Предыдущая публикация
ЧЫНЫГЫ БАКЫТ – ҮЙ-БҮЛӨ.
Бир айылда чогуу өскөн үч бала ар дайым отуруп алып кыялданганды жакшы көрө турган. Ар биринин өз кыялы, келечеги боло турган. Ар бири бактылуу болууну самашчу, бирок бакытты ар башка нерседен көрүшчү. Биринчи бала бай болууну самап, коомдо байларга ар ким урмат кыларын, бардык ишти акча менен бүтүрсө болорун, акчалуу болсо бактылуу жашаарын айтып кыялданчу. Экинчиси болсо: «Таланттуу адамды эл сыйлап турат, таланттын артынан байыса да болот, эл ичинде сыймыктанган адам көп болот. Эл баалап турса, ошондон өткөн бакыт барбы?!» – деп калчу. Ал эми үчүнчүсү болсо: «Кийин чоңойсом, жакшы жар күтүп, үй-бүлө курсам, бардык нерсени чогуу чечип, турмуштун ысык-суугун бирге татып, бири-бирибизди туура түшүнүп жакшы жашасак, мына ошол чыныгы бакыт болсо керек», – деп айтканда, тигил экөө: «Байлыгың болсо, эл сыйлап турган адам болсоң, каалаган адамыңа үйлөнүп бактылуу болосуң да. Андан жакшы бир нерсе тууралуу кыялдансаң боло», – деп күлүп калышчу.
Ошентип, убакыт өтүп, тагдыр аларды ар башка жакка бөлүп кетет. Жылдар жылга алмашып, убакыт өтө берет. Тагдырдын буйругу менен баягы үч бала карып калган чагында кайрадан жолугуп калышат. Сурашып отуруп, бала чактагы кыялдарын эстешет. Ошондо биринчиси: «Мен кыялданып жүргөндөй көп иштедим, бай болдум. Бирок канчалык акчам көбөйгөн сайын, дагы көбөйсүн дедим. Күндүз тынчтык, түндө уйку көрбөгөн күндөрүм болду. Акча үчүн жакын адамдарды да сатканга туура келди. Бирок, бактылуу болбодум. Тиш кайрагандар, ишимди тартып алгысы келгендер көбөйдү. Балдарым болсо барга көнүп өстү. Акча деп жүрүп тарбиясына көңүл бура албадым. Азыр алар бирдеме болсом, баарын бөлүп кеткени турат. Айтор, бакыт акча-байлыкта эместигин кеч түшүндүм», – дейт. Экинчиси да өз арманын айтып: «Мен өзүм кызыгып жүргөндөй, чоң өнөрдүн ээси болдум. Эл аралап көп жүрдүм. Убагында баары сыйлап жүрдү. Бирок кийинчерээк жаңы таланттар чыгып, мен унутула баштадым. Эч ким карабай, эч жерге чакырбай калды. Дайыма эле кадыр-барк күтүп жүргөнгө көнүп калган адам аябай жалгызсырап калат экен. Үй-бүлөдөн да жолум болбоду. Жалгыз талант менен бактылуу болбойт экен адам», – дейт.
«А мен болсо, – дейт үчүнчүсү, – чыныгы бакыттын даамын азыр да татып отурам. Үй-бүлөм, балдарым бар. Жарым жакшы чыкты, балдарымды татыктуу тарбиялоого болгон күчүмдү жумшадым. Азыр бизди сыйлап улам бирөөсү келип сурап турушат. Неберелерим мойнума минип ойноп, кечке чейин чарчатса да, ошолорго өмүр тилеп, ыйман тилеп, кудайга ыраазы болобуз. Мына, чыныгы бакыт үй-бүлөдө дегеним чын чыкты»
Бакыт деген – адам өкүнбөй турган рахат .
Следующая публикация
Комментарии 3
Эшектей иштеп байлык топтоо эмес,
Балдарга татыктуу тарбия берүү болсо керек.
Аталарыбыз бекер айтпаса керек.
Бир жылды ойлосоң кара эгин тик,
Он жылды ойлосоң бак тик.
Жүз жылды ойлосоң, балаңды тарбияла деп.