Ҡурай

1 июндә Арт-квадратта "Мин башҡортса һөйләшәм" фестивале ойошторола. "Мин башҡортса һөйләшәм" - телебеҙҙе һаҡлауға һәм үҫтереүгә йүнәлтелгән Башҡорт теленең ғаилә фестивале. Фестиваль көндөҙгө сәғәт 12-лә балалар һәм уларҙың ата-әсәләре өсөн «Тел лабораторияһы» майҙансығынан башлана. Киске сәғәт 17:00 оло сәхнә фестивалдең төп майҙансығына әүерелә, унда башҡорт эстрадаһының бойондороҡһоҙ йәш артистарының концерты үткәрелә.6+

Башҡортостан Башлығы хакимиәте етәксеһенең беренсе урынбаҫары Азат Бадранов Китап байрамындағы "Изге подписка" хәйриә акцияһында ҡатнашты. Ул махсус хәрби операцияла ҡатнашҡан яугирҙәр ғаиләләренә төрлө баҫмалар яҙҙырҙы. - Яугирҙәребеҙ ғаиләләренә төрлө яҡлап ярҙам итергә кәрәк, шул иҫәптән рухи яҡтан да. Акцияны ихлас күңелдән күтәреп алдым,- тине ул. Китап байрамының һәр көнөндә лә гәзит-журналдарға яҙылырға мөмкин. Бының өсөн "Китап" нәшриәтенең стенды янына килергә кәрәк. Яҙылыусылар араһында киске сәғәт 6-ла приздар уйнатыла. Акцияла баҫмаларға ярты йылға йәки күберәккә яҙылғандар ҡатнаша ала.