ җўчў». Җыгәди йиху Җон Али ба лисыщүә фубәшыди минтон дыйшонли. Зу зэ җы йинян литу ба щүәвэй лунвыншонди цэлё «Хуэйзужынмуди цэҗы вынмин: җўфон, җуонйүан, җўчў» лунвын йинди чўлэли. Җысы куәщүҗяди туйигә лунвын чўбан. Җыгә куәщүә янҗю тиму додо хуйзужынмушон ю да чинкуон дэ йисыни: данлинди минзуму ба хуйзуди җўфон, җуонйүан дэ җўчў жыншыли, җыдоли зэмусы зэ янҗю хуэйзу вынхуашон чўбанлигә щин куәщүә цэлё.
Зу да җыгә сыхуршон куәщүәҗя Җон Али Алиевич зэ Хырхызстан Минзў Куәщүәйүанни шыщин-шыйиди зэ янҗю хуйминди вынхуашон фи да щинҗиндини. Та зэ җар гунзуәли 43 нянли. Зэ җыще нян литу Али Җон щели бушоди куәщүә вынҗон дэ лунвын, янҗюди вынтиму додо куәщүәшон дусы ёҗинди, ба тамуди җяҗы ду да та щехади выҗон тимушон нын канди чўлэ.
Линйирди җы җинян литу куәщүҗя Җон Али зэ Җунгуә йинчулэли йигә лунвын дэ җигә куәщүә вынҗон. Тамуди тиму дусы бу йиёнди. Җунгуәди куәщүәҗяму ги җыще заёнди куәщүә вынҗон гили го җягуанли.
Йинцысы хуэйзу да Җунгуә доли Хырхызстанди диҗешон куэзу 150 няндыйли. Зэ җыще нянщян литу хуэйзу вынхуашон юли гэбянли. Ба җыще фынбе дэ цабе да Али Җ. куәщүә вынҗоншон Җунгуәди куәщүәҗяму кан чўлэдини, нын зўгә куәщүә бифон дэ цанву, җысы ту йилэ. Ди эрлэ, хуэйзу да Җунгуәди Щи-Бый дичүшон дэлэди куйчын, җищү, ганбан, фынсу ба нын канди-каншухали, ба дюди-дюдёли. Җиргә таму зэ хуэйзу вынхуа литу е юли гэбянли. Ба җыще дэ данлинди вынтиму куәщүәҗя зэ зыҗиди вынҗон лимян ду щифа ванчынди пәщёли. Билүн, ба «дунган - 东干» бынзыди хуагын да нани лэди зэмусы та литу ю са йисыни, куәщүәҗя зэ вынҗоншон ба зыҗиди канфа ги нянҗяму тиди чўлэли. Ди сан, виса ба Кыргызстан дэ Казахстан җуди хуйзуму җёди «дунган» ба Җунгуәди җёди «хуэйцзу»? Ба җыще дэ данлинди вытиму куәщүәҗя зэ зыҗиди лунвын дэ вынҗон литу вон кэни щеди пәщёли.
Чўгуә куәщүәди янҗю Җон Али хансы йигә хо сывынҗя. Сый ба тади «Бими фулин» (2011н.) сывынфуди зуәпин бу җыдо? Лян йүвынщәүди бәшы Шысыр И.С. йитун ги нян 2-3 җёнтонди щүәсынму ба «Фуму йүян» җёкуәфу йинчўлэли. Зэ гәёнди бо дэ заҗы лимян Али Җон йинчўлэли эршылэгә щёфә дэ бу шоди сывын.
Зэ җинтянди вынҗоншон вәму ба Җон Али зэ Хырхызстанди Минзў Куәщүәйүанниди Хуэйзу дэ Ханйү буфынни гунзуәшон йинчўлэди куәщүә янҗю җедуан щеди тифәлихар. Ги Али Алиевич, зэ тади сынжыршон, панвон чон мин-бый суй, җящяниди пиннан, гунзуәшонди чынгун.
Хырхызстан Минзў Куәщүәйүан Б.Дж. Джамгерчинов минтон лисыщүә, гўвущүә дэ жынҗунщүә Дащүәниди Хуэйзу дэ Ханйүди җунщин йүвынщүә фубәшы Хахазы Д.М.
#юбилеи
currenttime.tv за такой хороший фильм.
...Присоединяйтесь к ОК, чтобы подписаться на группу и комментировать публикации.
Комментарии 2