МОЁ СЕЛО Черная Промза

ЛАМОНЬ ТЕЕМЕ ТОНАДСЬ ЭЙКАКШПИНГЕСТЭ✅✅✅ Покш Березникень тиринь районов ардомсто свал седеесь лиякс чави, весемесь маряви истямо малавикс ды вечкевикс, прок эйкакшпингес таго велявтат. Кода свал, сайтянзат истямо ёжомарямо сестэ, зярдо кувать а ардат чачома ёнксов. Тов пачкодемстэ маряви, прок зярдояк тосто эзить тукшнояк. Нама, истя ламот юткстонок арсить, кить кадызь тиринь ёнксост ды тусть эрямо ошов. Тешкстаса, те куросонть, Руз. Найманонть ютамодо мейле, малав весе велетне эрзянь, юткстост ансяк Тазинась рузонь. Кода карминек содамо, тосояк седе ламо важодицятне ней эрзят. Алкукс важодеме тонадсь семиясо Текенень поладсынек, ютазь иень декабрясто саезь Тазина велень «Искра» ООО-нть прявтокс кармась эрзянь цёра. Те – Геннадий Афанасьевич Беспалов. Сонзэ чачома-касома тарказо – Покш Березникень райононь Ало велинесь (руз. Чёрная Промза). Кода бу ней меревельть, Геннадий Беспаловонь эйкакшчизэ ютась ламо эйкакшонь триця семиясо. Тетязо-авазо, Афанасий Иванович ды Мария Ивановна, трясть ды пильге лангс кеместэ стявтсть колмо эйкакшт: кавто тейтерть ды вейке цёра. Ало велесэ советской шкатнестэ кирьпецень покш ды мазый васенце кудонть Штырма леенть малас стявтызь Беспаловтне. Кудазортнэ Афанасий Иванович ды Мария Ивановна аволь ансяк эсест велесэ, шабра Чувашиясояк содавиксэльть кода тевест алкуксокс топавтыцят. Сынь ламо иень перть важодсть Алатырень Химлесхозонь Покш Березник ёнксонь отделениясонть – пурнасть пичеой. Тешкстасынек, те тевесь пек стака ды аволь весенень топавтовикс. Васняяк эрявсь маштомс шкастонзо эрьва пичес теемс керявкскеть, мейле эзгаст понгавтнемс оромкинеть. Кедьгетнень пешкедемадо мейле пурнамальть ды те стака канстонть пачтямаль эрявикс таркав. Кизэнь пси читнестэ тетясь ды авась истя сизильть, кудовгак удомо эзть пачкодекшне, кадновсть тоско кордонс. Виде, таркаськак аволь маласоль веленть эйстэ. Те шкастонть эйкакштнень вансь Васса сырькаест. Эйкакштне, касозь-кепедезь, кармасть якамо тетяст-аваст туртов лездамо. Весть ульнесь истямо тев, зярдо Геннадий цёрынест тусь лишмесэ вирев ды кадовсь. А ёвтавияк, кодамо седейризкс сестэ печтясь вечкевикс бабазо нуцькинензэ кисэ… Кеветееде ламо иень перть Беспаловтнень семиясь топавтсь те а шожда тевенть. Кие соды, паряк, седе товгак бу поладовлизь сонзэ, бути «Чёрнопромзинский» се шкань хозяйствань ловсонь-товарной фермань прявтось Римма Викторовна Макушкина аволинзе терде эстензэ важодеме. Вана истя Афанасий Иванович ды Мария Ивановна валскень зорясто ды позда чокшнес якасть ракша мельга. Вишка пингстэ Геннадий тонадсь скалонь потявтомо ды ламо тевс чарькодеме. Лиясто, аванзо таркас самсто, мартонзо важодиця аватнеде икеле весе тевтнень топавтылинзе. Ламо иеть ютасть се шкастонть, ламо полавтомат теевсть Геннадий Афанасьевичень тиринь велесэ ды семиясо. Умок уш тусть эрямосто тетязо, бабазо… Вейкесь кенярдовты, эзь ёма кудоюртост, тосо нейгак эри ды седейшкава весень васты аваст Мария Ивановна, кинень те иень августсто топодить 88 иеть. Эйкакшчинь арсемась топавтовсь Эйкакшокс уш Геннадий Беспаловонь покш мелезэль улемс тонавтыцякс. Те мелесь топавтовсь, ансяк аволь сеске. Школанть прядомадо мейле васня тонавтнесь ДОСААФ-со водителекс, сонзэ прядомадо мейле сась важодеме тиринь велев. Иень ютазь кармась тонавтнеме М. Е. Евсевьев лемсэ Мордовской государственной пединститутсо (ней – университет) физической культурань ды начальной военной подготовкань факультетсэ. Геннадий Афанасьевич эсь шкастонзо служась армиясо, эсь шкастонзо урьвакстсь. Низэ, Галина Фёдоровна, эсест велень, тонавтнесть вейке классо. Тешкстасынек, Галина Беспалова важодсь Н. П. Огарёв лемсэ МГУ-нь филологиянь факультетэнь эрзянь келень кафедрасо. Паряк, мирдть-нить пингень перть улевельть бу тонавтыцякс, бути аволь перестройкань иетне. Ютазь пингень сеть стака вейксэньгеменце иетнестэ, кода ламо лия