Предыдущая публикация
Одамлар орасида шундай кимсалар ҳам борки, улар билимсизлик билан (ўзгаларни) Аллоҳнинг йўлидан оздириш учун ва у (йўлни) масхара қилиш учун беҳуда сўз(лар)ни сотиб олур.
Ана ўшалар учун хор қилгувчи азоб бордир”
(Луқмон, 6).
Улар ҳикмат тўла Қуръонни Аллоҳ таолонинг пурҳикмат сўзларини қабул қилмасдан, уларга бадалсиз тақдим этилаётган икки дунё саодатига элтувчи илоҳий дастурга бўйсунмасдан, қандайдир беҳуда сўзларни кўтариб юрадилар. Ҳа, ўша беҳуда сўзлар эгаси бўлиш учун молу-мулкни, ҳаётни ва зеҳн-заковатни ҳамда бутун имкониятларини сарфлайдилар.
05:16
Бизнинг давримизда ҳам Қуръонни эшитишдан, тиловат қилиш ҳамда амал қилишдан чалғитиш мақсадида, ҳар хил хурофотлар ўйлаб топиб, одамларни дунёга келишидан бўлган мақсаддан узоқлаштиришмоқда. Телевидение, ижтимоий тармоқлар ва турли алоқа воситалар орқали намойиш қилинаётган фаҳш-бузуқликдан
иборат кино ва телесериаллар, бемаъни кулгили инсонни вақтини ўғирлайдиган бефойда кўрсатувларнинг барчаси инсонларнинг қалбини ўлдиради ва Аллоҳнинг каломини тинглашга тўсқинлик қилади. Буларнинг таъсири ер юзидаги кўплаб мусулмон хонадонларигача кириб борди ва фарзандларини тинчлантириш учун телефон билан овутадиган бўлишди.
Буни яхши билган дин душманлари мусулмонларнинг фарзандларини заҳарлаш мақсадида ақлини буткул бузиб юборадиган мультфильмлар ўйлаб топиб уларни ижтимоий
тармоқлар орқали мусулмонларнинг уйларигача олиб киришга эришишди. Натижада ота-оналар фарзандларини Қуръонга бўлган муҳаббати ва илм олишга бўлган рағбати йўқлигидан шикоят қилиб, қандай йўл тутишларини билолмасдан бошлари қотмоқда.
Концерт заллари одамлар билан лиммо-лим бўлиб тўлиб кетиши, эркак ва аёлларнинг аралашуви, машаққат билан топган пулларини сарфлаб чипта сотиб олиб қатнашишлари буларнинг ҳаммаси гуноҳга сабаб бўлади. Қолаверса, энг қимматбаҳо ва асло ортга қайтмас вақтларини қўлдан бой бериб, шайтоннинг найрангига алданишади.
Энг ачинарлиси концерт залларида ёшлари катта ҳожи оналар бошларига оппоқ рўмолларни ўраб олиб қарсак чалиб олқишлашлари ва шайтонни азони бўлган мусиқани куйлаб ҳаммани қалбини ўлишига сабабчи бўлган хонандаларни ҳаққига Аллоҳ рози бўлсин болам деб, дуо қилиб ўтиришларидир. Бундай ҳолатларнинг сабаби инсон динидан йироқлашиб кетганидан дарак беради. Уларнинг қалби ва қулоқларига қандай қилиб Қуръон оятлари кириб борсин. Бутун вужуди ва қалбларини мусиқа эгаллаб олган бўлса ва хаёлларида кейинги сонини чиқиши кутилаётган сериаллар бўлса?
Следующая публикация
Нет комментариев