иттилоотӣ
Сарфи назар аз чанд даҳсолаи бозсозии фаъоли технологии ниҳодҳои ҷамъиятӣ, нақш ва ҷойгоҳи давлат дар фазои рақамӣ ҳанӯз ба пуррагӣ мавриди омӯзиш қарор нагирифтааст. Ин махсусан ба мақоми ҳуқуқии давлат дар фазои маҷозӣ (киберфазо) дахл дорад. Ҳангоми таҳқиқи ин масъала мафҳуми “суверенитети иттилоотӣ” ба истилоҳ кашф мегардад. Таҳти мафҳуми мазкур маҷмӯи чорабиниҳои давлатӣ ва ҳуқуқи давлат ҷиҳати мустақилона амал кардан дар фазои иттилоотӣ ва таъмини амнияти иттилоотии худ аз таҳдидҳои беруна фаҳмида мешавад. Консепсияи “суверенитети иттилоотӣ” зиёда аз чиҳил сол аст дар рушду инкишоф аст ва чаҳор марҳилаи рушди худро: аз дарки техникӣ - ҳуқуқии мавқеи давлат дар байни ҷараёнҳои маълумот то меъёрҳои байналмилалӣ дар соҳаи назорат бар инфрасохтори рақамӣ паси сар кардааст.
Меъёрҳои “суверенитети иттилоотӣ” вуҷуд доштани заминаи технологӣ ва воситаҳои ҳифзи он, мавҷудияти низоми пардохти миллӣ, ба роҳ мондани таблиғоти густурда ва баланд бардоштани имиҷи кишвар дар фазои иттилоотӣ ва паҳн кардани ғояҳоеро дар бар мегирад, ки ба манфиатҳои ҳаётан муҳимми давлат мувофиқ бошанд.
Муносибатҳо ва амалкарди Чин, ИМА ва Русия ба масъалаи бавуҷудорӣ ва ҳифзи “суверенитети иттилоотӣ” ниҳоят ҷолибанд, зеро ҳар яки онҳоро метавон беназир арзёбӣ кард, ки ба таври мустақим ба идеяи миллии ин кишварҳо дар фазои иттилоотӣ алоқаманданд. Истиқлолияти иттилоотии Чин тавассути назорати пурраи иттилоот, набудани дастрасии пурра ба манбаъҳои хориҷӣ ва системаи пурқуввати ҳифзи шабакавӣ таъмин гардидааст. Намунаи машҳуртарин лоиҳаи филтри иттилоотӣ “Сипари тиллоӣ” мебошад, ки онро ғайрирасмӣ баъди Девори Бузурги Чин “Сипари Бузурги Чин” низ меноманд. Иёлоти Муттаҳида аз дастовардҳои бузурге дар соҳаи технология бархурдор аст ва ҳамкориҳои бахши хусусиро фаъолона ҷалб намуда, баҳри муҳофизати комили “Истиқлолияти иттилоотӣ” – и худ қушунҳои кибериро муҷаҳҳаз намудааст. Яке аз ҳадафҳои стратегияи амнияти миллии ИМА нигоҳ доштани мавқеи бартарии худ дар бозори маҳсулоти фанноварии технологӣ мебошад. Дар Русия таъмини Истиқлолияти давлатӣ дар фазои иттилоотӣ тавассути Доктринаи амнияти иттилоотӣ ва Стратегияи амнияти миллӣ, ки дар он ҳамчун чораҳои ҳифзи он рушди сегменти дохилии Интернет, баланд бардоштани қобилияти муқовиматии объектҳои стратегӣ ба ҳамлаҳои хакерӣ, рушди технологияҳои иттилоотӣ ва ҳамкории байналмилалӣ бо мақсади таҳияи заминаи ҳуқуқӣ, ки истифодаи одилона ва бехатари фазои кибериро таъмин менамояд, пешбинӣ шудааст.
