Предыдущая публикация
Yana shirin entikdim bugun
Sen yonimda bo'lganing kabi.
Yana yodga tushdi o'sha kun
Isyon qildi ishqning azobi.
Sen turarding dilga o't tashlab,
O'sha joyda, o'shal tamanno.
Yetim sevgim ko'zlarin yoshlab
Menga boqding... Ammo bema'no.
Osmon ezib yig'ladi shu tob,
Quyosh chiqib kuldi ustimdan.
Dilim notinch, tuyg'ular betob
Ko'ngil tonib ketdi ko'ksimdan.
Bir yil oldin, ayni o'sha joy,
O'sha holda meni kutarding.
Unutgansan jonim hoynahoy
O'sha joyda qo'ling tutardim.
Bugun esa turibsan loqayd,
Go'yo asli men bo'lmaganday.
Yonginangdan jim o'tdim hayhot
O'sha joyda sen turmaganday.
Bugun sevgim chin yetim bo'ldi.
So'ngi umid so'ndi ko'nglimda.
Entikmaymam, endi hech bo'ldi
Chiqib qolsang yana yo'limda.
Madad Burxon
Следующая публикация
Комментарии 2