4-бөлүм.
Бүгүнкү жумушум жакшы эле болгондой болду,Дастан байке келсе акчаны тапшырып ,толук маалыматты берейин деп күтсөм келбеди Акчаны сейфке салып,Жакып келгенде кете бердим.
Күндөр өтүп ,иш менен алектене баштадык.Дем алыш күндөрү айылга барып аттык.Самира эже кадимкидей баса баштады,баягыдай эмес,ачык,шайыр.Биз барсак атам,апам,балдарым болуп чогуу тосуп алышат.Үй толуп топурап,майрамдай болуп калгансыйт .
--Атамдын тамак ичүүсү начарлап баратат,догдурга көрсөтүш керекпи,-деди бир барганыбызда Самира эже.Биз кайра шаарга кайтканда ала келип догдурга көрсөттүк.Жашы да бир топ болуп калгандыктан болсо керек,жатып дарыланыңыз десе макул болбой коюптур.Догдур жазып берген дарыларды алып,үйдө карайлы десек ага да макул болбой койду,айылга эле кетем деп.Кайра эле алып барып,дарыларды убагында бергиле деп Самира эже менен Датка эжеге дайындап келди Жакып.Бирок,жакшы боло албады,чын дүйнөгө сапар алды көп өтпөй эле.Бардык зыйнатын колдон келишинче жасап,оо сапар узаттык.Апамдын жалгызсырап калганы билинди,кантсе да канча жыл түтүн булатып бирге жашашканда.Өлүм ак,баарыбыздын барар жерибиз ошол жер эмеспи.Коңшу-колоңдор,тууган урук келип көңүл айтып кетип жатышты.
Биз кайрадан жумушка кайттык.
---Бул сага,-деп гүл көтөрүп кирип келди Дастан байке бир күнү.
--Ой,рахмат.Бирок эмнеге?
--Белек бериш үчүн сөзсүз себеп болуш керекпи?
--Жок,ошентсе да.
--Гүл дүкөндөн өтүп баратып көзүмө кооз көрүнүп кетти,сен үчүн алып алдым.
---Неге мен үчүн,Жылдыз эжегечи...
---Эмне мынча ашыкча суроо бересиң,Албина.Сен үчүн алгым келди,болду.-деп орой сүйлөп кабинетине кирип кетти.Ашыкча сүйлөй албай ,же гүлдү ыргытып ийе албай кала бердим.Чындыгында аябай сонун гүлдөр экен,карап көзүң тойбойт.Бул Дастан байкенин экинчи жолу гүл бериши эле.Ойлоп көрсөм Жакып төрөп чыгып баратканда гана гүл бериптир,момунтип себепсиз бербеген.Бир аз ойлоно түштүм да, гүлдөргө суктанып карап туруп,ары жактагы идишке суу куюп гүлдөрдү салып койдум.Негедир ал күнү гүлдү коргон сайын улам жыттап коюп жакшы жүрдүм.Соода да жакшы болду,кечке кабинетинен чыкпай олтурду Дастан байке.Жумуш бүтүп,мен толук маалыматты бердим,акчаны колуна тапшырдым.Өткөн товарларды,дагы кандай кийимдерди буюртма кылыш керек айтып чыктым.Мен чыгып келатканда:
---Албина,гүл жыттанып турасың,-деди Дастан байке.
--Коюңузчу,рахмат.Мага билинбей эле,-деп коюп сыртка чыктым Алдымда Жакып мени күтүп туруптур:
--Дастан байкеге жумуш жөнүндө маалымат бергени кирдим эле,-дедим актангансып.
---Күндө ушинтип маалымат бересиңби ?
--Ооба,акчаны тапшырам,кайсы товар жакшы өтүп жатат,аны билдирем,-дедим дудалактап.
--А бул гүл кайдан?
--Дастан байке..
--Дастан байке эмес,Дастан байке эми сага Дастан жезде,-деп катуу сүйлөдү Жакып.
---Не себеп болду сага гүл белек кылганга?
---Аны мен билбейм.
---Анда ,себебин билбей эле ар кимден гүл ала бересиңби?Мен эмне дешимди билбей жер карап туруп калдым.
--Алдыма түш.Унчукпай эшикке чыктым да машинасына олтурдум.Үйгө келгенче экөөбүз сүйлөшпөй келдик.Мен ары -бериден тамак жасай койдум:
--Тамак даяр,---деген сөзумө жооп да бербеди,чыкпады да.Күтүп олтуруп,өзүм да табитим тартпай бир аз жемиш болдум да уктоочу бөлмөгө кирдим.Уктап калыптыр Жакып.
Эртең менен эрте туруп үстөлгө чай даярдап турдум.Жакып бул жолу өзү эле туруп келип чайга олтурду, адатта өзүм барып ойготуп чайга чакырчумун.Унчукпай чай ичтик,унчукпай ишке жөнөдүк.Бир топко чейин барганда мен чыдабай кеттим:
--Эмне,бир гүлдү деп канчага чейин сүйлөшпөй жүрөбүз?