Тамоюлҳои актуалӣ, ки ба ин ё он роҳ ба рушди фаъолияти давлатҳо дар фазои иттилоотӣ таъсир мерасонанд, аз инҳо иборатанд:
• Таҳияи маҷмӯи тадбирҳо оид ба фароҳам овардани муҳити устувор ва бехатари иттилоотӣ аз ҷониби давлатҳои гуногун ба баланд шудани нақши технологияҳои иттилоотию коммуникатсионӣ дар ҳамаи соҳаҳои ҳаёти мардум вобаста аст. Рақамикунонии густурдаи равандҳои иқтисодӣ, иҷтимоӣ, сиёсӣ, фарҳангӣ мавҷудияти механизмҳои ҳуқуқӣ ва технологии татбиқи онҳо, инчунин воситаҳои ҳифзи иттилооти табдилшударо дар назар дорад;
• Пандемияи коронавирус раванди вуруди технологияҳои иттилоотӣ ба ҳаёти мардумро чандин баробар суръат бахшид, ба хусус дар созмондиҳии шароити корӣ. Таҳкими компоненти иттилоотӣ дар давлат хароҷоти иловагӣ ва тасмимҳои иловагиро барои ташаккули сохтори устувори он тақозо мекард. Анҷоми эпидемия гумон аст, ки ба хоҳиши элитаи ҷаҳонӣ барои маҳрум кардани худ аз тамоми бартариҳое, ки технологияҳои иттилоотӣ ва коммуникатсионӣ дар солҳои охир ба вуҷуд овардаанд, таъсир расонад, зеро онҳо ба як платформаи хуби назорати иловагӣ аз болои фаъолияти шаҳрвандон табдил ёфтаанд;
• Афзоиши ҳолатҳои ҷосусии киберӣ, ҳамлаҳои хакерӣ ва истифодаи имконияти шабакаҳои иҷтимоӣ барои назорати шуури ҷамъиятӣ давлатҳои миллиро водор менамояд, ки дар фикри амнияти иттилоотии худ бошанд. Кишварҳое, ки инфрасохтори технологияи иттилоотӣ ва коммуникатсионии сустинкишофа доранд, қариб чизе барои муқобилият нишон додан бо рақибони аз ҷиҳати технологӣ пешрафтаи худ надоранд.
Истиқлолияти иттилоотии давлатҳои миллӣ дар рӯ ба рӯйи як қатор таҳдидҳои универсалӣ қарор дорад. Хатарноктаринашон инҳоянд:
а) осебпазирии технологӣ (мавҷуд ё суст инкишоф ёфтани заминаи миллии технологӣ ва ё вобастагӣ аз воридоти маҳсулоти пешрафтаи технологӣ). Дар сурати ҳамлаи хакерии дар миқёси бузург барномарезишуда, объектҳои муҳимми инфрасохтори иттилоотиро ғайрифаъол кардан мумкин аст;
б) ҷанги иттилоотӣ, ки ҳоло ба таври фаъол тавассути аксари давлатҳо роҳандозӣ шудааст. Моҳияти он дар бофтани фактҳо, бардурӯғ нишон додани маълумот ва ташаккули манзараи таҳрифшудаи ҷаҳон ифода меёбад ва дар он симои кишваре, ки барои бадном кардан интихоб шудааст, ба таври манфӣ пешниход карда мешавад (мисоли таърихӣ: дар тамоми расонаҳои ИМА ва ҷаҳони Ғарб Давлатӣ Шӯравӣ чун “Империяи бадӣ” муаррифӣ мегардид);
