Вақте андешаи инсон наметавонад вуҷуд воқеии ҷаҳонро инъикос намояд. Фард ҷаҳонро ба назари хирадиву мантиқӣ бинаду шиносад, вазъияту воқеиятҳоро таҳлил намуда баррасӣ созад, дар он фасоди андеша ба вуҷуд меояд. Фасоди андеша, тафаккуро нозо мекунад. Аз он чизи наве ба вуҷуд намеояд. Он дарки каҷу ворунае дар зеҳният аз ҷаҳон аст, ки ба ҷаҳони физикӣ ҳеҷ иртиботе надорад. Моҳияти инсон дар он ифода мегардад, ки ӯ ҳаводисро аз тариқи абзорҳои ҳиссиву ақлӣ дарк намуда дар баробари воқеият тасмим мегирад. Тадбир меҷӯяд. Хулоса мебарорад.
Миллате ки дучори фасоди фарҳангӣ мешавад, дар он хирадандешӣ аз байн рафта, бештар хурофаандешӣ ва таассубу нодонӣ рушд мекунад. Ин фасод дар ифода мегардад, ки набуди андешаи солим ва ҳарчи ки бофтаҳои зеҳниву хаёлианд ба ҳайси арзиш қабул меёбанд ва аксар бошандагони ин ҷомеа ба ҷое аз шеваи таҳлилию хирадӣ истифода намудан ҳамин навъи боварҳоро ҳамчун арзиши мутлақ қабул мекунанд.
Хурофот як шевае аст, ки замири фардро аз хирад тиҳӣ мегардонад ва дар он ҳамоқатро боло мебарад. Фарди хурофазада наметавонад бо андешаи солим ва таҳлили вазъиятҳое ба вуҷуд омада ба воқеият баҳогузорӣ намояд. Ӯ шефтаи хаёлоти хурофотии худ аст, ки онҳоро айни ҳақиқат ҳисобида ҳар гуна андешаи ба он мухолифро инкор менамояд. Ин фард бо пиндорҳои эҳтимолии худ такя намуда, онҳоро ҳамчун неруи таскиндиҳанда ба кор мегирад.
Фарди хурофазада наметавонад воқеиятро бо диду назари хеш таҳлилу баррасӣ намояд. Ӯ ҳамеша побанди мутаваллиёне қарор мегирад, ки онҳо аз тарвиҷ намудани хурофот баҳракашӣ менамоянд. Фарди хурофазада эҳсоси озодӣ надорад. Ӯ бештар зери таъсири дигарон аст ва андешаҳои онҳо баён доштаро соддалавҳона бидуни таҳлилу баррасӣ айнан қабул дорад.
Фарди хурофазада эҳсосу дарки моҳияти озодиро надорад. Ҳамин аст, ки ҳамеша пойбанди фикру назари дигарон мемонад ва ба як абзори барномакунонидашудаи дасти дигарон табдил меёбад. Ин гуна вазъро мубалиғони афкори хурофӣ мавриди суиистифода қарор медиҳанд ва аз афроди хурофазада ҳамеша мавриди баҳракашӣ қарор медиҳанд. Вақте ин раванд хусусияти иҷтимоӣ пайдо мекунад, аксар аз бошандагони ин ҷомеа афкори таҳлилӣ ва дарку баррасии оқилонаву мантиқиро аз даст медиҳанд ва маҷзуби маҷмӯи хурофоти аз ҷониби гуруҳҳои баҳракаши иҷтимоӣ табдил меёбад. Ин ҳолат ҳолати фасоди фарҳанг-иҷтимоӣ ба шумор меравад ва ҷомеае, ки ба фасоди фарҳангӣ дучор мешавад, дигар дар он тариқаи дурусти хулосабарорӣ вуҷуд надорад.
Шинохти вазъиятҳо ва дарки ҳаводиси иҷтимоӣ на бар пояи таҷрибаву илм, балки бар пояи эҳсосот, хаёлот ва бовару эътиқод сурат мегиранд. Яъне ин фасоди фарҳангӣ ҷомеаро куллан аз хирадандешӣ берун месозад ва онро ба як ҷомеаи тақдирзадаи хурофотӣ табдил медиҳад. Табиист, ки вақте хурофазадагӣ ба раванд табдил меёбад ва аксар аз афроди ҷомеаро ташкил медиҳад, дар ин ҳолат гуруҳи афроде, ки огоҳанд ва ё бар пояи хираду огоҳӣ андеша мекунанд, ба хотири ҳифзи ҳаёти хеш маҷбур мешаванд, худро дар инзивоъ (канорагири) қарор диҳанд, зеро дониш тарзи андешаи онҳо ба мафкураи пешбари ҷомеа мухолифат мекунад ва чун хурофот ҳамчун арзиш дар ҷомеа мутлақ арзёбӣ мешавад, дар ин ҳолат андешаи дигареро бар он мухолиф баррасӣ кардан сахт шикананда ва осебпазир аст.