--А сен билип жатасыңбы ошол бир гүлдүн артында дагы эмне болуп кетерин?
--Эмне болмок эле?
--Кандай эмне болмок эле,деги сен бир нерсени түшүнүп жатасыңбы?Эркектер аялдарга жөндөн-жөн гүл бере бербейт!
--Берсе эмне болуптур, Дастан байке...
---Дастан байке дегениңди жыйыштыр,ал деген сага жезде.Болгондо да кайын эжеңдин жолдошу.Ал гүлдү сага эмес эжеме бериш керек.
---Мен да ошону айттым,бирок..
--Экинчи ашыкча кыймылыңды байкабайын, уктуңбу,-деп үнүн өктөм чыгарып сүйлөдү Жакып.Анын аябай ачуусу келип турганын биринчи көрүшүм:
---Макул,-дедим акырын.
Ошентип олтуруп жумушка да жетип калыптырбыз.Сыртта Дастан байке туруптур.
--Тигил эмне,сени күтүп турабы?
--Ал эмне дегениңиз?-дегенче машина токтоду.
Дастан байке бери көздөп басканда,Жакып ага карабай эле машинасын катуу айдап жүрүп кетти.
--Эмне болгон Жакыпка?
--Кечиресиз,жумушка шашып атты эле,сизди байкабай калды болуш керек.
---Чындап эле ошондойбу? Ашыкча кеп жокпу?
--Бар,сиздин гүл жөнүндө кеп бар.Эмне сага гүл берет деп мага да сизге да таарынып жатат?
---Ошол,машинаны басып кеткенине караганда бир мандем бар деп ойлогом.Кайран шумкар,эки гүлдү сооруп жатып үйрөнүп калдыда.
--Ал эмне дегениңиз?
--Ал ошол дегеним,Албина.Сен эртеңкиңди ойлобой жатасың!
--А эртеңким эмне болот экен, бизде баары жакшы.
--Бугун жакшы, эртең Самира жакшылап өзүнө келип алса, ошолор сени батырат дейсиңби?
--Эмнеге батырбайт,биз Самира эже экөөбүз аябай жакшыбыз.
--Көрөм жакшылыгың канчага чейин узарат экен.Алды -артыңды жакшылап карап,ойлонуп жаша,Албина!-деп коюп кабинетине кирип кетти.
Мен дендароо болуп эле туруп калдым.Күтүлбөгөн ойлор баса түштү заматта.Чын элеби?Чындап эле Самира менен Жакып башка нерсени пландап жатышабы?Дастан байке бир нерсени билбесе бул сөздөрдү айтпаса керек?Башымды кармап олтуруп калдым:
--Ким бааар,-деп кардар келип кыйкырганда өзүмө келип ордумдан турдум.
--Келиниз.
---Келдик, чоң кыз.Тааныш курбумдун айтуусу менен келдим,жакшы көйнөктөр бар экен.
---Ооба,жакшы көйнөктөр бар.
---Мага 48-размердеги ,жаңы модадагы көйнөктөр болсо.
--Ии,бар эже.Мындай басалы,-деп ээрчитип жөнөдүм.
--Мына,сиз каалаган размер,сиз каалаган фасондогу,сиз каалаган түстөгү көйнөктөр.
--Ммм,ооба,жакшы көйнөктөр бар экен.Биринен -бири кооз көрүнүп, көздүн жоосун алатко.
--Ооба,сапаты жогорку көйнөктөр келет.Каалаганыңызды тандаңыз.
Кардар жай баракат ар бирин кылдаттык менен карап чыкты:
---Мага мобурекини бериңизчи,-деп сары-ак гүлдүү көйнөктү көрсөттү.
--Макул,тигил жерге барып кийип көрүңүз.Кийип чыкты:
-- Аииий,тим эле сонун жарашып калды,
--Чын элеби?
--Ой чын эле,сизди аябай ачып койду.Чындап эле өзү кара тору кыз экен, сары көйнөк аябай эле сонун жарашып калды.
Акчасын алдым да,ороп кол баштыкчага салып узаттым.
--Келип туруңуз.
---Албетте келип турам,жакшы калыңыз.
--Жакшы, барыңыз,-деп узатып койдум.Ошентип ал күнү да дүкөндөн адам үзүлгөн жок,соода аябай жакшы болду.Жумуштан кайтаар убакыт жакындап калганда мен акчаларды эсептеп,кийимдердин маалыматын берип чыгып келаткам
---Албина,сага жакшылык эле тилейм.Жакшылап ойлонуп көр,-деди дагы Дастан байке.
---Эмнени ойлонушум керек,сизге түшүнбөй калдым.
