Предыдущая публикация
Тяддеть Россияса Российскяй Федерациянь Президентсь Владимир Путин азозе Отечествань аралаень кизокс.
Героеньконь и специальнай военнай операциянь участникнень честьс и атяньконь аляснон, конат тюрсть Родинать инкса историческяй тя или тона пинкнень, подвигснон колга мялямонкса.
Сяс ёратама азондомс Великай Отечественнай войнань участникнень эзда фкять, Советскяй Союзонь Геройть Виктор Николаевич Бобковонь колга. Сон шачсь 1926 – це кизоня Саранскяйса. Тяса касондозе серенц, тонафнесь школаса. Великай Отечественнай войнать ушедомстонза Виктор Бобковонь 15-е кизоцоль. Цёранять пяк оцюволь мялец повомс фронту, тюремс фашисттнень каршес. Но военкомату эрь самстонза тейнза азондсть фкя и сяка валхнень: «Эряви касомс». Аньцек 1943- це кизонь августста пяшкодевсь арьсефоц – эсь воля тусь воявома. Повсь Белорусскяй омбоце фронту. Васень шитьненькиге од цёрась няфтезе прянц отькорь, аф пели и смузю боецокс. Но колганза пара кулятне келес срадсть 1944-це кизоня, мзярда частьсь, коса служась Виктор Бобков, пачкодсь Неман ляйть трвас. Сон сонць анась пря уемс ляйть тона берякозонза. Перьфпяльге сязендевсть снаряттне, но од боецсь сякокс ётась тона шири. Фашисттне врьгятсть лангозонза , пялязкс ляцендсть. Викторонь ранендазь. Но сяка тюрсь врагть каршес, ашезе кадонда вастонц. Тянь мархта лездсь ётамс ляйть туркс марнек подразделенияти. Викторонди мярькфоль пачфтемс донесения полконь командирти. Сон меки уезе ляйть и лац тиезе максф тевть. Неман ляйть туркс ётамста подвикнень инкса разведчикти Виктор Николаевич Бобковонди СССР-нь Верховнай Советть Президиумонц 1945-це кизонь 24-це мартонь Указсонза максфоль Советскяй Союзонь Героень лем. Но од воинти мяштезенза зрнянь тяштсь повфтамс ашезь сав. Сон 1944-це кизонь октябрьста шавовсь стака бойхнень пингста Восточнай Пруссиять границанц ётамстонза.
Следующая публикация
Нет комментариев