Предыдущая публикация
ЙИҒЛАБ ТУРИНГ
Эгар бўлдик эгилмаган бошимизни,
Тандан бу жон кетмасмиди сиз кетгунча.
Алдамчи деб атамасман асло Сизни —
Қиз боланинг ваъдалари бўй етгунча,
Кўнгил учун йиғлаб туринг тўй ўтгунча!
Бўй етган қиз учирма қуш, учар-кетар,
Бир кун суйиб бегонани, қочар-кетар,
Эрта исмим ёдингиздан ўчар-кетар —
Қиз боланинг ваъдалари бўй етгунча,
Кўнгил учун йиғлаб туринг тўй ўтгунча.
Қизлар кўнгли баҳор билан ёз ўртаси,
Гоҳи алам, гоҳи араз — ноз ўртаси.
Қумқўрғондек омонат бу ишқ ўрдаси,
Қиз боланинг ваъдалари бўй етгунча,
Кўнгил учун йиғлаб туринг тўй ўтгунча!
Айтинг-айтинг, тўраларим кулмасинлар,
Тили узун шум янгалар билмасинлар.
Кўча-кўйда мени эрмак қилмасинлар —
Қиз боланинг ваъдалари бўй етгунча,
Кўнгил учун йиғлаб туринг тўй ўтгунча!
Следующая публикация
Нет комментариев