---Башыңа келгенде баарын түшүнөсүң.
--Аны ошол убакта көрө жатарбыз, бүгүн жумушум бар эле эртерээк кетсем болобу?
---Макул, эртең менен кечикпе,күтөм.
--Жакшы калыңыз, рахмат,-деп сыртка чыктым.Негедир аба жетишпей жаткандай болдум.Менин артымдан эле Дастан байке чыгып кетти,мен Жакыпты күтүп турам.Бир аз кечирээк келди.
Маанайым суз экенин байкаган Жакып:
--Эмне болду,-деп сурады.
--Башым ооруп турат.
--Дары ичтиңби?
--Кайдагы дары,жумуштан кол бошободу.
Жол боюндагы дарыкананы көрө койду да,машинаны токтотуп кирип кетти.Бат эле кайтып келип ,колума анальгин дарысын карматты:
--Ме,мону ичип ал,- деп машинасында бөтөлкөдө суу бар экен кошо берди.
Чындап эле башым кызыкча болуп турган,бирөөнү ичип алдым.
---Анда бүгүн сенин башыңдын оорусун жакшылап жазалы,сейил бакка барып айланалы,кандай дейсиң?
--Кандай демек элем,албетте макулмун.Экөөбүз сейилге чыкпаганыбызга да көп болуп калыптыр.
--Ооба,айланалы,балмуздак жейли.
--Сонун,-деп мен жаш баладай сүйүнүп алдым.Сейил бакта көпкө айландык,андагы эки-экиден ээрчишип жүргөн кыз-жигиттерди көрүп суктанып бара жаттым.Өзүмдүн ушинтип ээрчишип жүрбөгөнүмө,эрте эле Жакыптын торуна илинип калганыма ичимден өкүнүп да бараттым.Анан дагы,"бул кыздардын абийири таза болсо экен,мага окшоп ылайым эле жаңылбаса экен"деген да ойлор чубап өтүп баратты.Бактагы гүлдөрдү көргөндө көңүлүң да ачыла түшөт экен,баратып эле кооз гүлдү көрсөм жыттап коём.Жолдо баратып тамактанып да алдык.
--Баш жакшы болуп калдыбы?
-- Жакшы,рахмат.Бүгүн аябай көңүлүмдү көтөрдүңүз. Ошентип үйгө да жеттик,көчөдөн чай ичип алганга үйдөн тамак кылбадым.Эртең менен уйкудан тураар мезгилде жаман түш көрүп калыпмын."Алыстан апам (кайненем )аппак кийинип алган,апамды көздөй эле атам (кайнатам) келатат.Мен алар жакты көздөй чуркап жөнөдүм,мен жеткенче эле атам келип апамды колдон алды да караңгы жакка кирип кетишти.Мен "апалап "кыйкырып ыйлап жибердим.
--Албина,сага эмне болду?-деп Жакып мени болкулдатып ойготуп жатыптыр көзүмдү ачсам.
--Апам,апам кана?
--Кайдагы апа,сен үйдөсүң,Албина,-дегенде өзүмө келе түшүп эки жагымды карадым.Жакыптан башка эч ким жок,тыптынч.
--Айылга баралы,апамдан,балдардан кабар алалычы,-дедим түшүмдү эстеп.
--Эмне,жаман түш көрдүңбү?
--Ошондойроок,апамды атам алып кетти.
--Түшкө бир нерселер кире беретта,Албина.Чындыкка жооруба түштү.
---Жок,айылга баралы, жүрөгүм бир нерсеге кыжалат болуп турат.
---Анда жумушка барып жооп сурайлы,себепсиз кете албайбыз го.
--Ошентели.
Экөөбүз шашыла жумушка жөнөдүк,алгач менин жумушумдан жооп сурайлы деп барсак Дастан байке келе элек экен.
--Сен келгенин күтүп жооп сурап тур,-деп Жакып мени таштап өзүнүн жумушуна жооп сураганы кетти.Мен макул болуп Дастан байкени күттүм,бир аз убакыт өтүп келип калды.Ага да болгон окуяны айтып берсем:
--Бул деген түш турбайбы,ошого ушунча тополоң салып алдынарбы?-деди макул болбогондой.
--Менин жүрөгүм башкача болуп турат,барбасам болбойт,балдарымдан да кыжалат болуп турам,-дедим.
--Соода эмне болот.?
--Ай,Дастан байке,азыр мага соодадан да үйдөгүлөр тынчсыздандырып жатат,апам,балдарым.Сиз мени түшүнүп коюңузчу.
---Мени ким түшүнөт,Албина.Сени көрбөсөм тура албай калдым.Сен качан мени түшүнөсүң?Селт эте түштүм:
--Акыл -эсиңиз жайындабы?Бул эмне дегениңиз,мен деген бир тууган кайниңиздин аялымын.
--Жок,сен анын токолусуң!
