Зубово-Полянскяй районца ули мокшень оцю веле, лемоц Кужа. Кельме и ши мадома ширде сонь кяшезь аера вармада туста вирьхе. А шинь стяма и лямбе ширеса келептезь сянгяря и панчфу эльснон лугатне. Сенем санкс лангаст таргавсть ляйхне и ляйнятне, оцю калонь сельмокс пиндолдыхть эрьхкне и эрьхконятне. Вов тяфтама вастса 1944 кизонь 11 сентябрьста и шачсь мокшень содаф писательсь Григорий Пинясов. Ня мазыдонга мазы васттнень эса кассь-венемсь, ётафтозе идькс и одкс пингонц.
Г. Пинясов шумордазе велень школать, сяда меле Зубово-Полянскяй педучилищать, Н. П. Огаревонь лемса Мордовскяй госуниверситетть. 16 киза покодсь спецкорреспондентокс, ответственнай секретарень заместителькс, ответственнай секретарькс «Мокшень правда» газетаса, сяльде – 16 киза главнай редакторкс «Мокша» журналса, мекольдень пингть покодсь главнай редактор «Якстерь тяштеня» идень журналса.
Мокшэрзянь литературав Г. И. Пинясов сась 1960-це кизотнень. Эсь творчестванц ушедозе поэзияста. Васенце стихотворенияц «Ваймама шиня» ульсь печатлаф 1961 кизоня «Мокша» журналса. Эсонза азондовсь кизонь лугать мазышинц и танцти шиненянзон колга.
Сяда тов ушедсь азксонь сермадома. 1977 -це кизоня башка книгакс лиссь сонь «Ветецесь» повестец. Тя произведениясь няфтезе, што мокшэрзянь литературав сась цебярь писатель, конань сонцень, эсь лацонь сёрмадыень асувоц, сон маштсь эряфста цебярь и важнай событиятнень няфнема. Тя произведениять пара мяльса васьфтезь лувихне. Сон лемтьф кажнайти эздонк инь мала, инь питни ломанти – тядяти.
Мордовскяй книжнай издательстваса лиссть Г. И. Пинясовонь повестень и азксонь книганза «Пси киза» (1980), «Ялгане и содафне» (1985), «Тушенттама, аля, тушенттама» (1990), «Сире ранат» (1995), «Эштерь туцят» (2000), ёфксонь, азксонь и повестень «Вирявань руця» (2004), 2013 кизоня лиссь «Кочкаф произведеният» кафта томса книгац. Рузонь кяльса лиссть «Жаркое лето», «Старые раны», «Давай вернемся в молодость».
Г. Пинясовонь произведениянза лисендсть «Литературная Россия» еженедельникса, «Волга» журналса, а стане жа Болгарияса, финно-угорскяй республикатнень эса.
1994 кизоня Г. И. Пинясовонди максфоль Мордовия Республикань Заслуженнай писателень лем, а 2000 кизоня максф Мордовия Республикань Государственнай премия.
Г. И. Пинясов - Мордовия Республикань Писателень союзонь член, ульсь Мордовиянь Культурань министерствань коллегиянь членкс, ульсь республикать эзда финно-угорскяй народонь Всемирнай консультативнай комитетса. Казьф «За трудовую доблесть» медальса.
МР-нь А. С. Пушкинонь лемса Национальнай библиотекаса ётась ила, кона лемтьфоль писательть шачема шистонза 80 кизонь топодеманцты. Илати сашендсть писательть мала ломаненза, раднянза, ялганза, сят, кит покодсть мархтонза и кит кельгсазь сонь творчестванц
Присоединяйтесь к ОК, чтобы подписаться на группу и комментировать публикации.
Нет комментариев