12-бөлүм.
Бул күнү Айзада менен Аман сайттын ачылышын белгилеп спирттик ичимдикке мас болуп калышкандыктан, социалдык тармактагы талкууларды көрүшкөн жок. Барда экөө түнү бою отурушуп, үйгө таң сүрүп калганда араң келип жатышты. Эртеси түшкө маал Аман ойгонду. Туруп телефонун издей баштады. Үйдүн ичинен таппай машинаны көздөй жөнөдү. Телефону кубаты өчкөн бойдон унаада калыптыр.
– Ту-уй, ата, тоону томкоруп салгансып мынча эмне ичкенбиз?- деп сүйлөнүп алып үйгө кирди. Үйгө кирсе Айзада ойгонуп калыптыр.
– Жаңылыктарды көрдүңбү? Бир түндө интернет желеси биздин сайт жөнүндө гана талкуу кылыптыр. Кызылдар бизди таап алса жаптырып тынат го,- деди Айзада.
– Ошончолук болуп кетиптирби? Бир түндө ошончо кишинин көңүлүн бура алыптырбыз да? Домен Орусиядан алынды да, бизди таба коюшпаса керек,- деген Аман телефонун жандырып интернетти карады. Ал чынында бир түндө мындай дүң жаратарын күткөн эмес.
Сайт аркылуу түн ичинде келген буюртмаларды карап чыкты.
– Айзада эже, элестетиңиз, түндө кыздарга эмес, жигиттерге көп буюртма болуптур. Карасаңыз, бул жигит түндө 3 буюртма алыптыр.
– Койчу, эркектерге дагы суроо-талап болот бекен?- деген Айзада Амандын жанына келип, телефонуна үңүлүп калды.
– М-м, күткөн эмесмин. Бирок келишимдүү жигит турбайбы.
– Ооба, анысы бар. Бул жакты караңызчы, иштейбиз деп анкеталарын толтуруп жөнөткөндөр да эркектер экен. Акчасын салгандарды сайтка жарыялап коёлу.
– Эркектер дагы мындай кызмат көргөзүп акча таап баштаган турбайбы, кыздарга эле асылып отурушчу эле го. Жөн кой, ушул сайттан эл дагы көрүп, кыздарга асылганын токтотсун,- деп жини келе сүйлөдү. Мындай асылууларды көп башынан өткөргөн Айзада.
– Өзү мен деле мурун кыздар эле денесин сатат деп ойлочумун. Бул бөлүмдү кошуп жатканда эркектерди сатып алган аялдар болобу деп ойлонгом,- деди Аман.
– Чынында, аялдардыкы көп таралган да. Анан да аларды коомго көп жарыялап жүрүшпөйбү. Бул иште дагы эттиятташ керек. Мен дагы бул чөйрөгө күтүлбөгөн жерден аралашып калгам. Ыза-күйүт менен жүрүп эле ушул жолго түртүлдүм. Мен ушул ишти жаңы баштаган кезде бир ирет бир жигит менин кызматымды сатып алды. Кардар болуп келген ал жигит кол саатына жашыруун камера тагып кириптир. Анын максаты – сойкукананын ичиндеги көрүнүштү тартып кетүү экен. Этият болуш шарт, жолугушуу тууралуу айтып телефон чалгандардан качыш керек. Сайтты жаптырабыз деп турганда иштеткендер ким экенине кызыккандар четтен чыгат. Канча күнгө чейин жашырына алар экенбиз? Булар, эгер чындап киришсе, бат эле таап алышат. "Мындай жолдон кеттим, болду, башка жашоо баштайм" дедим эле. Бирок бул жолдун дагы тузу оор, оңою менен кете албайсың. Эми кеттим дедим эле. Бирок баары бир ушул жаатта иш кылып отурам,- Айзада бул сөздү ойлонбой туруп айтып алды.
– Сиз эмне, иштеп көрдүңүз беле?- Айзададан мындай сөздү күтпөгөн Амандын оозунан бул сөз шашылыш чыгып кетти. Ал анын сүйлөп жаткан сөздөрүн таң калуу менен угуп жаткан.