--Сиз,сиз...
--Эмне мен чындыкты айтканым үчүн сага жек көрүндү болуп жатамбы?
Алыстан Жакыптын машинасы көрүндү,мен өзүмдү токтоттум да:
--Саламатта калыңыз,-деп чыгып кеттим.
--Сени күтөм,Албина.Кайра жумушка кайт,-деди мени узатып.Дастан байкени жек көрүп бараттым,ушул жумушуна келгим да келбей кетти.
---Жакшы элеби баары,-деп Жакып бир нерсени сезгендей.
--Баары сонун.
--Өңүң башкача.
--Жооок,кечиндеги түшкө бир аз кыжалат болдум окшойт, батыраак эле үйгө баралы.
--Макул,анда кеттик.Машина зуулдап баратат,адатта айылга үйгө баратканда көлдүн көркөмүнө суктанып ,көз албай барчумун.Ар кандай кыялдарга батчумун,бул сапар ойлор менен чырмалышып баратам.
--Дастан байке эмне болуп баратат?Эмнеге мага мындай мамиле жасап жатат?Бул кишини мен өз бир тууганымдай эле кабыл албадым беле?Азырчы,азыр неге мен жөнүндө кайгырып,мен жөнүндө башкача ойлорго жетеленип баратат???
---Эмне ойлонуп калдың,карачы көлдүн мелтиреп жатканын.Бир жээгине барып эс алып кетелиби?
--Жок,батыраак эле үйгө баралы.Мен кыжалат болуп турам.Жолдо Жакып менин көңүлүмдү көтөрөм деп ырдап да коёт,мен аны коштоп кол чаап коём.Ошентип үйгө да жеттик.Бизди көргөндө эле Самира эже:
---Ай,ушул силерди кудайым өзү жеткирди.Эмне кыларыбызды,силерге кантип жетерибизди да билбей турдук эле .Апам бир аз сыркоолоп калды,түндө жакшы эле жаткан болчу.
---Ушундай болуп жатканын жүрөгүм сезген,түштү бекер көрбөдүм дедим,-деп эле өзүмчө сүйлөнүп кирдим.
---Болду эми ,Албина.Баарын чоочутуп жатасың, азыраак сүйлө,-деди Жакып, өзүмдү басып үйгө кирдик.Апам тим эле сулуу болуп төшөктө жатат,сулуу кемпир экенин эми байкадым.
---Апаке,эмне эркелеп жатасыз?-деп кирип эле беттеринен өпкүлөп кирдим.
---Карактарым десе,келип калдыңарбы?
---Келдик апа,сизге эмне болду?-апасынын колунан өөп Жакып жанына отура кетти.
--Келиниңиз баралы деп болбой туруп албадыбы, жүрөгү сезген турбайбы сиздин эркелеп жатканыңызды,- деп мени карап көзүн кысып койду Жакып.
--Ошону айтсаң,ушу эркелебей эле эртерээк атаңардын жанына барсам жакшы болот эле.Силерди да кыйнагым келбейт.
---Апа,бул эмне дегениңиз,антпеңизчи.Сиздин эркеликти канча болсо да көтөрөбүз,-деп апамдын жанына келип ыйлап жиберди баятан бери мөлтүрөп карап турган Самира.
---Сиз кетсеңиз биз эмне кылабыз,Асан менен Батма да сизди сагынып калбайбы.Бакчадан келери менен сизди издешет.
---Ошону айтсаңыз,апа.Биз сизди али -бери эч жакка кетирбейбиз,атакеме айтыңыз сизге "бейиштен"орун алып күтүп тура берсин,-дедим мен да таңкы түшүмдү эстеп.
---Айланып кетейиндерим,мен да силерди таштап кетким келип турат дейсиңерби?Асан менен Батмамдын тойлоруна жетсем деген тилегим бар,эми аны ким билет.Суубуз түгөнсө баарыбыз бир күнү бараар жерибиз эки метр жер эмеспи.Баарыбыз бир аз тынымга унчукпай калдык.
--Апа,догдурга алып барайынбы?Кайсыл жериңиз ооруп турат,?-деди Жакып.
--Билбейм балам,алым эле куруп ,тамакка да табитим тартпай турат.Карылык да,балам.Догдуруңду кой,үйдө эле болуп турайын.
--Олдо карыларым ай,догдур десе коркуп турасыңар.Ал жерде өз убагында карап,ооруган жерди текшерип,сизге шыпаа берет эмеспи,-деди Жакып апасын көндүрмөккө.
--Жок,балам, догдур -могдуруңду кой.Силерди төрөгөндө эле догдуруна жатпасам,деги эле жаткан эмесмин.Барбайм,убара болбогула.Апасынын барбасына көзү жеткен Жакып:
---Анда ысык-ысык кайнатмадан ичип,тердеп,өзүңүдү абайлаңыз,ээ апа.
