Чарчадим... Бир кунга дам беринг менга.
Тинч қўйинг, сўзламанг, қилмангиз гина.
Ҳеч қандай масъулият ҳис қилмай яшай.
Фақат бир кунгина, бир кунгагина.
Неваранинг мактабини ўйламай.
Истаган вақтимда уйқудан турай.
Чолим дориларин назорат қилмай.
Нонуштасига ҳам бепарво бўлай.
Неваралар сочин тараб, ўрмайман.
Келин тургунича қилмайман тайёр.
Каттасини уйғотмайман, дамдаман.
Бугун бўлса ҳамки дарслари бисёр.
Ким нима еяпти, нима ичяпти.
Менгамас, бугун мен таътилга чиқдим.
Ҳаво булутлими, ёки қуёшли.
Менга нима, шунга юрагим сиқдим?
Қаерларда уруш, қаерда тошқин
Ээээ. Бугун менинг жуда парвойим палак.
Дунёни сув олса тўпиққа чиқмас.
Гир- гир айланмайдими осмони фалак.
Сериал кўрмайман, юракни сиқар.
Телефонни ўчириб, қўяман нари.
Бир кун телеграммсиз яшаб кўрайчи.
Яшаганку инсонлар шундай илгари.
Каналимга бир кун кирмай кўраман.
Ким чиқиб кетдию, ким бўлди аъзо?.
Бошқа шоир топса ўтиб кетишар.
Обуначиларда асли йўқ вафо.
Жигарларимдан ҳам хабар олмайман.
Қизларим ўтиргандир тушган жойда жим.
Ўғлимнинг ишларин ўйлаб ўтирмам.
Чунки ҳеч ким билан бугун йўқ ишим.
Тонг отди. Бомдодни вақтида ўқиб.
Ўраниб ётволдим- таътил бошланди.
Дарвоза эрта тонг очилмадия!
Тинчимаган кўнгил бироз ғашланди.
Чорак соат ўтди, невараларни.
Уйготиш керакку, "Ҳой, онанг қани?"
Тишни тишга қўйиб чидаб ётибман.
Чойи тайёрмикин, ул бул егани?
Чолим чиқиб бир- бир дориларини.
Кўрмоқда, қай бирин ичади олдин.
Ишқилиб адаштириб қўймасинларда.
Ахир жой- жойида ичиши лозим.
Дунёда нима гап? Урушми тинчлик?
Янгиликлар вақти ўтиб кетяпти
Мен эса ётибман ўраниб олиб.
Ичим эса аста ғимирлаяпти.
Кеча опамнинг қон босимлари.
Сал ошганди, ҳозир тушдимикана?
Кичкина қизимнинг бир ўғилчаси.
Йўталиб турувди, тузукмикина?
Чолим нонуштага қуймоқ севади.
Келиним ўхшатиб пиширдимикан?
Қизларининг узунгина сочларин.
Чиройли қилиб ўриб қўйдимикан?
Қўшнимни Ковид деб эшитган эдим.
Тузалиб қолдими, ахволи қалай?
Дам тугасин, чопқиллаб чиқиб.
Қадрдонларимдан хол- аҳвол сўрай.
Ярим соат ўтди, асаблар таранг.
Дам кетяпти, хаёл оламни кезар.
Шартта туриб чопиб кетсаммикина?
Шошма! Кўрай сабрим қанчага етар.
Телефоним бир қадам нари турибди.
Шундоқ қўлим чўзсам, етади бўйим.
Кўзимга оловдек кўриниб турар.
Ол! Олма! Ол! Олма! Буюрар кўнглим.
Саломлашмадим ҳам каналга кириб.
Дуолар қилмадим кўтариб билак.
Обуначиларим соғ- омонмикан?
Бугун янги шеърлар кутишса керак?
Бир соат ўтмоқда! Портладим! Бўлди!
Керак эмас менга дам ҳам, таътил ҳам!
Таним соғ, ақлим бут- шу етади, бас!
Югуриб юрганим катта бахт, билсам.
Кимгадир керакман, кимнинг ташвиши.
Бошимни оғритсин, беҳисоб шукр!
Ҳаётнинг қувончи, ташвишларини.
Ҳис қилиб яшашинг беради ҳузур!
Чолимга, невара, қўни- қўшнига.
Керакман, барчанинг ярай корига.
Кимгадир яхшилик қилсам- шудир дам.
Шукр қилай бундай имкон борига.
Кимдир зор бир бора қозон кавлашга.
Кимнингдир бир қадам юргиси келар.
Кимда йўқ невара, кимда йўқ уй- жой
Кимдир бемор, кимдир бой бўлгиси келар.
Менга дам берманглар! Мен чарчамайман!
Майли, сал дўмбоқман, лекин таним соғ.
Ҳаёт ғаниматдир, умр ўтмоқда.
Хайрли ишлар қилай! Куч бер ё Аллоҳ!
Присоединяйтесь к ОК, чтобы подписаться на группу и комментировать публикации.
Нет комментариев