– Жашырганда эмне? Ооба, иштеп көргөм. Сен суктанган ак Ренж Роверди ушул жактан иштеп тапкан акчама алгам,- деген бойдон Айзада сөзүн уланткан жок. Үйдүн ичинде тынчтык өкүм сүрдү. Аман дагы башка суроо бере алган жок. Ичинен ойлуу калды. Бул учурда Айзада дагы аны ушул ишке түрткөн Жакыпов менен айрылышкан күндү эстеди.
xxx
Бир учурда Жакыпов “ишим көп болуп жатат, менин тынчымды албай тур” деп айткан бойдон бир топ убакытка жок болуп кетти. Айзада ага абдан көнүп алган эле. Экөө жакын мамиледе жүргөндөн бери мынчалык көп убакыт айрылышкан эмес болчу. Бир күнү түн жамынып Жакыпов Айзаданын үйүнө келди. Бул үйдү ага Жакыпов өзү алып берген. Анда батирдин бир ачкычы боло турган. Уктап жаткан Айзада үйдөгү дабыштан улам ойгонуп кетти.
– Айзада, чочуба, бул мен,- деген үндү жазбай тааныды. Сагынып калган эле, халатын жонго сала калып коридорго чыкты. Жакыпов аны мурдагыдай тосуп алган жок. Айзада аны кучактап, моюнуна асылды. Жытынан кере-кере жыттады. Бирок ал анын колунан бошонууга шашкандай Айзаданын колун өзүнөн түртүп койду.
– Жакшыбы, сага эмне болгон?- деди Айзада. Ал келгенде Айзаданы эркелетип ага эзилип бүтпөйт эле. Бул жолу анын түрү башкача.
– Жакшы, Айзада, мен сени менен сүйлөшкөнү келдим.
– Эмнени?- Айзада алайып карап калды аны. Түн бир оокумда эмнени айтканы келди деп чочуду. Жакыпов чылымын күйгүздү. Айзада туруп барып чылымдын күлүн түшүргөн айнекти көтөрүп келип жанына койду.
– Айзада, экөөбүз көп жакшы күндөрдү өткөрдүк. Аны танбайм. Сага ыраазымын, жаштыгыңдын канча жылын мага арнадың. Бирок биз бул мамилеге чекит коюшубуз керек. Аялыма ушунча жыл кыянаттык кылдым.
– А сен менсиз деле...- Айзада сөзүн айтып бүткөн жок.
– Ооба, сен жокто деле ошол эле кыянаттыкты кылып келгем. Аны сен айтпасаң дагы моюнга алам. Учурда аялым катуу ооруп жатат. Мен өзүмдү анын алдында абдан күнөөлүү сезип турам. Ушундай жакшы адамдын кадырына жеткен жокмун, чынын айтсам. Эми убактымдын баарын ага арнагым келди. Сакайып жанымда калышына бар күчүмдү жумшайын деп жатам.
– А менчи?- Айзаданын жүзү бозоруп, көзүнөн жаш агып кетти.
– Айзада, сен эмне ыйлайсың? Үйүңдү алып бердим. Өз үйүңдү батирге берип койдуң. Ошол акча менен жашай бер. Колуңдан келген ишти иште.
– Кеп акчада эмес да. Мен сени азыр эле кайра сагынып кеттим. Таптакыр сенсиз кантип жашайм?- Айзада чындап жалгыздыктан коркуп жатты.
– Эх, Айзадочка, көнүп кетесиң. Ал аны өзүнө имере тартып кучактады. Айзада ага эреркеп бир топко бышактап ыйлады.
– Сага ушул жашоо жагып жатабы? Менин капасымда эч кайда чыкпай жүрүп, ансыз да жаштыгыңдын бир бөлүгүн мени менен өткөрдүң.
– Мага сени менен болгон жашоо кандай болбосун жагат,- деди кыз анын көзүнө тике карап.
– Койчу, Айзада, бир күнү ырас эле ошол чалдан кутулуптурмун деп сүйүнөсүң. Мындай келечеги жок жашоону эмне кыласың? Өзү сага мендей кишинин кереги бар беле?
– Бар үчүн жаныңда мышыктай болуп отурам да.