--Ооба балам,ошентем.Силердин келгениңер да мага күч -кубат берет балам.
-- Апа,догдурга бир барып келсеңиз болот эле.Кыйналып турасызго,кечээтен бери ушул акыбал.Жок дегендей башын чайкап,тескери карап жатып алды апам.
--- Анда силер жылуу-жумшак тамак кыла салгыла,мен барып балдарды алып келе калайын,сагынып кеттим,-деп Жакып балдарга кетти.Бизден мурун эле Датка эже тамакка уруна баштады.Баса Датка эже апамдын инисинин кызы болот экен.Ата -энесинен эрте ажырап апамдын колуңда жүрүп турмушка узатыптыр.Жолдошу аябай көк муштум чыгып,күн көрсөтпөй ара күндө таяк жеп жүрүп үч баласы боюнан түшүптүр.Көлдөгөн көз жашын көргөн Жылдыз эже ал жерге койбой алып келе берген экен.Апамдын жанында жүр,бешенең ачылса дагы турмушка чыгаарсың десе,Датка эже аны каалабайт экен.Эже келе бергенден көп өтпөй жолдошу да каза болуп калыптыр.Эженин тарыхы ушундай.
Биз ошентип олтурганда Жылдыз эже да Айжан экөө келип калышты.Дастан байке биздин келгенибизди айткан экен,эже олтура албадым дейт.Жакып да балдарды алып келип калды,опур -топур болуп чай ичтик.Апам эжем келгенге да эркелей түштү көрүнөт, көзүнө жаш алып,неберелерин өпкүлөп эле жатты.
---Бүгүн кетпей эле койгулачы,силер менен чогуу болгум келип турат,-деди апам күн батып баратканда.
---Апа,мен барбасам болбойт.Эртең саат 8:00 дө жыйналышым бар,барбасам сөз угуп калам,-деди Жылдыз эже дароо эле.
--Биз калабыз ээ,-деп Жакыпты карадым.
--Жумушчу?
--А мен жумушка баргым келбей турат,апамдын,балдарымдын жанында кичине турайынчы.-дедим чындап кетким келбей.Балдарым да бөжөңдөп апалап жанымдан чыкпайт.
--Макул анда,мен таң саардан чыксам жетишем.Бүгүн бир апам менен кучакташып,эркелеп жанында жатайынчы,ээ апа?
---Садагаң болоюн,ошентчи,-деп апам да мулжуңдап жаш балача сүйүнүп койду.Ошентип Жылдыз эжелер кетишти.
Биз апам менен кобурашып,балдардын кылык-жоругуна күлүп олтуруп саат бир убак болуп калыптыр.Айткандай эле Жакып апамдын жанына жатты,мен балдарым менен алардын бөлмөсүндө жаттык.
Эртең менен эрте кетмекчи болгон Жакып апасы менен коштошоюн деп бетинен өпмөкчү болсо,денеси муздак экен.
--Апа,мен кетип жатам,-деп акырын ойготсо ,унчукпайт.--Апаке,ойгонуңуз.Үн жок...
---Апа,сизге эмне болду,-деп Жакыптын кыйкырган үнүнөн биз баарыбыз ойгонуп жүгүрүп чыктык.
---Эмне болду?
---Апам,апамдын баары муздак,карагылачы.Самира жүгүрүп келип эле колун кармады
--+Апакеее ,-апам бизди таштап кетиптир,-деп үстүнө жата калып ыйлап кирди.Баарыбыз үй менен бир тополоң салып,ызы-чуу башталды.Ызы-чууну угуп коңшу-колоңдор чыгышты.
Күтпөгөн жерден апамды да узаттык,алыс-жакынга,тууган -урукка кабар берип,эртеси апамды да зыйнатын кылып узаттык.Үй аңгырап эле бош калгансып, бири -бирибиз менен сүйлөшүп отурганга табитибиз тартпайт.Бир күн мурун билгендей келип,апамдын көзүн көрүп калганыбызга ичимден кубансам,бизди таштап кеткенине өкүнүп турдум.
---Эми кандай жашоо болот?Апама эрмек болсун деп балдарды таштабадык беле?Эми балдарды алып кетишке туура келет.
Дагы эмнелер алдыда күтүп турат болду экен?Дастан байке бир нерсеге көзү жетпесе сүйлөбөсө керек?
Балдар мени менен кичине эле аралашпаса көпчүлүк учурун Самира эже менен өткөрүп жатышты,ичим ачыша түшөт.
--Мейли,ушул жерде чогуу жүрүп көнүп калышкан эмеспи.Акырындап бизге да үйрөнөт болуш керек,-деп өзүмдү алаксытып коём.Бир жума ушул жерде болдук,анан шаарга жөнөдүк.Жылдыз эже дагы бир аз турмай болду.Мен болсо жумушка баргым келбей турат,Жакыпка не деп айтышымды да билбейм.