Таърих борҳо собит кардааст, ки вақте ҷомеа тафаккури асосиашро таассубу хурофот ташкил медиҳад, инсонҳои донишманду озода ҳамеша мавриди бархӯрди руҳияи замон қарор мегиранд. Зеро арзишҳои мутлақшуда ҳар гуна андешаи дигарро маҳдуд намуда, онро бидъату ноҷоиз эълон менамоянд.
Дар дарозои таърихи ҳазорсола мо ба ҳамин гуна вазъиятҳое бархурд мешавем, ки хирадаандешону донишмандону мавриди таҳдиду таҳқири мутаваллиёни хурофапардозу таассубзада гардидаанд. Масъалаи асосӣ дар он ифода мегардад, ки аксаран аз мутаваллиёни хурофапардоз чунон вонамуд мекунанд, ки гӯё масъулияти тамоми ҳарфу ҳиҷои онҳо худашон не, балки офаридагори ҷаҳониён аст. Чунин ба назар мерасад, ки гӯё онҳо ба олами мовароӣ як робитаи бевоситае доранд ва ҳар гуна дастуру амалкардро бевосита аз он мегиранд. Ин гурӯҳҳо дар аксар ҳолат мардумонро бо маҳдуд кардани дарку андеша, ки он ҳамаро бидъату гуноҳ мешуморанд, як навъе аз тарсу ваҳшатро дар дили мардумон эҷод мекунанд.
Воқеият ин аст, ки мафҳуми гуноҳ як бовари тарбиятӣ аст, ки он бо шууру виҷдони мо алоқамандӣ дорад. Вале мутаваллиёни таассубу хурофот онро ба дараҷаи як амали ҳавлноку ваҳмангезе баррасӣ мекунанд, ки дар зеҳнияти инсонҳо онро ба як ҳолати ҷаҳаннамӣ баробар месозанд. Як чиз мусаллам аст, ки ҳар қадар зеҳнияти тарсу таваҳҳум боло гирад, ҳамон қадар ҷойгоҳи хираду андеша камтар гардида, сатҳи бовармандӣ меафзояд.
Инсони тарсу ҳамеша дар ин маҳдуда боқӣ мемонад, ки набояд амале анҷом диҳад, ки он берун аз меъёрҳо бошад ва муртакиби ҷурму гуноҳ нашавад. Тасаввуру таҷассуми мубҳаму пӯшидае, ки аз ҳаводиси ҷаҳон бо таблиғи гуруҳҳои хурофапардоз берун меояд, фардро намегузорад, ҳатто дар бораи вазъу воқеяити ҷаҳон дуруст андеша кунад. Ҳарчанд дар аксар маврид ба чунин ҳолате дучор меояд, ки иддае аз афкори таблиғу таҷассумшуда дар бораи ҷаҳон, ки аз тарафи гурӯҳҳои хурофапарокан ироа мешаванд, ба воқеият бегонаанд. Аммо тарсу таваҳҳуми гуноҳ содир накардан, онҳоро аз андешаи бохирадона ва таҳлилӣ бозмедорад ва ҳатто аз вокуниш кардан дар баробари ин навъи тафаккури сохтаю бофта парҳез меварзанд. Мутааасифона чунин таваҳумот аксаран дар байни миллатҳои шарқӣ ва адёни сомӣ ҷой доранд.
Гуруҳҳои хурофапардоз гоҳе навъе аз андешаи ғайрро, ки дар он таҷассуми воқеияти илмӣ бошад, ҳар ҷо ки дарёбанд дар зудтарин фурсат ба он метозанд, меситезанд ва сайъ мекунанд, чунин нафаронро тавба диҳанд ва аз баёни андешаи ин гуна минбаъд пешгирӣ намоянд.
