Предыдущая публикация
МОЛИТВА О ДАРОВАНИИ ПРАВОСЛАВНАГО ЦАРЯ: Господи Боже наш, со умилением и воздыханием и с тугою сердечною приступихом к Тебе, и припадаем Ти, и в болезни духа вопием: согрешихом, беззаконовахом пред Тобою, дары Твоя - Церкве благолепие, плодов изобилие, воздухов благорастворение, земли благоплодие, ихже Святей Руси даровал еси царством самодержавным - в небрежении прияхом и благодарения подобна Тебе Владыце и Щедродателю нашему не воздахом, паче же отрекохомся владычества Твоего, аще чрез Помазанника Твоего и Царство Православное утвердил еси.
Возлюбихом земная паче небесных и временная паче вечных - и обою лишихомся. Возлюбихом волю свою, паче Твоея творити - и ею врагу Твоему поработихомся. Исповедуем же, яко истиною и судом навел еси вся сия на ны, грех ради наших. Помяни, Господи, и речения пророк Твоих новых, их же в Земли Русской прославил еси в последняя времена сия, яко даруеши людем Твоим на малое время последнее, паки оплот крепок и стену недвижиму - Царя Самодержавна, Помазанника Твоего благословеннаго. Сия же паки вемы, яко несть дар сей от человек, ниже многомятежному похотению их даруется, но могуществом Твоим, и волею, и благим промышлением Твоимъ устрояется. Темже и вопием к Тебе со слезами: воздвигни нам вожди духовные, мужи в силе Илии и Еноха, да воля Твоя от нихъ возвещаема непреложно да совершится, нашу же волю падшую и греховную отлагаем зде пред Тобою. И аще благоволиши милостиво призрети на ны, недостойные рабы Твоя, Самъ Владыко укажи нам избраннаго Твоего самодержца, помазаниемъ же Божественнымъ на служение Царское, всеми дарами духовными снабди его. Аминь.
Следующая публикация
Комментарии 3