Башка жумуш тапканча иштеп турайын,анан ошол жакка кетип калам.Бирок бул жерден эмне чыгып жатасың десе эмне дейм?Жылдыз эже да капа болотко,эмне кылам?Антпесем,Дастан байке күндөн -күнгө өзгөрүп баратат,дагы бир нерсеге жолугуп калсамчы?Дагы бетиме көө сыйпалып калсачы?Эгер чындыкты айтсам менин да,Дастан байкенин да үй-бүлөсүнө сууктук түшөт.Эмне кылуу керек?Эки бир туугандын ортосу бөлүнөт!Башым катты...
Дастан байке да айылда үч күн турду,анан келе берген.Мен бир жумада келдим.Дүкөн ачык,Дастан байке ары жакта товарларды айланып жүрүптүр.
--Келдиңби?
---Келдик,саламатсызбы?
--Келбей коёбу деп аткам,мага таарынбадыңбы?
--Таарынычым бар,бирок мага экинчи андай ашыкча сөздөрдү айтпаңызчы,сураныч?
--Кантип айтпай коём, Албина.Өзүң да ойлонуп көрбөйсүңбү,"Эки кочкордун башы бир казанда кайнабайт"деген сөздү билесиңби,кантип Самира экөөңөр бир үйдө,бир эркек менен жашай аласыңар.Кантип?Самира мына сопсонун болуп калды,эми өз жолдошу үчүн,өз жашоосу үчүн күрөшпөйт деп ким кепилдик бере алат.Анын да адамдар сыяктуу жашоого,бактылуу болууга акысы бар.Сен ошону ойлоп жатасыңбы?Ал сага тынч жашоо берет деп ойлоп жатасыңбы?
---Сиз буларды ойлоп эмне кыласыз,бул менин жашоом,менин көйгөйүм.
--Ошол сенин жашооңо дагы көйгөй түшүшүнө менин көзүм жетип турат,Албина.Балдарыңды да алдырып коёсуңбу деп турам,өзүң да сезсең керек балдар Самирага көбүрөөк мээрим берип калышкан.
Сен жүрөсүң шаарда,Жакып менен күн өткөргөнүңө кубанып.Бул жашооң качанга чейин уланышына көзүң жетип турат?Түбөлүгү жок экенине баамың жетпей жатабы,Албина!
--Мен,мен..
--Ооба,сен эч нерсени ойлобой жатасың!Албина,мен сени бактылуу кылам,мага да "ата"деген ыйык наамды тартууласаң .Мен сени дүйнөдөгү эң бактылуу аял кылмакмын.
Дагы эле айтышып Дастан байкеге тең келгим келбеди.
--Бул сөздөр Жылдыз эже менен Жакыпка жетпесин, Дастан байке.
--Жетсе жетсин,мага эми баары бир.
--Антпеңиз,Дастан байке,сураныч?
--Убакыт көрсөтөт, өзүң күбө болосуң!
---Ооба,убакыт көрсөтөт!
Мен сыртка чыгып кеттим,Дастан байке кабинетине кетти.Кардарлар келип,жумуш башталды.
Мен эч кимге билдирбей башка жактан жумуш издей баштадым.Айылга барып келип,апамдын бир айттыгын өткөрдүк.
---Эми балдарды өзүбүзгө алалы,Самира эжеге да кыйын болуп калат,-дедим Айттан кийин Жакыпка.
--Самира кантет,ошолор менен эрмектешип жашап жатпайбы?
--А бизчи,биз эмне экөөбүз ушинтип жашай беребизби?
--Баарын түшүнүп турам,Албина.Азыр Самирага балдарды алып кетели десек,кандай абалда калышын элестетип жатам.
--Сиз айта албасаңыз мен айтам,балдарымды эми өзүм карайм,-деп бир айбаттанып алдым,бирок Самира эжеге айтууга канчалык дитим барат билбейм.Кеч кайтабыз деп атканда Самира эже үйдө экен,акырын жанына бардым:
--Самира эже,сиз менен сүйлөшөйүн дегем.
--Ии,кулагым сенде.
---Макул десеңиз,капа болбосоңуз биз балдарды алып кетсек.
---Ооба,Албина.Ушул сөз бир күнү козголушу керек экенин күтүп жүргөм.Биринчиден,мен кетишим керек,ал шаардагы үйгө менин канчалаган ак эмгегим кеткен,жаштыгым өттү ошол үйдө.Экинчиден,балдарың макул болуп сага ээрчисе мен каршылыгым жок.
Жооп бере албай дудалактап калдым,чынында эле ал үйдө Самира эже жашаганын билчүмүнда.А балдарымдан деле мени ээрчип кетет деген үмүтүм күмөн болуп турган,себеби Самира эже менен көп жашап калышты.