Ҳузури ҳамин гуна боварҳои пешипоафтодаи таассубию хурофотӣ дар афкори умумӣ аст, тудаҳои миллионнафарии авомуносро бар самти боз ҳам дар чорчубаҳои хурофотӣ боқӣ мондан ҳидоят менамоянд. Аз онҳо бардаҳои беҳуввият ба вуҷуд меоваранд. Мутаассифона агарчи танҳо як даста ва ё гуруҳи кучаке метавонанд аз ин ҳолат манфият ба даст оварад, вале дар сатҳи умум чунин навъи тафаккур боиси дармондагии ҷомеа ва вопасгароии миллияту халқиятҳо мешавад.
Вақте инсон хираду огоҳии худро аз даст медиҳад, ӯ наметавонад муроқиб аз амалу рафтори худ бошад. Ҳатман вақте у наметавонад амалу рафтори худро дар чорчӯбаи хираду андеша муроқибат намояд, дигарон муроқиби амалҳои ӯ мешаванд. Ҷоҳил касе ҳаст, ки ба муроқибаи дигарон эҳтиёҷ дорад. Ба он эътимод мекунад ва ҳарчиро ки барояш мегуянд, онро айни ҳақиқат қабул медорад. Ҳол он ки агар каме бар умқи ҳама аз ин таблиғот таваҷҷуҳ кунад, бебунёдиву дур аз воқеият буданашон дарк карда мешавад. Вале агар заррае ба чунин таблиғот таваҷҷуҳ накард, дуруғҳои боз аз он бузургтареро барояш ироа мекунанд. Яъне ҳарчи қадар барои ин нафарон афкори таваҳҳумзадаю тарсомезро бар сараш мубалиғин бор мекунанд.
Манфиатбортарин ва саҳлтарин кореро, ки гуруҳҳои хурофапардоз анҷом медиҳанд, ин таблиғи густурдаи ҷаҳлу нодонӣ ва бовармандӣ аст, ки таърихи ҷаҳонро бар боварҳои кучаки хеш инъикос намуда, ҳама гуна тамаддуну арзишҳои қаблии инсониро инкор мекунанд. Махсусан барои қавмҳои бузурги ориёие, ки сароғози тамаддуни башар ба номи онҳо рақам хӯрдааст, он ҳамаро нодида гирифта, тақаддумияти ин мардумро ба даврони ниҳоят навин мансуб мегузоранд.
Гуруҳҳои хурофапардоз ҳамеша сайъ мекунанд, ки аз ритуалу рамзу розҳое кор гиранд, ки дар нигоҳ доштани ҷомеа барояшон осон бошад. Онҳо ҳамеша аз тамҷидот ва чизҳои муқаддасшудае кор мегиранд, ки бадин восита тавонанд нуфузи худро бар гуруҳҳои дигар ҳамл кунанд. Инҳо кушиш ба харҷ медиҳанд то инсонҳо дарке аз худу худсозӣ надошта бошанд, то дар тобеияти ақидатӣ ва сарнавиштии онҳо қарор бидиҳанд. Ин гуруҳҳо бештар аз мафҳуму ҳаводиси марг кор мегиранд ва онро ҳамчун як василаи таъсиррасонӣ ба зердастони худ истифода менамоянд. Як мавзӯъро ҳеҷ гоҳ матраҳ намесозанд, ки ҳар навъи зинда аз руи он қонунмандие, ки мавҷуд аст тавлид мешавад, рушд мекунад, ҷуфт мешавад, насл мегузорад ва мемирад.
Гуруҳҳои мубалиғи хурофа аз он кор мегиранд, ки маргро дар наҳваи чигунагии мурдан арзёбӣ мекунад. Вале онҳо ҳеҷ гоҳ ин ҷиҳатро матраҳ намекунанд, ки чи фарқе дорад, ки марг мурдан аст, ё як тамом шудан. Чун дар олами ҳастӣ ҳеҷ чизе пойдор ва собит нест ва ҳама дар ҳоли тағйиру табдил қарор доранд ва агар ин ҳолатро ба ҳама шаклу анвои вуҷуд татбиқ намоем, пас танҳо худи марг аст, ки ҳамеша ва дар ҳар ҷо ҳузур дорад ва як чиз вақте аз доираи худ берун шуду ба чизи дигаре табдил шуд, он ҳеҷ гоҳ ба ҳолати аввала нахоҳад гашт. Аз ин лиҳоз агарчи шаклҳо метавонанд такрор шаванд, вале бозгашти як чиз ба ҳамон мазмун ва ҳамон моҳият имкон надорад, зеро ҳар шайъ марбут ба фазо ва макони муайян аст. Агар шайъи дигаре ба он монанд ҳам такрор шавад, вале он айни ҳамон чиз нест. Он чизи моҳиятан нав аст. Вобаста ба ин муқаддима яке аз мавзӯъҳое, ки аҳли хурофот матраҳ мекунанд, ин меоди ҷисмонии инсон аст. Аммо дар қонунмандии олами ҳастӣ ҳеҷ қазову қадаре вуҷуд надорад, ки он идорашаванда бошад.