тонавтыцятнененьгак, зярыя ковонь перть Беспаловтненень эзть пандо зарплатат ды ульнесть лия стакачить… Университетэсь ульнесь паро школакс Самай те тувталонть кувалма Геннадий Афанасьевичнень савсь туемс школасто. Эрямонзо сон сюлмизе правань ванстыця органтнэнь марто, кеветее иень перть важодсь Саранскойсэ общественной порядкань ванстомань тевсэнть. Ушодсь МР-ва МВД-нь Ленинской РОВД-сэ участковой инспекторокс, пачкодсь общественной порядкань отделэнь прявтокс. Самай сеть вейксэньгеменце иетнестэ саезь 2004 иес сонзэ вановт ало ульнесть весе покш ды вишкине мероприятиятне, конат ютавтовсть Н.П. Огарёв лемсэ Мордовской государственной университетсэ. Вейке шкасто сонзэ отделсэнть ульнесть малав ниленьгемень сотрудникть, эрьва ломанентень эрявсь аволь ансяк явомс мель, истя жо сонзэ важодеманзо кисэ кирдемс вал вере прявттнэнь икеле. Нама, сонензэ пек лездасть сеть содамочитне, конатнень пурнынзе омбоце высшей образованиянть получамсто (заочна прядсь юридической факультет). Шкань ютазь Н.П. Огарёв лемсэ Мордовской государственной университетэв кармасть само тонавтнеме омбо масторонь ламо студентт, ванстыцятненень вешематне полавтовсть ды, эряви меремс, эрямоськак икелень коряс кармась ков седе сэтьме. Важодемань те таркась киртязель. Виде, Геннадий Афанасьевичнень лия тев максокшность правань ванстыця органтнэсэ, ансяк сон тусь тосто. Теде мейле косо тензэ ансяк эзь саво важодемс, малав эрьва косо тевезэ сюлмазель безопасностенть, зыянтнэде ванстоманть марто. Сась веленть вельмевтеме Бути кеменьшка иеде икеле Геннадий Афанасьевичнень кияк меревель, што карми улеме Покш Березникень тиринь районсо велень хозяйствань прявтокс, тенень сон бу аволь кемеяк… Кода кортыть ломань ютксо, лиссь истя, кода лиссь! Тазинасо вастовомсто Геннадий Афанасьевич эзь карма сёпомо эйстэнек сень, што тей важодеме самодо икеле кувать арсесь… – Кавтолдомс ульнесь мезень коряс, хозяйствасонть ульнесть покш асатыкст: ламо ковонь перть тосонь важодицятненень эзь пандово зарплата, пек покшоль эрьва мезень коряс долкост, – мерсь Геннадий Афанасьевич. – Невтемакс, ансяк энергиянть кисэ малав котосядт тёжат целковойть. Ракшатне парсте апак андо, рудазовт, кардотне каладсть, техникась ташто… Ушодынь важодицятнестэ. Тесэ эйстэст 50 ломанть, кудосто ды одов эйсэст пачтятано эсенек транспортсо. Сынь маласо велетнестэ. Васняяк киртинек долконть зарплатань коряс, ней пандтано шкастонзо ды свал бажатано сонзэ кастомс. Эрямос совавтынек «коське» закононть, бути важодема таркасто киньгак редятано иредезь, сеске те ломаненть олякстомтсынек тевденть. – Аволь пек умок сисем иес теевтинек Экологиянь коряс проект, топавтынек весе вешематнень пожардо ванстомань коряс, полавтынек водонапорной башнянть, – поладсь Геннадий Афанасьевич. Валонзо кемевтемга, Геннадий Беспалов саимизь паксяв, косо васенцеде озавтсь соя ды кукуруза. Неть культуратне сынст модатнень лангсо касыть парсте. Ульнинек скалтнэнь кизна кирдемань таркасонть, весемева неявсь, ракшатне парсте андозь, ламот юткстост удость. Кода мерсь прявтось, аволь умок сынь витнесть ракшань кавто кардот, маласо шкасто колмоценть кармить анокстамо. Тешкстасынек, те хозяйствантень покш лезкс максы «Птицефабрика «Атемарская» ОАО-сь. Геннадий Афанасьевичень валонзо коряс, те хозяйстванть прявтось Александр Валентинович Щемеров аволь ансяк телефон вельде кевкстни, кода ютыть тевтне, бути эряви, сонськак тей арды. Теске ванкшносынзе тевтнень ды, ков виензэ сатыть, лезды. Те хозяйствастонть туемадо икеле кевкстинек Геннадий Афанасьевичень, зяро чассто ушодови важодема шказо? Тень каршо сон мерсь: «Течи сыргозинь валскень вете чассто, пурнынь ды сеске сынь важодема таркав». Вана истя, бути ломаненть седеезэ алкукс пии-палы тевензэ кисэ, сон а карми арсеме, зяро шка ютавтсь важодема таркасо. Весе шканзо, содамочинзэ ды виензэ карми максомо се тевентень, конань сон топавты. Валентина Юдина