................................
Sən ömrümün mənasısan
Bunu sənə necə deyim .....
Göllərimin sonasısan
Bunu sənə necə deyim
..................................
Bir buludam yağışı sən
Bir çəmənəm naxışı sən
Gözlərimin baxışı sən
Bunu sənə necə deyim
..................................
Mən zülmətəm ,sənsə işıq
Olmuşam mən sənə aşiq
Gəl ömrümə vur yaraşıq
Bunu sənə necə deyim
................................
Bir şairəm söz dünyamsan
Od alovsan,köz dünyamsan
Sən ki,mənim öz dünyamsan
Bunu sənə necə deyim
...............................
Bir bulağam gözü sənsən
Mən nəğməyəm sözü sənsən
Məhəbbətin özü sənsən
Bunu sənə necə deyim
.....................................
Sən könlümün şah əsəri
Həyatımın dərdi , səri
Demək olmur bu xəbəri
Bunu sənə necə deyim
.......................................
Mən qayayam, sən daşımsan
Mən üzüyəm sən qaşımsan
Yanağımda göz yaşımsan
Bunu sənə necə deyim
.................................
Sənsiz dünya mənə qara
Gəl dərdimə eylə çarə
Çox sevirəm , mən biçarə
Bunu sənə necə deyim
...................................
Ürəyimdə arzu , dilək
Mən dalğayam , sənsə külək
Bir hurisən , yoxsa mələk
Bunu sənə necə deyim
.................................
Daha bəsdir , yatma , oyan
Ayaq saxla , getmə, dayan
Qoy sevgimi edim bəyan
Bunu sənə necə deyim
................................ Yazar ... Polad Hüseyn
Присоединяйтесь к ОК, чтобы подписаться на группу и комментировать публикации.
Нет комментариев