Ҳастии ҳар шайъ ё навъ бар пояи қонунмандии илмӣ устувор аст, ки бо шинохт аз онҳо мо метавонем олами мавҷударо дарк намоем. Ҳеҷ замон устураҳои беруномада аз боварҳои инсон наметавонанд ва нахоҳанд тавонист ба воқеияти ҷаҳон ва он дастовардҳое, ки инсонҳо аз роҳи илму хирад кашф намудаанд, посух бигӯяд. Заъфи ин асостиру хурофот аз он аст, ки онҳо аз рӯи тасаввуротҳои соддаи омиёна ба вуҷуд омадаанд ва ҷуз хаёлу тасаввур чизе нестанд. Онҳоро мо инсонҳо бардошт кардаем, муқаддас гардонидаем ва худро тобеи зеҳниятҳои муқаддасшудаи худ гардонидаем.
Қобили қайд аст, ки танҳо ахлоқи аз зарурратҳои иҷтимоӣ бурун омада ки барои танзими равобиту муносибатҳои гуногуни иҷтимоӣ инсонҳо дуруст кардаанд ва он танҳо ба хотири дар ҳамзистию ҳамгироии осоишта ба сар бурдани худи инсонҳо аст, метавонад ба вазъу ҳолоти инсонҳо ҷавобгӯ бошад. Эътиқод ба бозгашт ва ҷаҳони дигар ин берун омада аз тарс ва ваҳми нобудии худи мо инсонҳост.
Мо инсонҳо ҳеҷ гоҳ ва ба ҳеҷ қиммат нобудию нестиро қабул надорем, фақат ба хотири тасаллӣ бахшидани хеш аз роҳи боварҳо ва имону эътиқод бозгашт ва дунёи дигарро ба вуҷуд овардаем, то ки худро аз ваҳми нобудӣ наҷот бидиҳем. Ҳолати аҷиб дар ин ҷо он аст, ки моро чи ҳосил ба фаҳми ин ки баъд аз марг боз мурдан ва боз мурдани дигаре дошта бошем ё надошта бошем.
Вақте дар тавлиди мо оғози як марг ногузир аст, чун ҳама чиз тағйирёбандаю фаннопазир аст. Пас чи қадар аҳмақона аст, ки сайъ кунем будани феълии худро бо шудане ки намедонем чист фиреб диҳем. Ҳол он ки агар шудание ҳам бошад боз дар ҳамин ҷо хоҳад буд ва он маоде, ки бо асотиру ақоид ва бовару таваҳҳум аз ҷониби хурофапардозон таблиғ мешавад, ба назар мерасад ки як фиребе беш нест, зеро онро бо ҳеҷ таҷриба ва далоили илмиву мантиқӣ собит карда наметавонем.
Вобаста аз муқаддимоти боло моро зарур аст, ки аз дидгоҳҳои таассубию хурофотӣ мардуму миллати худамонро берун биёварем ба донишҳои аз илму таҷриба берун омада такя кунем. Эътиқоду боварро кори фард қарор диҳем. Ҷаҳонро ба чашми хираду дониш шиносем. Андешаи худро аз зангори хасу хошоки тассубу хурофот тоза намем. Аз фасодиву нозоии тафакур бипарҳезем. Танҳо аз роҳи улуми ақлӣ ва табиию риёзӣ ба қонунмандии табиат ва дар маҷмуъ олами ҳастӣ огоҳ шавем, дар заминаи он фанновариву чизҳои моҳиятан навро барои саодати инсонии худу ҷомеаи худ ба вуҷуд оварем ва ҷомеаву миллати худродар сатҳи рушд бар пояи кишварҳои пешрафта бирасонем.
Исомиддин Шарифов,
номзади илмҳои фалсафа
Присоединяйтесь к ОК, чтобы подписаться на группу и комментировать публикации.
Нет комментариев