– Айзада, эми артка жол жок. Мен чечимди чыгардым. Өмүрүңдү мендей чал менен куру өткөрбө. Өзүң курдуу бирөөгө арна. Үй-бүлө күт, балалуу бол.
– Намысы жок мендей кызды бирөө алабы? Эми кайдагы үй-бүлө?- кыз титиреген үнү менен кыйкырды.
– Баары мүмкүн. Сендей татынакай кызга жигит эртең эле табылат. Мен деле өмүрүмдүн жарымынан көбүн жашадым. Калган өмүрүмдү түз жүрүп өткөрөйүн.
– Түз жүрүп өткөрөт имиш...- Амандын жанында отурган Айзаданын үнү сыртка чыгып кетти.
– Эмне дедиңиз?- Аман ага карап калды.
– Эч нерсе, өзүмчө эле,- деген Айзада балконго чыгып сыртты карап туруп калды.
– Шүмшүк, аялыңды бетиңе жаап келдиң эле. Андан бери канча кыздын башын айландырдың. Түз жүрө турган киши аялынын арбагынын алдында деле түз жүрөт эле да,- деп дагы да сүйлөнүп алды...
Айзада өзүнө ишенимдүү эле, Жакыпов андан кете албайт деп ойлочу. Аны менен өмүрүнүн калган бөлүгүн өткөрүүгө дагы даяр эле. Ал Жакыповдун аны таштап кеткенине ишенбей жүрдү. Себеби ал башынан бери эле канча жолу “бул кылганыбыз туура эмес, токтотолу” деп кетенчиктейт, жок болуп кетет. Кайра эле бир күнү “сагындым, сен жок жашай албачудаймын” деп мышыктай болуп шыйпаңдап келип калат. Айзада ага жини келет, бирок айласы жок, андан баш тартып кете албасын билет. Кайра эле баарына көз жумуп, анын жанында болгонуна кубанып башын көкүрөгүнө жөлөп, эркелеп отуруп берет. Бир катаны эки жолу жасаганың бул жаңылыштык. Ал эми үчүнчү ирет ал тандоо дейт эмеспи. Айзада бул нерсени моюндаган. Өзү менен өзү сүлөшүп, “бул менин тандоом, сезимдериме каршы чыга албайм, эгер ал мага жагып турса кантип баш тартам” деп тыянак чыгарып койгон. Бул жолу дагы Жакыповдун биротоло кеткенине ишенбей жүрдү. Бирок Жакыпов бул жолу үйдүн ачкычтарын таштап, Айзаданы бекем кучактап, маңдайынан өөп түн жамына чыгып кетти. Айзада аны көп күттү. Телефон чалса “кара тизмеде”. Байланыш дагы биротоло үзүлдү, бирок анын үмүтү эч качан үзүлгөн жок. Үмүтү шоола болуп жанып, анын келерине ишенип турду. Бирок күндөр айга алмашып, арадан үч ай убакыт өтүп кетти. Айзада бул аралыкта өзүн ичимдик менен сооротуп жүрдү. Жолукса эле ичимдик ичип мас болуп, курбуларын дагы жадатып жиберди. Ыйлайт, арманын айтат. Акыры аны менен жолугушуудан курбулары дагы кача баштады. Ал телефон чалса жок шылтоону айтып эч кимиси бошобой турган болду. Жалгыз ичкенге өттү. Ушул күндөрү ал кыздардын денесин сатып бизнес кылган таанышы Гуляга жолугуп калды. Гуля менен Жакыповдун эскертүүсүнөн улам таптакыр байланышты үзгөн эле.
– Ой, Айзадочка, кандай анан? Эмне жалгыз майрамдап жатасыңбы?
– Өзүңүз көргөндөй. Шерик болом десеңиз отуруңуз,- кызып калган Айзада жанындагы рюмкага толтура коньяктан куйду да, Гуляга сунду.
– Сен айтып калыптырсың, шерик болбосом болбойт го,- Гуля Айзаданын жанындагы отургучка отурду.
– Жакыпов менен мамилең жакшыбы?- Гуля кепти ушул жерден баштады. Себеби ал буга чейин Жакыпов менен Айзаданын ортосунда мамиле болбой калганын Асядан уккан эле.