--Балдар бакчадан келсин,силер менен калабы,же мени менен кетеби, көрөбүз.
Мына,кызыктын баары эми башталат окшойтко,тилимди тиштеп олтуруп калдым.Самира эже кийимдерин даярдап, кетүүгө даярдана баштады.
Жакып балдарды бакчадан алып келгени кеткен эле,балдар биринчи эле Самира эжени көздөй чуркап келишти.
--Апа,сизди сагынып кеттик.
--А менчи,-дегенде :--Сизди дагы сагындык ,-деп Батма жүгүрүп келди,а Асан келбеди.
--Сен сагынбадыңбы?
--Жок,-деп Самираны кучактап туруп алды.Кызыкча боло түштүм.
--Бул жерде эмне болуп жатат,-деди Жакып Самиранын кийимдерин даярдап жатканын көрүп.
--Эч нерсе деле болгон жок,болгону өз үйүмө кеткени даярданып жатам.Апамдын урматын кылып бул жерде жүрдүм,эми өз үйүмө барайын.
--Самира,эмне болуп жатасың?
--Эмне болуп жатыптырмын,мени эмне өмүр бою ушул үйдө өтүп кетет деп ойлодуңар беле.Мен да жумуш иштейин,мен да өз жашоомду улантайын.
--А балдарчы?
--Мына балдар,өз эркине койгула,кимди жүрөгү кааласа ошол жакта болсун.Силер менен калса силерге,мени кааласа мен багууга жол бергиле.Кана балдарым жакшы калгыла,мен силерге келип турам,-деп Самира эже ордунан турганда эле экөө ага жабышып,кыйкырып ыйлай баштады,аны ээрчип жөнөштү.Башымды кармап олтуруп калдым,ушул учурда балдарым эч сөзгө көнчү түрү жоктой.
--Ыйлабагыла,алтындарым,жаным балдарым,мына мен жаныңардамын.Силерди таштап эч жакка кете албаймго,силерсиз кантип жашайын,-деп Самира эже алардын көз жашын аарчып,бирин коюп бирин өпкүлөп жатты.Балдар бир аз басылды,бирок аябай ыйлаганынан энтигип турса да Самира эжени бучкактайт.Мен Жакыпты карадым,унчукпайт.
--Эмне экөөң тең унчукпай калдыңар,эмне мени өмур бою силердин оюңар менен жашайт деп ойлодуңар беле.Ооба,силерге көз каранды болуп жашадым,ал жашоомо албетте силер себепкер болдуңар.Баарына кайыл болдум,силерди кечирдим.Жакып,сага рахмат,мени кайрадан жашоого кайтардың,өз айыбыңды ошону менен жуудуң деп ойлойм.Ал үчүн чоң рахмат айтам.Жашоо уланып жаткан соң мен да өзүм үчүн жашоого уруксат бергиле,силер каалагандай жашагыла.Мен силердин ортоңордо эми тура албайм,болгону мени өз үйүмө,өз жашоомо койгула.Балдар мына,күчүңөр жетсе алып калгыла,-деп жөнөп калды.Балдар бутуна жабышып бучкактап ыйлап жатты.
Алып кет,менин жүрөгүм чыдабайт балдардын ыйына,-деди Жакып.
--Жооок,менчи!Мен балдарымсыз кантем,балдар меники.Асан,Батма,мен силердин апаңармын.Мага келгилечи.Балдар карагысы да келген жок,Самира эжени кучактап сыртка чыгарбайт.
--Макул,барып көрүп турсам болобу?-дедим көз жашымды токтото албай.
---Албетте,ага каршы эмесмин.Балдардын көңүлүн тапсаң болду.
--Табам буйруса,балдарымды өзүмө алам.Азыр макул,жакшы баргыла чырактарым,-деп эки баламды беттеринен араң өөп-жыттап ,ыйлаган боюнча калып калдым.
--Балким үйдүн ачкычын берээрсиңер,-деди Самира эже чыгып баратып.
--Ии,мына,-деп бере салдым чөнтөгүмдө турган ачкычты.
---Баса,мени менен Датка да кетип жатат.Бул жерде өзү жалгыз кыйналатко,ал да бизге көнө түштү.
--Ии,мен да баратам,бул жерде жалгыз...дегенде эле Жакып:
--Баарын сүйлөшүп бүткөн турбайсыңарбы,кеткиле,-деди катуу үн менен.
--Саламатта калгыла.Унчукпадык,Датка,балдар Самира эжени ээрчип чыгып кетишти.
Экөөбүз бири-бирибизди тиктеп отуруп калдык,үй аңырайып эле бош калды.
---Эми эмне болот,мен балдарым жок кантип жашайм?-деп ыйлап кирдим кайра эсиме келе калып.
---Болду,сен ыйласаң эле балдар кайра кайтып келет дейсиңби?
