Ҳаётий ҳикоя.
-- Туққанингизда опангиз келмади-я?Тавба қовурдоқ билан ҳам келмади-я?
Қўшнисининг гаплари юрагига тегса ҳам туғишган опасига гап теккизгиси келмади келинчак.
--Опамнинг қайнонаси оғир бетоб, ташлаб чиқолмайдилар. Аммо сарполар билан хат бериб юборибдилар,- деди Матлуба.
--Шундайку-я, аммо туққанда йўқламасанг, ўлганда йўқлама деган гаплар бор жигарсизлар-ку?!
Бу гаплар таъсирсиз қолмади. Матлуба энди чинданам опасидан хафа бўла бошлади.
"Бир пасга келиб кетиш мумкинку, битта шаҳарда туриб бир соат вақтини синглисига ажратмасликни кечириш мумкинми?"
Кўнглига шу гина ўрнашиб олган Матлубанинг кўзига ҳеч нарса кўринмай қолди. Аразлади, тамом! Бу орада опасининг қайнонаси оғир касалдан вафот этди. Фидойи опаси келинлик бурчини аъло даражада уддалади. Қайнонасининг дуосини олиб қолди.То маъракалар ўтгунча йил ўтиб кетди. Ҳар сафар тўмсайиб олган, у билан аввалгидек гаплашмай қўйган синглисининг олдида ўзини айбдордек ҳис қилаётган опасини кўрган сингилнинг худбинлиги ошиб борарди.
Бу орада Матлуба яна ҳомиладор бўлди. Дарди бошланган заҳоти опаси етиб келди. Дард билан олишаётган синглисининг дам пешонасини артади, дам елкасини силайди.
--Чуқур нафас олгин, --дейди-ю ўзи ҳам қўшилиб чуқур нафас олади. Дам новвот чой тайёрлайди, дам ёнғоқ едирмоқчи бўлади. Дард аччиғидаги Матлуба силтаб ташласа, кўзига мўлтираб қарайди.
Врачлар опасини палатадан чиқариб юборди.
Дард билан олишаётган Матлуба боя билмаган экан, энди жони минг чандон қийнала бошлади.
Оҳ-воҳ чекиб уёқдан буёққа юра бошлади. Бир пайт суянгани дераза олдига бориб қолди.
Бечора опаси икки кўзи тўла ёш, жавдираб деразага тикилиб турарди. У деразани очди
--Ман шу ердаман, хавотир олма, ҳеч қаёққа кетмайман,--деди опаси бечора.
Матлуба дард билан олишаётган бўлсада гапира олди
--Яхшиям онам сизни туққан опа, яхшиям борсиз, мани кечиринг...
Тамом.
Феруза Салходжаева.
Присоединяйтесь к ОК, чтобы подписаться на группу и комментировать публикации.
Комментарии 1