– Жок, жок, ал өлгөн,- рюмканы көтөрүп калтырбай ичип жиберди да, көзүн жумуп отуруп калды. Көзүнөн жашы сызылып ыйлай баштады.
– Эмне болду? Ичиңдегини айтып, көөдөнүңдү бошотуп алчы,- Гуля ага ыктай отуруп, аны аяган көз менен карап калды.
– Кетти, ал мени таштап кетти. Ушунча жанымда жүрүп, ал мени алдады. “Сенсиз жашай албайм, сенин жаныңда гана жан дүйнөм тынч алат” деп жалгандарына мени курулай гана тойгузуп жүрүптүр. Ага мени унутуш ушунчалык оңой болду. А мен болсо унута албай кыйналып жатам. Жашоомду ансыз элестете албай кыйналдым.
– Өлгөндүн артынан өлмөк жок дейт, кеткен кетти, Айзада, жашооңду улант!
– Ал менин бул жеримден кетпей жатпайбы,- кыз көкүрөгүн чапкылап жатты.
– Сен кааласаң эле ал жериңден дагы өчөт. Кечке ойлоно берсең кетпейт да. Бул жашоодо баарынын ордун алмаштырууга мүмкүн. Алмашкыс эч нерсе жок.
– А сүйүүчү... Сүйүү деле ушундай үч күндүкпү?
– Сүйүү керек болсо бир түндүк. Адам сүйүүсүз деле жашай берет. Мен сүйүү дегенди билгеним жок ушул жашка чыгып. Сен болгону ага көнүп калгансың. Жакыпов деп өмүр бою кыйналып жүрүп өтөт белең. Эркек дегениң өзүмчүл келет турбайбы, ал сенин ушинтип эзилип жатканыңды сезип, билип жатат дейсиңби? Жок! Өз жашооңду жаша. Кеткен Жакыпов кетиптир. Керек болсо анын туткунунан бошонгонуңа сүйүнүшүң керек,- Гуля астындагы коньяктан бир аз ууртап койду.
– Балким, сиз туура айтып жаткандырсыз,- Айзада чылымын күйгүзүп кере-кере тартып отуруп калды.
Айзаданын кыйла өзгөргөнүн байкады, ичимдик ичип, чылым чекпеген акылы зирек Айзаданы таанычу Гуля.
– Ага эмне кейийсиң, жапжаш, чырайлуу кызсың, биздин жумушка барчы. Жакыповдон төөлүк өйдө жигиттерди табасың. Жүрү, мен сени азыр эле ала кетейин, көңүл ачканча Жакыповду алмаштыра турган киши издейсиң,- өздөрүнүн жумушуна тартууну көздөп жаткан Гуля убакытты курулай созууну каалаган жок. Айзаданын ушундай абалынан пайдалангысы келди.
– Барса баралы,- кызымтал болуп коньяк ичин туйлатып турган неме эч нерсени этибар алган деле жок. Ордунан туруп жатып столго акча таштап, официантка кол көтөрдү да, Гуляны колтуктай сыртка чыгып кетти.
Гуля унаасынын арткы эшигин ачып Айзаданы отургузуп коюп, телефондо кимдир бирөө менен сүйлөштү. Ал бул учурда Айзадага кардар даярдап жаткан эле. Айзаданы жарым саатка жетпеген убакытта өздөрүнүн мейманканасына алып келип, экинчи кабатка колтуктап чыкты.
– Айзадочка, азыр сага сонун жигит келет. Аны бир көргөндө Жакыповду унутасың. Тезирээк буларды кийип даяр тур,- деп керебеттин үстүнөдөгү үлбүрөгөн пижаманы көрсөттү да, сыртка чыгып кетти.
Гуля ушунча жыл бул чөйрөдө иштеп жүрүп кандай адамдын тандоосу кандай болорун жатка билип бүткөн. Ал Айзадага дайыма машыгууда жүргөн, дене түзүлүшү дал эле Жакыповдукуна окшогон бир кардарын чакырып берди.
– Эже, мунуңуз чындап тазабы?