--Ошону айтсаңыз,"тапкан бала эмес,баккан бала"деген чын турбайбы!Мен түк мындай болот деп ойлогон эмес элем,заматта өзгөрүүлөр болуп кеткени эмнеси,-дейм шолоктоп.Жакып акырын келип башымдан сылап, экөөбүз тиктешип олтуруп эле калдык.
--Мейли,балдар баары бир биздики.Эртен менен эрте туруп биз да жолго чыгалы,Жылдыз эжеме барып учурап,бардык нерсени чечебиз,-деди Жакып.-Үй маселесин да карайбыз,балким ижарага үй табарбыз.
--Ии,ошентеличи,балдарга жакын жерден табалычы.
--Аны көрө жатарбыз.
Ошентип, таңга жуук жолго чыктык.Жакып мени туура эле ишканага таштап, өзү Жылдыз эже менен сүйлөшүү үчүн кетти.Дүкөн да ачыла элек экен,мен ачып,бир топ соода кылгандан кийин келди Дастан байке.
--Саламатсызбы?
--Саламатчылык.
--Ии,ишенген Самира эжең үйсүз калтырдыбы?Жакып менен сүйлоштүк,азырынча ал Самиранын жанында,сен биздикинде турмай болдуңар.Башка айлаңар да жок.Мына,сенин жашооңдогу өзгөрүү эми дагы башталат.Мен айткандар акырындап башталып жатат.
--А буга сиздин табаңыз канып жатат?
--Ой,жок Албина,табам канган жок.Болгону сага эскертип коеюн деп жатам.
---Жакып кечинде келбейт экен,сен биздин үйгө мени менен кетесиң.
--Ошондой чечим болдубу?
--Бул менин чечимим эмес,кайын эжең менен сүйүктүү түгөйүңдүн чечими.Мен үндөбөдүм,жумуш башталды.Бүгүн негедир кардарлар аз.Убакыттын өтүшү мага аябай узак сезилип кетти,же бир кардар келсе ,алаксысам деп улам эле эшикти карайм.Дастан байке да негедир бүгүн кечке кабинетинен чыкпады.Жумуш убактысы бүткөндө акырын чыгып :
--Кеттикпи?-деди.Макул дегендей башымды ийкеп мен артынан жөнөдүм.Экөөбүз үнсүз жүрүп үйүнө жеттик.
--Ой, келдиңерби,силерди ак эткенден так этип күтүп жаттым эле.
--Тынччылыкпы деги.
---Айжанды ала качып кетиптир.
--Эмне дейт,кайда?
--Түштүккө,Токтогулга.
--Ушунча алыска алып кетиптирби,деги эле өзү сүйлөшүп көргөн бекен?
---Мага бир учун чыгарган эле,койчу ай алыс экен.Жакын жердин балдары менен эле сүйлөшпөйсүңбү?-деп койгом.Ошол боюнча унчукпай эле калган.Көрсө ичтен бышырган тура,-деп ары-бери басат Жылдыз эже.
---Токтогулдан болсо менин жериме барган тура,кайсы айыл экен?
--Шопоков дегендей болду.
--Ой,менин айылым тура.
---Муну кара,деги эле сен таап бербедиңби , ыя?-деди Жылдыз эже ичи ачышып турса да тамашага салып.
--Ой,жооок,өзүм туулган айылым көздөн учуп араң жүргөндө...
---Макул,макул,тамашаладым.Эми эмне кылабыз,атасы?
Эмне кылмак элеңер,кызың өзү сүйлөшүп кеткен болсо,анын багына балта чапмак белек.Кыздын узатуу салты кандай болсо,ошондой жол -жобосун кылгыла.
--Ай,макул Дастан.сенин ыраазы болгонуңа ырахмат,эмне дейт экен деп бушайман болуп жаткан элем.
--Эмне ,кызыңдын жашы да бир топ барып калды.Аны күйөөгө бербегенде,күйөө сатып алмак белек.Бактылуу болсун, Оомийин,-деп бата кылганда,биз да кошо алакан жая бата кылдык.
--Эртен ,Албина экөөңөр барып тек-түгүн билип, кызың өз каалоосу менен кеттиби сурап кел.Эгер эле зордуктап ала качкан болсо,мен алар менен башкача сүйлөшөм,-деди Дастан байке.
--Макул.
--А менин жумушумчу?-дедим мен.Анан мен кантип барам?
--Жумушуңду өзүм карап турам.Неге бара албайсың,ага жылдар өттү,канча кар жаады,канча издер басылды.
---Мага дарегин таштап кетишти,кабарга келгендер,-деди Жылдыз эже.
Уландысы бар.
Голоева Санавархан Айтбаевна.
Ноокен району.
Шалка айылы
√13 Рахманжан атындагы орто мектебинин мугалими.
Присоединяйтесь к ОК, чтобы подписаться на группу и комментировать публикации.
Комментарии 6