Премьр-министр Сапар Исаков бүгүн, 13-октябрда кыргыз-казак чек арасындагы абал менен таанышуу максатында Ысык-Ата районундагы «Ак-Тилек» көзөмөл өткөрмө жайына барды. Өкмөт башчы ал жерде турган эл менен жолугушту. Ошондой эле, тиешелүү кызматкерлерден кырдаал тууралуу маалымат алды.
Чек ара кызматынын жетекчиси Уларбек Шаршеев «Ак-Тилек» өткөрмө бекетинен кыргыз тарап ар бир автоунааны 10 мүнөттөн, ал эми адамдарды 2 мүнөттөн текшерип өткөзүп жатканын маалымдады. Казак тарап бир машинени 40 мүнөт кээде бир жарым саатка чейин текшерип жатканын билдирди.
Андан соң Сапар Исаков «Ак жол» бекетине барды. Ал жерде 64 автоунаа 250 адам турганы белгилүү болду. Өткөрмө бекеттин кызматкери бүгүн, 13-октябрда 5 миң 830 адам жана 48 автоунаа өткөнүн билдирди. Анын ичинен 12 оор жүк ташуучу калганы жеңил автоунаалар. Ал эми буга чейин ушул эле бекеттен күнүнө 12 миңге чейин киши, 500дөн 800ге чейин унаалар өтүп турчу.
Эске сала кетсек, 11-октябрдан тартып кыргыз-казак тилкесинде элдин жана унаалардын өтүүсүнө тоскоолдук жаралып, кезек күткөндөр көбөйүп кеткен. Анда Казакстан чек араны жаап салганы тууралуу сөз чыккан. Бирок казак тарап чек ара ачык экенин жана Чек ара кызматы пландуу текшерүү иш-чараларын жүргүзүп жатканын маалымдаган.
11-октябрда Орусиянын Сочи шаарында КМШ жана ЕАЭБ жыйыны өтүп, анда Кыргызстандын премьер-министр Сапар Исаков Казакстан президенти Нурсултан Назарбаевге кыргыз-казак чек арасындагы абал боюнча маалымат берген. Кырдаалдан кабар алган Казакстан президенти чек арадагы көйгөйлөрдү жайгарууга тапшырма берээрин жана кыргыз элине дайыма жардам берүүгө даяр экенин билдирген. Бирок, 12-октябрда Казакстан өкмөтү билдирүү таратып, Нурсултан Назарбаев Сапар Исаков менен сүйлөшкөнүн жокко чыгарган. Буга карата Кыргыз өкмөтү дагы өз жообун жарыялаган.
Присоединяйтесь к ОК, чтобы подписаться на группу и комментировать публикации.
Комментарии 7