– Ой, Тимур, мен сага качан жаман кыз тандап берчү элем. Бул анда-санда бир адам менен көңүл аччу. Ал адам менен мамилесин үзгөнүнө көп болду. Кааласаң ушул кыздын дайымкы кардары болуп аласың. Өзүң каалагандай таптаза сактап берем,- Гуля мыйыгынан жылмая карап жигитти Айзада жаткан бөлмөгө киргизип жиберди.
xxx
Айзада ушинтип экинчи ирет Гулянын колуна түшүп берди. Башында ага ылайык кардар болгондо Гуля өзү чакырып жүрчү. Кийинчерээк Айзада Гуляга өзү чалып кардар сурай баштады. Жакыповду унутам деп жатып Айзада өзүнөн-өзү бул чөйрөгө баш-оту менен кирип кетти. Ал жашоосунда болуп жаткан жагдайларга, эмне кылып жатканына баам салып дагы койгон жок. Ал эми дене ырахаты үчүн гана жашап калгандай башка нерсеге эч көңүл бурбай калды. Жүрөк, жан дүйнө, сүйүү деген нерсе эми анда жашабай калды. Уктайт, ишин аткарат, акчасын алат, банктык эсебине салат. Күн сайын ушундай окшош кыймыл-аракет кайталанат. Өзү байкабаганы менен, Айзада бүтүндөй жараатын ушул нерсе менен алаксытып, жымсалдап койгондой дос-тааныштарынан таптакыр алыстап кетти. Эми анын чөйрөсү, тааныштары, жакындары таптакыр башка адамдар эле.
xxx
Чөгөлөп жалынсаң да күндөр токтобойт, айлар токтобойт, жылдар шуулдап биринин артынан бири кылчайып койбой өтүп жатат. Өтүп жаткан өмүрдүн баркын билгени бир, билбегени миң... Кор болгон өмүрлөр канча?! Азыр да кайран өмүр кордолуп жатат. Тар бөлмө, эски керебет. Бул керебеттин кызматы чоң. Түн бир оокум, керебет кыйчылдаган үнүн баспай дагы деле кызматта. Башканын жаны тынса тынат, бирок ушул керебеттин жаны тынбайт. Обон жаратса бул керебет укмуш обон, чыгарма жазса бул керебет укмуш чыгарма жаратмак. Азыр да Айзада бул бөлмөдө кардарын тейлеп бүттү. Ал бүгүн чарчаңкы, маанайы жок. Бирок анын жумушу анын чарчаганы, маанайынын жок экени менен эсептешпейт. Кийинки кардарына даярдыкты баштоого мажбур...
Айзада колундагы кружканы жерге чаап жиберди. Өткөнүнө саресеп салуу, андагы чындык менен бет келишүү ал үчүн ар дайым оор. Алынын жетишинче өткөндү эстебей, күнүмдүк тиричилик менен алектенип жүрчү. Бирок акыркы убактарда өтмүштөн кача албай калды. Бир аз тынч алса эле көз алдына тасмадай чууруп өткөн күндөрү тартылат. Азыр баарын эстеп отурганына жини келип кетти. Шарт бурулуп, муңга толгон көздөрүнөн жашын мөлтүрөтүп бөлмөдөн чыгып кетти. Аман дал болуп ал кеткен тарапты карап туруп калды. Эмне болуп кеткенин түшүнө алган жок. Чачырап жерде жаткан айнек идиштин сыныктарын бир топко карады да, бир нече мүнөттөн кийин гана Айзаданын артынан басты. Ашканада жок, сырткы каалга ачылбаптыр. Жуунуучу бөлмөнү көздөй жөнөдү. Айзада жуунуучу бөлмөнүн эшигин ичинен кулпулап алыптыр. Аман коркуп кетти. Акырын каалгага жакындап ичин тыңшап калды, эч кандай кыймыл-аракет байкалбайт. Бул кандай окуяны баштаганы турат дагы, бир нерсенин ичинен чыгып күнөөлүү болуп калбайын деп чочулады. Эшикти кайталап тарткылады. Бир топто гана аялдын бышактап ыйлап жаткан үнү угулду.
