Биз қанча яшаймиз, Оллоҳ билгучи,
Яшаш ташвишидан ошиб яшайлик.
Умр тизгининг лоақал бир учин,
Яхши амалларга қўшиб яшайлик.
Кеча соғ кўрганим бугун майтдир,
Уч кун аза бўлса, уч кун ҳайтдир.
Абадий ҳаётга иморат қурмоқ,
Уни жихозламоқ айни пайтдир!
Ҳар кунинг, ҳар куним сўнги эмасми,
Қай нодон Охират ғамин емасми.
Сени йўқдан бунёд айлаган Тангрим,
Пок юриб, тилансанг, лаббай демасми?
Қадрингни сўрашдан аввал қадрла,
Имконинг бўлмайди сўнгра қабрда.
Нон билан сув есанг ҳалолидан е,
Саодат топганлар топган сабрдан!
Насиҳат билмагин каломимни дўст,
Гуноҳим дон бўлса, қушлар абад тўқ!
Билсанг бу дунёда мендайин ғариб,
Мендайин бойию, бадавлати йўқ!
Яна қанча муддат, қанча бор имкон,
Келишу,кетарга шай турар карвон.
Энг сўнги нафасда, жон чиқар они,
Раҳмингдан бенасиб этмагин, Раҳмон!
Малика Тавфиқ
Присоединяйтесь к ОК, чтобы подписаться на группу и комментировать публикации.
Нет комментариев