Предыдущая публикация
Эй кош ҳама моҳ чу моҳи рамазон буд.
Эй кош ҳама покдилу покзабон буд.
Эй кош ҷаҳонро набуд ин қадр касофат,
Эй кош замин тоза зи бад ҳам зи бадон буд.
Эй кош пас аз моҳи шарифи рамазон ҳам,
Масҷид пур аз саҷдагару тавбагарон буд.
Эй кош пас аз моҳи шарифи рамазон ҳам,
Қалби ҳам аз бухлу адоват ба амон буд.
Эй кош пас аз моҳи шарифи рамазон ҳам,
Ҳарфи хушу дилчасп ҳаме вирди забон буд.
Эй кош пас аз моҳи шарифи рамазон ҳам,
Аз одамият дар дили ҳар фард нишон буд.
Эй кош пас аз моҳи шарифи рамазон ҳам,
Гӯши ҳама муштоқ ба овози азон буд.
Эй кош пас аз моҳи шарифи рамазон ҳам,
Ҳар фард зи аъмоли бади худ нигарон буд.
То рӯйи замин пур шавад аз хубиву хубон,
Эй кош ҳама моҳ дақиқан рамазон буд.
Ғайратҷон Ҳотамӣ
Следующая публикация
Нет комментариев