– Айзада эже, сизге эмне болду? Бир нерсе деңизчи. Мен сизге жардам бере аламбы?- деп үн катты Аман.
– Айзада эже, өзүңүзгө зыян келтире турган эч нерсе жасабаңыз. Баары жакшы болот. Жөн эле кейип, өзүңүздү жазалай бербеңизчи...- жигит дагы эшикти тарткылады.
– Аман, сарсанаа болбо. Мен өлбөйм, ушунча жылдан бери өлбөгөн эми өлөт белем? Сен мага көңүл бурба. Барчу жагыңа барып, иштериңди бүтүрө бер. Мени ойлобо. Мен эмне бир аз ыйлап эс алам. Бир аз жалгыз болгум келип турат.
– Макул, эже. Өзүңүзгө зыян келтирүү оюңузга келбесин. Кандай жардам керек менден, мен ар дайым даярмын,- деген Аман мындан ашык аялдын тынчын алууга болбостугун түшүндү. Сыртка чыгайын деп жатып оюна бир нерсе кылт эткендей төркү бөлмөгө кирди. Жерде сынып жаткан кружканын айнектерин терип тазалап баштады. “Жылан чакпай, жылкы теппей эле бир заматта кызууланып кетти го, эмне болгонун ким билсин” деп күбүрөнгөн жигит эч нерсени түшүнбөгөндөй ийнин куушуруп, башын чайкап койду. Кружканын сыныктарын таштандыга салды да, андан кийин гана ноутбугун көтөрүп, каалганы бекитип сыртка чыгып кетти. Кетпейин, бир жаман окуя болуп кетпесин деди, бирок аялдын жалгыз калгым келип турат деген сөзү аны кетүүгө түрттү. “Акылдуу эле аял го, өз жанына кастык кылбас. Бул дагы аялзатынын дагы бир чыргоолугудур. Өз үйүндө жалгыз калгым келип жатат десе чыгып кетпей туруп алганым болмок беле? Мен бир аз акча чогултуп алсам деген бир байкушмун, бул аялга эмне жетишпейт. Эмнеге билбейм, экөөбүздүн жолдор бирикти да калды” деп жигит өзүнчө ойго чөмүлүп баратты.
xxx
Түркиядагы эс алууга Дайыр көптү үмүттөнүп барган. Бирок, тилекке каршы, андай болгон жок. Башы жакшы башталганы менен, акыркы күндөрү Алтынай бир да жакшы сөз сүйлөбөдү. Дайыр ушул күндөрү Алтынайдын ага болгон таарынычы канчалык күч экенин, ага болгон сүйүүсүнүн, жакшы мамилесинин ордун таарыныч ээлеп алганынын, өзүн мурдагыдай сүйүүгө, эмне кылса да жакшы сөз сүйлөөгө татыктуу болбой калганын түшүндү. Дайыр өзүн актай албайт эле. Эми түз жүрүп, Алтынайды, жакындарын сыйлап анын мурдагыдай мамилесине, сүйүүсүнө арзууну гана ойлонуп калды Дайыр. Экөө учакта бири-бирине үн каткан жок. Ортодо Алан гана бир атасынан, бир апасынан бирдемлерди сурап экөөнү алмак-салмак сүйлөтүп келе жатты. Мындай маанайдагы 5 сааттык жол суткалап жол жүргөндөй эле болду Алтынай үчүн. Учак “Манас” аба майданына келип конгондо “өх” деп оор үшкүрүнүп алды.
– Такси керекпи?- деп Алтынайды жандай басты бир жигит.
– Ооба, керек деген Алтынайга Дайыр алая карап.
– Кереги жок. Бизге машина даярдап койгон.
– Мен түз эле үйгө кетейин дегем,- Алтынай Дайырга акырая карады.
– Сиз бара бересизби,- деди Дайыр таксистке кол шилтеп.
– Үйгө барып атам-апама учурашып койбойлубу, кайра жеткирип коём,- Дайыр Алтынайды суроолуу карады.
– Жок, чарчап турам. Үйгө эле барам, ушундай маанайым менен аларга барууну туура көрбөй элемин.