в) истифодаи шабакаҳои иҷтимоӣ ҳамчун платформа барои ташкили фаъолиятҳои ғайриқонунӣ. Яке аз мисолҳои барҷаста истифодаи мессенҷери Telegram барои ҳамоҳангсозии ҳаракатҳои эътирозӣ дар қаламрави Беларус дар тобистон ва тирамоҳи соли 2020 мебошад. Сатҳи баланди махфият аз ҷониби ин мессенҷер ба ҳар истифодабаранда имкон медиҳад, ки на танҳо шахсияти худро пинҳон кунад, балки амнияти нисбӣ ва махфияти интиқоли маълумотро низ таъмин намояд. Чунин усули махфияти маълумот метавонад аз ҷониби ячейкаҳои террористӣ, гурӯҳҳои муташаккили ҷиноӣ, контрабандаҳои маводи мухаддир ва таблиғгарони порнографияи кӯдакона мавриди истифода қарор гирад;
г) муомилоти беназорати криптовалюта. Аз ин ҷо, ки криптовалюта пуштувона надорад, назорати он тақрибан номумкин аст. Ин амр хатари хосеро барои иқтисоди давлатҳо эҷод месозад. Сарфи назар аз поин рафтани арзиши криптовалютҳои калидӣ, таҳдиде, ки аз онҳо бармеояд, аз байн намеравад ва бозори онҳо баҳодиҳӣ ва танзими ҳуқуқӣ аз ҷониби давлатро талаб мекунад;
ғ) қаллобӣ дар Интернет, ки ҷиноятҳои миқёси гуногунро дар бар мегирад. Киберҷиноятҳо инкишоф меёбанд ва ҳазинаҳои он низ афзоиш меёбад. Танҳо як низоми пуриқтидори иттилоотии миллӣ метавонад бо он мубориза барад.
Барои кам кардани зарари эҳтимолӣ ва воқеии таҳдидҳои дар боло зикршуда маҷмӯи чораҳои зерин пешниҳод карда мешаванд:
1. Зиёд кардани маблаггузорӣ барои рушди саноати миллии технологияи муосири пешрафта ва тадқиқоти илмӣ;
2. Ташаккули иқтидори ҳарбӣ дар соҳаи технологияҳои рақамӣ бо истифода аз таҷрибаи давлатҳои дигар дар шароитҳои ба ҳам монанд;
3. Гузаронидани сиёсати фаъол дар соҳаи иттилоот, ки ба мубориза бар зидди хабару гузоришҳои бардурӯғ нигаронида шудааст;
4. Ба вуҷуд овардани шароити назорат ва мубориза бар зидди фаъолиятҳои ғайриқонунӣ дар шабакаҳои иҷтимоӣ ва мессенҷерҳо;
5. Гузаронидани сиёсати фаъолу устувор дар соҳаи гардиши криптовалюта;
6. Татбиқи сиёсат дар соҳаи маълумотгирӣ ва маориф оид ба масъалаҳои амнияти иттилоотӣ, қоидаҳои ҳамкории бехатари шаҳрвандон бо технологияҳои рақамӣ ва истифодаи моҳиронаи онҳо. Саводи иттилоотӣ барои пиронсолон аз ҳама муҳим аст, зеро маҳз ҳамин тоифаи аҳолӣ ба далели ҳузури ками худ дар фазои иттилоотӣ аксаран фирефтаи қаллобон мешавад.
Албатта, соҳибихтиёрии давлат ҷузъи ҷудонашавандаи ҷаҳони муосир ва гарави амнияти ҷомеа мебошад. Аксари кишварҳои олам дар масъалаи таъмини амният ва Истиқлолияти иттилоотӣ, аз он чӣ ки ба нақша гирифта буданд, пеш рафтаанд ва як қатор мамлакатҳои дигар дар масъалаи мазкур ҳанӯз ҳам оҷизанд.
Ин матлаб зарурати дарки минбаъдаи мафҳуми ҳузури давлат дар фазои иттилоотиро аз нигоҳи технологӣ, ҳуқуқӣ, арзишӣ - ахлоқӣ шарҳу тафсир намуд. Оиди ин масъалаи муҳимми амниятӣ фикру мулоҳизаҳо зиёданд. Ақл беҳтарин неъмат барои дарки воқеиятҳост, ки бояд аз он истифода намуд!
Шарифи И,
коршиноси масоили сиёсӣ
Присоединяйтесь к ОК, чтобы подписаться на группу и комментировать публикации.
Нет комментариев