– Мындай маанайыңды сенин үйүңдөгүлөр көрсө деле эмне дейт? Дайыр эс алдырбай эле кызыбызды капа кылып алып келиптир дебейби.
– Алар мага көнүп бүтүшкөн, эч нерсе дебейт. Качан эле менин капа болбогон кабагымды көрүштү эле?- деди Алтынай.
– Унааны чыга беришке айдап келип, ачкычын тапшырды шыңга бойлуу жигит.
– Минтип бирөөлөрдү убара кылбай эле кетмекпиз,- деди Алтынай жактырбагандай.
– Ыңгайлуу болсун дегем,- деп күнөөлүү кишидей эшикти ачып жубайы менен уулун отургузду да, от алдырып бир аз жол жүргөндөн кийин жолду жээктеп унааны токтотту.
– Алтыш, болдучу, ушунча дагы таарынасыңбы? Андан көрө бир жерден чогуу тамактаналы, бир аз өзүңө келип, маанайыңды оңдоп алып анан барчы үйгө.
– Сага эмне болгон? Менин маанайым, кабагым менен качантан бери эсептешип калдың эле?
– Мындан ары дайыма эсептешем. Айткандарыңдын баарын көңүлүмө түйдүм. Алтынай, эми эски каталарды кайталабайм. Чынын айтсам, көңүлүңдү көп эле калтырдым. Бирок кайрадан сенин мурдагыдай сүйүүңө арзыгым келет. Кайрадан сенин жоодураган көздөрүңдү көргүм келет,- деген Дайыр жалооруй Алтынайды тиктеп калды.
– Сен эмне, Түркиядан сүйүү сөздөрүн жаттап келгенсиңби? Өзүңчө эле сөздөн-сөз токуп эле...- маанайы жок болсо дагы жүзүн кыска жылмаюу сүртүп өттү.
– Чын жүрөктөн айткан сөздөрүм. Жаттап, эмне айтам деп издеп деле отурган жерим жок,- деди Дайыр.
Андан ары эч ким унчуккан жок, шаарды көздөй бараткан жолдон экөө тең көзүн албай өз ойлору менен алек. Унаанын ичиндеги тынчтыкты Алан бузду.
– Апа, менин тигиндей машинам болот. Учуруп айдайм, карасаңыз деп алдыда бараткан жол тандабасты сөөмөйү менен көрсөтүп, өзүнчө кубанып жатты.
– Аласың, балам. Машина деп эле турасың, ээ?
– Ата, чоңойгончо ушунун кичинекейин алып берип турбайсызбы. Бирок ичине мен баткандай болоюн да,- деди уулу ага жакындап.
– Макул, алып берем,- уулунун бетинен өөп койду.
Алтынай башында көнбөй жатканы менен, үйгө жеткенде кадимкидей чытып турган кабагын ачылып, жайдары боло түштү. Ата-энесине сыр бербегенге аракет кылып жатканын байкаган Дайыр ичинен кудуңдап кубана түштү. Аларга алып келген белектерин тапшырып Дайыр үйүнө жөнөп кетти. Анын дарбазадан жалгыз кирип келе жатканын көргөн апасы чочуп кетти. Ушунча күндөн берки ал жактан мамилелери түзөлүп келет деп жанып турган үмүтүнө суу чачкандай эле болду. Дайыр үйгө түз кирген жок, унаасын короого киргизип жатты.
– Апей, ботом, Дайыр өзү жалгыз келиптир. Алтынайга эмне болду экен, дагы таарынышып кетиштиби, деги өздөрү жакшы болсо экен. Элдешип, ээрчишип келишет деп сүйүнүп жатпадым беле. Саякат деле жардам берген эмес турбайбы,- эне сарсанаа боло эшикти көздөй басты.
– Болдучу ар нерсени түкшүмөлдөй бербей. Отура турчу, кирсин үйгө, учурашалы, анан сурайсың чоо-жайын. Тим эле чыдамың жок да,- деп корс этти күйөөсү. Аял басып бараткан жеринде селейип туруп калды...
Уландысы бар.
Присоединяйтесь к ОК, чтобы подписаться на группу и комментировать публикации.
Комментарии 4